ნინო ბურჯანაძე: “ოცნება”, არ მინდა სააკაშვილის წისქვილზე დავასხა წყალი! სათქმელი ბევრი მაქვს! (ინტერვიუ)

„ერთიანი საქართველო – დემოკრატიული მოძრაობის“ ლიდერი ნინო ბურჯანაძე ხელისუფლებას მიმართავს, რომ გონს მოეგოს და 8 მარტის შეთანხმება შეასრულოს, წინააღმდეგ შემთხვევაში მას ძალიან ძვირი ფასის გადახდა მოუწევს და კითხვის ნიშნის ქვეშ დადგება მათ შორის დასავლეთიდან პოსტპანდემიურ პერიოდში დახმარების მიღება.

ეს განცხადება ნინო ბურჯანაძემ „აიპრესთან“ ინტერვიუში გააკეთა, რომელმაც ხელისუფლებიდან მის მიმართ გაჟღერებულ ბრალდებასაც უპასუხა, თითქოს მისი პარტია „ნაციონალური მოძრაობის“ პრორუსული სატელიტია. ბურჯანაძე ამბობს, რომ „ოცნება“ ამ წლების მანძილზე „ნაცმოძრაობის“ კლასტერი თავად იყო.

8 მარტის შეთანხმებაზე, საქართველო-უკრაინის ურთიერთობებზე, სააკაშვილის ქართულ პოლიტიკასთან შესაძლო დისტანცირებაზე და სხვა აქტუალურ საკითხებზე ნინო ბურჯანაძე „აიპრესთან“ ინტერვიუში საუბრობს (ინტერვიუ ჩაწერილია ორშაბათს, 11 მაისს, შესაბამისად ბოლო 2 დღეში განვითარებულ პროცესებზე პოლიტიკოსთან არ გვისაუბრია ავტ:).

_ „ქართული ოცნება“ ამტკიცებს, რომ ხელისუფლებისა და ოპოზიციის მოლაპარაკებების დროს კონკრეტული პირების განხილვა არ ყოფილა, მაშინ როდესაც ამაზე მინიშნება გაკეთდა ამერიკის საელჩოს მხრიდანაც და ევროკავშირის საელჩოს მხრიდანაც. რა შეგიძლიათ გვითხრათ ამასთან დაკავშირებით და ხომ არ ხედავთ საფრთხეს, რომ შესაძლოა საარჩევნო ნაწილთან დაკავშირებითაც შეიქმნას საფრთხე?

_ მე დიდი იმედი მინდა ვიქონიო, რომ ხელისუფლება მოვა გონს და შეასრულებს თავის დაპირებებს და იმ შეთანხმებას, რომელიც შედგა. ის, რომ შეთანხმება შედგა, ამაზე ვლაპარაკობთ არა მარტო ჩვენ, არამედ ამაზე ლაპარაკობს ის განცხადებებიც, რომელიც ოქრუაშვილის  სასამართლო პროცესის მეორე დღესვე გააკეთეს ამერიკის და ევროკავშირის ელჩებმა. გარდა ამისა, ამ შეხვედრის შემდეგ ქალბატონმა ინაშვილმა ხაზგასმით აღნიშნა, რომ ის მხარს არ უჭერს ამ შეთანხმების იმ ნაწილს, რომელიც ეხება პოლიტიკურ პატიმრებს, ხოლო საარჩევნო ნაწილს ის ეთანხმებოდა და მოაწერა კიდეც ხელი. ეს ნიშნავს, რომ არსებობდა შეთანხმება.

ჩვენ წავედით იმ ნაბიჯზე, რომ არ ჩაგვეყენებინა ხელისუფლება უხერხულ მდგომარეობაში. ეს იყო ელჩების თხოვნაც, რომ პროცესს უფრო ჯანსაღი სახე მიეღო. ჩვენ არ აგვიტეხია ზარ-ზეიმი, რომ ხელისუფლება კედელთან მივაყენეთ, დავათმობინეთ და ა. შ. ჩვენ ძალიან დელიკატურად ვსაუბრობდით ამ შეთანხმებაზე.

_ გქონდათ გამოცდილება, როდესაც უკან წაიღეს საარჩევნო საკითხებზე დაპირებები და ჩააგდეს საკონსტიტუციო ცვლილებები. როდესაც პოლიტპატიმრებთან დაკავშირებით დოკუმენტში არ ჩაწერეთ კონკრეტული სახელები და გვარები  ხომ არ იყო ეს შეცდომა? როგორ უყურებთ ამ საკითხს დღევანდელი გადმოსახედიდან?

