“მე ერთნაირად მენდობიან რუსეთშიც, ევროკავშირშიც და აშშ-იც” – ინტერვიუ ნინო ბურჯანაძესთან

„ერთიანი საქართველო – დემოკრატიული მოძრაობის“ ლიდერი ნინო ბურჯანაძე „აიპრესთან“ ინტერვიუში აცხადებს, რომ მისი პარტიის რეიტინგი არ დაკლებულა, რეიტინგებში კი 1% ჰქონდა წინა არჩევნების დროსაც, მაგრამ ოფიციალური შედეგებით 5%-ს ზღვარზე იყვნენ, რეალურად კი გაცილებით მეტი ხმა აიღეს.  ამბობს, რომ ბიძინა ივანიშვილმა ხმები მოპარა და მათი ნაწილი „პატრიოტთა ალიანსს“ მისცა. ბურჯანაძე აქვე აცხადებს, რომ მისი პარტია ჯერ სააკაშვილმა დაატერორა, მერე ივანიშვილმა.

ბურჯანაძე იმასაც ამბობს, რომ პრემიერობაზე მიხეილ სააკაშვილს მხარს არ დაუჭერს, გიორგი ვაშაძეზე კი ფიქრი შეიძლება, თუმცა მისი აზრით პრემიერი გამოცდილი პოლიტიკოსი უნდა იყოს. ამბობს, რომ მისი შანსი მიღებულ ხმებზეა დამოკიდებული.

რა საარჩევნო დაპირებები აქვს, რა ხედვები აქვს საშინაო და საგარეო პოლიტიკაში, შეიცვალა თუ არა ხედვები რუსეთთან და ნატოსთან დაკავშირებით? – ამ და სხვა საინტერესო საკითხებზე ნინო ბურჯანაძე „აიპრესთან“ ინტერვიუში საუბრობს (ინტერვიუ ჩაწერილია პარასკევს, 25 სექტემბერს ავტ:):

_ რა ხდება ოპოზიციაში? იქით მიშას და ბოკერიას დაპირისპირებაა, მანამ იყო „ნაცმოძრაობის“ დაპირისპირება გიორგი ვაშაძესთან, ახლა უკვე ამაში ჩაერთო „გირჩიც“… ვის წისქვილზე ასხამს წყალს ეს კინკლაობა?

_ მე რა თქმა უნდა ყველაფერს თვალს არ ვადევნებ, მაგრამ ვხედ, რომ არის გარკვეული კამათი და დაპირისპირება ცალკეულ ოპოზიციურ პარტიებს შორის. პრინციპში ამაში განსაკუთრებულ ტრაგედიას ვერ ვხედავ იმ მარტივი მიზეზის გამო, რომ ჩვენ არ ვართ ერთი ბლოკი. ერთი პარტიის ან ბლოკის შიგნით რომ ყოფილიყო დაპირისპირება, ეს გაუგებარიც იქნებოდა, მაგრამ სხვადასხვა ოპოზიციური პარტიებია, რომელსაც ჰყავს კონკურენტი არა მხოლოდ „ქართული ოცნება“, არამედ ჩვენ ყველანი გარკვეულწილად ერთმანეთის კონკურენტები ვართ. მით უმეტეს „გირჩი“, „ევროპული საქართველო“, „ნაციონალური მოძრაობა“ ეს პარტიები მეტ-ნაკლებად ერთი ამომრჩევლის ხმების მოპოვებას და გულის მოპოვებას ცდილობენ. მათ გარკვეულწილად ამომრჩევლის ერთი სეგმენტი ჰყავთ.

რა თქმა უნდა, ძალიან მნიშვნელოვანი იქნებოდა ქვეყნისთვისაც და პოლიტიკური პროცესისთვისაც, რომ დავუშვათ რაც შეიქმნა კონსტიტუციური ცვლილების მოსაპოვებლად ყველა ერთის წინააღმდეგ, ეს დროებით მაინც შენარჩუნებულიყო. იცით თქვენ, რომ იყო ამაზე ლაპარაკი, რომ ერთგვარი ერთობა ყოფილიყო, რაღა ხელისუფლება შეცვლილიყო და შემდეგ ყველა პოლიტიკური პარტია თავის გზას დაადგებოდნენ.

ხელისუფლება გულის მოოხებით და კმაყოფილებით ნუ შეხედავს რაიმე კამათს ოპოზიციურ პარტიებს შორის. ძირითადი ოპოზიციური პარტიები, რომლებიც არ არიან ხელისუფლების სატელიტები, ისინი მაინც ინარჩუნებენ რამდენიმე საკითხში ერთობას: პირველი, უნდა გავუფრთხილდეთ მონაპოვარს კონსტიტუციური ცვლილებების სახით. მეორე, მეტ-ნაკლებად კოორდინირებულები უნდა ვიყოთ მაჟორიტარებთან დაკავშირებით. მესამე, ყველაფერი უნდა გავაკეთოთ იმისათვის, რომ იმ შტაბმა, რომელიც ხმების დასაცავად შეიქმნა, იმუშაოს. ეს შტაბი ლაგდება და თანდათანობით ამუშავდება ყოველდღიურ რეჟიმში. რაც მთავარია, უნდა შევინარჩუნოთ ერთობა იმისათვის, რომ ბიძინა ივანიშვილი და მისი ხელისუფლება გადავიდეს ოპოზიციაში და ქვეყნის მართვის სათავეებში მოვიდეს მრავალპარტიული პარლამენტი და კოალიცია. ეს მიზნების მთავარი.

