A1 ბანერი

“მერიაში ყველა გაფრთხილებული მყავს, რომ ჩვენ ვართ ხალხის მსახურები! მოგვმართეთ ნებისმიერს”-ინტერვიუ კახი კალაძესთან

რას აპირებს დარჩენილ ვადაში და როგორ აპირებს დაამახსოვროს თავი ძალიან მომთხოვნ და პრეტენზიულ თბილისელებს, რომელ ინფრასტრუქტურულ პროექტებს განახორციელებს დედაქალაქისთვის და რას მოუხერხებს თბილისის საცობებს და პარკინგს, როდის მიიღებს გენგეგმას, რომელიც სპეციალურად შექმნილ ჯგუფს თითქმის თავიდან გააკეთებინა და როგორ აფასებს პარტიაში არსებულ დიდ არეულობას…

ამ ყველაფერზე „აიპრესს“ დედაქალაქის მერი, კახა კალაძე ესაუბრა. 

სასტუმრო „ბუდაპეშტის“ მშენებლობის შეჩერებას ვაკის პარკში საკმაოდ დიდი აჟიოტაჟი და აზრთა სხვადასხვაობა მოჰყვა. თქვენ თქვით რომ ვაკის პარკმა გაიმარჯვა და შედგა მოლაპარაკება. ცხადია, ეს ძალიან მნიშვნელოვანი გადაწყვეტილებაა,  მაგრამ, გაჩნდა კითხვები, რის ფასად დათანხმდა ინვესტორი ამას? გიგი უგულავას გადაწყვეტილებით, ეს იყო მისი კერძო საკუთრება. კერძო საკუთრება კონსტიტუციით არის ხელშეუხებელი. რა შესთავაზეთ „ბუდაპეშტის“ მეპატრონეს?

როდესაც თავიდან დავიწყეთ მოლაპარაკება, არ დავუბრუნდები რა და როგორ დაიწყო, რა იყო სასამართლოს გადაწყვეტილებები და ასე შემდეგ, ინვესტორი იდგა საკმაოდ მყარად სასამართლო გადაწყვეტილებებით ხელში. 2 წინადადება გვქონდა: ერთი, აეშენებინა რესტორანი, რაც იყო ოდითგანვე 70-იან წლებში და მეორე წინადადება იყო ადგილმონაცვლეობა.

თავიდან, ძალიან არასასიამოვნოდ მიიღო ეს ჩვენი შეთავაზება, იმიტომ რომ დაახლოებით 10 000 კვ/მ-ზე ჰქონდა ეს სამშენებლო ნებართვა, რომელიც 2013 წელს იქნა გაცემული, ამ სასტუმროს პროექტს 30 მ-ის სიმაღლის შენობა ნაგებობა უნდა განთავსებულიყო და საუბარი იყო 5 ვარსკვლავიან სასტუმროზე. მე მესმის ინვესტორის მდგომარეობა, ყველაფერი თანხაში რომ გადაიყვანო და დათვალო ცხადია, ბიზნეს ინტერესები მისთვის მნიშვნელოვანია.

ორჯერ შევხვდით, მანამდე იყო რეპლიკები პრესით, ჩვენი მხრიდან, მისი მხრიდან. საბოლოო ჯამში შევთანხმდით. შევთანხმდით, ადგილმონაცვლეობაზე, მოხდება ამ მისი საკუთრების შეფასება სამხარაული ან დიდი ოთხეულიდან რომელიმე ფირმა შეაფასებს. სხვა მიწას შევათავაზებთ.

ანუ, კონკრეტული მოთხოვნით ინვესტორი არ წარმდგარა?

არა, ჩვენ ჯერ პრინციპებზე შევთანხმდით. ავუხსენით სიტუაცია. ყველა ამ ქალაქისთვის ვცხოვრობთ, შეიძლება ის ბიზნესით არის დაკავებული, მე დღეს უფრო დიდი პასუხისმგებლობა მაქვს ქალაქის და ხალხის მიმართ. ყველა ამ ქალაქისთვის ვცხოვრობთ, შვილებით, ოჯახებით და ვაკის პარკი არის ერთადერთი, მეორე ვაკის პარკს ვერ შექმნი, ამიტომ მოფრთხილება სჭირდება. პლუს ამას, რეაბილიტაცია გვაქვს დაგეგმილი, რაც გვაქვს იმას უნდა გავუფრთხილდეთ და შევინარჩუნოთ. კომპრომისი შედგა და ეს ძალიან მნიშვნელოვანია.

არაერთი განცხადება გაკეთდა თქვენი მხრიდან გიგი უგულავას მიერ უკანონოდ გაცემულ ტერიტორიებზე და არც მას დაუტოვებიხართ უპასუხოდ.

მე პირადად მეწერა სტატია,  25 რეკრეაციულ ზონას როგორ შეუცვალეს 1 დღეში სტატუსი. თითოეული  ეს ზონა ვნახე საპარკინგე ადგილებად და კერძო საკუთრებად ქცეული. ყოველთვის მქონა ეს კითხვა და ახლაც მაქვს: როდესაც არის ფატები, ხელმოწერილი, დოკუმენტები, რატომ არ დგება ამ ადამიანების პასუხისმგებლობა?!

ძალიან ბევრი პრობლემური გადაწყვეტილების მიღება ხდებოდა წლების განმავლობაში, რამაც მიგვიყვანა იმ რეალობამდე სადაც დღეს ვიმყოფებით და არ გვსიამოვნებს არავის, ვისაც მართლა გიყვარს ეს ქალაქი. გვინდა რომ ხვალინდელი თბილისის უკეთესი იყოს.  იმის გაგრძელება, რაც ხდებოდა წლების განმავლობაში, პირადად ჩემთვის ის პოლიტიკა კატეგორიულად მიუღებელია.

