“მე არ ვითხოვ ვადამდელ არჩევნებს, მე ვითხოვ გადათვლას” – ინტერვიუ ლევან კობერიძესთან

ოპოზიცია 2020 წლის საპარლამენტო არჩევნების შედეგებს არ აღიარებს, აცხადებს, რომ არჩევნები გაყალბდა და მანდატებზე უარს აცხადებს. იმის მიუხედავად, რომ ოპოზიცია აქციებს მართავს, აქციაზე წასვლას არ აპირებს „ლელოს“ ერთ-ერთი ლიდერი ლევან კობერიძე, მაშინ როდესაც თავად პარტია მონაწილეობს აქციაში.

რატომ არ უერთდება აქციას, დაიცავს თუ არა ხმებს ოპოზიციურ ფორმატში, რა დარღვევებზე საუბრობს და თუ ხელისუფლება წავა დათმობაზე და სადავო უბნებს გადათვლის, მზად არის თუ არა „ლელო“ პარლამენტში შესვლაზე? – ამ და სხვა აქტუალურ საკითხებზე „აიპრესთან“ ინტერვიუში ლევან კობერიძე საუბრობს:

_ ფაქტობრივად მთელ ქვეყანაში ვნახეთ პროტესტი გუშინ, როდესაც ოპოზიციური პარტიები საოლქო კომისიებთან შეიკრიბეთ. არ აღიარებთ არჩევნების შედეგებს, საუბრობთ დარღვევებზე და შედიხართ პარლამენტში. არის ქვეყანაში პოლიტიკური კრიზისი?

_ ვეთანხმები ჩვენი სტრატეგიული პარტნიორის აშშ-ის საელჩოს განცხადებას, სადაც გულისტკივილით აღნიშნავს, რომ სახელმწიფო სტრუქტურებსა და პარტია „ქართულ ოცნებას“ შორის ზღვარი პრაქტიკულად წაშლილია. რეალურად გადაწყვეტილებები სხვადასხვა სტრუქტურებში, მათ შორის ცესკოში მიიღება პარტიიდან. ეს არის ავტორიტარიზმისკენ მიმავალი ერთ-ერთი ყველაზე მთავარი სიმპტომი, როდესაც პარტია წყვეტს – უნდა გადათვალოს თუ არა უბნები, როგორ უნდა წარიმართოს პროცესი, რომელიც იმსახურებს მაქსიმალურ გამჭვირვალობას.

იყო ზეწოლის ფაქტები, როგორც კანდიდატებზე ისე ოპოზიციური პარტიების წარმომადგენლებზე. მათ შორის „ლელოს“ წარმომადგენლებზეც. ადმინისტრაციული რესურსის მაქსიმალური მობილიზებაც იყო, განსაკუთრებით რეგიონებში. ანუ არჩევნების მნიშვნელოვანი ნაწილი მოსყიდვა-დაშინებებით და ა. შ. ჯერ კიდევ არჩევნების დღემდე გაყალბდა. ასევე ხელთ გვაქვს ოქმები, რომლის ბათილობასაც ვითხოვთ. მე პირადად ვაკის ოლქში 35-მდე საჩივარი მაქვს შეტანილი. ასეა საქართველოს მასშტაბით, როგორც ჩვენი პარტიის მხრიდან ისე სხვა პარტიების მხრიდან.

მესმის, რომ შესაძლოა მოხდეს ადამიანური შეცდომები და ვცდილობ, რომ ის მივიღო არგუმენტად, მაგრამ ის ვერ იქნება მთავარი მიზეზი იმ შედეგების რაც დადგა. მე ვისაუბრებ ვაკის ოლქის მაგალითზე. 104 000-მდე ამომრჩეველია, საიდანაც 60.5% მოვიდა. ძალიან მაღალი აქტივობა იყო. უახლოესი არჩევნები გვაჩვენებს, რომ ეს ხდება ხელისუფლების ცვლილებებისთვის. ასე იყო 2003 წელსაც და 2012 წელსაც, როდესაც იმაზე მეტი ადამიანი მივიდა არჩევნებზე, ვიდრე ამის მოლოდინი იყო. სხვადასხვა ნიშნით არის არჩევნები გაყალბებული. მაგალითად მე-11 უბანზე ეწერა, რომ მაქვს 48 ხმა, ოქმი სწორად იყო შედგენილი, სამაგიეროდ ცესკომ საიტზე ატვირთა არა 48 ხმა, არამედ 8. შეყვანის დროს 40 ხმა დოკუმენტიდან დაკარგა.