_ თუმცა საუბრობდით იმაზეც, რომ არჩევნებზე არ ყოფილიყო ერთმანეთის მიმართ ტალახის სროლა არ ყოფილიყო.

_ მგონია, რომ ტალახის სროლა ძირითად ოპოზიციურ პარტიებს შორის მაინც მინიმუმამდეა დასული. გახსოვთ, ტალახი ისეთი იყო ხოლმე, რომ მე მგონი ჩვენი საზოგადოების ნოუჰაუ იყო, ისეთი ტალახის სროლა იყო. ახლა გაცილებით სხვა რეალობაა და თანდათანობით პოზიტიურისკენ არის წასული. აქ მთავარია, რომ ოპოზიცია ერთიანია იმაზე, რასაც ჰქვია თავისუფალი და დემოკრატიული არჩევნების ჩატარება. დანარჩენი კი ბრძოლის სტრატეგიული მიზანია, რომ ხელისუფლება შეიცვალოს და მრავალპარტიული მთავრობა და მრავალპარტიული პარლამენტი გვქონდეს. ალაგ-ალაგ ბრძოლები თუ იქნება, ამას პრინციპული მნიშვნელობა არ აქვს.

_ თქვენც და სხვა პარტიებიც სულ საუბრობდით ხოლმე, რომ ბიძინა ცდილობს პოლარიზაციას. დღეს ეს ნიშა ხომ არ დაიკავა მიშამაც?

_ კი, რა თქმა უნდა. იმიტომ, რომ პოლარიზაციის თემა ყოველთვის აწყობდა ბიძინასაც და მიშასაც. ეს შეუაიარაღებელი თვალით ჩანდა და მე ეს არაერთხელ მითქვამს. სააკაშვილი არ არის ის ფიგურა, რომელიც მაინცდამიანც სხვების ანგარიშის გაწევით თავს დაიღლის. ამიტომ, ბუნებრივია ის ცდილობს, რომ თავისი პარტიის სასარგებლო ნაბიჯები გადადგას. ეს რა თქმა უნდა სხვა პარტიებს აზარალებს, რადგან ხდება პოლარიზაცია და შეიძლება ამან ბიძინა ივანიშვილს ხმები მოაპოვებინოს, მაგრამ ვნახოთ. ჯერ ნაადრევია ამაზე ლაპარაკი. ვფიქრობ, რომ საზოგადოებას კარგად უნდა ესმოდეს, რომ პოლარიზაცია ძალიან ხელოვნურია. ახლა არის დიდი არჩევანი და არა მხოლოდ ბიძინა თუ მიშა, არამედ ბიძინა, მიშა თუ სხვა პარტიები, მათ შორის „ერთიანი საქართველოს“ და ნინო ბურჯანაძე. იგივე „ლელო“, „ევროპული საქართველო“, „სტრატეგია აღმაშენებელი“ თუ სხვა პარტიები.

მოდი, ყველაფერს თავისი სახელი დავარქვათ. თუ ახლა თავის მართლება უნდა ამომრჩეველს, რომელსაც ხმის მიცემა ან ბიძინასთვის უნდა, ან მიშასთვის, ეს ასე არ არის. დღეს საქართველოს მოსახლეობას არჩევანი აქვს. თუ გამოვიხედავთ, არჩევანი არსებობს, ხოლო თუ თავის შეწუხება არ გვინდა და ან ბიძინასგან ველოდებით ოქროს წვიმას, ან სააკაშვილი მიგვაჩნია მესიად და ამიტომ სხვების დანახვა არ გვინდა, ეს ოპოზიციური პარტიების ბრალი ნამდვილად არ არის. საზოგადოება იღებს გადაწყვეტილებას, გაათამაშებინებს თუ არა ბიძინას და მიშას ორპულუსიანობას.

_ თქვენთვის იყო ცნობილი, რაზეც სააკაშვილი საუბრობდა, რომ მას სურდა ერთიანი სია ყოფილიყო. თქვენი თანდასწრებით ამაზე თუ ყოფილა საუბარი?

