“ხელისუფლებას უნდა ხალხი შეატოვოს ერთმანეთს, მან საპატრიარქოსთანაც უნდა იმუშავოს” – ინტერვიუ ლევან კობერიძესთან

წინა მოწვევის პარლამენტის  წევრი, პოლიტიკოსი ლევან კობერიძე მიიჩნევს, რომ ხელისუფლებამ კოვიდ პანდემიის დროს მისი დაწყებიდან დღემდე ბევრი შეცდომა დაუშვა. დღევანდელი მდგომარეობა კი მხოლოდ ბოლო დროინდელ შეცდომებს არ უკავშირდება და მათ შორის შარშანდელ შეცდომებსაც წელს ვიმკით.

კობერიძის აზრით ჯერ ვაქცინა დაგვიანდა, შემდეგ ახალგაზრდა ქალის გარდაცვალებამ შეანელა ვაქცინაციის პროცესი, ხოლო როცა დაიწყო საინფორმაციო კამპანია ძალიან სუსტი იყო და დღესაც სუსტია. ადამიანები ვერ იღებენ კითხვებზე პასუხებს და ამიტომ არის ანტივაქსერული განწყობა საზოგადოებაში. კობერიძის აზრით, ხელისუფლებამ თითოეულ სეგმენტთან უნდა იმუშავოს და ხალხი ვაქსერებად და ანტივაქსერებად არ უნდა დაყოს.

რა შეცდომები იყო დაშვებული? რამდენად სწორად მოქმედებს ამჟამად ხელისუფლება და რა გამოწვევების პანდემიის პროცესში? – ამ და სხვა საკითხებზე „აიპრესთან“ ინტერვიუში ლევან კობერიძე საუბრობს:  

ლევან კობერიძე: ფაქტია, რომ საკმაოდ რთული მოცემულობა გვაქვს. ყველაზე დიდი კრიტიკა, რაც ხელისუფლების მიმართაა მთელი ამ ხნის პერიოდში და არა მხოლოდ ბოლო ხანებში, ეს არის მიღებული გადაწყვეტილებების გარკვეული ალოგიკურობა და არათანმიმდევრულობა. ამას ვამბობდი ადრეც და ახლაც იგივე აზრზე ვარ, რომ ეს უფრო მეტად პოლიტიკურ დღის წესრიგზე იყო მორგებული. ვგულისხმობ ჯერ სრულ ლოქდაუნის გამოცხადებას და მერე მის მოხსნაში თუ შემოღებაში ალოგიკურობას.

_ მათ შორის პრემიერის გადაწყვეტილებასაც გულისხმობთ, როდესაც მან ჯარიმები ჩამოწერა და დღეს თავს იმართლებს, რომ თურმე 2020 წელს საზოგადოებას არ ჰქონდა სრული ინფორმაცია?

_ მე ვიტყოდი ასე, რომ ყველა პრემიერმა და ყველამ უნდა გაითავისოს, რომ ეს არ არის დღევანდელი გადაწყვეტილება, ეს არის გამოცდილება, რაც მოსახლეობას უგროვდება და პანდემიის ან მსგავსი თემების გამეორება არასდროს არ არის გამორიცხული. განსაკუთრებით კატაკლიზმები ხშირად ხდება ქვეყნებში. ყველამ უნდა იცოდეს, რომ ეს არის ის გამოცდილება, რომელიც ადამიანებს უგროვდება. ყოველი შემდგომი პანდემიის გამკლავება გაძნელებული იქნება, თუკი ეს გამოცდილება არათანმიმდევრული და არალოგიკური ბრძანებების ერთობლიობაა. ანუ, შემდგომში მოსახლეობა ხელისუფლებასთან ერთად ეფექტიანად შეებრძოლება თუ არა პანდემიას, ეს დამოკიდებულია იმაზე თუ ახლა როგორ იქცევა ხელისუფლება და მოსახლეობა.

