მეუფე ნიკოლოზი: 5 ივლისის მოვლენებს ძალიან მოკლე სახელი ჰქვია – ეს იყო ლინჩის წესით გასამართლება

ახალქალაქისა და კუმურდოს მიტროპოლიტი, მეუფე ნიკოლოზის შეფასებით, 5 ივლისს თბილისში განვითარებული ძალადობრივი მოვლენები “ლინჩის წესით გასამართლება იყო”.

“5 ივლისის მოვლენებს ძალიან მოკლე სახელი ჰქვია, ოღონდ ეს სახელი ყველას გვავალდებულებს რაღაცას. მე ვფიქრობ, რომ ეს იყო ლინჩის წესით გასამართლება. ამერიკაში მოხდა პირველად ეს, როდესაც გასამართლების გარეშე ადამიანების ჯგუფი გადაწყვეტდა, რომ ვიღაც დამნაშავეა, გამოძიების გარეშე სჯიდნენ… ადამიანების ჯგუფმა გადაწყვიტა, რომ ჟურნალისტებზე შური ეძია”, – თქვა მეუფე ნიკოლოზმა.

წამყვანის კითხვას, რის გამო უნდა ეძიათ შური ჟურნალისტებზე, მიტროპოლიტმა ასე უპასუხა: “მე იმ ადამიანების ლოგიკას ვერ აგიხსნით. რაც არ უნდა გამაბრაზოთ, კისერში არ გწვდებით”.

5 ივლისს თბილისში ღირსების მარში იყო დაგეგმილი, თუმცა რუსთაველის გამზირი დილიდან დაიკავეს მოძალადე ჰომოფობებმა, რის გამოც თბილისი პრაიდმა მარში გააუქმა. საპატრიარქოსა და მოძალადე ჯგუფების ორგანიზებული კონტრაქციის მონაწილეებმა იძალადეს მედიის წარმომადგენლებსა და გამვლელებზე. სულ მედიის 53 წარმომადგენელი დაშავდა, მათ შორის TV პირველის ოპერატორი ლექსო ლაშქარავა, რომელიც 11 ივლისს გარდაიცვალა.

კომენტარები
იტვირთება...