მესმის, მშენებლობას ხელშეწყობა სჭირდება,  მაგრამ ეს არ უნდა ხდებოდეს ქალაქის ღირსშესანიშნავი უბნების, ქუჩების, მწვანე სივრცეების, სპორტული მოედნების  ხარჯზე.  ძალიან ბევრ ნაღმი ფეთქდება წინა წლებში გაცემული ნებართვების გამო და ძალიან ხშირად გვიწევს, დავები ინვესტორებთან მოლაპარაკებები, ადგილმონაცვლეობა ად ასე შემდეგ. ძალიან რთული პროცესებია, თუმცა მაქსიმალურად ვცდილობთ, რომ ის გაფუჭებული, რაც იყო გამოვასწოროთ.

მძიმე საპარკინგე მდგომარეობა და ტროტუარზე გაჩერებული მანქანები დედაქალაქის ერთ-ერთი ყველაზე მძიმე საკითხია საცობებთან ერთად. მომატებული მშენებლობების ფონზე კიდევ უფრო მეტად იზრდება პრობლემა. ანალოგიურად რთული მდგომარეობაა გამწვანებასთან დაკავშირებით.რას აპირებს ქალაქის მერია და მოუხდებათ თუ არა მშენებლებს საპარკინგე ადგილებზე ზრუნვაც თავისი მაცხოვრებლებისთვის?

სამწუხაროდ მაგის გათვალისწინება და მოთხოვნა არ ხდებოდა წლების განმავლობაში და ბევრი შენობა ნაგებობა იყო ქალაქში ისეთი, რომლსაც საპარკინგე ადგილი საერთოდ არ გააჩნია. ჩვენ დღეს, ყველა მშენებლობის ნებართვის გაცემის დროს ვითხოვთ დენდროლოგიური პროექტის შეთავაზებას ანუ აუცილებლად უნდა იყოს მწვანე სივრცე და ეზო, სადაც  იქ მცხოვრებ ადამიანებს შეეძლებათ ჩამოვიდნენ და საკუთარი შვილები გაასეირნონ. თუ მწვანე პროექტი არ იქნება შეთანხმებული,  სამშენებლო ნებართვა არ გაიცემა.

იგივე დამოკიდებულება გვაქვს პარკინგებთან დაკავშირებით. მხოლოდ მუნიციპალიტეტმა  რომ გააკეთოს მიწისქვეშა პარკინგები, ამით  ჩვენ პრობლემას ვერ მოვაგვარებთ. რა თქმა უნდა, ამდენი მშენებლობები როდესაც ხდება,  უცილებლად უნდა იყოს გათვალისწინებული მინიმუმ იქ მცხოვრები ადამიანებისთვის ავტომობილების განთავსების შესაძლებლობა.

თქვენ თქვით, რომ ეს წელი იქნება საინტერესო წელი. რა არის 2019 წელს თბილისის მერიისთვის პრიორიტეტული? ინფრასტრუქტურული პროექტების და დედაქალაქის მოდერნიზაციის თვალსაზრისით, რა გეგმები გაქვთ?

ძალიან ბევრ თემაზე ვმუშაობთ და  პრიორიტეტულია სატრანსპორტო  პოლიტიკა და საზოგადოებრივი ტრანსპორტის მოწესრიგება. წელს გვინდა მთლიანად ჩავანაცვლოთ არსებული ავტობუსების პარკი, დაგეგმილი გვაქვს მეტროს ახალი შემადგენლობის დამატება და მეტროსადგურების რეაბილიტაციის პროექტების განხორციელება.

მასშტაბურ სამუშაოებს განვახორციელებთ, რათა სიღრმისეულად გაკეთდეს გზები  მიწისქვეშა კომუნიკაციებიდან დაწყებული, დასრულებული ელემენტარული განათებებით და მწვანე სივრცეებით. ეს ძალიან მნიშვნელოვანია, ჩვენ შევქმენით ამის საპილოტე მაგალითები: იგივე კოსტავა შარტავას რეაბილიტაცია, როდესაც ბეტონის გზაგამყოფები  გარდავქმენით მწვანე სივრცეებად, რასაც საკმაოდ დიდი პოზიტივი და გამოხმაურება მოჰყვა.

ზუსტად ეგ მიდგომები გვექნება ყველგან, ქალაქის სხვადასხვა უბნებში, ქუჩებზე. არ ვაპირებთ, სანახაობისთვის ავდეგთ და გზა დავაგოთ მხოლოდ ზედაპირულად. არავინ არ უყურებს შიგნით რა  ხდება და რა საშინელ მდგომარეობაში იყო კომუნიკაციები.

“ჯივიპისთან“ გვქონდა აქტიური კომუნიკაცია და დავიყოლიეთ, რომ  ყველა ამ დიდ პროექტს მოყვებიან და განახორციელებენ იმ ინვესტიციებს, რაც სავალდებულო და საჭიროა რომ  ის ქსელი იყოს მოწესრიგებული. აქტიურად შეიძლება ითქვას რომ მიწისქვეშა ქალაქის განახლება ხდება ამ პროექტებით.

სოციალურმა კვლევებმა აჩვენა, რომ ეკოლოგიის გამო დედაქალაქის მოსახლეობა ძალიან ღელავს და აბსოლუტურად სამართლიანად. რთული მდგომარეობაა აშკარად დედაქალაქში. გარდა ტექდათვალიერებისა, რომელიც წინ გადადგმული  ერთი ნაბიჯი იქნება, გაქვთ თუ არა დაგეგმილი სხვა ღონისძიებების გატარება ამ მიმართულებით?