_ რა თქმა უნდა წინასწარ არა. სააკაშვილი წინასწარ მაშინ არ მითანხმებდა რაღაცებს, როდესაც ხელისუფლებაში ვიყავი და ახლა თავისი პარტიის წევრებს არ უთანხმებს და ბუნებრივია, არც შემითანხმებდა და არც მაქვს ამის არც სურვილი და არც პრეტენზია. შემდეგ როდესაც მან ეს განცხადება გააკეთა, მე ჩემი პოზიცია მქონდა. რომ არა თავად სააკაშვილის ფაქტორი, ეს იდეა რა თქმა უნდა კარგი და სწორი იყო. მე ინტერვიუს დასაწყისშიც ვთქვი, რომ ყველა ერთის წინააღმდეგ, ეს იქნებოდა მნიშვნელოვანი გარღვევა და ივანიშვილს არჩევნების მოგების შანსი არ ექნებოდა. მთავარი აქ იყო სააკაშვილის ფაქტორი, რომელიც აბსოლუტურად მიუღებელი იყო. იცით, რომ მე არასოდეს არ გავაკეთებ იმას, რომ ოღონდ ბიძინა წავიდეს და ამით თუნდაც 1%-ით დავუშვა მიშას მობრუნების შანსი.

_ თუმცა, როდესაც პარტიებს შორის განსხვავებებზე საუბრობთ, ერთიანი სიის შემთხვევაში როგორ მოხდებოდა ეს?

_ ჩვენ უნდა შევეჩვიოთ იმას, რომ კოალიციური მთავრობა და მრავალპარტიულობა ზუსტად განსხვავებულობას ნიშნავს. ვინც ჩემსავით ფიქრობს, მათი აბსოლუტური უმრავლესობა ან ჩემ პარტიაშია, ან ჩემი მომხრეები არიან. ზუსტად, რომ განსხვავებულია ადამიანების ხედვა, სწორედ მაგიტომ ქმნიან სხვა პარტიას ან სხვა პარტიას უჭერენ მხარს. როდესაც ვსაუბრობთ ბლოკზე, ეს იქნებოდა განსხვავებულთა ერთობა და ეს იქნებოდა დროებითი ერთობა. გახსოვთ, რომ ჩვენ ვამბობდით, რომ თუ ასეთი რამე მოხდება, მაშინ პრაქტიკულად 6 თვეში ვადამდელი საპარლამენტო არჩევნები უნდა დანიშნულიყო და შემდეგ მოხდებოდა ყველა პოლიტიკური პარტიის მიერ ინდივიდუალურად ხმების მოპოვება. თუმცა, კიდევ ერთხელ ვიმეორებ, მიშას სურვილმა, რომ ამ იდეის ლოკომოტივი ყოფილიყო თვითონ და „ნაციონალური მოძრაობა“ ეს იდეა ჩაშალა.

_ თქვით, რომ პრემიერობის კანდიდატად სააკაშვილს მხარს არ დაუჭერთ. რას ფიქრობთ სხვა კანდიდატებზე. მაგალითად, ვაშაძე, რომელიც ასევე დასახელებულია, მას დაუჭერთ მხარს?

_ გიორგი ვაშაძე ნამდვილად მონდომებული ახალგაზრდა კაცია, საქმის კეთებაც იცის და ძალიან ენერგიულია, მაგრამ მე ვფიქრობ, რომ გამოცდილება ძალიან მნიშვნელოვანია. ეს ჩემთვის ძალიან პრინციპულია. ჩვენ ერთხელ უკვე ვიწვნიეთ, როდესაც ძალიან ენერგიული და ენთუზიაზმით აღსავსე, მაგრამ გამოუცდელი ახალგაზრდები მოვედით ხელისუფლებაში 2003 წელს.

არ ვიცი. არ მინდა რადიკალურად ვინმეზე ვთქვა კი ან არა, გარდა სააკაშვილისა. იმედია მერაბიშვილს და ადეიშვილს არავინ დააყენებს კანდიდატად, მაგრამ… სააკაშვილი გამორიცხულია, დანარჩენებზე, მათ შორის ვაშაძეზეც რაღაცა პროცენტით ფიქრი შეიძლება, თუმცა მიმაჩნია, რომ ქვეყანას სჭირდება ძალიან გამოცდილი ლიდერი და ეს ხალხმა უნდა გადაწყვიტოს. არავინ არ იცის, ჩემი არჩევანი იქნება ძალიან აქტიური და მომაპოვებინებს ძალიან ბევრ ხმას, რომელიც მნიშვნელოვანი იქნება მინისტრთა კაბინეტის და პრემიერის განხილვასთან დაკავშირებით თუ სხვისი ამომრჩეველი.

_ იგივე ბაქრაძეზე ან ბოკერიაზე რას ფიქრობთ?