_ ახსენეთ მთელი ამ პროცესის არათანმიმდევრულობა და ამაში არჩევნების კონტექსტიც იგულისხმება?

_ ყველაფერი ჯამურად და მათ შორის არჩევნების კონტექსტიც. გახსოვთ, რომ ჯერ კიდევ წინა პრემიერის დროს დავაყენე მოთხოვნა და მოვითხოვე გეგმაზომიერი ახსნა, რათა ყველაფერი გარკვეულ ლოგიკას იყოს დაქვემდებარებული. თავიდან რაც არასწორად გაკეთდა იმის შედეგებსაც ახლა ვიმკით, არათუ მერე რაც გაკეთდა არასწორად. ნურავის ნუ ეგონება, რომ ეს ახლა მიმდინარე სპონტანური პროცესია, ან თუნდაც აგვისტოში მიღებული შემსუბუქების შედეგი. არა, ერთიანი ჯაჭვია.

თავიდან მე თავად დავუჭირე მხარე ერთთვიან ლოქდაუნს, რადგან მაშინ საჭირო იყო. არ ვიცოდით, რასთან გვქონდა საქმე, როგორი ქცევა უნდა ჩამოყალიბებულიყო, ჩვენი უცხოელი პარტნიორების გამოცდილება გაგვეზიარებინა და დასკვნები გამოგვეტანა. მახსოვს, მაშინ ამ კითხვებს რომ ვუსვამდით გახარიას გვეუბნებოდა, რომ შეუძლებელია პროგნოზების გაკეთება გნებავთ ჯანდაცვაზე და გნებავთ ეკონომიკაზეო. როდესაც თავად ოპოზიციაშია, ზუსტად ამას საყვედურობს ხელისუფლებას. ამას რომ ვუყურებ, მეცინება.

_ ოპოზიციაში უნათდებათ ხოლმე გონება?

_ სხვებისგან განსხვავებით მე პირადად ოპოზიციაში წასვლამდეც ვაკრიტიკებდი ხელისუფლებას, დანარჩენ ყველას პირიქით მოსდის, რომ ოპოზიციიდან იწყებენ თვითკრიტიკას და კრიტიკას.

ეს მდგომარეობა თავიდანვე არათანმიმდევრულობის შედეგია. იმის, რომ მეცნიერული დასკვნების თუ კარგი გამოცდილების დანერგვას ვახდენთ ან ეპიზოდურად ან რეაქტიულად ვიქცევით. ანუ, როცა ხედავს ხელისუფლება რა შედეგი დგება, მერე იწყებს მოქმედებებს. ამიტომ მართვის თვალსაზრისით ბევრი შეცდომა დავუშვით. ჩვენთვის ხომ ის არის მნიშვნელოვანი, რომ ეკონომიკაც კარგი გვქონდეს, როცა სხვებზე ბევრად სუსტი გვაქვს და ჯანდაცვის სისტემაც ძალიან მყიფე და მოუმზადებელია მსგავსი ტიპის პანდემიებისთვის.

_ თითქოს ეკონომიკა შევწირეთ იმისთვის, რომ ჯანდაცვა ყოფილიყო მყარი და საბოლოო ჯამში ორივე ჩამოგვექცა.

_ ზუსტად მანდ ვარ. წინა პრემიერისთვის რომ გეკითხათ, ამოფარებული იყო ექიმების ხალათებს. ამბობდა, რომ ამას ადამიანების გადასარჩენად ვაკეთებთო და ფაქტობრივად ეკონომიკა მსხვერპლად იყო შეწირული. მინდა გითხრათ, რომ იმდროინდელი შეზღუდვები, რომლის პოლიტიკურ ელფერში გადატანასაც ცდილობდა ხელისუფლება, ახლა არსებული მდგომარეობის ერთ-ერთი განმაპირობებელია. ამას ემატება სხვა არათანმიმდევრული მოქმედებები და ჯანდაცვის სისუსტე.

თუმცა, ერთი რამე უნდა ვთქვათ, ამ დამოკიდებულებაში სახელმწიფოსა და ხალხს შორის, მოსახლეობა გაცილებით უფრო წინ დგას, რაც არ უნდა ვამუნათოთ ერთმანეთი.

_ რაში გამოიხატება ეს იმ ფონზე, როდესაც რეკომენდაციები დატოვეს, ვალდებულებები მოიხსნა თუ არა, უხეშად რომ ვთქვა, ყველამ იშვლიპა პირბადე და მიაყოლა დახურულ სივრცეებშიც?

_ მაგ ნაწილს რაც შეეხება, მე ვარ მომხრე, რომ მოსახლეობის დამუნათება არ ხდებოდეს. ქცევა მხოლოდ მოწოდებით და მაღალი შეგნებით არ ხდება. ასე არ მუშაობს სისტემა. ასე რომ მუშაობდეს, მაშინ არც საგზაო უსაფრთხოების წესები ან სხვა წესების დაცვა არ დაგვჭირდებოდა.

_ ამის თქმა გინდოდათ იმ პოსტში, რომელიც სოციალურ ქსელში გამოაქვეყნეთ?

_ დიახ, ზუსტად ამის თქმა მინდოდა. აქ ლიდერობა უნდა აეღო სახელმიწფოს და თავიდანვე უნდა გაეტარებინა ძალიან სწორი საკომუნიკაციო კამპანია. ახლა ადამიანები თავად მოუწოდებენ ერთმანეთს. იცით როგორ ვითარებას შევადარებ? – რიგი რომ არეულია. ობიექტში რიგი თუ არეულია, კომპანიამ უნდა დაარეგულიროს რიგი და მათ უნდა მოუწოდონ ადამიანებს წესრიგის დაცვისკენ. თუ ადამიანები დაიწყებენ ამის დარეგულირებას, ის აუცილებლად კონფლიქტით დამთავრდება.

_ ორგანიზებაა დაკარგული?

_ რა თქმა უნდა. ორგანიზების ერთ-ერთი მთავარი ნაწილი სწორედ ის კომუნიკაციაა, რაც უნდა ყოფილიყო სახელმწიფოს მხრიდან. მათ შორის ოპოზიციის მხრიდანაც, მაგრამ პირველ რიგში ხელისუფლების, მისი პასუხისმგებლობაა.

600 მილიონი რომ იყო გამოყოფილი ბიუჯეტიდან სწორი კომუნიკაციისთვის, ის როგორ არის დახარჯული და ეს ეფექტი სად არის? ვინემ თუ შეიძლება ახსნას, რომ ის ახალგაზრდა ქალი, რომელიც ასტრაზენეკას ვაქცინით აიცრა დასაწყისშივე და დაიღუპა, რატომ არ არის გასაჯაროვებული დასკვნა, რა მოხდა? სწორედ მისი სიკვდილის და სხვა გარემოებების არაჯეროვანი შესწავლის გამო ტოვებს ბევრ მოქალაქეში ეჭვს და შიშს ვაქცინაციის მიმართ.

_ პროკურატურამ ხომ წარუდგინა ბრალდება ექიმებს?

_ კი, მაგრამ სამედიცინო დასკვნა საჯარო არ არის და არსებობს თუ არა საერთოდ ისიც არ ვიცი. სამედიცინო გახნილვა იმაზე თუ რა იყო ასტრაზენეკის ვაქცინის და ამ ქალის ჯანმრთელობის მდგომარეობის ურთიერთმიმართება, ეს არ ყოფილა. ჯანდაცვის სამინისტროს განცხადება იმაზეც კი არ ყოფილა, ასეთი შემთხვევები შეიძლება თუ არა განმეორდეს შემდგომში. ეს ის კითხვებია, რომელზეც პასუხების გარეშე მოსახლეობას მუდმივად ექნება შიში თუ სიფრთხილე.

მიუხედავად იმისა, რომ შეიძლება ჩვენ ერთმანეთს მოვუწოდებდეთ, ძნელია ამის იმედზე ვიყოთ. მაშინ მოვუწოდოთ მთელ მოსახლეობას, რომ დანაშაულები არ ჩავიდინოთ და დავაკვირდეთ, თუ ხელისუფლება ასე იმართება, მაშინ ხელისუფლება საჭირო არ ყოფილა.

_ დღევანდელობას რომ დავუბრუნდეთ, კონკრეტული შეზღუდვები იმუშავებს თუ არა?

_ ბევრი ქვეყნის მაგალითიდან გამომდინარე სწორად არ ვაფასებ საზოგადოებრივი ტრანსპორტის შეზღუდვას. საზოგადოებრივი ტრანსპორტი ის ადგილია, რომელიც ევროპის უმრავლეს ქვეყანაში არც კი დაკეტილა პანდემიის დროს, თუკი იქნება მოწესრიგებული და ეს ექვემდებარება მართვად და მოწესრიგებულ ქცევას.

_ აქ მნიშვნელოვანი პარამეტრია ალბათ ისიც, რომ საყოველთაო ვაქცინაცია მიმდინარეობს და გადაადგილების პრობლემა ალბათ შეექმნებათ ადამიანთა ერთ კატეგორიას.

_ რა თქმა უნდა. ის, რისი კონტროლიც და მართვაც შესაძლებელია, ის უნდა შეიზღუდოს უკიდურეს შემთხვევაში. პირველ რიგში რაც უნდა შეიზღუდოს, ეს არის პირბადის ტარება, სუფრები, თავყრილობები, თუნდაც დასვენების ადგილის თუ მუდმივის საცხოვრებელი ადგილის კონტროლის მხრივ.

_ ესეც ხომ მიიღეს?

_ კი, ეს ახლა მიიღეს, მაგრამ ეს არც კი უნდა მოხსნილიყო. არსებობს სტატისტიკა და კვლევები მთელ მსოფლიოში დაგროვდა და ნათლად ჩანს, რომ გავრცელების ყველაზე მაღალი პროცენტი ეს არის ოჯახი, სადაც მისი დაცვა ძალიან ძნელია, პრაქტიკულად შეუძლებელია. მეორე ეს არის მასობრივი თავშეყრის ადგილები. ეს მეცნიერულად დადასტურებული ფაქტია. აქ უნდა დახმარებოდა სახელმწიფო ხალხს, კოვიდსასტუმროები კი არ უნდა იყოს გახსნილი, რომელშიც მე ვფიქრობ, რომ კორუფციული სქემები იყო საკმაოდ აქტიური. მაგალითად, მოხუცი თუ ჰყავს ადამიანს სახლში ან რისკჯგუფი ის უნდა შეეთავაზებინათ თუკი ამის საშუალება იქნებოდა, რათა იქ ეცხოვრა იზოლირებულად, თუკი მას ასეთი სურვილი ექნებოდა, რომ ოჯახის მიერ შემოტანილი ინფექციისას მისი ლეტალობა არ დამდგარიყო.

 

საქართველოში არათანმიმდევრულობაა. ზოგჯერ როდესაც არავინ ელოდა შეზღუდვების მოხსნას, ისეთ დროს მოიხსნა და როდესაც არ ველოდით, რომ ჩაგვკეტავდნენ, ისე ჩაგვიკეტეს ყველაფერი. ლოგიკურ ახსნას არავინ არ აყოლებს პროგნოზებთან ერთად. მესმის, რომ ამის პროგნოზირება ძნელია, მაგრამ გარკვეული გათვლები და დათვლები უნდა იყოს და ისე არა, რომ აი ჩვენ ვითვლით, საჯარო უნდა იყოს და გვაჩვენონ ეს. ვფიქრობ, რომ ნდობაა დაკარგული ხალხსა და ხელისუფლებას შორის პანდემიის მართვასთან მიმართებით.

_ საუბარია არავქცინირებული ადამიანებისთვის უფრო მეტ შეზღუდვაზე. მაგალითად თქვეს, რომ მსჯელობენ იმაზე, რომ სექტემბრიდან ფიტნეს-გამაჯანსაღებელ ცენტრებში, სალონებში და ა. შ. შემოღებული იყოს სისტემა, რომლითაც არავაქცინირებულ ადამიანებს მხოლოდ ტესტის საფუძველზე დაუშვებენ?

_ როდესაც ვაკვირდები პროცესს, სამწუხაროდ ეს კეთდება არა იმიტომ, რომ მთლიანი მდგომარეობა რაღაცით უფრო გაუმჯობესდეს. მე მგონია, რომ ამ განცხადებების მიზანია, რომ ისინი ვინც მერყეობენ, ისინი აიძულონ ვაქცინის გაკეთების თვალსაზრისით. ამ დროს ამ ადამიანებს იძულებით ვერ გადავადგმევინებთ ნაბიჯებს. აქ არის მნიშვნელოვანი რამე, ხელისუფლებას ჰგონია, რომ თუ ამ თემებზე ლაპარაკს დაიწყებენ, ვინც აქამდე აცრას არ იკეთებდა, გაიქცევა და გაიკეთებს აცრას. ასე არ არის, მათ სხვა კითხვები აქვთ ვაქცინირებასთან დაკავშირებით და ამას ვერ აკეთებს ხელისუფლება. ამის ნაცვლად ის აკეთებს იმას, რომ აი თქვენ შეგიშვებთ და თქვენ არაო. ეს მოიტანს საზოგადოების გახლეჩვას.

რა თქმა უნდა ვაქცინა ყველამ უნდა გაიკეთოს, მაგრამ ის რომ ახლა ცუდი სიტუაციაა იმიტომ, რომ ვიღაცა არ იცრება, ასეთი პირდაპირი მტკიცებულება არ არსებობს. ეს საზოგადოებას გახლეჩს შუაზე.

_ ალბათ ერთ-ერთი მიზეზი თავად ვაქცინაციის პროცესის დაგვიანებაც არის?

_ რა თქმა უნდა. ასტრაზენეკათი აცრისას იმ ტრაგიკულმა შემთხვევამ მყისიერად დაამუხრუჭა პროცესი. ფაქტობრივად ერთი წელი ისეთ შეკეტვებში გავატარეთ, როდესაც ვაქცინაც არ გვქონდა. მაგალითად, მე სადაც გავიკეთე ვაქცინა სამედიცინო უნივერსიტეტში, მშვიდად და წყნარად იცრება ხალხი. სწორი კომუნიკაციის შემთხვევაში ეს ტალღა რა თქმა უნდა, გაძლიერდებოდა. ახლა საზოგადოების გახლეჩვა, რომ არავაქცინირებულები შენი მტრები არიან, ეს კარგს არაფერს მოიტანს. მე ვფიქრობ, რომ ეს უნდა მოხდეს სულ სხვა გზით – სწორი კომუნიკაციით. სწორი ახსნით და კითხვებზე პასუხების გაცემით და არა ვაქსერებად და ანტივაქსერებად საზოგადოების დაყოფით.

განცდა მიჩნდება, რომ ხელისუფლება გაურბის პასუხისმგებლობას და ცდილობს, რომ ისევ მოსახლეობა შეატოვოს ერთმანეთს. ან საპატრიარქოზე იძახის, რომ ის არ მოუწოდებს, თორემ ყველა აიცრებოდა და ა. შ.

_ ესეც მნიშვნელოვანია ალბათ.

_ რა თქმა უნდა, ყველაფერი მნიშვნელოვანია. ხელისუფლებამ საპატრიარქოსთანაც უნდა იმუშავოს და დააჯეროს, რომ ვაქცინაციის პროცესში მათი როლი მნიშვნელოვანია. ხელისუფლებამ უნდა იმუშავოს ექიმებთანაც და მოსახლეობის თითოეულ წევრთან. ეს კომუნიკაცია არ მიმდინარეობს.

ერთადერთი ვინც გმირულად უძლებს, ეს არის სამედიცინო სექტორის მნიშვნელოვანი ნაწილი. გარკვეული მობილიზაციაა, მართალია დაგვიანებით, მაგრამ მაინც არის. როდესაც ვაქცინები გამოჩნდა, ეს ქსელი გამართულად ფუნქციონირებს და ეს უნდა აღვნიშნოთ. თუ ადამიანი იქამდე მივიდა, მას იქ ხვდება მეტ-ნაკლებად მოწესრიგებული სიტუაცია, მაგრამ მთლიანობაში ჩამოშლილია სწორი კომუნიკაციის ნაწილი ხელისუფლებასა და საზოგადოებას შორის.

პროცესი საკმაოდ არათანმიმდევრული და ქაოტურია და ამ ქაოსში ძნელია მოსახლეობას მოსთხოვო წესრიგის დაცვა. ჯარიმებს რაც შეეხება, ეს თავიდანვე არასწორი იყო. მე ვითხოვდი, რომ ჯარიმები რამდენიც იყო, იმაზეც კი გვემსჯელა.

_ კი, მაგრამ ამ მოხსნამ ბევრს უსამართლობის განცდა გაუჩინა და პრევენცია შემდგომში კიდევ უფრო რომ გართულდებოდა, ეს ხომ ნათელია?

_ რა თქმა უნდა. შემოღებაც არასწორად მოხდა. რაოდენობა იმდენად მაღალი იყო, რომ ამას ან არავინ არ გადაიხდიდა, ან ეს იყო არაგონივრული რაოდენობა. უნდა ყოფილიყო ის რაოდენობა, რომელიც იქნებოდა საკმაოდ მტკივნეული ჯიბისათვის და უნდა ჰქონოდა პროგრესული მექანიზმი.

_ მაგალითად 2000 ლარის ნაცვლად 200 ლარი?

_ მაგალითად. პირველ ჯერზე ყოფილიყო 200 ლარი და მეორე ჯერზე უკვე 500 ლარამდე გაზრდილიყო. ანუ ისეთი უნდა ყოფილიყო, რომ ადამიანს გადახდაც შეეძლოს. ჯარიმა იმისთვის უნდა წესდებოდეს, რომ ის გადაიხადო და გადახდის ტკივილმა აღარ გაგამეორებინოს, ეს ჩვეულებრივი ფსიქოლოგიური მომენტია. მაშინ ნებისმიერ თემაზე დავაწესოთ სიკვდილით დასჯა ან მთელი ქონების კონფისკაცია, ამითი დანაშაულები შემცირდება? ადმინისტრაციული ჯარიმების თემა ასე არ მუშაობს.

კიდევ ერთხელ ვიმეორებ არ ხდება კომუნიკაცია. ადამიანებს აქვთ კითხვები და პასუხები არ არის. მაგალითად, ახალგაზრდა ქალმა დასვა კითხვა ერთ-ერთ ჯგუფში, რომ ბავშვი ჰყავს ძუძუთი კვებაზე და აინტერესებს, აცრა რომ გაიკეთოს მის შვილს შეიძლება თუ არა პრობლემები შეექმნას. ეს კითხვა არსად არ ისმის საჯაროდ, იმიტომ, რომ არ არის კომუნიკაცია. ან როდესაც ადამიანი ამბობს, რომ თუკი პირველი აცრა გაიკეთა, მეორე აცრამდე უნდა იყოს თუ არა სახლში, თუ წესებით გადაადგილება შეუძლია და ა. შ.