_ ამაზე რა არგუმენტი აქვთ?

_ არგუმენტია, რომ უი, უი შეგვეშალა. ბოდიში, მაგრამ ქვეყნის ბიუჯეტიდან 72 მილიონი გამოყოფილია ცესკოს დასაფინანსებლად წელს.

_ ანუ თქვენ მიზანმიმართულად დაშვებულ შეცდომად მიგაჩნიათ ეს?

_ ეს რომ იყოს ერთეული შემთხვევა დავუშვებდი იმას, რომ ადამიანურ ფაქტორში ჩაითვალოს, მაგრამ როდესაც ამის გარდა ასეთ ფაქტს ვხედავთ ძალიან ბევრს. როდესაც უამრავ დარღვევებს ვხედავ – უბნიდან წასულია ოქმები ბეჭდის გარეშე, რომელსაც „აპრავებს“ ოლქის ხელმძღვანელი და ამბობს, რომ კი არის დისბალანსი, მაგრამ მე გავასწორე და ცვლილება შევიტანეო, სინამდვილეში ეს არის კანონდარღვევა და ამაზე რეაგირება უნდა მოხდეს. მინდა გითხრათ, რომ „ლელოს“ ხმები ყველაზე მეტია მოპარული და პირადად ჩემი ხმები.

_ ყველა პარტია ასე იძახის, რომ ჩვენი ხმებია ყველაზე მეტი მოპარულიო და რომელს დაგიჯეროთ?

_ არგუმენტებით ვთქვათ. „ნაციონალურ მოძრაობას“ არჩევნებში მონაწილეობის გამოცდილებაც მეტი აქვს და გაყალბებისაც.

_ ენმ-გან არც გამიგია ეს, მაგრამ ამაზე ისაუბრა მაგალითად ბურჯანაძემ რომ მე და ირაკლი ოქრუაშვილს გვებრძოდა ივანიშვილიო…

_ მე ვამბობ იმას, რომ ჩვენ წარმომადგენელი არ გვყავს კომისიაში. შესაბამისად არგუმენტი, რომ რატომ მოაწერა „ლელოს“ წარმომადგენელმა ხელი ოქმს, მოკლებულია საფუძველს.

ჩვენ არ მივმართავთ უკანონო მოქმედებებს, ჩვენ მივყვებით სამართლებრივ გზას. ეს არის გასაჩივრება და დაწერილი გვაქვს 37 საჩივარი.

_ ხმების გადათვლას ითხოვთ?

_ დიახ. ძირითადად გადათვლაზეა საუბარი.

_ თუ წამოვიდა ხელისუფლება კომპრომისზე და დაიწყო გადათვლა, მზად ხართ შეხვიდეთ პარლამენტში და აღარ დააყენოთ ხელახალი არჩევნების მოთხოვნა?

_ მე ძალიან კარგად მესმის, რომ ვადამდელი არჩევნები ქვეყნისთვის არის დამატებითი ტვირთი. როგორც ფინანსური თვალსაზრით, ახალი არჩევნების ხარჯები, ასევე ახალი არჩევნების თვალსაზრისით. რადგან პოლიტიკურ სტაბილურობასთან დაკავშირებით მოლოდინი მოქმედებს. მაგრამ ეს არ არის ჩვეულებრივი მოთხოვნა, რომ რაღაცა მოითხოვო და ასე ადვილი იყოს. ელემენტარულად ადამიანებმა დრო დახარჯეს და მივიდნენ უბნებზე. არ მივეკუთვნები იმ პოლიტიკოსების რიცხვს, ვინც ვადამდელ არჩევნებს ითხოვენ. მე ვითხოვ გადათვლას. დაიწყეს გადათვლა, გახსნეს რამდენიმე უბანი და სამაგალითო იყო ჩვენი წევრის ფიქრია ჩიხრაძის ბიულეტენები, როდესაც მოპარული ხმები დადასტურდა. ბევრი ასეთი ფაქტი დადასტურდა. ამის შემდეგ მიიღეს პარტიული გადაწყვეტილება, რომ ცესკოს აღარ გაეხსნა უბნები.