_ მე საერთოდ მიმაჩნია, რომ მე ჩემ კანდიდატურაზე უნდა ვილაპარაკო და არა სხვების კანდიდატურაზე. მე საერთოდ მგონია, რომ როდესაც ბურჯანაძე გყავს პოლიტიკაში, სხვა კანდიდატებზე ლაპარაკი მეორე ეტაპია. იმიტომ, რომ ქვეყანას სჭირდება გამოცდილი და ავტორიტეტული ლიდერი, მაგრამ მოდით ვაცადოთ საზოგადოებას, ვის რამდენ ხმას მისცემენ. ბოკერია პრემიერობის კანდიდატად თავისი პარტიის მხრიდანაც კი არ განიხილება და მე და თქვენ რატომ უნდა ვილაპარაკოთ ამაზე?! შევხედოთ, როგორ დალაგდება პოლიტიკური სპექტრი და შევხედოთ რა რეალობა იქნება. მე არ გამოვრიცხავ, რომ თუ აბსოლუტურად მიუღებელი იქნება ჩემთვის ესა თუ ის კანდიდატურა და ჩავთვალე, რომ არავის არ უნდა დავუჭირო მხარი, შეიძლება არც არავის დავუჭირო.

_ ანუ, თქვენ პრემიერობის კანდიდატობას აპირებთ?

_ ამ წუთში არ ვაპირებ. ჯერჯერობით პარლამენტში სერიოზული ხმების მოპოვებას ვაპირებ. ჯერ პრემიერობაზე ლაპარაკი არასერიოზულია. ამიტომ ვამბობ, რომ ახალგაზრდობა და ენთუზიაზმი კარგია, მაგრამ პოლიტიკაში სიჩქარე არ ვარგა. ჯერ ადრეა პრემიერ-მინისტრობაზე ლაპარაკი, როდესაც ჯერ არ ჩამოყალიბებულა საზოგადოებრივი აზრი პარლამენტთან დაკავშირებით. შესაძლოა პარტიებს შიგნით ამაზე საუბარი იყოს, მაგრამ ოპოზიციურ საპრემიერო კანდიდატზე საუბარი ჯერ ნაადრევი და არასწორია. მოდით, ჯერ პარლამენტი ავირჩიოთ და მერე ვილაპარაკოთ პრემიერობის კანდიდატებზე. ხალხი ერთიან კანდიდატს არც ითხოვს, იმიტომ რომ ადამიანებს ესმით, რომ ეს არ არის ერთი ბლოკი და ზოგადად დემოკრატიულ ქვეყნებში ჯერ პარლამენტი აირჩევა, მერე კოალიცია დგება და მერე ხდება პრემიერობისა და მინისტრობის კანდიდატებზე შეთანხმება. ჩვენც დავემსგავსოთ თანდათან ცივილიზებულ ქვეყანას.

_ კი ბატონო, ავირჩიოთ პარლამენტი და გადავიდეთ კვლევებზე. ნინო ბურჯანაძის და მისი პარტიის რეიტინგი წინა არჩევნებზე იყო 5%-ის ზღვარზე. თითქმის გადალახეთ საარჩევნო ბარიერი. დღეს კვლევებით გაქვთ 1%. რატომ დაიკო თქვენმა რეიტინგმა?

_ არ ვთვლი, რომ ჩემმა რეიტინგმა დაიკლო. ჯერ ერთი წინა არჩევნებზე 5% არ გვქონდა, გაცილებით მეტი გვქონდა. თითქმის კი არ გადავლახეთ, გადავლახეთ. გაჩვენეთ გაყალბების უამრავი დოკუმენტები.

_ მე გეკითხებით ოფიციალურ მონაცემებზე დაყრდნობით.

_ კი ბატონო, მაგრამ ჩვენ ხომ რეალობა გვაინტერესებს და არა მხოლოდ ქაღალდზე დაწერილი?! ჩვენ გადავლახეთ ბარიერი, უბრალოდ ჩვენი ხმები ბიძინა ივანიშვილმა მოიპარა და გადაულაგა ნაწილი თავის პარტიას და ნაწილი მაშინდელ ოპოზიციას, მათ შორის „პატრიოტთა ალიანსს“. დღესაც სიამოვნებით გააკეთებს იგივეს თუ ამის შესაძლებლობა ექნება.

სხვათა შორის მაშინაც რაც „ქართულმა ოცნებამ“ დაწერა ყველაზე მინიმუმი თითქმის 5% დაფიქსირდა, თუმცა კვლევებში მაშინაც 1% გვეწერა. იმიტომ, რომ ჩვენი ამომრჩეველი არ ამბობს, რომ ჩვენ გვაძლევენ ხმას. გუშინ საბურთალოს ამომრჩეველთან მქონდა შეხვედრა და მითხრეს, რომ ჩვენთან როდესაც მოდიან, ჩვენ ან კარს არ ვუღებთ, ან არ ვეუბნებით, ვის ვაძლევთ ხმასო.

_ რატომ?

_ იმიტომ, რომ ეს პარტია ჯერ მიხეილ სააკაშვილმა დაატერორა დაარსების დღიდან და ჩვენი მხარდაჭერა პირდაპირ ციხეში წასვლას და სამსახურის დაკარგვას ნიშნავდა. როდესაც ივანიშვილი მოვიდა ხელისუფლებაში, მერე ივანიშვილმა გააგრძელა ეს ტერორი. იმიტომ, რომ ყველა ადამიანი ვისაც სამსახურის დაწყება უნდოდა, ეუბნებოდნენ, რომ თუ მუშაობის დაწყება გინდა, მაშინ ბურჯანაძის პარტიას თავი დაანებეო.

_ პრორუსული იარლიყი ხომ არ აქვს თქვენ პარტიას და ამასაც ხომ არ ერიდება ამომრჩეველი?

_ არა, პრორუსული იარლიყი არაფერ შუაშია. ახლა ბიძინა ივანიშვილს 5 მილიარდი ბაბუამისმა დაუტოვა საჩხერეში?! რომელ პრორუსულზე მელაპარაკებით? ივანიშვილი უბრალოდ ვერ იტანს დამოუკიდებელ, ჭკვიან და გამოცდილ ადამიანებს. წავიკითხეთ, ხომ რაც დაწერეს ოჯახის წევრებმა, რომ მას ელაპარაკებიან, როგორც მეფეს. ბურჯანაძე ივანიშვილს კი არა, არავის არ დაელაპარაკება, როგორც მეფე. დედოფალს ველაპარაკე ბრიტანეთში და სხვაგანაც მქონდა მეფეებთან შეხვედრები, ესპანეთში და სხვაგანაც და ველაპარაკებოდი როგორც მეფეებს, მაგრამ ივანიშვილის მისგან ძალიან შორს არის. ასე, რომ აქ პრობლემაა ის, რომ მას ბურჯანაძე არ აწყობს პარლამენტში როგორც დამოუკიდებელი და ძლიერი პოლიტიკოსი. 5 მილიარდი რუსეთში რომ იშოვა და მერე იქიდან გამოიტანა ეს ფული, ახლა პრორუსულობაზე მე ნუ მელაპარაკება ის და მისი პარტია.

_ გადავიდეთ პროგრამულ ნაწილზე. რა გეგმები გაქვთ საგარეო პოლიტიკასთან დაკავშირებით. წინა არჩევნებზე თქვენი ერთ-ერთი ინიციატივა ნატოში გაწევრიანების წინააღმდეგ იყო მიმართული. დღესაც რჩება ეს თუ ამ მიმართულებით ხედვა შეიცვალეთ?

_ ჩვენ მომავალ კვირას გვექნება პარტიის პროგრამის პრეზენტაცია და ამას ფართოდ გავაშუქებთ, მათ შორის ონლაინ რეჟიმშიც. უკვე გვაქვს მომზადებული ბუკლეტი, სადაც კარგად არის ასახული, რა გვინდა ჩვენ და როგორ წარმოგვიდგენია პარტიის განსახორციელებელი საქმეები. იმედი მაქვს, რომ ამ პრეზენტაციას კიდევ უფრო ღრმად გააშუქებთ.

მოდი, გეტყვით პრიორიტეტებს პროგრამულ ნაწილში. პირველ რიგში ეს პრიორიტეტები არის მშვიდობა და უსაფრთხოება. მე ნამდვილად შემიძლია ჩვენს საზოგადოებას გარანტია მივცე, რომ ჩვენი არჩევის შემთხვევაში ქვეყანას საფრთხე აღარ დაემუქრება. იმიტომ, რომ მეზობელ სახელმწიფოებთან ურთიერთობები მოწესრიგდება და ნებისმიერი პროვოკაციული ქმედება გამორიცხული იქნება და ეს ჩვენმა საზოგადოებამ ძალიან კარგად იცის. ყველაფერს გავაკეთებ იმისათვის, რომ დავალაგოთ ურთიერთობები, რაც ჩვენი ქვეყნის სტაბილურობას უქმნის საფრთხეს.

_ რაზე დაყრდნობით ამბობთ ამას? გვახსოვს, რომ ივანიშვილიც გვპირდებოდა ამას, რომ მოაგვარებდა ურთიერთობას რუსეთთან, მაგრამ ვხედავთ რა ვითარებაც არის. თქვენ რა გაძლევთ ამის თქმის გაკეთების საფუძველს?

_ ივანიშვილსა და ბურჯანაძეს შორის პრინციპული განსხვავებაა. იმიტომ, რომ ბურჯანაძეს არასოდეს არ მიუცია ტყუილი დაპირებები არავისთვის. მე რასაც ვპირდებოდი ადამიანებს, როგორც მინიმუმ მის შესრულებას ვცდილობდი. განსხვავებით ივანიშვილისგან, რომელიც თავიდანვე იტყუებოდა, როდესაც ერთ სოფელს 5 მილიონს ჰპირდებოდა. მე ასეთი ტყუილი დაპირებები არასოდეს არ მიმიცია. მე ვიცი, რას ვპირდები ადამიანებს. მე ვარ ადამიანი, რომელსაც ერთნაირად ენდობიან რუსეთშიც, ევროკავშირშიც და აშშ-იც და სამეზობლოშიც. მენდობიან იმიტომ, რომ მტერმაც და მოყვარემაც კარგად იცის, რომ მე არასოდეს სიტყვას არ ვტეხ. ასევე მე ტყუილ დაპირებებს არ ვიძლევი. რაც არ შემიძლია მე იმ დაპირებას არ ვიძლევი, ან პირდაპირ ვამბობ, რომ არ შემიძლია, რამდენადაც არაპოპულარული უნდა იყოს. ამიტომ მე შემიძლია, რომ მაღალკვალიფიციური და ქვეყნის ინტერესებიდან გამომდინარე დიალოგი წარვმართო ყველასთან.