ვინც სრულად ანტივაქსერია, იმათ მე მგონი თავი უნდა გავანებოთ. ყველაზე დიდი რაოდენობა ისეთია, ვინც მერყევია, ან შეიძლება ანტივაქსერობისკენ იყოს გადახრილი, მაგრამ არა იმიტომ, რომ იდეოლოგიური რწმენა აქვს, რომ მისი თავი მას ეკუთვნის. ასეთ ადამიანებს ვერ დავაჯერებთ და კი ბატონო იყვნენ თვითიზოლაციაში, ან იზოლაციაში. სხვას არ მიაყენონ ზიანი შეძლებისდაგვარად. დრეს რა სეგმენტები გვყავს, ესეც კი არ არის შესწავლილი.

მეორე სეგმენტი ეს არის, როდესაც რელიგიური რწმენით იკავებს თავს ვაქცინირებისაგან. აქ სახელმწიფომ უნდა იმუშაოს საპატრიარქოსთან და სხვა რელიგიურ კონფესიებთან და მათ თანადგომა სთხოვოს ამ ყველაფერში. ადამიანების მესამე ნაწილია ის, ვინც ამბობს, რომ ეს არის ის, ვიც შეთქმულების თეორიას მიყვება. მაგრამ ყველაზე დიდი სეგმენტია, რომელიც ჯერ არ აცრილა და ჯერჯერობით არც აპირებს აცრას, ასეა ხოლმე ფორმულირებული კვლევებში და აქ არის სამუშაო.

კომუნიკაციის ნაკადი უნდა მოდიოდეს ხელისუფლებიდან, რომ შევიარაღდეთ ინფორმაციით, ეს იქნებოდა სწორი. ამაში უნდა დახრჯულიყო საკმაოდ დიდი თანხა. ხელისუფლებას ნამდვილად უნდა, რომ ეს მდგომარეობა არ იყოს. ეს ნამდვილად ჩანს. შესაძლოა ზოგიერთ პოლიტიკოსს უნდა, რომ ეს ვითარება იყოს. ვნახეთ, 1-2 ლიდერის საჯარო პოსტები. მერე კი თქვეს, რომ სხვებმა დაწერეს და ა. შ. მე არ მივეკუთვნები იმ პოლიტიკოსების რიცხვს, ვისაც გაუხარდება, რომ დამძიმდეს ქვეყანაში სიტუაცია. მაგრამ, ვიცი, რომ ასეთი პოლიტიკოსები არიან და მათ შორის ოპოზიციაშიც.

დღეს სახელმწიფო ცდილობს, რომ მარტომ “გაიმარჯვოს” კოვიდზე, ეს ვერ იქნება ასე. ეტყობა, აქაც პოლიტიკური ქულების დაწერის შესაძლებლობას ეძებს. თუ კარგად არის სიტუაცია, თქვას, რომ მე გავიმარჯვე, ეს თქვას პრემიერმა. ვერ მოხდება ასე! ამ შეცდომას უშვებს, რომ ცდილობს ამ საკითხის პოლიტიკურად გამოყენებას.

მე იგივე კითხვას ვსვამ, რაც საპარლამენტო არჩევნების წინ მქონდა – რა იგეგმება ადგილობრივ არჩევნებთან დაკავშირებით? რატომ არავინ არ მსჯელობს ხელისუფლებიდან, უნდა ჩატარდეს თუ არა არჩევნები ამ პირობებში?! ოქტომბერი აგერ არის, სულ რაღაც 2 თვეღა დარჩა. მე ვფიქრობ, რომ საჭიროა მსჯელობა, პირველ რიგში კი პარლამენტში. მსჯელობა იმაზე, უნდა გაიმართოს თუ არა ასეთ პირობებში ადგილობრივი არჩევნები.

ავტორი: იაგო ნაცვლიშვილი

კომენტარები
იტვირთება...