მდინარაძე სტრასბურგის გადაწყვეტილებაზე: ქართულმა სასამართლომ კიდევ ერთხელ ჩააბარა საერთაშორისო, ძალიან კრიტიკული ტესტი

“დღეს ქართულმა სასამართლომ კიდევ ერთხელ ჩააბარა საერთაშორისო, ძალიან კრიტიკული ტესტი”, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ ჟურნალისტებს „რუსთავი 2“-ის საქმეზე ადამიანის უფლებათა ევროპული სასამართლოს გადაწყვეტილებაზე კომენტირებისას განუცხადა.

„სტრასბურგის სასამართლომ დაადგინა, რომ სამართლიანი სასამართლოს უფლება „რუსთავი 2“-ის ამჟამინდელ მფლობელებს, ძმებ ყარამანაშვილებს არ დარღვევიათ. ქართულ სასამართლოში ასეთი უფლების დარღვევის შესახებ, ასევე დარღვევის ნიშნები არ ყოფილა რაც აღსრულებას შეეხებოდა, შეჩერების მექანიზმი გაუქმებულია და მოხსნილია სტრასბურგის სასამართლოს გადაწყვეტილებით. მნიშვნელოვანია, რომ ეს გადაწყვეტილება სასამართლოს სრულმა შემადგენლობამ მიიღო. რამდენიმე შემთხვევაში მხოლოდ ერთი მოსამართლის განსხვავებული აზრია ხოლმე. სხვა შემთხვევაში პრაქტიკულად აბსოლუტური უმრავლესობა ეთანხმება ამ გადაწყვეტილების პათოსსა და შინაარსს“, – განაცხადა მამუკა მდინარაძემ.

ცნობისათვის, სტრასბურგის ადამიანის უფლებათა ევროპულმა სასამართლომ „რუსთავი 2“-ის საქმეზე გადაწყვეტილება გამოაცხადა. სტრასბურგის სასამართლოს გადაწყვეტილებით, „რუსთავი 2“-ის საქმეზე კონვენციის დარღვევა არ დადგინდა და შეჩერების მექანიზმი მოიხსნა.

მსგავსი სიახლეები
კომენტარები
იტვირთება...