მეორე ფუნდამენტური საკითხია ეკონომიკა, რომელიც ძალიან აწუხებს ჩვენს მოქალაქეებს. ეს მნიშვნელოვანწილად არის დამოკიდებული საგარეო პოლიტიკაზე. იმიტომ, რომ თუ არ იქნება სტაბილურობა, ბუნებრივია, რომ ეკონომიკაც ვერ განვითარდება. ამისდა მიუხედავად ჩვენ გვაქვს კონკრეტული ინიციატივები, რა უნდა გავაკეთოთ იმისათვის, რომ პირველ რიგში ინვესტიციები შემოვიდეს ქვეყანაში და ეს ინვესტიციები იყოს ძალიან სერიოზული კომპანიებიდან. ამას სჭირდება სტაბილური გარემო, ამას სჭირდება გამჭვირვალე მმართველობა და არა ჭორვილაში მჯდომი ფეოდალი და ამას სჭირდება დამოუკიდებელი სასამართლო. როდესაც ნებისმიერი ქვეყნის ინვესტორი ხედავს იმას, რაც მოხდა დავუშვათ ანაკლიასთან დაკავშირებით, როდესაც ივანიშვილს შეუძლია 100 მილიონიანი ინვესტიციების პატრონი ქვეყნიდან გააგდოს, იმიტომ რომ თავად ასე უნდა, ბუნებრივია, რომ არცერთი ნორმალური ინვესტორი ამის შემდეგ ქვეყნისაკენ არ გამოიხედავს.

პრინციპულად მნიშვნელოვანია, რომ ქვეყანაში მოვიდნენ პროფესიონალები და პროფესიონალები მართავდნენ ყველა მიმართულებას და არა ერთგულების ნიშნით დანიშნული ადამიანები. კარგად იცით, რომ ნებისმიერი გუნდის პროფესიონალთან შემიძლია მუშაობა და არ მეშინია ადამიანების და არ მაქვს იმის შიში, რომ ვინმე იტყვის, რომ ბურჯანაძეზე უკეთესად ეს საქმე სხვამ იცისო და არ მაქვს პრეტენზია, რომ ეკონომიკა განათლება, საგარეო პოლიტიკა და ყველა მიმართულება ერთნაირად კარგად ვიცი, მადლობა ღმერთს ამის პრეტენზია ნამდვილად არ მაქვს. მაგრამ, შემიძლია ვიპოვო ადამიანები, ვინც ეს საქმე ძალიან კარგად იციან და ვამუშავო ეს ადამიანები ისე, რომ ქვეყნისათვის სასიკეთო ნაბიჯები გადაიდგას. კონკრეტული წინადადება მაქვს, როგორ გავაიაფო გაზი და ელექტროენერგია.

_ გვითხარით როგორ? კონკრეტული ხედვები მაინტერესებს.

_ ახლავე გეტყვით. მაგალითად, დღეს გაზის და ელექტროენერგიის შემოტანასთან დაკავშირებით დადებულია კაბალური ხელშეკრულებები, სადაც უზარმაზარი კორუფციული სქემებია. კაბალური ხელშეკრულებებიდან წილები მისდით ხელისუფლების წარმომადგენლებს. ამ ხელშეკრულებებს სჭირდება გადახედვა კომპეტენტური და წესიერი ადამიანების მიერ და გარწმუნებთ, რომ ფასი შემოტანილ ელექტროენერგიასა და გაზზე იმდენად შემცირდება, რომ ჩვენ შევძლებთ კომუნალურ გადასახადების 25%-ით შემცირებას – ელექტროენერგიასა და გაზზე. ეს არ არის რთული საქმე. მე შემიძლია რუსეთთანაც და აზერბაიჯანთანაც ისე წარვმართო  მოლაპარაკებები და რაც მთავარია გამჭვირვალედ, რომ გაცილებით დაბალი იქნება ფასი.

ასევე მარტივად შეიძლება სსიპ-ების და აიპ-ების გაბერილი ხარჯების შემცირება. როდესაც ადამიანები არ მუშაობენ, მაგრამ „ქართული ოცნების“ ერთგულების გამო ეძლევათ ხელფასი, ამის ნაცვლად უნდა შეიქმნას რეალური სამუშაო ადგილები და ადამიანები მართლა დასაქმდნენ. შესაბამისად, საზღვარგარეთ წასული ადამიანები, რომლებიც იქ დებენ თანხებს ეკონომიკაში, აქ ჩამოვიდნენ და ქართული ეკონომიკა დააყენონ ფეხზე, ამით ბევრი რამის გაკეთება შეიძლება.