_ არა. ეს იყო ელემენტარულად ჩვენი უცხოელი კოლეგებისადმი პატივისცემა. სხვათა შორის ეს იყო ნაბიჯი ხელისუფლებისკენ გადადგმული. იმიტომ, რომ ჩვენ გვესმოდა, რომ ხელისუფლებას გვარები რომ ჩავუწეროთ, ეს ნიშნავს იმას, რომ ხელისუფლებამ საჯაროდ უნდა გამოაცხადოს, რომ ეს ადამიანები პოლიტიკური ნიშნით დააპატიმრა. იმისათვის, რომ პროცესში უფრო გაგვეხსნა ხელ-ფეხი ხელისუფლებისათვის, იქ ჩაწერილი იყო შესაბამისი ფრაზები. ნახსენები იყო პრეზიდენტის ინსტიტუტი სპეციალურად, რათა პრეზიდენტს მისცემოდა შესაძლებლობა, შეწყალების უფლება გამოეყენებინა.

ასე, რომ ეს არ არის შეცდომა, მაგრამ თუ ხელისუფლება გადაწყვეტს, რომ მეორედ გადააგდოს საერთაშორისო თანამეგობრობა, საკუთარი მოსახლეობა და პოლიტიკური პარტიები, თუ ხელისუფლება გადაწყვეტს, რომ ვინმეს თავზე გადაახიოს 4 ელჩის თანდასწრებით ამერიკის საელჩოში მიღწეული შეთანხმება, ამით ხელისუფლება ძალიან დაზარალდება და ეს ძალიან მძიმე პოლიტიკურ შედეგებს გამოიწვევს. რაც ყველაზე სამწუხაროა, დაზარალდება ქვეყანა. გარწმუნებთ, რომ არცერთი სახელმწიფო და საერთაშორისო საზოგადოება არ დაეხმარება ხელისუფლებას, რომელიც მასხრად იგდებს საერთაშორისო თანამეგობრობას და თავის სიტყვას არ ასრულებს.

ასე, რომ ეს შეთანხმება შესაძლოა საქართველოს ხელისუფლებას დაუჯდეს ძალიან ძვირი და რაც მთავარია მოსახლეობისთვის იყოს ძალიან პრობლემური. იმიტომ, რომ ასეთ შემთხვევაში საერთაშორისო დახმარება პოსტ კრიზისულ პერიოდში დადგეს კითხვის ნიშნის ქვეშ, რაც ისედაც არ არის გარანტირებული. ამიტომ მე მოვუწოდებ ხელისუფლებას, რომ შეასრულოს ეს მოთხოვნები. მე არ ვარ ჩასაფრებულის პოზიციაში. მიუხედავად იმისა, რომ ძალიან უსინდისოდ იქცევა ხელისუფლება ჩემი და ჩემი პოლიტიკური პარტიის მიმართ.

_ რას გულისხმობთ?

_ ვგულისხმობ იმას, რომ ცდილობს „ნაციონალური მოძრაობის“ ქვეშ მოაქციოს მთელი ოპოზიცია. მათ შორის ჩვენც. ქვეყნის ინტერესებიდან გამომდინარე არ მაწყობს ქვეყნის ინტერესების ჩამოშლა. ამიტომ მოვუწოდებ ხელისუფლებას, რომ შეასრულოს ეს პირობა.

_ ოპოზიციური სპექტრისთვის ეს პრინციპული საკითხია, რომ თუ ხელისუფლება არ შეასრულებს შეთანხმების პოლიტპატიმრების კონტექსტში, საარჩევნო საკითხებზეც არ ითანამშრომლებთ მასთან?

_ არა, ასე არ არის. ერთი საქმის გამო, ორივე საქმის გაფუჭება რა თქმა უნდა არ შეიძლება. გახსოვთ, რომ გიგი უგულავამ და პოლიტპატიმრებმა თავად გამოაგზავნეს წერილი ციხიდან, სადაც თქვეს, რომ ისინი მზად არიან ციხეში იჯდნენ, ოღონდ არ ჩავარდეს საარჩევნო პროცესი. ჩვენც ერთმნიშვნელოვნად ვიძახდით, რომ ძალიან მნიშვნელოვანია საარჩევნო სისტემა და ეს ყველა შემთხვევაში უნდა იყოს შეცვლილი, მაგრამ მეორე მომენტია ის, რომ თუ ხელისუფლებას უნდა, რომ მართლა ჩაიწეროს ქულები და ჩაეთვალოს თავისი ვალდებულებების სრულყოფილად შესრულება, თუ მას უნდა, რომ პოლიტიკური პროცესი გადავიდეს ნორმალურ გარემოში და ეს არ იყოს დაპირისპირების ძალიან მძიმე რეჟიმი, ასეთ შემთხვევაში მან სრულყოფილად უნდა შეასრულოს შეთანხმება.

