ლევან იოსელიანი: ამ ქვეყანაში უნდა დავასრულოთ არჩევნების გამო ერთმანეთისადმი დაპირისპირების და პოლიტიკური კრიზისის შესაძლებლობა

„ჩემი აზრით, დღეს ნამდვილად ისტორიული დღეა, რადგან საბოლოო ჯამში, შევძელით, მიგვეღწია შეთანხმებისთვის და მიგვეღო დოკუმენტი, რომელიც საქართველოში რეალურად შეცვლის არჩევნებს და მას გახდის ბევრად უფრო სანდოს”, – ამის შესახებ მე-10 მოწვევის პარალემენტის დეპუტატმა პარტია „მოქალაქეები“-დან ლევან იოსელიანმა “საარჩევნო კოდექსში” შესატან ცვლილებების პროექტზე საუბრისას განაცხადა.

“ყველაზე მთავარი არის ის, რომ მეც და ალეკო ელისაშვილიც ვთვლით, რომ ჩვენი ამოცანა, რისთვისაც შემოვედით პარლამენტში, ძალიან კარგად შევასრულეთ, რადგან როცა არ უნდა ჩატარდეს არჩევნები, თვითმმართველობის არჩევნები იქნება, ვადამდელი თუ 2024 წლის არჩევნები, ეს დღე იქნება ბევრად უფრო გამჭვირვალე, ბევრად უფრო გასაგები და ბევრად უფრო უკეთესი, ვიდრე აქამდე ყოფილა.

ეს ცვლილებები ითვალისწინებს ყველაზე მთავარს: ელექტრონული მთვლელი მანქანების შემოტანას პირველ ეტაპზე საარჩევნო უბნების ნაწილზე და შემდეგ მთელ საქართველოში, რეგისტრაციას ანაბეჭდის საშუალებით, რაც გულისხმობს, რომ ეს ყბადაღებული თემა – ე.წ. კარუსელები და მკვდარი სულები – საბოლოოდ დაიხურება, ასევე 10 პროცენტის სავალდებულო გადათვლა, რაც ნიშნავს, რომ მთელ საქართველოში დაახლოებით 365 უბანი სავალდებულო წესით გადაითვლება, რაც პრინციპში უკვე გამორიცხავს იმის შესაძლებლობას, რომ ვინმემ სადმე რაღაცა გაყალბებაზე იფიქროს იმიტომ, რომ ასეთი მასშტაბის გადათვლა თავისთავად დააზღვევს ამ პროცესს. ეს გადათვლა მოხდება არა ერთი ან ორი თვის მერე, არამედ არჩევნების ჩატარებიდან ყველაზე ბევრ ექვსი დღის ვადაში.

ეს და სხვა ყველა ცვლილება, რაც ამ კანონპროექტით არის გათვალისწინებული, ჩემი აზრით, ნამდვილად რევოლუციურია და რაც მთავარია, ახალ პოლიტიკურ ძალებს მისცემს საშუალებას, რომ მონაწილეობა მიიღონ პოლიტიკურ პროცესში.
ამ ქვეყანაში უნდა დავასრულოთ არჩევნების გამო ერთმანეთისადმი დაპირისპირების და პოლიტიკური კრიზისის შესაძლებლობა. ეს არის მთავარი ამოცანა, რის გამოც ჩვენ შემოვედით პარლამენტში და ხელი მოვაწერეთ მემორანდუმს, რომელიც მალე იქცევა კანონად. წინ გვაქვს კანონპროექტის განხილვების კიდევ ორი თვე, რაც არ გამორიცხავს კიდევ უფრო გაუმჯობესებას. მთლიანობაში ჩვენ ამას კანონად ვაქცევთ მხოლოდ მაშინ, როდესაც ამ დოკუმენტთან დაკავშირებით სრული კონსენსუსი იქნება არამარტო ჩვენს და „ქართულ ოცნებად“ შორის, არამედ მთლიანად საზოგადოებაში. ეს ცვლილებები არის რეალურად გარდამტეხი და შეცვლის ჩვენი ქვეყნის პერსპექტივას იმიტომ, რომ არჩევნები არის დემოკრატიის ქვაკუთხედი და საფუძველი“, – განაცხადა ლევან იოსელიანმა.

მსგავსი სიახლეები
კომენტარები
იტვირთება...