„მერკისა“ და „ფაიზერის“ აბები, რომლებმაც შესაძლოა, პანდემიის გარდატეხაში უდიდესი როლი შეასრულონ – რა ვიცით მედიკამენტების შესახებ

კომპანიებმა – Pfizer Inc და Merck & Co Inc შექმნეს ანტივირუსული პრეპარატები, რომლებმაც ცდებში კორონავირუსის წინააღმდეგ იმედისმომცემი შედეგი აჩვენეს. პრეპარატები დაავადების გართულების რისკის მქონე ზრდასრულ პაციენტებში გამოსცადეს.

რა განსხვავებაა ორ წამალს შორის და რომელი უფრო ეფექტიანია?

როგორც „როიტერსი“ წერს, ცდების შედეგებმა ცხადყო, რომ „ფაიზერის“ მიერ შექმნილ  მედიკამენტს მეტი ეფექტიანობა აქვს, თუმცა სრული მონაცემები ჯერჯერობით  ცნობილი არ არის.

„ფაიზერმა“ განაცხადა, რომ კვლევების მიხედვით, მათმა პრეპარატმა ჰოსპიტალიზაციისა და გარდაცვალების შანსი 89%-ით შეამცირა იმ პაციენტებში, რომლებსაც დაავადების გართულების მაღალი რისკი ჰქონდათ.

„მერკში“ კი პირველ ოქტომბერს აღნიშნეს, რომ მათმა მედიკამენტმა ჰიოსპიტალიზაცია და გარდაცვალება, ასევე დაავადების გართულება დიდი რისკის მქონე პაციენტებში, 50%-ით შეამცირა.

„ფაიზერის“ მედიკამენტს პაქსლოვიდი ჰქვია, „მერკის“ მოლნუპრავირს კი (რომელიც ბრიტანეთში Lavgevrio-ს სახელით ჩაეშვა) ბრიტანეთის რეგულატორებმა უკვე მისცეს ავტორიზაცია.

რატომ არის აღნიშნული მედიკამენტები მნიშვნელოვანი

იმის მიუხედავად, რომ კორონავირუსის საწინააღმდეგო ვაქცინები მსოფლიოს მასშტაბით უკვე საკმაო რაოდენობის შექმნეს, ინფექციის სამკურნალო ეფექტიანი პრეპარატების ჩამონათვალი მწირია.

პაციენტებს ორივე პრეპარატს 5 დღის განმავლობაში აძლევენ. „ფაიზერის“ სამი აბი ინფიცირებულებმა დილით უნდა მიიღონ, სამი – ღამით. „მერკის“ ტაბლეტები კი  – ოთხი – დილით, ოთხი – ღამით.

„ფაიზერის“ მედიკამენტი მიეკუთვნება პროტეაზას ინჰიბიტორთა კლასს, გამოიყენება იმ ფერმენტის დასათრგუნად, რომელსაც ვირუსი ადამიანის უჯრედებში გასამრავლებლად იყენებს. პაქსლოვიდი რიტონოვირთან კომბინაციაში ინიშნება.

„მერკის“ მედიკამენტი ნუკლეოზიდური ანალოგია, ის ორგანიზმში ვირუსის გამრავლებას  ხელს უშლის და  მის გენეტიკურ კოდში ცვლილებები შეაქვს, რის შედეგადაც ვირუსი სუსტდება და ორგანიზმი მას მარტივად ერევა.

რა ვიცით მედიკამენტების უსაფრთხოების შესახებ

ორივე კომპანიამ კვლევების შესახებ მცირე მონაცემები წარადგინა, თუმცა უსაფრთხოების შესახებ ღრმად არიან დარწმუნებულნი.

„ფაიზერის“ ინფორმაციით, გვერდითი მოვლენებ  იმ პაციენტების დაახლოებით 20%-ს დაუფიქსირდა, რომლებიც იღებდნენ აბს ანდა პლაცებოს. სერიოზული გვერდითი მოვლენები კი 1.7%-ს აღენიშნა.

„მერკის“ შემთხვევაში კი პაციენტების 12%-ს აღენიშნა გვერდითი მოვლენები.

პაქსლოვიდს აშშ-ის რეგულატორი, სავარაუდოდ, წლის ბოლოსთვის დაამტკიცებს.

 

კომენტარები
იტვირთება...