“ოპოზიციამ დამაიგნორა… თუ გულწრფელად ეძებენ საერთო კანდიდატს, აგერ ვარ” – ინტერვიუ ანა დოლიძესთან

იმის მიუხედავად სასამართლო რეფორმა შარლ მიშელის შეთანხმებაში ჩაიწერა, უვადო მოსამართლეების დანიშვნა მაინც არ ჩერდება. იუსტიციის საბჭომ უზენაესის კანდიდატები შეარჩია და პარლამენტს გადაუგზავნა. პარლამენტიც არ აჩერებს პროცესს. იმის მიუხედავად, რომ ამას ითხოვს ოპოზიცია და არასამთავრობო სექტორი. უფრო მეტიც ხელისუფლებას ჯერ ამერიკისა და ევროკავშირის ელჩებმა მიმართეს წერილით, გუშინ კი კიდევ უფრო კატეგორიული იყო ამერიკის საელჩო თავის განცხადებაში.

სასამართლოს თემისა და სხვა აქტუალური საკითხების შესახებ „აიპრესთან“ ინტერვიუში მოძრაობა „ხალხისთვის“ ლიდერი ანა დოლიძე საუბრობს:

_ ვხედავთ, რომ არ ჩერდება მოსამართლეების გამწესება უზენაესში. ეს იმ ფონზე, როდესაც მიღებულია შარლ მიშელის დოკუმენტი და ვიცით, რომ დასავლეთისთვის მართლმსაჯულება არის წითელი ხაზი, ისევე როგორც ჩვენ საზოგადოებასაც აღელვებს ეს საკითხი, მაგრამ „ოცნება“ მაინც ამ გზით მიდის. რას ნიშნავს „ოცნების“ ეს ქმედება თქვენთვის?

_ გეტყვით იმას, რატომ აკეთებენ ახლა ამას. იმიტომ, რომ შესაძლოა ძალაუფლება დაკარგონ, თვითმმართველობის არჩევნებიდან ერთი წელი იქნება დარჩენილი სავარაუდოდ, ამიტომ რა ვაკანსიებიც იყო დარჩენილი უზენაესში ყველაფერს ბოლომდე იმტკიცებენ. ანუ, ეს არის განპირობებული ძალაუფლების დაკარგვის შიშით.

მეორე თემაა, რაც გააკეთეს გენდერულ კვოტებზე. „ოცნების“ ხელწერაა ის, რომ ყველაფერზე დათანხმდებიან, ოღონდ დააშოშმინონ უკმაყოფილება. მოგვიანებით შეცვლიან. არავითარი სანდოობა ამ ჯგუფს არ უნდა დარჩეს. ასე გააკეთეს პროპორციულ არჩევნებზე, გენდერულ კვოტებზე და ახლაც ასე გააკეთეს – მოსამართლეებზე. ვითომ მოუსმინეს ვენეციის კომისიას, მაშინ რომ არ შეავსეს ეს ვაკანსიები, მაგრამ მომენტი რომ ჩაიგდეს ხელში ესეც შეასრულეს. ეს არის ანტიდასავლური პარტია. იმიტომ, რომ ყველაფერს აკეთებენ იმისათვის, რომ ევროკავშირს არ დავუახლოვდეთ, მიუხედავად მათი გაცხადებული პოლიტიკისა.

_ ვნახეთ, რომ წერილით მიმართეს ამერიკისა და ევროკავშირის ელჩებმა ხელისუფლებას და გუშინაც გაავრცელა ძალიან მწვავე წერილი ამერიკის საელჩომ. ასე უნდა გავიგოთ, რომ ამ ფონზე მაინც ამ გზას ირჩევენ, თუ გამოსავალს ეძებენ?

_ ნახეთ როგორ არის? – სასწორის პინაზე დევს ის, რისიც ყველაზე მეტად ეშინიათ. ეს არის ძალაუფლების დაკარგვა და ფიქრობენ იმაზე, რა შეიძლება მოხდეს ძალაუფლების დაკარგვის შემდეგ. ამ შიშის ფონზე საერთოდ ჩირის ფასი აქვს იმ დაპირებას, რასაც გასცემენ. ახლოვდება არჩევნები, ახლა იწყება კამპანია და თუ 43% ვერ მოაგროვეს, ისეთი ვითარება იქნება „ოცნებაში“, როგორც საქართველოში იტყვიან დედა შვილს არ აიყვანს ხელში. ამ ვითარებაში მათთვის ძალიან მნიშვნელოვანია, რომ რა ვაკანსიებიც დარჩა, ის უნდა განიმტკიცონ. ამით არის განპირობებული მათი ქმედებები.

მე ვცდილობ ავუხსნა ჩვენ უცხოელ პარტნიორებს, რომ ყველა დაპირება, რასაც ესენი გასცემენ ხოლმე, არ ასრულებენ. ეს არის თაღლითური პარტია, რომელსაც არ აინტერესებს არაფერი – საერთაშორისო ურთიერთობებში რამდენი რამეა დეპუტაციაზე, მაგრამ არ აინტერესებთ და შესაბამისად ჩვენმა პარტნიორებმაც ასე უნდა იურთიერთონ მათთან.

_ ანუ, მათთვის ძალაუფლების დაკარგვის შიში უფრო მნიშვნელოვანია, ვიდრე მათი სიტყვის ფასი? სახელმწიფოებრიობაზე რომ აღარაფერი ვთქვათ.

_ კი, ასეა და იცით რატომ? იმიტომ, რომ ეს არის ძალიან კორუმპირებული ხელისუფლება. ძალაუფლების დაკარგვა მათთვის მარტო ის კი არ არის, რომ 2 000 ლარიანი ხელფასი უნდა დაკარგოს რომელიღაცა ქალაქის მერმა, არა! ესენი ძალაუფლების დაკარგვით კარგავენ ცხოვრების მთელ სტილს, რომელსაც ეღირსნენ ცხოვრებაში. რატომ სჭირდებათ სასამართლო? – იმიტომ, რომ პასუხისმგებლობის თემა არ დადგეს. ხელისუფლების ცვლილების შემთხვევაში ვიღაცამ არ მოიფიქროს დაუსაბუთებელი ქონების ჩამორთმევა ან არ დადგეს მათი კორუფციული საქმეების ანგარიშგების დრო. ამიტომ ეშინიათ ძალაუფლების დაკარგვის. მარტო სახელმწიფო სამსახური და ხელფასი რომ იყოს მაშინაც იქნებოდა ბევრისთვის პრობლემა, მაგრამ ბევრისთვის არ იქნებოდა.

ისეთი ცხოვრების სტილს ეღირსნენ ესენი… ჯერ მარტო საათებზე და მანქანებზე სიუჟეტებს თუ გავიხსენებთ, ესეც საკმარისია.

_ ოპოზიცია რამდენად თანმიმდევრულია ამ პროცესში? მოვისმინეთ მათი განცხადებები, რომ დავტოვებთ პარლამენტს და ა. შ. რამდენად სწორია ეს?

_ ეს არ ვიცი, მაგრამ კიდევ ერთხელ მინდა გავიმეორო – „ნაციონალურმა მოძრაობამ“ სასამართლოს თემას თავი უნდა გაანებოს. ძალით აშარჟებენ ამ თემას თავისი მონაწილეობის გამო.

_ გასაგებია, რომ წარსულში ჰქონდათ გადაცდომები, მაგრამ ხომ შეიძლება გაიაზრეს ეს და ხომ აქვთ უფლება ჰქონდეთ პროტესტი დღევანდელობაზე?

_ ნახეთ, როდესაც „ნაციონალური მოძრაობის“ წარმომადგენელი გამოდის და ამბობს, რომ გული შესტკივა მურუსიძე-ჩინჩალაძის კლანზე, მაშინ სულ მცირე იცით რა უნდა გააკეთოს? – გამოვიდეს და მოყვეს, როგორ შედგა ეს კლანი და როგორ მუშაობს ის. ყველაზე კარგად მაგათ იციან, როგორ ფუნქციონირებს ეს კლანი. ცოტა სასაცილოა, ესენი არიან ავტორები ამ სისტემის. ათასი სხვა საკითხია, რაზეც შეუძლია „ნაციონალურ მოძრაობას“ ილაპარაკოს, სადაც გამოუვიდათ რეფორმები, მაგრამ ცინიკურად რომ ვთქვათ, სასამართლო და ადამიანის უფლებები მათი ძლიერი მხარე არ არის.

_ თქვენ აქტიური ხართ პენსიონერთა უფლებებზე და აკრიტიკებთ „ლიბერთი ბანკს“ სესხებზე მაღალი პროცენტის გამო. გამოვიდნენ ბანკის წარმომადგენლები რაღაც ინიციატივით და გარკვეული დათმობა ჩანს მათი მხრიდან. მოგეწონათ იდეა?

_ გუშინ გავიგე, რომ რაღაცა შემოთავაზებაა, ისიც კულუარული პროცესით. ალეკო ელისაშვილის მეშვეობით გამოსცა „ლიბერთი ბანკმა“. მე არ მესმის, რატომ არის ეს კულუარული პროცესი და რატომ არ არის საჯარო, რომ ჩვენ გავიგოთ. „ყვავს კაკალი გააგდებინე“ პრინციპით არის. მაგრამ იქ წერია, რომ თუ პენსიონერს თავდებში ჩაუდგება ოჯახის წევრი, მას შესთავაზებენ უკეთეს პროცენტს. ეს არის ჩვეულებრივი სესხი, რომლის აღებაც ისედაც შეუძლია პენსიონერს. აქ საუბარია საპენსიო სესხზე, რომელსაც აქვს 36%. თუ მას ოჯახის წევრი ჰყავს დასაქმებული და ის ჩაუდგება თავდებში, ისედაც აიღებს სესხს და რაში სჭირდება „ლიბერთი ბანკი“?! ამიტომ, მისი ეს ქცევა თავიდან ბოლომდე პიარია, რომელზეც არ უნდა მოვტყუვდეთ და რეალური, ხელშესახები ცვლილებებია საჭირო სოციალურ სესხებზე ზოგადად. იმიტომ, რომ შშმ პირებსაც აძლევენ მაგხელა პროცენტის სესხებს და ვეტერანებსაც და დევნილებსაც. ანუ, საბრძოლველი დემონოპოლიზაციის მიმართულებით „ლიბერთი ბანკთან“ დაკავშირებით რჩება.

_ ანუ, საკენკი გადმოაგდეს?

_ ზუსტად, რომ საკენკი გადმოაგდეს.

_ რაც შეეხება თქვენ პოლიტიკურ აქტოვობას, ამაზე რას გვეტყვით? შესთავაზეთ თქვენი კანდიდატურა. ოპოზიციამ დაგიწუნათ და რა ხდება ამ მიმართულებით?

_ ოპოზიციამ დამაიგნორა, კი არ დამიწუნა, რაც ფაქტობრივად დაწუნებაა. საქმე იმაშია, რომ რა კანდიდატურასაც ისინი ეძებენ, მე მგონი აგერ ვარ მე და მე მგონი ყველა იმ კრიტერიუმს ვაკმაყოფილებ, რასაც ეძებენ, თუ ეს ძებნა გულწრფელია. ამის შემდეგ იტყვიან, ვეძებეთ, არ გამოგვივიდა ერთიანი კანდიდატიო და მიტომ, ჩვენი პარტიის კანდიდატი ჩვენვე უნდა დავასახელოთო. მაშინ სწორედ მანდ გავუსვამ ხაზს, რამდენად გულწრფელი იყო ეს იდეა, რომ საერთო კანდიდატს ეძებენ. აგერ არის პროფილი ადამიანისა, რომელსაც არ შეშინებია არც წინა ხელისუფლების და არც ახლანდელის, არც მომავალში ანგარიშს არ გაუწევს არც მათ და არც დიდ კორპორატიულ ინტერესებს. პლუს ამისა, ქალი ვარ, რაც ამომრჩევლის თვალსაზრისით არის მნიშვნელოვანი და ა. შ. საინტერესოა მათი მოსაზრება. არც კი მომისმენია, უბრალოდ გადაწყვიტეს, რომ დამაიგნორონ. მარტივი გამოსავალი იპოვეს.

_ გამოხმაურება თუ ისევ არ იქნება ოპოზიციის მხრიდან, იყრით კენჭს დამოუკიდებელ კანდიდატად?

_ კი, ვფიქრობ ამაზე. ჩვენ გვაქვს მსჯელობა ამასთან დაკავშირებით. რთული საორგანიზაციო სამუშაოა, მაგრამ ჩემი მხარდამჭერები ფიქრობენ, რომ აუცილებელია. გვექნება შიდა კონსულტაცია და კალენდარი რომ მოახლოვდება, მაგას გადავწყვეტთ.

ავტორი: იაგო ნაცვლიშვილი

კომენტარები
იტვირთება...