საკმაოდ კომპლექსური პრობლემებია და ერთი მიმართულებით რომ ვიმუშავოთ, ამ პრობლემას ვერ მოვაგვარებთ. გეთანხმებით, მხოლოდ ტექდათვალიერება არ არის გამოსავალი. საკმაოდ ბევრი მიმართულებაა. ტექდათვალიერება, რა თქმა უნდა, მოსაწესრიგებელია, ავტომობილები უნდა იყოს გამართული გამონაბოლქვის თვალსაზრისით. საზოგადოებრივი  ტრანსპორტი პრობლემაა და ახლა არ დავიწყებ ახსნას, ყვითელი ავტობუსები რა პრობლემას ქმნის ქალაქში. იგივე სამშენებლო მიმართულებით არის პრობლემები, ჩვენ ინიცირებული გვაქვს სამშენებლო რეგულაციების გამკაცრება, ცვლილებები რომ მაქსიმალურად დაცულები ვიყოთ ამ მტვრისგან, სამშენებლო პროცესისგან  ასევე მნიშვნელოვანია მწვანე სივრცეების შექმნა. მაქსიმალურად უნდა ვეცადოთ, სადაც შესაძლებელია ყველა ადგილზე მოხდეს გამწვანება. ახალი  ხე-მცენარეების დარგვა ქალაქში. ეს ყველაფერი, რა თქმა უნდა, ერთობლიობაში აუცილებლად მოგვცემს შედეგს.

ასევე, სპეციალურ წახალისებებს ვაკეთებთ ელექტრომობილებისთვის, ჰიბრიდებითვის, რომ უფრო მეტი ინტერესი იყოს ასეთი ტიპის ავტომობილების შემოყვანაზე. დარწმუნებული ვარ, ძალიან მალე, ეკოლოგიური პრობლემა, რომელიც  ყველას გვაწუხებს ჰაერის დაბინძურების თვალსაზრისით, საგრძნობლად გამოსწორდება. ამას დრო დასჭირდება, რა თქმა უნდა, თუმცა ეს ყველაფერი რასაც ვაკეთებთ, შედეგს აუცილებლად გამოიღებს.

ხომ არ აპირებთ, პარლამენტში შეხვიდეთ საკანონმდებლო ინიციატივით სამშენებლო მასალების ხარისხის  კონტროლთან დაკავშირებით? არაერთი მოსაზრება გამოითქვა იმასთან დაკავშირებით, რომ ის ტრაგედია, რაც ავთანდილის ქუჩაზე მოხდა, გარდა იმისა რომ იქ მძლავრი აფეთქება იყო, კორპუსიც უხარისხოდ იყო ნაშენები. ნებისმიერ შემთხვევაში,  მეც ვიცი და თქვენც, რომ დღეს მშენებლები თავიანთ ნებაზე არიან მიშვებულები. ხშირ შემთხვევაში ძალიან უხარისხო  ობიექტებს აშენებენ.  არ აპირებთ ხარისხის კონტროლის გამკაცრებას?

იმ კონკრეტული კორპუსის მშენებლების დადანაშაულება მე გამიჭირდება იმაში, უხარისხოდ იყო თუ არა აშენებული. როგორც სამხარაულის ექსპერტიზას, ისე ჩვენს   ლაბორატორიას გაკეთებული აქვს დასკვნები და ამბობს რომ კორპუსი საცხოვრებლად არის ვარგისი. ანუ, ის მზიდი კედლები არ დაზიანებულა.  ეს ნიშნავს რომ კარგი ნაშენებია.

რეგულაციების მხრივ,  ამ ერთი წლის განმავლობაში, ბევრი მნიშვნელოვანი ცვლილება  განვახორციელეთ, განსაკუთრებით უსაფრთხოების თვალსაზრისით მშენებლობებზე. გახსოვთ, თვე არ გავიდოდა, ადამიანი არ დაღუპულიყო  მშენებლობაზე. ძალიან მძიმე მდგომარეობა იყო.  ახლა ხება ერთი-ორი შემთხვევა. სტატისტიკა რომ ვნახოთ, შედარებაც არ შეიძლება. ამ მიმართულებითაც ვმუშაობთ. გარკვეული სიახლეები გვექნება და უახლოეს მომავალში ვაპირებ ამის გაჟღერებას.

სიახლეებში გულისხმობთ იმას, რომ სამშენებლო რეგულაციებს კიდევ უფრო გაამკაცრებთ? 

დიახ, გავამკაცრებთ, აუცილებლად. გარდა ამისა, ეკონომიკის სამინისტროს პარლამენტში უკვე გადაგზავნილია ენერგოეფექტური მასალების გამოყენების აუცილებლობა მშენებლობის დროს. ამაზე ვალდებულება გვაქვს აღებული ასოცირების ხელშეკრულებით და მნიშვნელოვანია ამ დოკუმენტის მიღება კანონის თვალსაზრისით.  ეს ყველაფერი მშენებლობის ხარისხზე აუცილებლად იმოქმედებს. თუნდაც ელექტროენერგიის, ბუნებრივი აირის მოხმარების თვალსაზრისით უფრო მეტი თბოიზოლაცი ექნება შენობა ნაგებობებს. ადამიანებს უფრო ნაკლების გადახდა მოუწევთ ელექტროენერგიასა და ბუნებრივ აირზე.

დღეს ის პრობლემა გვაქვს, რომ არცერთ შენობა- ნაგებობას, ძირითადად ძველ აშენებულ სახლებს, არანაირი თბოიზოლაცია არ გააჩნიათ. ძალიან ბევრი თანხის გადახდა უწევთ ადამიანებს, როგორც ელექტროენერგიაზე ისე ბუნებრივ აირზე.  ამიტომ ენერგო ეფექტურობა, შეფუთვა სახლების და ამ მასალების გამოყენება მშენებლობის დროს ძალიან მნიშვნელოვანია.

თქვენ თავად მგზავრობთ მუნიციპალური ტრანსპორტით? საცობებში გადაადგილება თუ გიწევთ? გასაგებია, რომ მერია სატრანსპორტო პოლიტიკაზე მუშაობს, მაგრამ  მოგვარების გზები გაცილებით მეტ ეფექტურობას მოითხოვს, ვიდრე დღეს არის. 

საზოგადოებრივი ტრანსპორტი უნდა იყოს ქალაქში სწრაფი. უნდა იყოს ყველაზე კომფორტული, შემთხვევით არ არის რომ ქალაქში ჩნდება სპეციალური ზოლები ავტობუსებისთვის. ჩვენ დაკვეთილი გვაქვს კვლევა, რომელიც შარშან დაიწყო და  ფრანგული კომპანია „სისტრა“ აკეთებს. გაზაფხულზე გვექნება სრული მონაცემები. თუმცა, ის პროექტები, რომელიც ხორციელდება, შუალედური დასკვნების და მონაცემების საფუძველზე კეთდება. თუ  რა მარშუტებზე და როგორ უნდა განხორცილდეს ის პროექტები, რასაც ავტობუსების სპეციალური ზონები ჰქვია.

კერძო ავტომობილით მგზავრობა გარკვეულწილად უნდა იყოს დისკომფორტი. სხვათა შორის, ძალიან საინტერესო შემოთავაზებაა და მაზე ვისაუბრე რამდენიმე კვირის წინ, ეს არის ავტომობილების გაზიარება ანუ, ქალაქის სხვადასხვა წერტილში, უბანში, ქუჩაზე განთავსებული იქნება ელექტრო მობილები.

ადამიანი, ვისაც სურვილი აქვს, მაგალითად არ იმგზავროს ავტობუსით, ან ტაქსით, ენება შესაძლებლობა ეს ავტომობილი აიყვანოს იჯარით, გადაიხადოს თანხა, რომელიც ყველასთვის ხელმისაწვდომი იქნება  და გადაადგილდეს. როგორც გვეუბნებიან სპეცილური აპლიკაცია იქნება, სადაც უნდა დარეგისტრირდე. საჭიროა მართვის მოწმობა, აიდი ბარათი,და ტელეფონით შეგიძლია მართო. ავტომობილს ტელეფონით აღებ, ტელეფონით კეტავ, ძალიან საინტერესოა. სხვათა შორის, ევროპულ ქალაქებს, როგორიცაა: პარიზი, მილანი, რომი, ბერლინი  უკვე ძალიან დიდი გამოცდილება აქვთ ამ მიმართულებით.  ეს ეხმარება ქალაქს საცობის განტვირთვაში.

პირველ ეტაპზე, როგორც გვეუბნებიან, 300 ელექტრომობილის შემოყვანას აპირებენ,  შემდეგ ციფრი  რა თქმა უნდა გაიზრდება. ვნახოთ, ესეც დაგეხმარება გარკვეულ წილად, რომ საცობები მოწესრიგებული და მოგვარებული იყოს.

ღამის ეკონომიკა ახალი პროექტია, ძალიან ინოვაციური თბილისელებისთვის, ცოტა დრო გქონდათ რომ დაკვირვებოდით, როგორ მუშაობს ეს პროექტი. რა შეგიძლიათ თქვათ საწყის ეტაპზე და რა შემოსავალს ელოდებით ამ წელს? ბიუჯეტზე რამენაირად თუ აისახება?

ბიუჯეტზე არა, ეს პირიქით არის სტრუქტურა რომელიც ხელს უწყობს მაგალითად კაფეების, ბარების, მიკრო და მცირე ბიზნესის განვითარებას. ამ მიმართულებით ერთი კონკრეტული პროექტი, რომელიც ჩვენ განვახორციელეთ, ეს არის საზოგადოებრივი ტრანსპორტით უზრუნველყოფა პარასკევს, შაბათს და კვირას. ადამიანებს, რომლებიც სარგებლობენ ღამის კლუბებით, რესტორნებით ბარებით, შეუძლიათ ერთი რაიონიდან მეორეში თავისუფლად გადაადგილდნენ საზოგადოებრივი ტრანსპორტით, რომელიც მუშაობს ღამის საათებში.

გარდა ამისა, ჩვენ ჩავატარეთ საერთაშორისო ფორუმი თბილისში, სადაც მოწვეული გვყავდა ღამის მერები სხვადასხვა ქალაქებიდან. მათ გაგვიზიარეს თავისი გამოცდილება, რას აკეთებს მუნიციპალიტეტი, როგორ ეხმარება ღამის ეკონომიკის განვითარებას და როგორ უწყობს ხელს. ჩვენ რაღაც განსხვავებულს არ ვიგონებთ. უბრალოდ, გვინდა გავიზიაროთ როგორ გააკეთა ეს ევროპულმა განვითარებულმა ქალაქებმა. ამ პროექტის ფარგლებში შესაძლებელია დამატებით ახალი სამუშაო ადგილების შექმნა. შესაძლებელია დავეხმაროთ და ბიზნესი გავაზრდევინოთ იმ კაფეებს, ბარებს, რომლებიც 9-ზე, 10-ზე, 11-ზე იხურებიან და ეს გარკვეულწილად შეიძლება პრობლემა იყოს ქალაქისთვის იმ თვალსაზრისით, რომ ვთქვათ სტუმარი გყავს 11 საათზე და გსურს  შეხვიდე სადმე და  ივახშმო. საკმაოდ საინტერესო შეთავაზებები გექნება ამ მხრივ და მე ვფიქრობ ინტერესიც ძალიან დიდი იქნება.

როდესაც მერი გახდით, ერთ-ერთ პრიორიტეტად გამოაცხადეთ თბილისის რაიონების თანაბარი განვითარება. ამჟამად რომელი რაიონი იწვევს ყველაზე მეტ შეშფოთებას და რომელ რაიონზე გაქვთ ყველაზე დიდი გეგმა. რომელ რაიონზე შეგიძლიათ მითხრათ, რომ 1 წლის შემდეგ ამ რაიონს ვეღარ იცნობთ, ისეთი განვითარებული იქნებოა?

პრობლემები ყველა რაიონშია და ძირითადად ინფრასტრუქტურული. მაგალითად, დიდი დიღმის და მუხიანის აგარაკები. ელემენტარული კანალიზაციის სისტემა არ არსებობს და 21-ე საუკუნეში გვიწევს ელემენტარულზე საუბარი, რომ მიწისქვეშა კომუნიკაციები საერთოდ არ არსებობს. დავიწყეთ, ამ პროექტების განხორციელება რათა მოვაწესრიგოთ და მოვაგვაროთ ეს პრობლემა და  ადამიანებმა ნორმალურ პირობებში იცხოვრონ.

ასევე გლდანში, ძალიან დიდი პროექტი გვაქვს ეს არის ვეკუასა და ხიზანიშვილის ქუჩების მოწესრიგება თავისი მიწისქვეშა ინფრასტრუქტურით და ყველანაირად მულტიფუნქციური კომპლექსით, რომელიც საკმაოდ მასშტაბურია.

დიღომი, დიდი დიღომი და ვარკეთილი  ყველაზე მეტად საჭიროებს მიხედვას და მულტიფუნქციონური კომპლექსების მშენებლობას. დღევანდელი გადმოსახედიდან  ყველა რაიონს სჭირდება მიხედვა,  რა თქმა უნდა, თუმცა, ეს ორი რაიონი დღეს, ყველაზე მეტად საჭიროებს ამ  საკითხის მოგვარებას. ამიტომ,  წელს ვიწყებთ და დაახლოებით 24 მლნ დაიხარჯება ორივე პროექტზე.

დანარჩენი გამგეობები ყველაფერს აკეთებენ შიდა საუბნო გზების მოწესრიგებაზე, სკვერების მოწესრიგებაზე, ყველა რაიონში არის პრიორიტეტი ეს მიმართულებები.

თბილისში უამრავი საინტერესო ადგილია, რომელიც მიტოვებულია და უდიდესი პერსპქტივა აქვს, რომ საინტერესო ტურისტულ მარშუტად იქცეს. თუ გაქვთ რაიმე სამუშაოები ჩატარებული ამ მიმართულებით?

ზოგადად, ძველი თბილისი საკმაოდ მომხიბვლელია თავისი კულტურული მემკვიდრეობითი ძეგლებით და ისტორიული შენობა-ნაგებობებით. ამ მიმართულებითაც  საკმაოდ დიდი თანხები იხარჯება ბიუჯეტიდან. 2 კონკრეტული ლოკაციის რეაბილიტაცია, უკვე დაწყებული გვაქვს, ეს არის ორბელიანი, რომელიც  ძალიან მალე დამთავრდება და ძალიან ლამაზი გამოდის. ასევე გუდიაშვილი, რომელიც შემოდგომაზე უნდა დასრულდეს.

წელს ვიწყებთ ასევე ფიროსმანის სრულ რეაბილიტაციას, რომელიც ძალიან მსხვილი პროექტია, 150 მლნ დაიხარჯება. ასევე გორგასლის ქუჩაზე, მიწისქვემოთ ჩავიტანთ საგზაო ინფრასტრუქტურას და ზემოთ მთლიანად მწვანე სივრცე შეიქმნება. პირდაპირ  შეიძლება შარდენიდან ფეხით დავაკავშიროთ ეს სივრცე, რაც ულამაზესი იქნება. ქალაქში დაახლოებით 9-10 ჰექტარი ახალი მწვანე სივრცე ისტორიულ უბანში საოცრება იქნება. თავისი კაფე-ბარებით და სკვერით, ერთ-ერთი საუკეთესო ადგილი იქნება.

მაქსიმალურად ყველაფერს ვაკეთებთ,, რომ ის ხიბლი რომელიც თბილისს აქვს,  მაქსიმალურად აღვადგინოთ, შევინარჩუნოთ და მოვუაროთ.

როდესაც დაასრულებთ მერობას, როგორ გინდათ  შეგაფასონ თბილისელებმა? რას დაუტოვებთ ქალაქს ისეთს, რაც თბილისელებს თქვენს სახელს გაახსენებს?

ჩვენ  უამრავი  პრობლემა გვაქვს, რომელი 30 წელია არსებობს, გუშინ და გუშინწინ არ დაწყებულა. მე იმის ილუზია მართლა არ მაქვს, რომ ჩვენ 4 წლის განმავლობაში ყველაფერს მოვაგვარებთ და პრობლემა არ დარჩება ქალაქში. საღად ვაზროვნებთ და ვაანალიზებთ  არსებულ სიტუაციას, თუმცა, იმის ამბიცია გვაქვს, რომ ბევრი კარგი პროექტი დავუტოვოთ ქალაქს, რომელიც იქნება საამაყო თითოეული თბილისელისთვის.

როგორ გადაწყდება და რა ბედი ეწევა იმ ხმაურიან და სკანდალურ გენგეგმას, რომელიც დაიწყო თქვენამდე და თქვენს შემდეგაც  საკმაოდ დიდი დებატების ფონზე მიმდინარეობდა? თქვენ შექმენით ახალი ჯგუფი, რომლებმაც ფაქტობრივად 80% შესწორებები შეიტანეს იმ ვარიანტში, რომელიც  თავის დროზე „სითი ინსტიტუტმა“ წარმოადგინა. როდის ექნება დედაქალაქს გენგეგმა და რომელი ვარიანტი?!

დიახ, მართლაც ისე იყო, როგორც ამბობთ.  გენგეგმის ის დოკუმენტი, რომელიც ჩვენ გადმოგვეცა, ნამდვილად იწვევდა ჩვენს უკმაყოფილებას.  ამასთან დაკავშირებით ჩვენ კონკრეტული ფაქტებით ვსაუბრობდით და ყველა სეხვედრისას ვამბობდით, რომ მისაღები არ იყო ჩვენთვის ის დოკუმენტი.

რატომ თვლიდით, რომ მიუღებელი იყო?

პირველ რიგში, ამ დოკუმენტის განხორციელება იქნებოდა შეუძლებელი. უბრალოდ დოკუმენტი მიიღო იმისთვის რომ გენგეგმა ერქვას, აბსოლუტურად წარმოუდგენელია ასეთი რამ. შემდეგ მისი განხორციელება შეუძლებელი იქნებოდა და ეს პირიქით, ქალაქს დააზიანებდა და რა თქმა უნდა, ჩვენ დაგვაზიანებდა. შესაბამისად ჩვენ შევქმენით სპეციალური ჯგუფი, სადაც ჩართული იყო სხვადასხვა ქვეყნის ექსპერტები. უნდა აღვნიშნო, რომ ჩვენ ძალიან დაგვეხმარა, საერთაშორისო საფინანსო ორგანიზაციები, რომლებმაც ექსპერტები გამოგვიყვეს სპეციალურად.  მერიიდანაც  იყვნენ  ჩართულები ადამიანები და მათ შორის,  გენგეგმის დოკუმენტის შემქმნელებიც.

მთავრობის მიერ მოწონებულია გენგეგმა უკვე გადაგზავნილია საკრებულოში და ახლა მიმდინარეობს მუშაობა რეგულაციებზე.  გენგეგმა რომ განვახორციელოთ, ამას სჭირდება შესაბამისი რეგულაციების დაწერა, ხო? ალბათ, თებერვლის შუა რიცხვებში უკვე მივიღებთ გენგეგმას.

რაც შეეხება ხმაურიან ტენდერებს, რომლითაც ოპოზიცია ხშირად გიტევთ ხოლმე: მაგალითად, ბაგა-ბაღებში  ბავშვების უხარისხო პროდუქტით კვებასთან დაკავშირებით არა ერთ და ორ ტენდერზე აგორებულა სკანდალი.

მაინტერესებს უჭერთ თუ არა მხარს კანონმდებლობის შეცვლას ტენდერებთან დაკავშირებით? არსებული კანონმდებლობა ხშირად პრობლემებს ქმნის და არაერთი ასეთი პრობლემა უკვე შეგექმნათ. მაგალითად, უზნაძის ქუჩასთან დაკავშირებით, კომპანიამ ვერ შაესრულა სამუშაო და დაზარალდა მოსახლეობა…

უზნაძის ქუჩა, იგივე ვარკეთილის ხიდებიც, ძალიან ბევრია ასეთი რაც ბევრ პრობლემას წარმოადგენს და ის მხოლოდ მერიის პრობლემა არ არის. ზოგადად, ქვეყანაში პრობლემებია ამ თვალსაზრისით. საზოგადოებას, ჩვეულებრივ ადამიანს, არ აინტერესებს  ეს კომპანიის ბრალია თუ არა, ის  ხელისუფლებას სთხოვს პასუხს და სწორიც არის.

შესაბამისად, ამ მიმართულებით მეც მგონია რომ გარკვეული ცვლილებები საჭიროა და გასაკეთებელი. თუმცა ტენდერებს რაც შეეხება და კონკრეტულად გამოთქმულ  კრიტიკას, მოდით, ყველაფერს თავის სახელი დავარქვათ: „ნაციონალური მოძრაობის“ და ხაბეიშვილის მიერ ეს  არის წყლის ნაყვა მეტი არაფერი. ეს არის ძირითადად სიცრუეზე დაფუძნებული განცხადებები.

თქვენ ბაღების ტენდერი ახსენეთ, თუ გახსოვთ, სანამ ტენდერი გამოცხადდებოდა, უკვე კონკრეტული ტელევიზია სიუჟეტებს აკეთებდა იმასთან დაკავშირებით, რომ ერთ-ერთი კომპანია, არ მახსოვს რომელ კომპანიაზე იყო საუბარი, გაკოტრებულია და ტენდერში ვერ იღებს მონაწილეობასო. ტენდერი ჯერ გამოცხადებული არ იყო, 2 დღის მერე გამოცხადდა და დასრულდა წარმატებით. არადა, იუჟეტის შინაარსი ის იყო, რომ 60 ათასზე მეტი ბავშვი კვების გარეშე რჩებოდა ბაღებში. ფაქტია, მიზანმიმართულად სურთ მოსახლეობა დაზაფრონ, მოატყუონ და არ ვიცი რა დავარქვა. თუმცა, ჩვენ ასეთ გამოძახილს უპასუხოდ არ ვტოვებთ და მაქსიმალურად ვცდილობთ,  ყველა ასეთ ცრუ ბრალდებას გაეცეს შესაბამისი პასუხი. კიდევ ერთხელ ვიმეორებ, არანაირი პრობლემა ამ მიმართულებით არ არსებობს.  ამას ჩვენ ვაკონტროლებთ ჩვენი შიდა აუდიტის სამსახური ყოველთვის და ასევე სურსათის სააგენტო გვეხმარება მაქსიმალურად. ყოველგვარი გაფრთხილების გარეშე ვატარებთ რეიდებს შედიან ბაღებში და ამოწმებენ საკვებს.

კიდევ ერთხელ ვიმეორებ, თუ რაიმე დარღვევები იქნება და  დავინახავთ, რომ რამე  პრობლემას უქმნის ბავშვების კვებას, ჩვენი მხრიდან იქნება უმკაცრესი რეაგირება. ჩვენ თვალს არავის დავუხუჭავთ. ეს პირველ რიგში ჩვენს ინტერესებში შედის ეს მიდგომები და დამოკიდებულება. ეს ძალიან კარგად იცის“ ნაციონალურმა მოძრაობამაც“ და ძალიან კარგად იცის  ოპოზიციის თითოეულმა წევრმა.

ხშირად არასერიოზულად უყურებთ ხოლმე ოპოზიციის განცხადებებს, თუმცა სერიოზული პრობლემის წინაშე დადექით საპრეზიდენტო არჩევნების პირველ ტურში.  საქართველოს მოსახლეობა კი დადგა იმ რეალობის წინაშე, რომ შესაძლებელი იყო „ ნაციონალური მოძრაობის“  გარკვეული ფორმით მობრუნება.

ასე ვტქვათ, გაყოფილი„ევროპულ საქართველოს“ და „ნაციონალური მოძრაობას“ ცოტა ხმა ნამდვილად არ შეუგროვებია. თუ გაანალიზეთ, რა მოხდა? რის გაკეთებას პირებთ იმისთვის, რომ 2020 ში ისევ მოხვიდეთ ხელისუფლებაში?

რაც შეეხება პირველ ტურში ვერ გამარჯვებას, ამას თავისი მიზეზები ჰქონდა, რა თქმა უნდა. არის ასევე იმ კონკრეტული ტელევიზიის ცრუ ინფორმაციები, რომელიც, რა თქმა უნდა, ყოველდღიურ რეჟიმში მიეწოდება მოსახლეობას.  თუმცა, მარტო ეს არ არის და ჩვენ ამას არ უნდა დავაბრალოთ არავითარ შემთხვევაში. პრობლემები ჩვენშიც არის და მე მგონია, რომ ზოგადად ჩვენ, ყველა უფრო მეტად აქტიურები უნდა ვიყოთ, უფრო მეტი კომუნიკაციაა საჭირო მოსახლეობასთან.

ზოგადად პრობლემებს რაც შეეხება, თუ რა იყო პირველი ტურის გამომწვევი მიზეზი,  ბევრი იყო.  ახლა ამის ჩამოთვლას ვერ დავიწყებ, თუმცა მაშინაც ვთქვი,  როდესაც პირველი ტური დასრულდა, რომ ეს იყო მოსახლეობის პასუხი და გზავნილი ერთგვარი, ამიტომ ბევრი მიმართულებით ვმუშაობთ ახლა როგორც პარტიაში, ასევე სხვადასხვა მნიშვნელოვან საკითხებზე.

საჭიროა კონკრეტულ საკითხებზე სწრაფი რეაგირება, უფრო მეტი ჩართულობა და კომუნიკაცია სხვადასხვა მიმართულებით.

ჩემი მოადგილეები, სამსახურის უფროსები და ყველა მყავს გაფრთხილებული, რომ ყველამ კარგად უნდა გაითავისოს ის, რომ ჩვენ ვართ ხალხის მსახურები, ჩვენ ვემსახურებით ხალხს და მაქსიმალურად უნდა იყოს სერვისები მოგვარებული. მიმართეთ ნებისმიერ დროს! შეიძლება ადამიანს გარკვეულ რაღაცაებზე  უარი ვუთხრათ, მაგრამ ამ უარსაც ახსნა სჭირდება დეტალური.  ისე უნდა იყოს ნათქვამი, რომ კითხვის ნიშანი არ გაუჩნდეს. იგივე თუნდაც ინფორმაციის მიწოდება, 21-ე საუკუნეა და სოციალური ქსელები ისეთ დონეზეა აწეული, შეიძლება ტელევიზია ძალიან მალე საჭირო აღარ იყო.

სხვათა შორის ადგილობრივი თვითმართველობებს მერებს თუ ავიღებთ, მათი მხრიდან დაბალი დოზით ხდებოდა ან თითქმის არ ხდებოდა ურთიერთობა მოსახლეობასთან და ესეც იყო ერთ-ერთი მიზეზი, რის გამოც პირველი ტური მივიღეთ.

ღირდა ჭკუის სასწავლებლად?

ღირდა საიმისოდ, რომ ბევრ რამეზე დავფიქრებულიყავით.

მმართველ გუნდში, პარტიაში რთული პროცესები დაიწყო და  ქაოტურიც. რა სახის დაპირისპირებაა დღეს „ქართულ ოცნებაში“? ხომ არ უკავშირდება ის 2020 წლის არჩევებისთვის მზადებას?

და რადგან ეს დაპირისპირება მოსამართლეების გამო დაიწყო, აქვე გკითხავთ:    მოსამართლეებს შორის, რომლებზეც დიდი ამბავია ატეხილი, ისინიც არიან: (მაგ: გვრიტიშვილი), რომელიც 2012 წელს ბიძინა ივანიშვილს და მის შემომწირველებს აჯარიმებდა.  თქვენ კახი კალაძე, რომელსაც 2012 წელს გესროდნენ ქვებს, გაჯარიმებდნენ შემოწირულობების გამო,  რას ფიქრობთ ასეთი მოსამართლეები უნდა იყვნენ თუ არა უზენაეს სასამართლოში?

მე მაქვს ძალიან მარტივი მიდგომა ამასთან დაკავშირებით, აუცილებლად უნდა განისაზღვროს და გაიწეროს კრიტერიუმები. ვისაც სურვილი აქვს მოსამართლეობის, ამ კრიტერიუმებს უნდა ექვემდებარებოდეს. ყველაფერი უნდა იყოს ღია და გამჭირვალე. ჩემთვის ძალიან მნიშვნელოვანია სასამართლოს რეპუტაცია. შედარებებიც აუცილებლად უნდა გავაკეთოთ, ისე ძალიან რთულია რაღაცა დაინახო.

ჩვენ თუ ვნახავთ 2012 წლამდე რა მდგომარეობა იყო სასამართლოს მიმართულებით, და რა მდგომარეობაა დღეს, რადიკალურად განსხვავებულია სტატისტიკა.

ცხადია, იმ სასამართლოში ძალიან ბევრი კარგი მოსამართლეა, თუმცა ისინი ამ ყბადაღებულ სიაში არ არიან…

ძალიან კარგი რეფორმა და წინგადადგმული ნაბიჯი გვაქვს, თუმცა ამით არ უნდა დავკმაყოფილდეთ. დამატებით რეფორმებია გასაკეთებელი. აუცილებლად  უნდა გავაკეთოთ ისე, რომ სასამართლოს ჰქონდეს ნდობა.  სასამართლოს რეპუტაცია არის ძალიან მნიშვნელოვანი. თუ არსებობს ისეთი მოსამართლეები, ვისთანაც გვაქვს კითხვები, დაიბარონ პარლამენტში, ხომ არის ამის პლატფორმა და ყველა კითხვას გაეცეს შესაბამისი პასუხი. მე მგონია, რომ ეს მიდგომა არის სწორი.

თუ ყოფილა ისეთი კრიზისული მომენტი, როდესაც გიფიქრიათ საკუთარი გუნდის შექმნასა  და ოპოზიციაში წასვლაზე და რა შემთხვევაში შეიძლება მოხდეს ეს?

იცით რა, დღეს გულწრფელად რომ გითხრათ, იმხელა პასუხისმგებლობა მაქვს აღებული  ქალაქის, თბილისის და თბილისელების წინაშე, რომ ჩემი მთავარი მიზანი და ყოველდღიურობა უკავშირდება მხოლოდ თბილისს და თბილისელებს.

ფაქტობრივად მართო ამხელა ქალაქი, დედაქალაქი მაცხოვრებლით და ამდენი პრობლემით, ძალიან რთულია, მე კარგად მაქვს გააზრებული ეს პასუხისმგებლობა. კიდევ ერთხელ ვიმეორებ, ჩემი ძირითადი ფიქრები და აზრები დაკავშირებულია მხოლოდ და მხოლოდ თბილისთან და თბილისელებთან, იმ პრობლემების გადაჭრასთან რაც ყველას გვაწუხებს და არ გვსიამოვნებს.

თქვენ დიდი სპორტიდან მოდიხართ და ბოლო დროს განვითარებულ მოვლენაზეც უნდა გკითხოთ,  გეგეშიძის სკანდალზე და იმაზე,  რაც მოხდა. ფიქრობთ თუ არა რომ გასატარებელია მნიშვნელოვანი რეფორმა თუნდაც სპორტულ ფედერაციებთან მიმართებაში?

ცხადია, ის რაც მოხდა, არავისთვის მისაღები არ იყო. არაეთიკური იყო ის, რაც ყველამ ვნახეთ ტელევიზიით და ჩემთვის, როგორც ყოფილი სპორტსმენისთვის კატეგორიულად მიუღებელია ეს დამოკიდებულება ფედერაციის პრეზიდენტს და სპორტსმენს შორის.

ზოგადად სპორტს რაც შეეხება, ვიტყოდი რომ ის მიღწევები რაც გასულ წელს გვქონდა, შემთხვევითი არ არის. დიდი ყურადღება ექცევა სპორტს, სპორტის განვითარებას, სხვადასხვა მიმართულებებით.

ფეხბურთი ავიღოთ, რომელიც ძალიან ახლოა ჩემთან, მნიშვნელოვანი რეფორმები განხორციელდა, როდესაც კობიაშვილი და მისი გუნდი მოვიდა ფედერაციაში და შედეგიც გვაქვს სახეზე. ეს შემთხვევით არ ხდება, სახელმწიფოს მხრიდან იყო თანადგომა და სპეციალური პროგრამა შეიქმნა. ამ პროგრამის ფარგლებში საქართველოს ეროვნულ ჩემპიონატს, ქვედა ლიგებსა და ბავშვთა ფეხბურთს აქვს მაქსიმალური მხარდაჭერა და თანადგომა. ეროვნული ნაკრებიც მოწოდების სიმაღლეზეა. დღეს გვაქვს ისტორიული შანსი რომ შემდეგ ეტაპზე გავიდეს საქართველოს ნაკრები. იგივე შემიძლია ვთქვა  სპორტის  სხვა სახეობებზე. ამდენი ოქრო არასდროს მიგვიღია და ნამდვილად მეამაყება, ამდენი ღირსეული და წარმატებული სპორტსმენი რომ გვყავს

ცილისწამების კანონზე რას ფიქრობთ? სად გადის ზღვარი ამ კანონსა და გამოხატვის თავისუფლებას შორის?

კანონი აუცილებლად მისაღებია. აქ ჩვენ შეგვიძლია გავიზიაროთ ევროპული ქვეყნების მაგალითი. ეს ზოგადად ყველგან სერიოზულ პრობლემას წარმოადგენს. ცილისწამება, ფეიქ-ნიუსები და არაფრის გამო ადამიანს გიწევს თავის მართლება. საზოგადოება შეჰყავთ შეცდომაში, შენს ირგვლივ  ქმნიან არასწორ იმიჯს, არასწორ ინფორმაციას აწვდიან მოსახლეობას და შენ ვალდებული ხარ, გამოხვიდე და თავი იმართლო. ეს კატეგორიულად მიუღებელია!

სხვათა შორის, ჩვენი ოპონენტები ხშირად იყენებენ ამას და პროფესიონალები არიან ამაში. მე მგონია, რომ აუცილებლად მისაღებია ეს კანონი, თუმცა, კიდევ ერთხელ ვიმეორებ, რთულია ზღვარის გავლება. მაგრამ ვნახოთ, როგორია საუკეთესო ქვეყნების მაგალითი.

 

 

მსგავსი სიახლეები
კომენტარები
იტვირთება...