_ არჩილ თალაკვაძემ თავის განცხადებაში ყველა ოპოზიციური პარტია „ნაციონალურ მოძრაობასთან“ გაგაიგივათ. მან ახსენა ფრაზა „ნაცმოძრაობის“ სატელიტი პრორუსული პარტია. ცხადი იყო, რომ თქვენს პარტიასთან მიმართებით იყო ნათქვამი ეს. რა პასუხი გაქვთ ამასთან დაკავშირებით?

_ არა, მე არ ვიცი პრორუსულ და მით უმეტეს სატელიტ პარტიაში ვის გულისხმობდა. კონკრეტულად დაასახელონ. მე არ ვთვლი, რომ ჩვენი პარტია პრორუსულია, მით უმეტეს ჩვენ არავის სატელიტი არ ვართ. პრორუსულობაზე ლაპარაკი, ვინც ბიძინა ივანიშვილისგან იღებს ხელფასს, ივანიშვილისგან, რომელმაც 5 მილიარდი რუსეთში იშოვა და მთელი რიგი კაპიტალი რუსეთში ჰქონდა და აღარ გავაგრძელებ დანარჩენს არაფერს, აქედან გამომდინარე ასეთი განცხადება ცოტა უხერხული გახლავთ.

რაც შეეხება „ნაციონალური მოძრაობის“ სატელიტობას და კლასტერობას, როგორც ბატონმა ვოლსკიმ და სხვებმა გამოიყენეს ეს ტერმინი, „ნაციონალური მოძრაობის“ კლასტერი იყო „ქართული ოცნება“ მთელი ამ წლების განმავლობაში, როდესაც კოჰაბიტაციაში იყო მასთან. ჩვენ „ნაციონალურ მოძრაობასთან“ და მთელ ოპოზიციურ სპექტრთან მოლაპარაკებაზე დავსხედით მხოლოდ ერთ თემასთან – საარჩევნო გარემოს გაუმჯობესებასთან დაკავშირებით. მიუხედავად ჩვენი სიმპათია-ანტიპათიებისა. ამან მოიტანა ის ძალიან მნიშვნელოვანი შეთანხმება, რომელზეც ახლა ვლაპარაკობთ, რასაც მოჰყვა მთელი საერთაშორისო თანამეგობრობის მხარდაჭერა.

„ნაციონალურ მოძრაობასთან“ სატელიტობაზე საუბრისას ხომ არ გავიხსენოთ, ვინ სად იყვნენ „ქართული ოცნების“ წევრები მაშინ, როდესაც მე და ჩემი პარტიის წევრები სააკაშვილს და „ნაციონალურ მოძრაობას“ ვებრძოდით. ვინ სად იმალებოდა 26 მაისს და ვის რა პოზიცია და რა მდგომარეობა ეჭირა. ასე, რომ ამ მცდელობას ხელისუფლება ბოლომდე ვერანაირად ვერ მიიყვანს. ეს სასაცილოა ნებისმიერი მეტ-ნაკლებად ობიექტური და გონება გახსნილი ადამიანისთვის, ვისაც ერთი უჯრედი მაინც უმუშავებს ტვინში. სრულიად საკმარისია ჩვენი პარტიის განვლილი გზის თვალის გადავლება, რომ ვერავის სატელიტობა და მით უმეტეს „ნაციოანალური მოძრაობის“ სატელიტობა ვერ დაგვაბრალონ.

სხვათა შორის ვერც პრორუსულობას დამაბრალებენ, მეკამათონ საგნობრივად და არსობრივად, რომელი ჩვენი მოქმედებაა პრორუსულობა ან რომელი ჩვენი განცხადებაა პრორუსული.

_ პრორუსულ და პროპუტინისტურობაში გადანაშაულებენ ხოლმე ოპოზიციიდანაც. ერთ-ერთი პოლიტიკური ფიგურა სერიოზულად გაკრიტიკებთ ხოლმე…

_ არა, სერიოზული კრიტიკით ვერავინ ვერ გამოდის, მოდით ნუ დავაკონკრეტებთ. ეს არ არის სერიოზული კრიტიკა. ეს არის ემოციებზე და ცარიელ სიტყვებზე აგებული კრიტიკა. იმიტომ, რომ არცერთი არგუმენტი არ არსებობს, ერთ მაგალითს თუ მაინც მოიყვანენ როდის იმოქმედა ჩვენმა პარტიამ ისე, რაც შედის რუსეთის და არა საქართველოს ინტერესებში. ან როდის გააკეთა ასეთი განცხადება ჩვენმა პარტიამ?!

_ მაინც უნდა გკითხოთ კონკრეტულად, თაკო ჩარკვიანია ერთ-ერთი ვინც გამოირჩევა ხოლმე თქვენი კრიტიკით. ხშირად მაქვს მასთან ინტერვიუები და ყოველთვის ხაზს უსვამს ამას. რა პასუხი გექნებათ მის კრიტიკაზე?

_ არა, არ მაინტერესებს. მე პოლიტიკოსებზე ვლაპარაკობ. არ ვაპირებ არაპოლიტიკოსების გამონათქვამებზე საუბარს.

_ არ არის თაკო ჩარკვიანი პოლიტიკოსი?

_ ეს თქვენი გადასაწყვეტია. მე ასე ვთვლი, როგორც გიპასუხეთ.

_ ამბობთ, რომ არ მიგაჩნიათ პოლიტიკოსად, თუმცა ის გარკვეული პერიოდის განმავლობაში იჯდა იმ მაგიდასთან, რომელშიც სრული ოპოზიციური სპექტრი იღებდით მონაწილეობას.

_ მაგიდასთან ჯდომა არაფერს არ ნიშნავს.

_ უკრაინასთან არსებულ ვითარებაზე როგორია თქვენი პოზიცია? რამდენად ადეკვატური იყო ხელისუფლება ამ ვითარებაში და რამდენად სწორად მოიქცა თავად უკრაინა?

_ უკრაინის ამ მოქმედებამ ერთმნიშვნელოვნად დაგვანახა, რომ ჩვენი ხელისუფლების ავტორიტეტი მთელ მსოფლიოში, მათ შორის მეგობარ სახელმწიფოებშიც არის ნულს ქვემოთ. როდესაც ხელისუფლებას იმდენად არ უწევენ ანგარიშს, რომ მის მიერ ძებნილი და მის მიერ დამნაშავედ გამოცხადებულ ადამიანს ნიშნავენ მაღალ თანამდებობაზე, ეს ლაპარაკობს ქვეყნის საგარეო პოლიტიკის აბსოლუტურ კრახზე. მაგრამ, ეს არ არის უკრაინის ბრალი, ეს არის ჩვენი ხელისუფლების და ბიძინა ივანიშვილის ბრალი. რომელმაც 2012 წლიდან მოყოლებული სააკაშვილთან სიამტკბილობაში გაატარა სინამდვილეში და მოჩვენებითი იყო ის ბრძოლა, რომელიც ხორციელდებოდა. იმიტომ, რომ ივანიშვილს სჭირდებოდა სააკაშვილის პოლიტიკურ ფიგურად შენარჩუნება. მისი პოლიტიკური ძალის ოპოზიციურ ძალად შენარჩუნება, რადგან ყველა არჩევნებში სააკაშვილი წარმოეჩინა საფრთხობელად და ხალხი დაეყენებინა არჩევანის წინაშე – ან ივანიშვილი ან სააკაშვილი.

_ ხომ არ გგონიათ, რომ სააკაშვილის თანამდებობაზე დანიშვნა კარგი შეიძლება იყოს ქართული პოლიტიკისთვის? ხომ არ მოხდება სააკაშვილის გარკვეული დისტანცირება ქართული პოლიტიკისგან და ამ თვალსაზრისით ხომ არ არის კარგი, რადგან „ოცნების“ პოლიტიკა აგებულია „მიშა მოდის“ პრინციპზე?

_ თავისთავად უნდა მოხდეს. იმიტომ, რომ სააკაშვილს ისეთი პოზიცია უკავია, რომ უბრალოდ უფლება არ ექნება ჩაერიოს სხვა სახელმწიფოს, ამ შემთხვევაში საქართველოს საშინაო საქმეებში. ასე, რომ რაც შორს იქნება სააკაშვილი ქართული პოლიტიკისგან და რაც ნაკლებად ჩაერევა, მით უკეთესია ქვეყნისთვის, პოლიტიკისთვის და ამ შემთხვევაში მით უარესი ივანიშვილისთვის. იმიტომ, რომ სააკაშვილის საფრთხობელად გამოყენებას ის შედარებით ნაკლებად შეძლებს.

ჩემი ინფორმაციით, სწორედ ამიტომ შეხვდა მძიმედ ხელისუფლება, განსაკუთრებით კი ივანიშვილი სააკაშვილის ამ დანიშვნას. აღარ გამოუვა ივანიშვილს პოლარიზება – „ნაციონალური მოძრაობა“ და მისი სატელიტები. ხალხის ზურგს უკან გარიგებები მოიკითხონ თავისთან. ვაფრთხილებ „ქართულ ოცნებას“ – რაც ებრძოლნენ ჩვენ პარტიას იკმარონ. რა უსინდისობაც გააკეთეს 2013 წლის საპრეზიდენტო არჩევნებით დაწყებული, 2016 წლის საპარლამენტო არჩევნების გაყალბებით, დაფინანსების წართმევით და ა. შ., იკმარონ. სანამ იმაზე მეტის ლაპარაკს დავიწყებ, ვიდრე დღემდე ვლაპარაკობდი. ძალიან ვზოგავ „ქართულ ოცნებას“, იმიტომ რომ არ მინდა ნებსით თუ უნებლიედ სააკაშვილის, „ნაციონალური მოძრაობის“ თუ სხვა ვინმეს წისქვილზე დავასხა წყალი. ვიდრე „ერთიან საქართველოს“ და ნინო ბურჯანაძეს ახსენებენ, ასჯერ გაზომონ. იმიტომ, რომ სათქმელი ძალიან ბევრი მაქვს.

_ ელჩის კონსულტაციებისთვის გამოწვევა რამდენად სწორი იყო?

_ მართალია ელჩი კონსულტაციებისთვის გამოიწვიეს, მაგრამ ესეც აბსოლუტურად სულელური ნაბიჯი იყო ჩემი აზრით.

_ ჩვენ მოვისმინეთ ზელენსკის განცხადება, რომ ის არ აპირებს საპასუხო ნაბიჯებს, თუმცა აღნიშნა, რომ საქართველოს ხელისუფლება შეცდომას უშვებს. ამ ფონზე ურთიერთობათა ნორმალიზება როგორ წარმოგიდგენიათ?

_ შეცდომებს საქართველოს ხელისუფლებაც უშვებს და სამწუხაროდ უკრაინის ხელისუფლებაც. მაგრამ, ეს უკრაინის საფიქრალი და სადარდებელია. მე ვფიქრობ, რომ ზელენსკი ისევე ინანებს სააკაშვილის დანიშვნას, როგორც პოროშენკომ ინანა. მაგრამ ეს უკრაინის შიდა საქმეებია.

რაც შეეხება ურთიერთობის გამოსწორებას, მე ამ ხელისუფლების არანაირი იმედი არ მაქვს. ის ვერანაირ ურთიერთობებს ვერავისთან ვერ გამოასწორებს. მთელი 8 წლის განმავლობაში ხელისუფლებამ ერთი ნაბიჯითაც ვერ გამოასწორა ურთიერთობა რუსეთთან და ერთი პრობლემაც ვერ მოაგვარა, რომელიც ჩვენ ხალხს აწუხებს. ასე, რომ ხელისუფლებამ თავის ტკივილი შექმნა მეზობლებთან, იგივე აზერბაიჯანთან, სომხეთთან, დასავლელ პარტნიორებთან. ყველასთან, ვისთანაც შეიძლებოდა… ხელისუფლებამ საგარეო მიმართულებით სრული კრახი განიცადა.

ეს ხელისუფლება არაფრის გამომსწორებელი არ არის, მაგრამ იმედია საქართველოს ეყოლება უახლოეს პერიოდში ხელისუფლება, რომელიც რეალურად შეძლებს ქვეყნის ინტერესების განხორციელებას და არა მხოლოდ იმაზე ზრუნვას, რომ ნებისმიერ ფასად 30 წელი დარჩეს ხელისუფლებაში.

_ „ნაციონალურ მოძრაობაზე“ თქვით, რომ მასთან მხოლოდ საარჩევნო საკითხებზე საუბრობთ. ვის განიხილავთ მთავარ პარტნიორად, ვისთან ერთადაც აპირებთ ბევრი თემის ირგვლივ კონსოლიდაციას?

