A1 ბანერი

“ოპონენტების ხელოვნურ აჟიოტაჟზე დროს ვერ დავკარგავ, ანგარიშს ჩავაბარებ მოსახლეობას!” – ინტერვიუ თორნიკე რიჟვაძესთან

„არაერთგზის მითქვამს და ახლაც გავიმეორებ, რომ ჯანსაღი ოპონირება ძალიან მნიშვნელოვანია ნებისმიერი ხელისუფლებისთვის. არამცთუ მნიშვნელოვანი, აუცილებელიც კი, მაგრამ რასაც აქ „ნაცმოძრაობის“ წარმომადგენლები აკეთებენ, ამას არ ჰქვია ოპონირება. მაგათ ჰქონდათ ძალიან მარტივი ტაქტიკა. წლების განმავლობაში ცდილობდნენ ყველა მასშტაბური და მსხვილი პროექტის დაკნინებას და ნიველირებას საზოგადოებაში. მათ შორის „ოცნების ქალაქთან“ დაკავშირებით  მიღებული გადაწყვეტილების დაკნინებას,  მაგრამ რა თქმა უნდა, ჩემი მთავრობის პირობებში ეს მათ არ გამოუვათ, ამის პირობას ვაძლევთ!“ – აცხადებს „აიპრესთან“ ინტერვიუში აჭარის მთავრობის თავმჯდომარე, თორნიკე რიჟვაძე.

პირველ კითხვას სოციალურ მდგომარეობაზე დაგისვამთ: მიუხედავად იმისა რომ აჭარის ავტონომიური რესპუბლიკა ტურისტული ზონაა და დასაქმების, თუნდაც თვითდასაქმების თვალსაზრისით მეტის საშუალებას იძლევა, ვიდრე სხვა რეგიონები, პრობლემები მაინც მრავლადაა. განსაკუთრებით სოციალური.

ამ  მდგომარეობის გამოსასწორებლად წელს რა პროექტები გაქვთ დაგეგმილი? თუნდაც საკმაოდ გაპიარებული „ოცნების ქალაქი“ რას შეუცვლის ადამიანებს?

ე.წ მუყაოს ქალაქის პრობლემა იყო ყველაზე დიდი სოციალური პრობლემა აჭარაში. ზოგადად, ამ პრობლემის გამომწვევი მიზეზები არის საკმაოდ ღრმა, თუმცა მოცემულობა რაც მე და ჩემს მთავრობას დაგვხვდა,  საკმაოდ კრიტიკული იყო. დაახლოებით ათასი ბავშვი ცხოვრობს იმ დასახლებაში და ყოფითი და ჰიგიენის პრობლემები აქვს იმ ოჯახებს.  სწორედ ამიტომ, საქართველოს მთავრობასთან  და პრემიერთან კონსულტაციის შედეგად, მივიღეთ გადაწყვეტილება მოგვეგვარებინა აღნიშნული საკითხი. ეს იქნება ერთ-ერთი ის გადაწყვეტილება, რომელიც აჭარის რეგიონში შეძლებს სოციალური ფონის გაუმჯობესებას.

იქ ჩასახლებული ოჯახები  აჭარის სხვადასხვა მუნიციპალიტეტიდანაა და მათ საცხოვრისებით უზრუნველყოფა გამოიწვევს  ავტომატურად მათი ოჯახების მდგომარეობის გაუმჯობესებას.

რაც შეეხება სხვა სოციალურ პროექტებს, ბუნებრივია გაგრძელდება ეკომიგრანტებთან დაკავშირებით ეტაპობრივი დახმარება. ბიოლოგიური პროცესები მაღალმთიან აჭარაში საკმაოდ ინტენსიურია და ბუნებრივია, ძალიან პრაქტიკულად მოვახდენთ ამ ყველაფერზე რეაგირებას.

ყველა ის ეკონომიკური პროექტი და მაღალმთიან აჭარაში ტურიზმის განვითარებასთან დაკავშირებით ინკლუზიური ეკონომიკის ხედვა  ემსახურება სწორედ იმას, რომ მთაშივე შევძლოთ შესაძლებლობების შექმნა ადამიანებისთვის.  იმ პირველადი სოციალური პრობლემების მოგვარების შემდეგ, უკვე ამ ეკონომიკური შესაძლებლობებიდან გამომდინარე მაქსიმალურად შევძლოთ მოსახლეობას მივცეთ შემოსავლის წყარო მთაში.