იმედი გვქონდა, რომ დაიწყებოდა გადათვლები. გუშინ იმიტომ იყო ოპოზიციის თავშეყრა, რომ მიიღეს გადაწყვეტილება, რომ გადათვლასთან დაკავშირებით არცერთ სარჩელს არ აკმაყოფილებენ. მიგვითითებენ, რომ წავიდეთ ჩინჩალაძე-მურუსიძის სასამართლოში. მინდა გითხრათ, რომ „ქართული ოცნება“ სწორედ ამ სასამართლო კლანის ჩაბეტონების გამო დავტოვე. ვიცოდი, რომ 2020-ის არჩევნების გაპრავებას ამ სასამართლოთი მოინდომებდა.

_  ანუ, სასამართლოში წასვლას არ აპირებთ?

_ როგორ არა. ყველა სამართლებრივ ბერკეტს გამოვიყენებთ.

_ მაგრამ არ ენდობით?

_ ბუნებრივია. ჯერ მურუსიძე-ჩინჩალაძის სასამართლოს როგორ შეიძლება ენდო, მაგრამ ნდობის მოპოვება ხდება პროცესით.

„ოცნების“ შესაძლო მოკავშირე პარტიაც კი ამბობს, რომ არ აღიარებს შედეგებს და ხელისუფლება მარტოა დარჩენილი. ამ დროს ცესკომ საზოგადოების თვალწინ, გამჭვირვალედ „ლაივ რეჟიმში“ უნდა გადათვალოს ყველა უბანი. ამაზე დაიხარჯება მაქსიმუმ 1 დღე და გვეცოდინება ყველა საჩივარზე პასუხი. რა დოზით იყო იქ შეცდომები დაშვებული. კიდევ იქნება არჩევნები და რატომ უნდა მიდიოდეს ეს საქმეები სასამართლოში. თუ ეს ნაბიჯები გადაიდგმება, ეს წინ გადადგმული ნაბიჯი იქნება, მაგრამ პრაქტიკულად ჩაკეტა „ქართულმა ოცნებამ“.

„ოცნებამ“ ცესკოს მიაღებინა გადაწყვეტილება, რომ არ გახსნას უბნები და არ გადათვალოს. მეორე მხრივ ღია ვაჭრობა დაიწყო პარტიებთან. მხედველობაში მაქვს კობახიძის განცხადება პარტიების დაფინანსების შეწყვეტაზე. ეს გარკვეულ ლოგიკაში ჯდება, მაგრამ ეს ლოგიკა სად იყო, როცა ამ კანონს იღებდა პარლამენტი და რატომ არ ჩაიწერა ეს მუხლი მაშინვე, რომ თუ პარტია უარს იტყვის პარლამენტში შესვლაზე, მას შეუწყდება დაფინანსება. მაშინ მას მე დავარქვი ბიძინა ივანიშვილის 1%-იანი ტრიუკი. იმიტომ მიიღეს ეს კანონი, რომ ვაჭრობა გაეჩაღებინათ პატარ-პატარა პარტიებთან, რომ 1%-ით შემოხვალთ და დაფინანსება გექნებათო და არა დემოკრატიის გასაძლიერებლად. ახლა კობახიძე გამოვიდა და როგორც დაგპირდით, ისევ წავიღებთ უკანო. ანუ სავაჭროდ იყენებენ.

_ აშანტაჟებენ პარტიებს?

_ კი. ეს არის პარტიების შანტაჟი. ჩვენ პარტიას აქვს რესურსი, რომ პარტიულად იმუშაოს, მაგრამ შედარებით მცირე პარტიებისთვის მნიშვნელოვანი იქნება დაფინანსება და ამის გამო ხდება შანტაჟი.

_ გასაგებია, რომ არჩევნები ვერ ჩატარდა სამართლიანი წესებით და ბევრი კითხვის ნიშანია, მაგრამ არ ფიქრობთ, რომ ოპოზიციამაც დაუშვით შეცდომები? იქიდან გამომდინარე, რომ თითქმის ყველა პარტიის ასოცირება მოხდა რაღაცნაირად „ნაციონალურ მოძრაობასთან“. ესეც ხომ არ იყო მიზეზი?

_ შეგიძლიათ ჩემი „ფეისბუქ-პოსტი“ ამასთან დაკავშირებით, რომელიც არჩევნების მეორე დღესვე დავწერე. სადაც ვამბობდი, რომ მეტი თვითკრიტიკა გვმართებს. გაყალბება ერთი თემაა, მაგრამ ჩვენ შიგნითაც უნდა დავიწყოთ პრობლემების ძიება. პირდაპირ ვიტყოდი, რომ როგორც ჩანს ქართულმა ოპოზიციურმა სპექტრმა ვერ შეძლო შეთავაზება მოსახლეობის დიდი ნაწილისთვის იმ ფორმულის შეთავაზება, რაც ჩემი აზრით ყველაზე აქტუალურია. დღეს ყველაზე აქტუალურია „ქართული ოცნების“ ხელისუფლებიდან ჩამოშორება ან შევიწროება, რათა არ დაბრუნდეს „ნაციონალური მოძრაობა“.

პირდაპირ ვიტყვი, რომ რეალურად კოალიციური მთავრობა იყო „ნაცმოძრაობის“ დღის წესრიგი. ვფიქრობ, რომ ეს გარკვეულწილად დამაზიანებელი აღმოჩნდა და ეს დადასტურდა კიდევაც. კოალიციური მთავრობის დღის წესრიგი ამომრჩევლის თავში არ არის. ეს იყო მედიის და გარკვეული პოლიტიკური პარტიების მხრიდან გაჟღერებული შემოთავაზება. პირველ რიგში კი ეს იყო „ნაციონალური მოძრაობის“ შემოთავაზება. საქართველოს სჭირდება ძლიერი, დამოუკიდებელი პარტია, რომელსაც შეუძლია პასუხისმგებლობა აიღოს.

_ თუმცა, ისტორიამ ხომ აჩვენა, რომ ერთპარტიულმა მმართველობამ არ გაამართლა?

_ რა თქმა უნდა ერთპარტიული მმართველობა არ ამართლებს, მაგრამ მე იმის თქმა მინდა, რომ ყველამ უნდა იბრძოლოს, მერე უნდა შევიდეთ პარლამენტში და მერე უნდა ვილაპარაკოთ ამაზე.

_ ანუ წინასწარ ამაზე ლაპარაკი სწორი არ იყო?

_ რა თქმა უნდა. ამან აღქმაში „ნაციონალური მოძრაობის“ ვექტორზე მოახვედრა პარტიების დიდი უმრავლესობა.

_ ანუ, პარტიები „ნაციონალური მოძრაობის“ თამაშს აყვნენ?

_ მე ვიტყოდი ასე, რომ გარკვეული შეცდომა იყო დაშვებული. ჩემი შეფასება ასეთია. მაქვს უფლება, რომ არჩევნების შემდეგ გარკვეული შეფასება გავაკეთო. ერთი ევროპული ქვეყანა მაინც მითხარით, სადაც პარტიები წინასწარ ამბობენ, რომ კოალიციას ამასთან შევკრავ და იმასთან, მერე ტელევიზიებში მიდიან და ხელს აწერენ რაღაცა პირობებზე. ეს არ არის პოლიტიკის ევროპული კულტურა. მაშინ ბლოკი შექმნან. თუ ერთ აზრზეა რამდენიმე პარტია, შექმნან ბლოკი. მით უმეტეს ამ არჩევნებზე ბლოკის შექმნის შესაძლებლობა იყო.

რა თქმა უნდა ერთპარტიული მმართველობა უნდა დასრულდეს და ამიტომ ვიბრძოლეთ ყველამ ერთად პროპორციული არჩევნებისთვის, მაგრამ ეს უნდა მომხდარიყო იმ რეალობის შემდეგ, რა რეალობასაც პარლამენტში მივიღებდით.

_ ანუ ამ ყველაფერზე მსჯელობა პოსტფაქტუმ უნდა მომხდარიყო და არა წინასწარ.

_ რა თქმა უნდა. ყველამ თავის პროგრამაზე უნდა ილაპარაკოს და რამდენი ამომრჩეველი დაუჭერს მხარს. იქნება „ლელო“ იმარჯვებდა იმდენი პროცენტით, რომ კოალიციის შექმნა დღის წესრიგში არ იყო?

_ აქციაზე წახვალთ?

_ „ნაციონალური მოძრაობა“ სადაც არის მე პირადად იმ აქციაზე არ მივალ.

_ ანუ, არც ამ აქციაზე მისვლას აპირებთ?

_ მე პირადად ამ აქციაზე მისვლას არ ვაპირებ. თუმცა, რა თქმა უნდა ვარ იმ დღის წესრიგში, რომ ჩვენ ხმები ერთად უნდა დავიცვათ. ამაში მაქსიმალურად ვარ ჩართული, მაგრამ მე პირადად აქციაზე არ ვიქნები.

_ მაგრამ „ლელოს“ წარმომადგენლები იქნებიან?

_ დიახ, რა თქმა უნდა. პარტია აქტიურად იქნება წარმოდგენილი.

სტატიის ავტორი იაგო ნაცვლიშვილი
მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად