პაატა იმნაძე: “სინოფარმის” აცრაზე ყველა ადგილი დაჯავშნილია, ხალხი ნელ-ნელა რწმუნდება, რომ ვაქციანაციას ალტერნატივა არ აქვს

ჩვენთან სიტუაცია სახარბიელო ნამდვილად არ არის და ჯერჯერობით, ისევ მატებაში ვართ, – ამის შესახებ დაავადებათა კონტროლის ეროვნული ცენტრის დირექტორის მოადგილემ, პაატა იმნაძემ საქართველოს პირველი არხის გადაცემაში „თავისუფალი ხედვა“ განაცხადა.

„ერთი პლუსი ის არის, რომ ეს მატება ნახტომისებური არ არის და გაორმაგებები ყოველ მეორე კვირას არ გვაქვს, როგორც შარშან ნოემბერში გვქონდა. მაისის პირველი ნახევარი ასე თუ გავიარეთ, შეგვიძლია, ფრთხილი ოპტიმიზმით ვთქვათ, რომ ზაფხულს მეტ-ნაკლებად, ნორმალურად შევხვდებით“, – განაცხადა იმნაძემ.

პაატა იმნაძის თქმით, ვაქცინაციის ამ ტემპით იმის მოლოდინი არ არის, რომ საქართველოს ისრაელის შედეგები ექნება ან აშშ-ის და დიდი ბრიტანეთის, რომლებმაც მოსახლეობის ნახევარი უკვე აცრეს, მაგრამ როდესაც დღეს ადამიანები იცრებიან, ეს იმას ნიშნავს, რომ ისინი დაცული იქნებიან მძიმე დაავადებისგან.

„მონაცემები ოპტიმიზმის საშუალებას გვაძლევს. 45 000-ზე მეტი ადამიანი აიცრა და ვხედავთ, რომ თბილისში, „სინოფარმის“ აცრაზე, თვის მეორე ნახევრის ჩათვლით, პრაქტიკულად, ყველა ადგილი დაჯავშნილია. ჩვენი ხალხი ნელ-ნელა რწმუნდება იმაში, რომ ვაქციანაციას ალტერნატივა არ აქვს, რაც ძალიან კარგი და სასიხარულოა. ჩვენ თუ გვინდა, ვიცხოვროთ ჩვენი წესებით და არა კოვიდის წესებით, ვაქცინაცია აუცილებელია“, – განაცხადა იმნაძემ.

მსგავსი სიახლეები
კომენტარები
იტვირთება...