უკვე მიღებულია გადაწყვეტილება, დაიგეგმა და გრაფიკის მიხედვით მივდივართ. ეს იქნება კრიზისის მოგვარების  ერთ-ერთი ყველაზე წარმატებული გადაწყვეტილება.

ხედვები გასაგებია, მაგრამ კონკრეტულად რა კეთდება ისეთი, რასაც ადამიანი საკუთარ თავსა და მდგომარეობაზე იგრძნობს?

მაღალმთიან აჭარაში ვაპირებთ წელს და მომდევნო წელს განვახორციელოთ ძირეული ინფრასტრუქტურული პროექტები, ეს იქნება როგორც წყალმომარაგების კუთხით, ასევე დაბების რეაბილიტაციის პროექტი. საბოლოოდ ეს მისცემს მაღალმთიან აჭარას როგორც გაუმჯობესებულ ინფრასტრუქტურას, ასევე დამატებით შემოსავალს ტურიზმის თვალსაზრისით.

მაღალმთიანი აჭარა  მცირემიწიანია და ამიტომ საჭიროა ტურიზმთან ბმაში მოხდეს სოფლის მეურნეობის და ასევე სხვა დარგების განხილვა და შემოსავლის შექმნა იქ მაცხოვრებლებისთვის. განსაკუთრებით მნიშვნელოვანი იქნება ხულო-გოდერძის გზის დაწყება და ჩვენ ძალიან აქტიურად  ვმუშაობთ ამ საკითხზე. იმედი გვაქვს, რომ ძალიან მალე შევძლებთ ამ გზის დაწყებას.

1985 წლიდან, პრაქტიკულად ამ მასშტაბის  ინფრასტრუქტურული პროექტი მაღალმთიან აჭარაში არ განხორციელებულა და ბუნებრივია, ყურადღება როგორც მთავრობის, ასევე მოსახლეობის მოლოდინების თვალსაზრისით, ძალიან დიდია.

ამავე დროს, გოდერძი ძალიან აქტიურად ვითარდება. წელს უკვე ჩვენ დავიწყებთ  გაზიფიცირების მეორე ეტაპს და მთლიანად შევკრავთ წრედს, რომელიც უზრუნველყოფს აჭარაში გაზიფიცირების პროცესის დასრულებას. განსაკუთრებით მახარებს, რომ მაღალმთიან აჭარაში უკვე მოხდება გაზიფიცირება ინდივიდუალურ დონეზე. პირველი ეტაპი ჩვენ დავასრულეთ შარშან და მეორე ეტაპი წელს დასრულდება.

ხომ არ აპირებთ  მაღალმთიანი აჭარის მოსახლეობას ხელი შეუწყოთ  საოჯახო ტიპის სასტუმროების მოწყობაში, რაც  ძალიან მნიშვნელოვანია სწორედ ტურიზმის განვითარებისთვის. საუბარი მაქვს შეღავათიან სესხზე ან კრედიტზე.

ჩვენი ხედვა არის შემდეგი: სახელმწიფო უზრუნველყოფს ძირითად ინფრასტრუქტურას. როცა მიდის გზა, კომუნიკაციები, გაზიფიცირება, ეს უკვე უზრუნველყოფს ბიზნესის სტიმულირებას და კომერციული საწყისების შექმნის შესაძლებლობას. დონორ ორგანიზაციებთან ჩვენ გვაქვს ახლა კონსულტაცია და ვაპირებთ როგორც საოჯახო ბიზნესების, ასევე ფერმერული მეურნეობების კუთხით  ხელშეწყობას. გვსურს გამოიყოს გრანტები, შეღავათიანი კრედიტები, რომელიც მისცემს შესაძლებლობას ჩვენს მოსახლეობას განსაკუთრებით კი ახალგაზრდებს ჩაერთონ ეკონომიკურ აქტივობაში. თითოეულ ოჯახში გაჩნდეს დამატებითი შემოსავალი.

2 წლის პერიოდში გვინდა რომ სამუშაო ადგილების შექმნის თვალსაზრისით იყოს უპრეცედენტოდ მაღალი მონაცემები.

„ოცნების ქალაქის“ თემას ამოვწურავ, რადგან ეს საკითხი ბევრს აწუხებს და აინტერესებს. „ოცნების ქალაქში“ მაცხოვრებლების გარკვეულ ნაწილს აღმოაჩნდა დარეგისტრირებული მიწები, ფართები, საცხოვრებელი ადგილები. მათი ბედი როგორი იქნება? მაინც მიიღებენ ისინი აქ  საცხოვრებელს თუ სხვანაირად გადაწყდება ეს საკითხი?

ზოგადად, გადაწყვეტილების გამოცხადებისთანავე,  ჩვენ ვთქვით რომ ეს, რა თქმა უნდა, არის პოლიტიკური გადაწყვეტილება იმ თანმხვედრი რეალობიდან გამომდინარე, რაც იქ გვქონდა. ასევე ვთქვით, რომ  ეს მიღებული გადაწყვეტილება და ზოგადად  კრიტერიუმები უნდა იყოს იმგვარად და იმდენად ობიექტური, რომ უსამართლობის განცდა არავის არ დარჩეს.

რაც შეეხება განაწილების კრიტერიუმებს, დღეის მდგომარეობით 600 განაცხადია შემოსული. ამ 600 ადამიანის განაცხადის დამუშავება მოხდება, აბსოლუტურად ბოლომდე გავერკვევით  თითოეული ოჯახის სოციალურ-ეკონომიკურ მდგომარეობაში და ძალიან მალე კრიტერიუმებს და პრიორიტეტულ ჯგუფებს, რა თქმა უნდა გამოვაცხადებთ.

ისე არ მოხდება, რომ უქონელს და საცხოვრისის გარეშე მყოფს მიაკლდეს რაიმე ამ პროექტით. მერწმუნეთ, ისე ნამდვილად არ იქნება, როგორც ამას ოპონენტები კაბინეტებიდან ხატავენ.

ოპონენტები ახსენეთ არაერთგზის… ამბობთ რომ ისინი მხოლოდ კაბინეტებიდან საუბრობენ მაღალფარდოვანი სიტყვებით. ოპონენტების თქმით კი, წინა ხელისუფლების შემდეგ აჭარაში სრული უძრაობაა და არ ვითარდება არც ტურიზმი, არც საინვესტიციო გარემო, არც ეკონომიკა…

რას უპასუხებდით ამასთან დაკავშირებით და უფრო კონკრეტულად რომ ვთქვათ, საინვესტიციო პროექტების თვალსაზრისით, რა ხდება აჭარაში?

მე არაერთგზის მაქვს ნათქვამი და ახლაც გავიმეორებ,  რომ მაგათ ჰქონდათ ძალიან მარტივი ტაქტიკა. წლების განმავლობაში ცდილობდნენ ყველა მასშტაბური და მსხვილი პროექტის დაკნინებას და ნიველირებას საზოგადოებაში. მათ შორის „ოცნების ქალაქთან“ დაკავშირებით  მიღებული გადაწყვეტილების დაკნინებას,  მაგრამ რა თქმა უნდა, ჩემი მთავრობის პირობებში ეს მათ არ გამოუვათ, ამის პირობას ვაძლევთ!

ის რომ აჭარას ყოველწლიურად აქვს 15-16 %-იანი ზრდა ტურიზმის მიმართულებით, ეს მშვენივრად იციან მათ.  ახლახანს ვიყავი ესტონეთში, საიდანაც დავნიშნეთ პირდაპირი ჩარტერული რეისები ზაფხულში და ეს იქნება პირველი შემთხვევა, როდესაც ევროპის ერთ-ერთი მნიშვნელოვანი დედაქალაქიდან   ბათუმში განხორციელდება ფრენები. რამდენიმე ევროპულ ქვეყანასთან კიდევ გვაქვს მიმდინარე მოლაპარაკებები.

დარწმუნებული ვარ, ძალიან ბევრ  როგორც ევროპულ ინვესტიციას ასევე ტურისტს ჩამოვიყვანთ ბათუმსა და მთლიანად აჭარაში.

ის პროექტები რომელიც წეღან ვახსენე, თუნდაც გოდერძზე  დაახლოებით  150 მილიონიანი პორტფელიოა და რაც განსაკუთრებით მახარებს, ეს არის კერძო კაპიტალი, რაც იმას ნიშნავს, რომ  ინვესტორების ნდობა არის მაღალი.

ავიღოთ თუნდაც ის ინფრასტრუქტურული პროექტები, რასაც საჯარო ფინანსებით ვახორციელებთ: მაგალითად სტადიონი, რომელიც სხვათა შორის „ნაცმოძრაობამ“ დაანგრია თავის დროზე, წელს თითქმის ბოლომდე მივიყვანთ მშენებარე ობიექტს. ეს იქნება  უეფას მეოთხე კატეგორიის სტადიონი. ბათუმში ძალიან ბევრი ფეხბურთის მოყვარულია და დარწმუნებული ვარ, ძალიან გაახარებს ეს ამბავი. .

თუმცაღა, ფაქტია ისიც, რომ ეს პროექტი ძალიან გაიწელა…

სამწუხაროდ ბევრი  „ჩაწოლილი“ პრობლემა იყო. ძალიან ბევრი გაჩერებული და გაჭედილი პროექტი. ჩვენ ოპონენტების ხელოვნურ აჟიოტაჟზე არ ვაპირებთ დროის კარგვას, ჩვენ საქმით ვუპასუხებთ მაგათ და როცა ამბობენ დაპაუზებულ აჭარას, ეს იმიტომ, რომ დავაპაუზეთ ისინი პოლიტიკურად. ამიტომ არიან ისინი ყველაზე მეტად განაწყენებული, მე ეს კარგად ვიცი.

ყველა ის პროექტი, რომელიც ამ წელს გვქონდა დაგეგმილი, წარმატებით გავა ბოლომდე და მე ანგარიშს ჩავაბარებ მოსახლეობას და არა ჩასაფრებულ ოპონენტებს.   მომავალი წლიდან ბულვარის გაგრძელებასთან დაკავშირებით  იქნება ძალიან მნიშვნელოვანი გადაწყვეტილება. უკვე ვესაუბრებით საერთაშორისო საფინანსო ორგანიზაციებს და საქართველოს მთავრობამ მხარი დაგვიჭირა. მოხდება ბულვარის სარფამდე დაგრძელება და გაკეთდება გონიოს ხიდი. ყველა ის პროექტი, რომელიც სხვადასხვა სუბიექტური თუ ობიექტური მიზეზების გამო  გაჩერებული იყო, რა თქმა უნდა, დაიძვრება.

ჩვენ გვაქვს ძალიან სპეციალური მიდგომები.  ყველა მუნიციპალიტეტის დონეზე ვიცით სად რა უნდა გაკეთდეს, რომ ხალხმა უკეთ იცხოვროს.

მერწმუნეთ, ამის 10% რომ გაეკეთებინა წინა ხელისუფლებას, ტელევიზიიდან არ ჩამოვიდოდნენ ამაზე სასაუბროდ.

ამბობთ, ყველა მუნიციპალიტეტის დონეზე ვიცით რა უნდა გაკეთდესო. რის გაკეთებას აპირებთ ქობულეთში, რომელსაც აქვს უდიდესი პოტენციალი ტურისტული თვალსაზრისით და რომელსაც ყველა ხელისუფლება აყვავებას ჰპირდება, მაგრამ შედეგი არ ჩანს.

2 წლის განმავლობაში დაახლოებით  ნახევარი მილიარდის ახალი პროექტებს დავიწყებთ ქობულეთში და 5 დან 7 წლამდე ეს ციფრები უნდა გაორმაგდეს.

მოკლევადიან პერიოდში რომელი პროექტი დაიწყება? ვთქვათ რომელიც უცებ დაეტყობა იქაურობას?

ამას ჯერ საიდუმლოდ შევინახავ და რამდენიმე კვირაში დაგპატიჟებთ, როცა უკვე დავაანონსებთ.

აუცილებლად უნდა გკითხოთ ბათუმისთვის ერთ-ერთ ძალიან  პრობლემატურ საკითხზე, ეს არის ქალაქის გენგეგმა. ქალაქის გენგეგმა ზოგადად რთული საკითხია, თბილისშიც დიდი დებატებისა და დაპირისპირების ფონზე მიმდინარეობდა მისი შემუშავება.

როგორია თქვენი კონცეფცია გენგეგმასთან დაკავშირებით და საბოლოო ჯამში, რა ბედი ელის იმ მართლაც უსაშინლეს შენობებს, რომლის გამოც ბათუმის ზოგიერთი უბანი არაფერს აღარ ჰგავს?

რომ გითხრათ, რომ მეც ყველაფერი მომწონს ურბანული განვითარების და განაშენიანების კუთხით, მოგატყუებთ. მეც ბევრი რამე არ მომწონს და შეიძლება ზოგიერთი გადაწყვეტილების წინააღმდეგ ვიყო განწყობილი, მაგრამ ეს თვითმმართველობის და მერიის საკითხია. აჭარის მთავრობის თავმჯდომარეს აქ ძალიან მინიმალური როლი აკისრია, თუმცა როგორც პოლიტიკურ ხელმძღვანელს, რა თქმა უნდა, ბათუმი და მისი ურბანული განვითარება მეც მეხება.

ძალიან მალე, ჩემი ინფორმაციით, ბათუმის მერია გენგემაზე ტენდერს გამოაცხადებს. ამ პროცესს სჭირდება როგორც სამოქალაქო სექტორის, ასევე პროფესიონალი არქიტექტორების და მშენებლების ჩართულობა.

ქალაქში, სამწუხაროდ, დღემდე არის ძალიან ბევრი პრობლემა, მათ შორის ავარიული ბარაკული დასახლებები, რომელიც უდავოდ მოსაწესრიგებელია.

და რა ბედი ელის იმ დაუმთავრებელ შენობებს, რომელიც არ დამთავრდა  არასდროს?

ჩვენ უნდა შევძლოთ სამართლიანი ბალანსის შემოღება ერთის მხრივ, ქალაქის ისტორიულ-კულტურული მემკვიდრეობასა და მეორეს მხრივ, ურბანული განვითარების ინტერესს  შორის. ადამიანებს რომლებიც ბარაკებში ცხოვრობენ, აუცილებლად სჭირდება ყურადღება. მაგრამ, ამავე დროს, მათი ცხოვრების პირობების გაუმჯობესება არ უნდა მოხდეს ისტორიულ-კულტურული მემკვიდრეობების ხარჯზე.

ამ გაურკვეველი წარმოშობის მშენებლობებზე თქვენსა და ბათუმის საზოგადოების ერთ ნაწილს შორის მწვავე კამათი გაიმართა. მაშინ ასეთი ფრაზა თქვით: ყველაფერი გაკეთდება ისე, როგორც საჭიროა და არა ისე როგორც ადრე იყო, როდესაც ეს სფერო ნარკობიზნესს ჰქონდა ხელში ჩაგდებული. ვის გულისხმობდით ნარკობიზნესმენებში?

არის გარკვეული ადამიანების ჯგუფი, რომელიც ცდილობდა ხელი მოეთბო ამ ისტორიულ-კულტურული მემკვიდრეობით და ზოგადად სამშენებლო პროექტებზე მათი ხმის მონაცვლეობით…  რა თქმა უნდა, მე ამას არ დავუშვებ!

ხელისუფლებაში იყვნენ ეს ადამიანები? რასაც თქვენ ამბობთ, იმის გაკეთება მხოლოდ გადაწყვეტილების მიმღებ პირებს შეუძლიათ და არა რიგით მშენებელს…

არა, რატომ? საბჭოებში წარმოდგენილები არიან არა მარტო თანამდებობის პირები, არამედ სხვა ადამიანებიც, რომლებიც, მათი თქმით, სამოქალაქო სექტორს წარმოადგენენ.

ბულვარში  უკანონო მშენებლობების დემონტაჟს აპირებთ. ცხადია, ეს პროცესი  არ ჩაივლის უმტკივნეულოდ რადგან იმ შენობებს მეპატრონეები ჰყავთ და იქ ადამიანები მუშაობენ.

მესმის, მაგრამ ამ უკანონობას ბოლო მოეღება და ქალაქში ყველა უნებართვო ობიექტის დემონტაჟი მოხდება. ისევე, როგორც დავიწყეთ ქუჩების გათავისუფლება უკანონო გარევაჭრობისგან.

უნდა ვთქვა, რომ ბათუმის მერიამ საკმაოდ კარგად და ეფექტურად იმუშავა. მოვაჭრეებს, ჩვენს მოქალაქეებს შევთავაზეთ ალტერნატიული ფართები და საბოლოოდ შეთანხმებას მივაღწიეთ. ვფიქრობ, ეს იყო ერთ-ერთი კარგი პრეცედენტი, როცა საჯარო და კერძო ინტერესების დაბალანსების საფუძველზე ჩვენ ერთის მხრივ შევძელით ამ ადამიანებისთვის მიგვექცია ბოლომდე ყურადღება, მათ გამოეყოთ შესაბამისი სავაჭრო ადგილები და გაუუმჯობესდათ სამუშაო პირობები და ამავე დროს, ქალაქის იერსახეს ტროტუარებს და იქ მაცხოვრებლებს შეუმსუბუქდათ გადაადგილება.  რა თქმა უნდა, ქალაქის იერსახე და სილამაზე  გაუმჯობესდა.

ცხადია, იმ ადამიანებზეც ვღელავ, რომლებიც  თუნდაც უნებართვო ობიექტებში საქმიანობას ეწევიან, მაგრამ ამ შემთხვევაში უპირატესი  ქალაქის და სხვა დანარჩენი მოქალაქეების ინტერესია, ამიტომ ამ მიმართულებით  ბოლომდე პრინციპული და თანმიმდევრული ვიქნები.

ბათუმი ახალციხის დამაკავშირებელი გზის მშენებლობასთან დაკავშირებით არაერთხელ დაანონსდა აჭარის ხელისუფლების მხრიდან. პროექტი საკმაოდ მნიშვნელოვანია, ბევრჯერ გაპიარებული, თუმცა, ამ ეტაპზე ფაქტობრივად შეჩერებულია. როდის აპირებთ ამ საკითხის ბოლომდე მიყვანას?

ჩვენ ვაანონსებთ მხოლოდ იმ შემთხვევაში, როცა გვაქვს კონკრეტული სამოქმედო გეგმა. მე იმედი მაქვს და თითქმის დარწმუნებული ვარ, რომ ამას ძალიან მალე დავაანონსებთ ამ პროექტის შესახებ.

თქვენ პოლიტიკური ფიგურა ბრძანდებით და ცხადია, ვერ ჩაუვლით გვერდს იმ მოვლენებს, რაც ცენტრში  ხდება. როგორ შეაფასებდით „ოცნებაში“ ე. წ  ძველების და ახლების თემას, პარტიის გაყოფა-გამოყოფას  და იმ პროცესებს, რაც ახლა ‘ოცნებაში“ ხდება?

მე მიმაჩნია რომ ეს არის ჯანსაღი პროცესი. როცა ამდენი წელია ხარ ხელისუფლებაში, რა თქმა უნდა, არის პროცესები რომელიც  რაღაც კონკრეტულ დროსა და ვითარებაში თავს იჩენს. მე მგონია, რომ ეს არის პარტიისთვის  გაჯანსაღების და განახლების პროცესი  და დარწმუნებული ვარ, ჩვენი პარტია იქნება ლიდერი შემდეგ არჩევნებზე.

თქვენ ფიქრობთ, რომ 2020 წლის არჩევნებში  ისევ მოხვალთ ხელისუფლებაში? სამი ვადით საქართველოს ხელისუფლება არ ჰყოლია…

მე მჯერა რომ „ქართული ოცნება“ რომლისთვისაც მთავარი ღირებულება ადამიანი და ჩვენი ქვეყნის დემოკრატიული განვითარებაა, არასდროს გადაუხვევს ამ მიმართულებას. დემოკრატიის ის ხარისხი,, რომელიც ჩვენ დავნერგეთ რა თქმა უნდა, ზოგიერთი მოქალაქის თვალში  ზოგჯერ ქმნის სხვადასხვა კრიტიკის საფუძველს. ჩვენ პასუხისმგებლები ვართ მიმდინარე მოვლენებზე, ამიტომ ვთვლი რომ ეს არის განახლების, გაჯანსაღების და პროცესი ამას უახლოესი არჩევნები დაადასტურებს.

რამდენი წლის ბრძანდებით ახლა?

თვის ბოლოს ვხდები 30 წლის.

სულ მინდოდა მეკითხა, როგორ ან რის გამო არ შეუშინდით ამხელა პასუხისმგებლობას? მითუმეტეს როცა საქმე ავტონომიურ რესპუბლიკას ეხება? მოდით, პირდაპირ გკითხავთ, ამხელა პასუხისმგებლობა რამ აგაღებინათ?

პასუხისმგებლობის აღებას ძალიან ადრეული ასაკიდან ვარ მიჩვეული. დაახლოებით 15-16 წლიდან  უკვე დამოუკიდებლად ვაკეთებ ყველაფერს ცხოვრებაში.

მუშაობდით მაგ დროს? 15-16 წლის ასაკში?

დიახ, 16 წლიდან დროებითი სამუშაოები იყო. რაც თავი მახსოვს, სულ ვმუშაობ. მანამდეც, ენერგეტიკაშიც  როცა ვიყავი, მაშინაც ყველაზე ახალგაზრდა საჯარო მოხელე ვიყავი . აჭარის შემთხვევაში ორი მთავარი მომენტია: ეს არის ჩემთვის ძალიან დიდი გამოწვევა პირველ რიგში და მეორე, ყოველ დღე რაც მაძლევს სტიმულს, ეს არის ჩემი კუთხე. ის ცოდნა  და გამოცდილება რაც დავაგროვე, მინდა რომ აქ გამოვიყენო. მე  საკმაოდ პრაგმატული ვარ, ყოველთვის ვიცი რომ არსებობს რაღაც პერიოდი, როცა გაქვს თვითრეალიზების საშუალება კონკრეტულ პოზიციაზე.  რომ არ მოგატყუოთ, 10 და 15 წლიანი გრძელვადიანი გეგმები არ მაქვს.

პოლიტიკაში ყოფნის გეგმაზე საუბრობთ თუ სხვა რამეზე?

ზოგადად ვამბობ. ჩემთვის მთავარია საშუალო ვადიან პერიოდში, რომელიც  დაახლოებთ  2-3 წელია, მაქსიმალურად ამოვწურო ჩემი თავი, გავაკეთო მაქსიმუმი რაც შემიძლია შემდეგ ვეძებო ახალი გამოწვევები. შემდეგ ადგილი ახალგაზრდებს უნდა დაუთმო.

თქვენ რას აკეთებთ რეგიონის  ახალგაზრდობისთვის? ეს საკითხი საკმაოდ პრობლემატურია. ახალგაზრდობას არ აქვს თვითრეალიზაციის საშუალება, ვერ ახერხებენ დასაქმებას…

გეტყვით იმას, რომ ცალკე შევქმენი რეფორმების ჯგუფი და ახალგაზრდული კომპონენტი ცალკე გამოვყავი. დავავალე კომპეტენტურ ადამიანებს, რომ დეტალურად შეისწავლონ ყველა ის საკითხი, რაც ახალგაზრდებს ეხება.  ძალიან მალე შეიქმნება დამოუკიდებელი უწყება, რომელსაც პირადად მინდა გავუწიო კურატორობა.

რა ერქმევა უწყებას?

ეს იქნებან  ახალგაზრდულ საქმეთა დეპარტამენტი, სიპი, ახლა ჩამოვყალიბდებით თვის ბოლომდე. აჭარაში ნამდვილად არის პრობლემა ხარისხიანი განათლება და ამ მიმართულებითაც ვმუშაობთ. მოლაპარაკებებს ვაწარმოებთ და მინდა 2 ან 3 საერთაშორისო უნივერსიტეტი ჩამოვიყვანო წელს. ვნახოთ, ამ ყველაფერზე ვმუშაობთ.

ეს მისცემს საშუალებას რომ  ხარისხიან განათლებაზე წვდომა ჰქონდეთ ახალგაზრდებს მეორე რასაც ვაპირებთ ყველა საჯარო უწყებაში რეორგანიზაციის შემდეგ ვაპირებთ რომ მაქსიმალურად როგორც ახალგაზრდების სტაჟირება იქნება ეს თუ ზოგადად დასაქმება ჰქონდეთ პრიორიტეტი ახალგაზრდებს  და იმედია მათ მშობლებიც არ მიწყენენ ამას.

-ანუ უწყებებში რეორგანიზაციას აპირებთ?

-კი მიმდინარეობს (30:07) სამინისტროებში აპარატში უკვე განვახორციელე და 1/3 ით შევკვეცე ზომა ასე რომ

-აპარატის თქვენი? მთავრობის?

-დიახ,ასე რომ ეს განგრძობადი პროცესია და კიდე გაგრძელდება

 

 

მსგავსი სიახლეები
კომენტარები
იტვირთება...