_ ანუ, ბიუროკრატიის ხერჯების შემცირებასაც აპირებთ?

_ რა თქმა უნდა. შემცირება არ უნდა იყოს თვითმიზანი, მაგრამ ეს ხარჯები უნდა შემცირდეს ობიექტურად და უნდა იყოს ოპტიმიზაცია. ისეთ უსინდისობა, რაც გააკეთა „ქართულმა ოცნებამ“ არასოდეს გავაკეთებ. მხედველობაში მაქვს ის, რომ საარსებო მინიმუმი დაწია ხელოვნურად. 2500 კალორია ამ უსინდისოებმა 2300-ზე ჩამოწიეს და 2300 კალორია მამაკაცს არ აკმაყოფილებს. ასეთ უნამუსობას ნამდვილად არ გავაკეთებ. ცხვირში ამოვადენ ამას იმას, ვინც ასეთ უნამუსობას აკეთებს. დღეს რომ იძახის „ოცნება“ სიღარიბემ მოიკლოვო, ნაკლები ღარიბი იმიტომ კი არაა, რომ ადამიანებს შემოსავალი მოემატათ, არამედ სტატისტიკურად იმიტომ არის ნაკლები ღარიბი, რომ გაზრდილი ფასების პირობებში საარსებო მინიმუმი ჩამოწიეს. იქიდან ამოიღეს ტუალეტის ქაღალდი და კბილის ჯაგრისი და უთხრეს გაჭირვებულ ადამიანებს, რომ საჭმელს რახან ჭამ კბილის ჯაგრისი, საპონი და ტუალეტის ქაღალდი არ გინდაო. ამით მათ ღირსება შეულახეს.

ახლა თუ ქართველ ხალხს უნდა, რომ აირჩიოს ადამიანი, რომელსაც თავად 7 მილიარდი აქვს და სხვებს ეუბნება, რომ ნახევრად მშივრებმა და ჭუჭყიანებმა იარეთო, მაშინ რას ვიზამთ, მაშინ მოგვიწევს ასეთ ხალხთან და ხელისუფლებასთან ცხოვრება.

_ ნატოსთან დაკავშირებით დასმულ კითხვაზე არ მიპასუხეთ და თუ შეიძლება გამცეთ პასუხი ამაზე.

_ რაც შეეხება ნატოს, ჩემი პოზიცია ცნობილია. ჩვენ რა თქმა უნდა, ნატოსთან ურთიერთობა და თანამშრომლობა უნდა გავაგრძელოთ ისეთ საკითხებში, როგორიც არის ავღანეთი, საერთაშორისო უსაფრთხოება, მაგრამ ნატოში შესვლა დღეს არარეალისტურია. აბსოლუტური ტყუილია, ვინც გვეუბნება, რომ ნატოში შევალთ. თუ შევლენ, შევიდნენ ბატონო, მაგრამ მე ვიცი, რომ ვერ შევალთ. მასთან უნდა ვითანამშრომლოთ ინტენსიურად, მაგრამ ნატოს ბაზების საქართველოში განთავსებაზე საუბარი მხოლოდ და მხოლოდ აზიანებს საქართველოს ინტერესებს.

_ ანუ, ნატოს ბაზების განთავსებასთან დაკავშირებით თქვენი პოზიცია უცვლელია. რაც შეეხება რუსეთთან ურთიერთობას, ამ მიმართულებით რა გეგმა გაქვთ?

_ მოლაპარაკება, მოლაპარაკება და მოლაპარაკება. ძალიან რთულია, არ არის რუსეთი მარტივი სუბიექტი და მეზობელი და რა თქმა უნდა სირთულეები იქნება.

_ რუსეთთან მოლაპარაკება ერთი ერთზე უნდა გაიმართოს?

_ ერთი ერთზეც, ერთი ათზეც, ერთი სამზეც… ასევე ჩვენ გვაქვს პროგრამაში, რომ უნდა გამოვიყენოთ აბსოლუტურად ყველა შესაძლებლობა იმისა, რომ აფხაზეთი და სამაჩაბლოს პრობლემები დავაბრუნოთ არა მარტო ჩვენი, არამედ საერთაშორისო თანამეგობრობის დღის წესრიგში და ასევე ჩვენთვის ძალიან მნიშვნელოვანია, რომ გავაღრმავოთ ორმხრივი ურთიერთობები ამერიკასთანაც, ევროკავშირთანაც და მეზობელ სახელმწიფოებთან.