_ იცით რაშია საქმე? ახლა ძალიან რთული ვითარებაა ქართულ პოლიტიკაში. ამიტომ, ძალიან ძნელია დაასახელო, რომელიმე პოლიტიკური ძალა, რომელთანაც უმეტეს საკითხში ემთხვევა ჩვენი ხედვები. ამიტომ ჩვენ ვითანამშრომლებთ კონკრეტულ საკითხებთან და კონკრეტულ პრობლემებთან დაკავშირებით იმ პოლიტიკურ ძალებთან, რომელთანაც იმ კონკრეტულ მომენტში სახელმწიფო ინტერესებიდან გამომდინარე საჭირო იქნება გარკვეული კოორდინირება.

ჩვენ გვაქვს ნათლად ჩამოყალიბებული საგარეო და საშინაო პრიორიტეტები. ჩვენმა პარტიამ ყველას დაანახა, რომ ყველაზე ეფექტური, ყველაზე სწორი და ყველაზე ოპტიმალური ქვეყნის შესაძლებლობებიდან გამომდინარე თუნდაც ეკონომიკური პროგრამა დავდეთ. ასე, რომ ჩვენ ძალიან სერიოზული შესაძლებლობები გვაქვს იმისა, რომ ქვეყნის ძალიან ბევრი პრობლემა მოვაგვაროთ.

_ თქვენსა და გიგა ბოკერიას შორის ურთიერთობები თითქოს მკვეთრად დათბა. ამაზე რა შეგიძლიათ გვითხრათ?

_ იცით რაშია საქმე? პოლიტიკაში ურთიერთობა დათბა, გაცივდა და ა. შ. სწორი კრიტერიუმები არ არის. ჩვენი კონკრეტული ხედვები კონკრეტულ საკითხებთან დაკავშირებით, რაც ეხებოდა საარჩევნო გარემოს და სამართლებრივ გარემოს, ყველა ოპოზიციურ ძალასთან სრულ თანხვედრაშია. ამაზე ლაპარაკობს ისიც, რომ ბატონი შალვა ნათელაშვილის ოფისში, სადაც ოპოზიციური შეკრებებია, ყველა ოპოზიციური პარტია იკრიბება. მათ შორის ბოკერიას პარტია, „ნაციონალური მოძრაობა“, „ლელო“, კახა კუკავას პარტია და ა. შ. სრულიად განსხვავებული ხედვების და ხშირად განსხვავებული პრიორიტეტების პარტიები, რომელიც გააერთიანა ხელისუფლების ტყუილმა და ხელისუფლების უსამართლობამ.

რაც შეეხება ხელისუფლებას, მას მინდა ვუთხრა, რომ თუ რამე ქულა დააგროვა ამ პანდემიის ბრძოლის დროს, მან დღეს ყველა ეს ქულა დაკარგა და გააგრძელებს ამ ქულების დაკარგვას. დარწმუნებული ვარ, რომ ჩვენი მოსახლეობა ხელისუფლებაზე იქნება ძალიან გაბრაზებული, რომელიც უკიდურესად რთულ მდგომარეობაშია და მისი დიდი ნაწილი შიმშილის ზღვარზეა. მოსახლეობა ხელისუფლებისგან ელოდებოდა კონკრეტულ გეგმებს ეკონომიკაში, კონკრეტულ ნაბიჯებს და დახმარებას და არა 1.6 ლარს დღეში ოჯახზე, რომელიც ხელისუფლებამ გამოაცხადა თვითდასაქმებულებისა და მათი ოჯახებისათვის. არა 2 დოლარს, რომლის მარჩენალმაც დაკარგა სამსახური.

იმის ნაცვლად, რომ ხელისუფლება ამ მიმართულებით ფიქრობდეს, ის გადავიდა საარჩევნო კამპანიაზე. ხელისუფლებამ ვერ შეიფერა ოპოზიციის გაჩუმება და მაქსიმალური სოლიდარობა. მან დაიწყო ოპოზიციის ლანძღვა-გინება და დაიწყო შეთანხმებების გადახედვა. ასე, რომ ხელისუფლებას ძალიან მძიმე დღეები ელის, როგორც ეკონომიკური ასევე პოლიტიკური თვალსაზრისით.  ნამდვილად მოვუწოდებ, რომ სწორი გადაწყვეტილებები მიიღოს და გონს მოეგონ, სანამ დროა.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად