პაველ კლიმკინმა ქვეყნებს შესთავაზა, რუსული გემების პორტებში შესვლა აკრძალონ

უკრაინამ ნატოს მოკავშირეებს შესთავაზა, ქერჩის სრუტეში მომხდარი ინციდენტის გამო, “ცივილიზებულ ქვეყნების” პორტებში რუსული ხომალდებისა და გემების შესვლა აიკრძალოს. ამის შესახებ უკრაინის საგარეო საქმეთა მინისტრმა პაველ კლიმკინმა ბრიუსელში გამართულ ბრიფინგზე განაცხადა,- ინფორმაციას „უკრაინსკაია პრავდა” ავრცელებს.

მისი თქმით, რუსეთის წინააღმდეგ “საუკეთესო სანქცია” გაზსადენ „ჩრდილოეთ ნაკადი -2“-ის პროექტის შეჩერება და  „ცივილიზებული ქვეყნების პორტების გამოყენებით რუსეთის გემების აკრძალვის შესაძლებლობა იქნება”.

ცნობისთვის, 25 ნოემბერს, ოდესიდან მარიუპოლისკენ უკრაინული მცირე ჯავშნიანი კატარღა “Бердянск” და “Никополь”, აგრეთვე ბუქსირი “Яны Капу” მიემართებოდა, როდესაც რუსული სასაზღვრო გემი “Дон” უკრაინულ “Яны Капу”-ს შეეჯახა. დაზიანდა ორივე ხომალდი. როდესაც უკრაინულმა გემებმა ქერჩის სრუტისკენ დაიწყეს მოძრაობა, რუსული გემები მათ გაჰყვნენ, ცეცხლი გაუხსნეს და უკრაინული ხომალდები დააკავეს.

გავრცელებული ინფორმაციით, დაშავებულია 6 ადამიანი, მათ შორის ორი დაჭრილია. რუსული მხარე უკრაინის ქმედებებს პროვოკაციულს უწოდებს.

აზოვის ზღვაში განვითარებული მოვლენების გამო, უკრაინის პრეზიდენტმა პეტრო პოროშენკომ ქვეყანაში საომარი მდგომარეობა გამოაცხადა. გადაწყვეტილების თანახმად, საომარი მდგომარეობა 2018 წლის 26 ნოემბრიდან – 2019 წლის 25 იანვრამდე იქნება ძალაში.

სტატიის ავტორი თაკო ჩხაიძე
მსგავსი სიახლეები
კომენტარები
იტვირთება...