რაც შეეხება ოკუპაციას, აქ პრინციპული და გადამწყვეტი როლი აქვს რუსეთის პოლიტიკას. ჩვენ უნდა ვაწარმოოთ პრინციპული მოლაპარაკებები არა მარტო რუსეთთან, არამედ თანმიმდევრული დიალოგი ვაწარმოოთ აფხაზეთთან და ოსეთთან. ჩატეხილი ხიდების აღსადგენად ყველაფერი უნდა გავაკეთოთ.

_ სახალხო დიპლომატიას გულისხმობთ?

_ არა მხოლოდ. მათ შორის პოლიტიკოსებთან საუბარსაც. რა თქმა უნდა, ეს არავითარ შემთხვევაში არ ნიშნავს აღიარებას, მაგრამ ეს ნიშნავს მოლაპარაკების დაწყებას, რომ პრობლემები თანდათანობით მინიმუმამდე დავიდეს. ამავე დროს ყველა საერთაშორისო ფორმატი ეფექტიანად უნდა გამოვიყენოთ, მათ შორის ჟენევის ფორმატი. თუმცა, ის რომ ეს ფორმატები საკმარისი არ არის და მას სჭირდება ორმხრივი ფორმატის დამატება რუსულ-ქართული უმაღლესი დიალოგის სახით, ეს არის ფაქტი.

_ მართლა გჯერათ, რომ მცოცავ ოკუპაციას შეაჩერებთ და რუსეთთან ურთიერთობების დარეგულირება შესაძლებელია?

_ კი არ მჯერა, ვიცი რომ შევაჩერებ. თუ ვიქნები უფლებამოსილი, ქართველი ხალხის სახელით ველაპარაკო რუსეთის ხელისუფლებას. გჯერა, არ გჯერა, მოგწონს, არ მოგწონს, ოცნებობ, არ ოცნებობ… ეგ კითხვები „ქართულ ოცნებასთან“. მე ვიცი, რასაც ვამბობ.

ახლა მსოფლიო ეკონომიკა შედის უმძიმეს კრიზისში და საქართველოს ეკონომიკა იქნება კატასტროფულ მდგომარეობაში. ხედავთ ლარი რა დღეშია და მე პირველი ბრიფინგის 2013 წლის ივნისში ჩავატარე ამასთან დაკავშირებით, რომელიც იყო კეთილგანწყობილი და ვუთხარი ხელისუფლებას, რომ არასწორი პოლიტიკა გაქვთ ამაზე და ლარს პრობლემები შეექმნება-მეთქი. მაშინ „ოცნება“ გამოხტა და ჩასაფრებულის პოზიციიდან სისულელეებს ლაპარაკობენო. შევადაროთ ლარის კურსი, სისულელეებს ვინ აკეთებს და ლაპარაკობს, ამაზე მერე ვილაპარაკოთ.

_ ამ თემებიდან გამომდინარე გკითხავთ, საგარეო საქმეთა მინისტრობაზე ხომ არ გიფიქრიათ?

_ არა. არცერთ მინისტრობაზე არ მიფიქრია სიმართლე რომ გითხრათ. მერე მაინტერესებს, პრემიერ-მინისტრი ვინ უნდა იყოს, ბურჯანაძე რომ საგარეო საქმეთა მინისტრი იყოს?! ამასაც ხომ აქვს მნიშვნელობა. არ მიფიქრია კონკრეტულ თანამდებობაზე. ჯერ მთავარია, რომ პარლამენტში მქონდეს სერიოზული მანდატი. მე თანამდებობები არ მიკვირს. საქართველოში ერთადერთი ადამიანი ვარ, რომელმაც ქვეყნის უმაღლესი თანამდებობის პირის სავარძელი ნებაყოფლობით დავტოვე. მეტი პრეცენდენტი საქართველოში არ არის. ახლა ბიძინა ივანიშვილს ნუ შემადარებთ, მას არ დაუტოვებია პრემიერობა, ის დარჩა პრემიერადაც, პრეზიდენტადაც, პარლამენტის თავმჯდომარედაც და ა. შ.

მე მთელი „ნაციონალური მოძრაობა“ მიხეილ სააკაშვილის ხელმძღვანელობით მეხვეწებოდა დარჩენას, წამოვედი უმაღლესი თანამდებობიდან, როდესაც მივხვდი, რომ ისე არ კეთდებოდა საქმე, როგორც მე მიმაჩნდა სწორად და მე ამას ხელს ვერ ვუშლიდი. ამიტომ, მე ვიცი რა სჭირდება ამ ქვეყანას.

ამირჩევენ? – გავაკეთებ. ნაკლები ხმებით ამირჩევენ? – არ მექნება ზეგავლენა პოლიტიკაზე და მომიწევს ისევ ბრიფინგის ჩატარება – ხომ გეუბნებოდით, არ დამიჯერეთ და ახლა გაიხსენეთ რომ სწორს გეუბნებოდითო. სჯობს, არ მომიწიოს ამის თქმა. მომცენ მანდატი, რათა რადიკალური ცვლილებები გავატარო ქვეყანაში.

სტატიის ავტორი იაგო ნაცვლიშვილი
მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად