A1 ბანერი

კახა კუკავა: თუ პრეზიდენტი გავხდები რელიგიური ორგანიზაციების დაფინანსებას შევზღუდავ (ინტერვიუ)

„თავისუფალი საქართველოს“ საპრეზიდენტო კანდიდატი კახა კუკავა აცხადებს, რომ თუ პრეზიდენტი გახდება ავსტრიის კანცლერის კურცის მაგალითს გამოიყენებს და ყველა პარტიას შესთავაზებს, რომ საერთო პროგრამაზე შეჯერდნენ. დაჯდება პარტიებთან ერთად, იმსჯელებს რა არის მის პროგრამაში ყველასთვის მისაღები და მხოლოდ ამას გაატარებს. ამბობს, რომ როდესაც პირი პრეზიდენტი ხდება იქ მთავრდება მისი პარტიულობა. ამ შემთხვევაში ის გეგმავს, რომ ლიბერალურ პარტიებთანაც ითანამშრომლოს, ვისთანაც დღეს საერთო კანდიდატის იდეაზე თანამშრომლობას გამორიცხავს და მათ ფაშისტებს უწოდებს.

ამის შესახებ კახა კუკავამ „აიპრესთან“ ინტერვიუში ისაუბრა. პოლიტიკოსი საუბრობს იმაზეც, რომ თუ პრეზიდენტი გახდება რელიგიური ორგანიზაციების უცხოეთიდან დაფინანსებას შეზღუდავს. ამბობს, რომ ეს ისევე უნდა იყოს დეკლარირებული როგორიც პოლიტიკური პარტიების დაფინანსებაა. მისი თქმით, ეს შეზღუდვა საპატრიარქოზეც გავრცელდება. აქვე აღნიშნავს, რომ ეს შეზღუდვა ნაწილობრივ არასამთავრობო ორგანიზაციებზეც უნდა გავრცელდეს.

კახა კუკავას კიდევ ერთი საარჩევნო დაპირება მარიხუანას ლეგალიზაციას წინააღმდეგ კანონმდებლობის მიღებაა, ასევე გეგმავს ანტიდისკრიმინაციულ კანონის გაუქმებას. ეს ყველაფერი პრეზიდენტის უფლებამოსილებებს ცდება, თუმცა პოლიტიკოსი ამბობს, რომ ეს შემდგომ ქმედებებზეც არის გათვლილი.

რას ჰპირდება ამომრჩეველს, გეგმავს თუ არა ავლაბრის რეზიდენციაში შესვლას, რა პოლიტიკა ექნება პრეზიდენტობის შემთხვევაში ლგბტ თემთან მიმართებაში და რას ფიქრობს გურამ კაშიას ქმედებაზე? – ამ და სხვა საკითხებზე „აიპრესმა“ კახა კუკავასთან ვრცელი ინტერვიუ ჩაწერა.

1 წლის წინ გააკეთეთ ბლოკი ნინო ბურჯანაძესთან. მაშინ როდესაც ჩავწერეთ ინტერვიუ მითხარით, რომ გსურდათ არა თუ ბლოკის შენარჩუნება, არამედ მისი კიდევ უფრო გაფართოება. მიდიოდა მუშაობა ამ მიმართულებით. მაშინ როდესაც ნინო ბურჯანაძემ ერთ-ერთმა პირველმა თქვა, რომ ის აპირებდა კენჭისყრას და პრეზიდენტობისთვის ბრძოლას, მაშინ თქვენ დააყენეთ თქვენი კანდიდატურა. რატომ გააკეთეთ ეს? ისევ რამე უთანხმოება არსებობს თქვენსა და ბურჯანაძეს შორის?

არა. ნინოს არ დაუყუენებია საბოლოოდ კანდიდატურა. პერსონალურად, რომ მე მინდა პრეზიდენტობა, ასე არ ყოფილა. არ ვთვლი, რომ მე საუკეთესო კანდიდატურა ვარ. თვენახევრის წინ მქონდა მიმართვა, როცა ლევან ვასაძეს შევთავაზე. ჩემი აზრით, ნებისმიერ არჩევნებში მნიშვნელოვანია ის, რომ ხალხს ჰქონდეს რეალური არჩევანი, რაც საქართველოში დეფიციტია და ხალხს ხანდახან ხელოვნურ არჩევანს სთავაზობენ ცუდსა და უარესს შორის. იმიტომაც გადავწყვიტე არჩევნებში მონაწილეობა, რომ ამ ფლანგზე ტრადიციულ-კონსერვატიულ ფლანგზე სხვა კანდიდატურა არ არსებობს.

თუმცა, ნინო ბურჯანაძეს ჰქონდა გაჟღერებული და ბოლო წუთამდე ფიქრობდა დააყენებდა თუ არა თავის კანდიდატურას…

ჩემთვის და დაახლოებული პირებისთვის ცნობილი იყო, რომ ის არ აპირებდა არჩევნებში მონაწილეობას. სწორედ ამიტომ გავაკეთე მიმართვა ლევან ვასაძეზე. ჩემთვის მთავარია იყოს ალტერნატივა. ვაშაძე, ზურაბიშვილი და ბაქრაძე ერთმანეთის ალტერნატივა არ არიან. ესენი არიან ერთი დიდი ლიბერალური პარტიის ქვე-ფრაქციები.

ლიბერალურ პარტიებთან არ გქონდათ კონსულტაციები?

არა.

თუმცა, მაშინ საუბრობდით, რომ ყველა პარტიასთან გვაქვს კონსულტაციებიო…

არის თემები, რაზეც ვსაუბრობთ. მაგალითად საარჩევნო გარემო, კონსტიტუციური მოწყობა… მაგრამ, არა საერთო კანდიდატის იდეა.

ერთიან კანდიდატურასთან დაკავშირებით საუბრობდით…

მართალს ამბობთ, მაგრამ ეს იყო რამდენიმე თვის წინანდელ პერიოდზე და ეს იყო ჰიპოთეზა რომ ყოფილიყო ერთიანი კანდიდატი, მაგრამ ჩემი მოსაზრება და ხედვა იყო, რომთუ დადგებოდა ერთიანი კანდიდატი, ის არ უნდა ყოფილიყო არც ულტრალიბერალი და არც ულტრაკონსერვატიული. ის უნდა ყოფილიყო შუალედური. იყო ეს იდეა დაგვარები და სახელებიც სახელდებოდა. 

მაგალითად ვინ?

ამ ადამიანთან კონსულტაციამდე საქმე არც კი მისულა, მაგრამ რადგან ჩავლილი ამბავია გეტყვით. მაგალითად, ანა დოლიძე. ეს იყო ჩემი იდეა, განხილვამდე საქმე არ მისულა. "ნაციონალური მოძრაობის" წევრი ერთიანი კანდიდატი ვერ იქნება. ენმ-ს წევრები, სამშობლოს მოღალატეები არიან, მათ შორის გუშინწინ რომ პარტიის წევრები იყვნენ დაგუშინ გამოეყვნენ, ამიტომ მისი წევრი გამაერთიანებელი კანდიდატი ვერ იქნებოდა. ეს ვერ იქნებოდა ვერც გამოკვეთილი ეროვნულობის მატარებელი და ვერცულტრალიბერალიზმის, ფაშიზმის წარმომადგენელი, რომელიც ჩვენთვისაც მიუღებელი იქნებოდა. მათ აირჩიეს სხვა გზა. 

ასე ფიქრობთ, რომ ულტრალიბერალები ფაშიზმის წარმომადგენლები არიან?

დიახ. რასაც ვუყურებდით 9 წლის განმავლობაში, ეს არის ლიბერალური ფაშიზმი. ანუ ეს არ არის კლასიკური ფილოსოფიური ლიბერალიზმი. ფილოსოფიური ლიბერალიზმიეს არის მეტი თავისუფლება, მეტი გულმოწყალება, მეტი ტოლერანტობა. გვახსოვს ვითარება როცა ლიბერალები მართავდნენ ქვეყანას. ახლაც მართავენ, მაგრამ ეს არ არისდეკლარირებული კურსი. 

როცა ულტრალიბერალიზმზე საუბრობთ ფსევდოლიბერალიზმში რატომ ურევთ?

ერთი და იგივეა. 

ვერ დაგეთანხმებით რომ ერთი და იგივეა. 

როგორ გიგა ბოკერია და თამუნა ჩერგოლეიშვილი ვინ არიან?!

პერსონებზე დისკუსიაში ვერ გამოგყვებით. 

მე ვსაუბრობ რეალობაზე. აბა 17-ე საუკუნეში სპინოზა და 19-ე საუკუნეში კანტი რომელი ფრთის წარმომადგენლები იყვნენ, ამაზე ხომ არ ვსაუბრობთ?! მე არ ვსაუბრობკლასიკურ ლიბერალიზმზე, როგორც მიმდინარეობაზე. ვსაუბრობ იმ პოლიტიკურ ჯგუფზე, რომელიც თავის თავს ლიბერალურს უწოდებდა და მართავდა ქვეყანას. ქართულრეალობაში ლიბერალური და პროდასავლური ძალები ფაშისტები არიან. ესენი არიან ძალები, რომლებიც მოწინააღმდეგის განადგურებას აბსოლუტურად ნორმალურსაშუალებად მიიჩნევენ. მათ შორის ფიზიკურ განადგურებასაც.

"დემოკრატიული მოძრაობის" წარმომადგენელმა გიორგი ახვლედიანმა თქვა, რომ საერთო კანდიდატის გარშემო გაერთიანების იდეა "ნაციონალურმა მოძრაობამ" ჩამოანგრია. იყო შეხვედრებზე ასეთი რამე?

მეც იგივე გითხარით ზუსტად. თუ ერთიანი კანდიდატი იქნებოდა უნდა ყოფილიყო ნეიტრალური. 

ანუ, "ნაციონალური მოძრაობა" ამბობდა, რომ კანდიდატი მაინცდამაინც მათი პარტიიდან უნდა ყოფილიყო?

ფაქტია მათ დააყენეს კანდიდატი. 

დააყენეს მოგვიანებით. ხომ შეიძლება ვერ შედგა მოლაპარაკება და იმ პარტიებთან ერთად დააყენა კანდიდატი ვისთანაც მოილაპარაკა?

ამიტომ ვერ შედგა. მათთან პირდაპირი კონსულტაციები მე არ მქონია, მაგრამ თითქმის ყველა ოპოზიციური პარტიის ლიდერი ევროპაში იყო და ჩუმჩუმად ხვდებოდნენსააკაშვილს. ეს იყო სწორედ მოლაპარაკების თემა, რომ მათ მხარი უნდა დაეჭირათ "ნაცმოძრაობის" კანდიდატისთვის. ის იდეა რაც მე გავაჟღერე არა მხოლოდ თქვენთანინტერვიუში, არამედ სხვაგანაც და მათ შორის არაფორმალურ მოლაპარაკებებშიც ცნობილი იყო, რომ მოდი დავასახელოთ ისეთი კანდიდატურა, როგორიც ანა დოლიძეა, კონსტანტინე გამსახურდია და იყვნენ სხვებიც, რომელიც არ არის არცერთი და არც მეორე ბანაკის წარმომადგენელი. რაც მოგვცემდა ოპოზიციური ელექტორატისკონსოლიდაციის საშუალებას. ეს ჩაშალა "ნაციონალურმა მოძრაობამ". 

გაერთიანებების თემაზე შეიძლება ითქვას, რომ ავანტიურისტულ პოლიტიკას ეწევით. ჯერ ბურჯანაძესთან გქონდათ კარგი ურთიერთობა, მერე დაუპირისპირდით, მერე ისევ კარგი ურთიერთობა დაამყარეთ, „ახლებთან“ იყავით, იქ ბესელიასთან გქონდათ ურთიერთობები… რა პრინციპით ახდენთ ხოლმე პოლიტიკურ ურთიერთობებს?

კოალიციები პოლიტიკაში აბსოლუტურად ნორმალური მოვლენაა, ეს არ არის ავანტიურიზმი.

სხვადასხვა ღირებულებების მქონე პარტიებთან გქონდათ ურთიერთობები…

რატომ არის სხვადასხვა? რომელიც ჩამოთვალეთ, რომელია სხვადასხვა ღირებულებების? როდისმე „ნაცმოძრაობასთან“ „ევროპულ საქართველოსთან“ ან „ქართულ ოცნებასთან“ კოალიცია მქონია?

სხვადასხვაში მაგალითად ბურჯანაძესა და „ახლებს“ ვგულისხმობ. ისე „ნაციონალურ მოძრაობასთან“ კავშირებში ლადო სადღობელაშვილი გადანაშაულებდათ…

რაში გამოიხატებოდა? „მარშალპრესი“ წერდა? თუ სუს-ი ამბობდა. ეგრე პუტინთანაც მაკავშირებდნენ.

იყო ამის საფუძველიც, იყავით რუსეთშიც წასული და გქონდათ საუბარი?

რუსეთში თუ ჩახვალ, ეს ნიშნავს, რომ პუტინთან ჩახვალ? ეს არის სამთავრობო დეზინფორმაციის მანქანა. მიუღებელ სუბიექტებთან კოალიციები არ შემიქმნია. „ნაციონალური მოძრაობა“ და „ქართული ოცნება“ არა უბრალოდ მიუღებელია, რაც „ახალ მემარჯვენეებზე“ მკითხეთ, არამედ ჩემი აზრით ქვეყნის მტრები არიან და უნდა იჯდნენ ციხეში. რაც შეეხება „ახლებთან“, დიახ მათთან მაქვს რაღაც იდეური უთანხმოება, ისევე როგორც ლევან ვასაძესთან. მაგრამ ეს ხალხი ქვეყნის პატრიოტები არიან.

„რესპუბლიკელებზე“ რას იტყვით მათთან ერთადაც იყავით 7 ნოემბრის მოვლენების დროს…

„რესპუბლიკელებიც“ მიუღებლები არიან ჩემთვის, თუმცა მტრები – არა. რაც შეეხება იმ მოვლენებს, თუ რაიმეს ვნანობ იმას ვნანობ რომ იმ ხალხთან ერთად ვიდექი 7 ნოემბრის მოვლენების დროს. არა მარტო „რესპუბლიკელებს“ ვგულისხმობ. საბედნიეროდ თუ საუბედუროდ იქიდან ქვეყანას არაფერი არ დაუჯდა. როგორც შემდგომმა მოვლენებმა გამოაჩინა ის კოალიცია არაფრით არ სჯობდა „ნაციონალურ მოძრაობას“.

ვასაძის იდეა საიდან წამოვიდა. რატომ შესთავაზეთ ვასაძეს? მით უმეტეს რომ მას ჰქონდა გაცხადებული, რომ პოლიტიკაში ჩართვას არ აპირებდა…

ჯერ ერთი მას აქვს ყველაზე მაღალი რეიტინგი საქართველოში.

მოგწონთ თქვენ მისი იდეები?

არ მომწონს. ჩემ მიმართვაში ვთქვი, რომ ბევრ რაღაცას არ ვიზიარებ მის პოზიციებში, მაგრამ ბევრ რაღაცას ვიზიარებ. პირველი მიზეზი რატომაც შევთავაზეთ გითხარით, რომ მას ჰქონდა მაღალი რეიტინგი და მეორე. ბევრი ადამიანი იყო ილუზიაში, რომ მას შეიძლებოდა დაეყენებინა თავისი კანდიდატურა. მინდოდა ამ გაურკვევლობისთვის დამესვა წერტილი.

თუ მის ხედვებს არ იზიარებთ, მაშინ რატომ სთავაზობდით კანდიდატობას?

მე ვთქვი, რომ 100 %-ით არ ვიზიარებ.

უმეტესად იზიარებთ?

ბევრ საკითხში ვიზიარებ. მაგალითად რაც შეეხება იმას, რომ ქართული მიწა არ უნდა გაიყიდოს არაბებზე ვიზიარებ.

მხოლოდ არაბებზე?

გამოცდილი ჟურნალისტი ხართ და იცით რასაც ვგულისხმობ. თუ გინდათ იურიდიული ტერმინოლოგიით გესაუბრებით, მაგრამ არ იქნება საინტერესო ინტერვიუ. ჩვენ ვსაუბრობთ რეალობაზე. კანონში არაბები რა თქმა უნდა არ ჩაიწერება და უცხო ქვეყნის მოქალაქე ჩაიწერება. მაგრამ ჩვენ როცა ვსაუბრობთ არაბებზე და თურქებზე ეს არის პრაქტიკული ვითარება. ესპანელები ხომ არ ყიდულობენ საქართველოში მიწას და ხომ არ აპირებენ რომ მერე ესპანეთს მიუერთონ საქართველოს ტერიტორია?!

არაბები აპირებენ?

განათლებული ადამიანი ხართ და იცით რომ საქართველოს დედაქალაქი 400 წელი არაბული ქალაქი იყო.

ის სხვა ისტორიული მონაკვეთი იყო…

რატომ იყო სხვა ისტორიული მონაკვეთი?! ბათუმი რამდენი წლის წინ დავიბრუნეთ თურქეთისგან?!

თურქეთზე შეიძლება ვისაუბროთ და უპირველეს ყოვლისა კი რუსეთზე…

ისლამურ სამყაროზე ვსაუბრობთ და რა თქმა უნდა ნომერ პირველი საფრთხე ამ მხრივ თურქეთია.

რახან ამ თემას შეეხეთ გკითხავთ ენის საკითხზეც. ერთ-ერთი პირველი იყავით, როდესაც 6-7 წლის წინ სხვადასხვა ობიექტებზე ქართულენოვანი აბრების გაკეთება მოითხოვეთ. შემდეგ მიიღო ქვეყანამ კანონი ამაზე. დღეს ისევ ვხედავთ ინგლისურ, არაბულ, ირანულ, თუ რუსულენოვან აბრებს. ცოტა ხნის წინ იყო ფაქტი, რომ 8 აგვისტოს ომის თემაზე აქცია გაიმართა და ერთ-ერთი რესტორნიდან გამოაგდეს იმიტომ რომ ოკუპაციის პროტესტის შემცველი ატრიბუტიკა ჰქონდათ… ამ ყველაფერზე საერთო კონტექსტში ვისაუბროთ და მითხარით, რატომ აღარ მიადევნეთ ამ ყველაფერს თვალი? ერთი ბრიფინგი გამართეთ და მორჩა?

არა, ასე არაა. თქვენ შეიძლება ერთი ბრიფინგი გააშუქეთ. მე შემიძლია განახოთ როდესაც უამრავი ღონისძიება დავგეგმეთ. ყოველდღე ვერ ვაქტიურობთ. სხვა პარტიებთან შედარებით გაცილებით მეტს ვაკეთებთ. ნახეთ, ბაქრაძეს აქვს ნახევარი მილიონი ლარი დახარჯული აგვისტოში. ჩვენ დახარჯული გვაქვს 4 000 ლარი. რასაც ვახერხებთ ეგეც სასწაულია.

ენის დაცვის პროგრამას რაც შეეხება, ჩვენ ირანულის წინააღმდეგიც ვართ, მაგრამ პირველ რიგში ჩვენი სამიზნე ინგლისურია. ენის საკითხში ქართულს არაბული არ ემუქრება, ინგლისური ემუქრება. არაქართული რეკლამების 99% ინგლისურია. ბოლო აქცია გვქონდა ვაკის პარკთან, სადაც ფეხსაცმლის მაღაზია შევღებეთ და ქართულად გადავაწერეთ. კიდევ ვაპირებთ ასეთ აქციებს. გარკვეული პაუზა გვქონდა იმიტომ რომ ერთ-ერთ დებატში კალაძემ თქვა, რომ კუკავას ვეთანხმები ამ საკითხშიო.

კანონი საერთოდ სასაცილო თემაა ამაზე, არანაირი კანონი არ სჭირდება. სულ რაღაც 2 თვე ვიყავი საკრებულოში რაღაც კომისიის თავმჯდომარე ამ თემაზე. 2013 წლის ზაფხულში. არანაირი კანონი არ დამჭირვებია. ერთ საათში მოვიწვიე ყველა მსხვილი რეკლამის დამკვეთი 2 საათი ვისაუბრეთ და ახლა რომ შეიძლებოდეს გადამოწმება ნახავდით რომ მაშინ ყველა რეკლამა ქართული იყო. როგორც კი კონტროლი მოიხსნა, დღეს ისევ 95 % არაქართულენოვანი რეკლამებია. მთავრობაში თუ ეროვნული ხალხია არ სჭირდება კანონი. როდესაც გრძნობს რომ ლიბერალები არიან, ზურგის ტვინით გრძნობს და არის არაქართული რეკლამა.

ძალიან ებრძვით ლიბერალებს…

თქვენ თუ გინდათ ფსევდო დავუძახოთ.

გადავიდეთ საარჩევნო დაპირებებზე, რა არის თქვენი მთავარი დაპირებები, რომელიც ჯერ საიტზე არ გაქვთ განთავსებული?

საშინაო პოლიტიკაში ჩვენთვის მთავარია სასამართლო რეფორმა. ასევე მარიხუანას ლეგალიზაციის წინააღმდეგ კანონმდებლობის მიღება.

ეკონომიკურ პოლიტიკაში გვაქვს 4 პუნქტი, ეს შეეხება მევახშეობის აკრძალვას, საწვავისა და მედიკამენტების მონოპოლიის აკრძალვას, მიწაზე საკუთრების დადგენას მხოლოდ საქართველოს მოქალაქეებისთვის და ადგილობრივი მწარმოებლების გათავისუფლებას 2 წლის განმავლობაში გადასახადებისგან.

საგარეო პოლიტიკას რაც შეეხება, ჩვენი მთავარი ინიციატივებია ანტიმიგრაციული კანონმდებლობის მიღება, რომელიც მიგრაციას შეზღუდავს, ასევე გვაქვს ინიციატივა რომ საზღვარგარეთიდან რელიგიური ორგანიზაციების დაფინანსება შეიზღუდოს და გამჭვირვალე გახდეს. პირველ რიგში თურქეთს და არა მხოლოდ თურქეთს ვგულისხმობ. ასევე ჩვენი ინიციატივაა, გაუქმდეს ანტიდისკრიმინაციული კანონი.

რელიგიური ორგანიზაციების დაფინანსების შეზღუდვაზე მათ შორის საპატრიარქოს დაფინანსებასაც გულისხმობთ?

საპატრიარქოს დაფინანსებაც გამჭვირვალე უნდა გახდეს რა თქმა უნდა. გვაქვს კანონი პოლიტიკური პარტიების დაფინანსების შესახებ, რომლითაც მე რა ფულსაც ვიღებ მის დეკლარირებას ვახდენ საგადასახადოში და არის შეზღუდვა. მაგალითად, უცხოეთის ორგანიზაცია ფულს ვერ მომცემს. რელიგიური ორგანიზაციები არიან სსიპ-ები და მათზეც უნდა გავრცელდეს. ვფიქრობ, ეს კანონი ნაწილობრივ არასამთავროებზეც შეიძლება გავრცელდეს.

ჩამოთვალეთ დაპირებები, მაგრამ ერთია ინიციატივა და მეორე რა უფლებამოსილებებში ჯდება პრეზიდენტი. ყველა ამ დაპირების შესრულება როგორ წარმოგიდგენიათ პრეზიდენტის პოსტიდან, მაშინ როცა საკმაოდ შეზღუდულია მისი უფლებამოსილებები კონსტიტუციის ახალი რედაქციის მიხედვით?

მიმაჩნია, რომ ეს არ იქნება ჩვეულებრივი არჩევები. თუ მოიგო ოპოზიციამ, ეს გამოიწვევს უმრავლესობის რღვევას. ჩვენ გვაქვს ავტორიტარული სისტემა, რომელიც ერთ კაცზეა დამოკიდებული და როგორც კი „ქართული ოცნება“ წააგებს არჩევნებს, ის წააგებს მთლიანობაში ყველაფერს.

ისეთ რაღაცაზე საუბრობთ, რაც დღეის მდგომარეობით რეალობას მოკლებულია…

„ნაცმოძრაობამ“ 2012 წელს საპარლამენტო უმრავლესობა რომ წააგო მარტო პარლამენტის უმრავლესობა დაკარგა?!

ის იყო საპარლამენტო არჩევნები. ეს არის საპრეზიდენტო, რომლის უფლებებიც შეზღუდულია…

„ნაცმოძრაობამ“ 70 საკრებულოში უმრავლესობა რომ დაკარგა, ეს საპარლამენტო არჩევნებთან იურიდიულ კავშირში იყო?!  მთავარი ფსიქოლოგიური მომენტია, რომ მმართველმა გუნდმა წააგო.

ანუ თქვენი პროგრამა არ არის მხოლოდ საპრეზიდენტო არჩევნების პროგრამა და შემდგომ ქმედებებზეა გათვლილი?

რა თქმა უნდა. პირველი რასაც გავაკეთებთ, იქნება ამ მახინჯი სისტემის დანგრევა. ყველა პარტიასთან გავმართავ შეხვედრას და ვეტყვი რომ მოვრჩეთ ეს 30 წლიანი სამოქალაქო დაპირისპირება. როგორც დასავლეთის დემოკრატიული ქვეყნები იმართება, ჩვენც შევთანხმდეთ, რომ პოლიტიკური გადაწყვეტილებები პოლიტიკური ძალების შეთანხმებით მიიღება.

ავლაბრის რეზიდენციაში შეხვალთ?

აუცილებლად. იგივე ფორმით არ დავტოვებ, მაგრამ დღეს ამას აქვს კონტექსტი, რომ ექნება თუ არა ყველაზე დიდი სასახლე საქართველოში ბიძინა ივანიშვილს. ოლიგარქის კაპრიზი მიუღებელია. მიმაჩნია, რომ ავლაბრისა და ათონელის რეზიდენციისგან ერთ-ერთი აუცილებლად უნდა გაიყიდოს. მთავრობას არ აქვს ზედმეტი შენობები თუ გუბერნიებს არ აქვს ჯიპები?! თუ იხარჯება 100 მილიონი სახელმწიფო ქონებების შენახვაზე, ჩვენ ეს ციფრი უნდა დავიყვანოთ 30 მილიონამდე.

ის, რომ მთავრობაში ხარჯები შესამცირებელია, ამაზე „ოცნების“ გარდა მგონი ყველა თანხმდება, მაგრამ თქვენ თუ გახდებით პრეზიდენტი თქვენს ხარჯებსაც თუ შეამცირებთ, მათ შორის აპარატის შემცირებით?

აუცილებლად. აპარატსაც შევამცირებ, რეზიდენციის საკითხსაც მოვაგვარებ. ოღონდ არ ნიშნავს რომ არ შევალ. მთავრობის კონტექსტია შევალ თუ არა ათონელზე? ათონელზე არ შევალ. მაქსიმუმ ერთი რეზიდენცია უნდა შეინახოს ბიუჯეტმა და უნდა ვიფიქროთ იმაზეც როგორ შემცირდეს ხარჯები. თუ პირობა იქნება ის, რომ ავლაბრის რეზიდენცია გაიყიდება, მაშინ კი ბატონო მე თანახმა ვიქნები რომ ათონელზე გადავიდე.

მთავარ კონკურენტად ვის მიიჩნევთ?

მთავარი კონკურენტი ჩემთვის არის ბაქრაძე და ზურაბიშვილი. გასაგებია რომ მეორე ტურში ვაშაძეს აქვს ყველაზე მეტი შანსი, მაგრამ მეორე ტურში მოხვედრისთვის ჩემი მთავარი კონკურენტები ბაქრაძე და ზურაბიშვილი არიან. რა თქმა უნდა ბაქრაძეც „ოცნების“ ფავორიტია.

მეორე ტური თუ იქნება ოპოზიციურ კანდიდატს დაუჭერთ თუ არა მხარს?

გააჩნია ვინ იქნება. კრიმინალს არ დავუჭერ მხარს. მიმაჩნია, რომ ვაშაძე კრიმინალური ბანდის წარმომადგენელია და მას არ დავუჭერ მხარს. არც ბაქრაძეს.

ვაშაძე და ზურაბიშვილი რომ იყვნენ არც ერთს დაუჭერთ მხარს?

იცით რას მეკითხებით? კიტოვანსა და იოსელიანს შორის ვის დაუჭერდით მხარსო. ეგ სამივე აღნიშნული კანდიდატი ბანდიტები არიან. მაგ სამის გარდა დანარჩენებზე შეიძლება ვიფიქრო.

თუ პრეზიდენტი გახდებით, იქნებით თუ არა ყველას პრეზიდენტი?

აუცილებლად. ამით უნდა დავიწყოთ ჩვენ ქვეყნის მართვა. ავსტრიის კანცლერი კურცი ახლახანს აირჩიეს, მან როგორც კი არჩევნები მოიგო თქვა, კამპანია დამთავრდა, მე ვიწვევ ჩემს ყველა ოპონენტს, დავჯდეთ, ერთად შევადგინოთ სამთავრობო პროგრამა სადაც იქნება ჩემი საკითხებიც და თქვენიც. საქართველოს სჭირდება ასეთი პირველი პირი, რომელიც ძალიან დიდი ხანია არ გვყოლია. მე ვაპირებ, რომ როგორც კი არჩევნები დამთავრდება ყველა პოლიტიკურ ძალას ვუთხრა, მოდი შევძლოთ და შევჯერდეთ საერთო პროგრამაზე. ავიღოთ ჩემი პროგრამიდან ის პუნქტები, რაც შეიძლება იყოს საერთო ყველასთვის.

ყველაში ლიბერალური პარტიებიც იგულისხმება?

დიახ. იმიტომ რომ ლიბერალურ პარტიებსაც ჰყავს ელექტორატი. ეს ქვეყანა არც ლიბერალებისაა და არც ეროვნულების. ყველას აქვს თანაბარი უფლება. უნდა მოვახერხოთ და უამრავ სეგმენტად დანაწილებული მოსახლეობისგან შევქმნათ ერთიანი საზოგადოება. როდესაც იგებ არჩევნებს იქ მთავრდება შენი პარტიულობა და შენ ხდები ყველას პრეზიდენტი. გერმანიის კანცლერი მარტო ქრისტიან-დემოკრატების ლიდერია და სხვებთან არ თანამშრომლობს?! ამერიკაშია არაჩვეულებრივი ინსტიტუტი ორპარტიული კომისია. როცა რაიმე საკითხი მწვავდება, ამბობენ რომ ეს საკითხი უნდა გადწყდეს ორპარტიულად, ჩვენთან ეს უნდა იყოს მრავალპარტიულად.

თუ პრეზიდენტი გახდებით როგორი პოლიტიკა გექნებათ ლგბტ თემთან მიმართებაში და დაიცავთ თუ არა მათ უფლებებს?

ჩემი პრეზიდენტობის პირობებში მათი უფლებები იქნება დაცული ყველაზე უფრო იდეალურად. ამ ადამიანების უფლებებს დღეს ლახავენ თვითონ ლიბერალები. იყენებენ მათ საზოგადოებაში პოლიტიკური დაძაბულობების შესატანად. თქვენთვის კარგადაა ცნობილი, რომ ლგბტ პირების მიმართ ძალადობა ათჯერ და ასჯერ გაიზარდა მას შემდეგ რაც დაიწყეს პოლიტიკური იმის შექმნა… პარადები და აღლუმები… აქამდე ამით არავინ არ იყო დაკავებული.

მათ ხომ არავინ აიძულებს? ვისაც უნდა საკუთარი აზრის ღიად გამოხატვა გამოდის და გამოხატავს…

აიძულებს. თოკს არ ჩამოაბამენ კისერზე, მაგრამ დაფინანსებას აძლევენ, არასამთავრობოებს უქმნიან და ეუბნებიან რომ გამოდი ქუჩაში. ჩახედული ხართ მაგ სფეროში და იცით, რომ 17 მაისს აქციას ვინც აწყობდნენ, იქ 80 % არანაირი ლგბტ არ ყოფილა. ეს ხალხი რაღაცა შიდა დაძაბულობის შესაქმნელად გამოიყენეს. კანონმა არ უნდა იკითხოს, მღვდელია, ლგბტ-ია თუ ვინ არის. ვინც დამნაშავეა უნდა გაუშვა ციხეში.

თუმცა, გვესმის რომ ღამის საათებში ან კლუბიდან გამოდის პირი ან სხვა და მას თავს ესხმიან, ხშირად ამ ფაქტებზე პოლიცია ეფექტურად არ რეაგირებს…

ყველა მოძალადე უნდა დააკავონ, თუმცა ერთ რაღაცასაც გეტყვით ობიექტურობისთვის. ამ თემის არასწორი ინტერპრეტირებაც ხდება. მაგალითად, ცნობილია რომ სანაპიროზე დგანან ტრანსსექსუალი სექსმუშაკები და ერთმანეთში ჩხუბობენ და ამას „რუსთავი 2“ გადასცემს რომ ჰეტეროსექსუალი დაესხა თავს. მე არ მაინტერესებს ვისგან წამოვა ძალადობა. ალბათ ჩემი თანამოაზრეებისგანაც იქნება ძალადობის ფაქტები, მაგრამ ვინც ჩაიდენს ფიზიკურ ძალადობას უნდა ჩაჯდეს ციხეში. იმავდროულად ლგბტ თემმაც უნდა იცოდეს, რომ მათი მხრიდან ნებისმიერი პროვოკაციააზე იქნება ადეკვატური პასუხი.

პროვოკაციაში რა იგულისხმება?

მაგალითად, რუსთაველზე გეი აღლუმების გამართვა.

ჰომოფობიისა და ტრანსფობიის წინააღმდეგ მიმართული აქცია გეი აღლუმი იყო?

კი. როდესაც ცისარტყელას დროშებით ხდება აქცია გეი აღლუმია.

ატრიბუტიკის აკრძალვას აპირებთ?

ფორმებზე მსჯელობა შეიძლება თუ ორმხრივი სურვილია. თუ მათი სურვილია რომ ძალადობა გააპროტესტონ და არა ის რომ მრევლი გადაიყვანონ ჭკუიდან, შუა წერტილის მოძებნა შეიძლება.

თუ პირს უნდა რომ გაიკეთოს ცისარტყელას ფერებში სამაჯური, ეს მისი უფლებაა, ასე არ არის?

არ არის ასე. ღორის ხორცის ჭამის უფლება ხომ გაქვს ამ ქვეყანაში? ახლა მეჩეთთან რომ მიხვიდე დაკლა იქ ღორი, ეს ნორმალურია?!

თუ ეკლესიაში არ შედის ამ ატრიბუტიკით?

გარეთაც, რუსთაველის გამზირზე ვამბობთ ჩვენ. „ბასიანში“ რითაც გინდა იმით იაროს.  

რუსთაველი მარტო მრევლის და ჰეტეროსექსუალების ქუჩაა?

ქალაქის ცენტრალური ადგილები, ეკლესიის მიმდებარე ტერიტორიები, რომელიც მიზნად ისახავს… დარწმუნებული ვარ, ყოველი 17 მაისი მიზნად ისახავდა მრევლის პროვოცირებას და არა ძალადობის გაპროტესტებას.

მიპასუხეთ კითხვაზე, აკრძალავთ თუ არა ლგბტ ატრიბუტიკის გამოყენებას?

გააჩნია სად. მაგალითად, სკოლებსა და ეკლესიებში ავკრძალავ.

რუსთაველზე?

თუ ადამიანს უჭირავს, ეჭიროს. ბესელიამ რომ თავის კომიტეტზე მიიყვანა, იქ რა თქმა უნდა ავკრძალავ. სახელმწიფო ამისგან დისტანცირებული უნდა იყოს. ლგბტ ღირებულებები ეს არ არის ქართული სახელმწიფოს ღირებულებები. ეს არის ფრანგული კონცეფცია, რომელსაც მე ვიზიარებ. სახელმწიფო იცავს ადამიანთა თანასწორობას. ფრანგულ სახელმწიფოს არ აქვს რატიფიცირებული უმცირესობების შესახებ უფლებები. ანტიდისკრიმინაციული კანონი სინამდვილეში იმიტომ არის დისკრიმინაციული რომ ის მე და ჰომოსექსუალს სხვადასხვანაირად გვიცავს. ჩვენ ნუ დავამატებთ ჰომოსექსუალს და ვთქვათ ძალადობა ადამიანის წინააღმდეგ ისჯება თავისუფლების აღკვეთით სამ წლამდე ვადით, მორჩა. არ უნდა ამას ხაზგასმები და პროვოკაციები.

შენ თვითონაც პროვოკატორობ თორემ იცი რომ 10-დან 9 შემთხვევაში იქ არავინ ჰომოფობიას არ აპროტესტებს.

არ ვპროვოკატორობ, კითხვებს ვსვამ…

არ ვიკითხავ ვინ მღვდელია და ვინ ჰომოსექსუალი. თუ ერთი ადამიანი მეორეს ტაბურეტკას ჩაარტყამს დაისჯება. რა თქმა უნდა მოძალადეს დავსჯი.

გურამ კაშიას ქმედებას როგორ შეაფასებთ?

ეს ჩემთვის კატეგორიულად მიუღებელია, თუმცა მიმაჩნია, რომ კანონის ფარგლებშია. ეს კანონის დარღვევა არ არის. მან ისარგებლა თავისი კანონიერი უფლებით, მაგრამ ესქმედება, ჩემი აზრით სამარცხვინოა. 

გურამ კაშიას არც ვიცნობ, მაგრამ მას ვერც ხელს ჩამოვართლევ და ვერც ჭიქას ვერ ავწევ მასთან ერთად. რაც მთავარია, იტყუება ეგ ადამიანი. აი ზუსტად მივადექით იმსაკითხს, რაც შეეხება ლიბერალურ ფარისევლობას. კაშია ამბობს, რომ მან გაიკეთა ეს სამკლავური, როგორც ძალადობის წინააღმდეგ თანასწორობის ნიშანი. ეს ხომ არისტყუილი?! 

რატომ არის ტყუილი?

ცისარტყელას დროშა რომელი მოძრაობაც არის ის მოძრაობა მარტო თანასწორობას ითხოვს?! ითხოვს თუ არა ის მოძრაობა ერთნაირსქესიანთა  ქორწინების დაკანონებას?!

ესეც თანასწორობის ერთ-ერთი ნიშანია…

მაშინ თქვას კაშიამ, რომ ითხოვს საქართველოში ერთნაირსქესიანთა დაკანონებას. 

თანასწორობას ითხოვს…

ახლა მე რომ ე.წ. სვასტიკა რომ გავიკეთო და ვთქვა ჰიტლერის მომხრე კი არ ვარ…

როცა კაშიამ ეს სამკლავური გაიკეთა ჰოლანდიაში, ერედივიზიონის ყველა გუნდის კაპიტანი ლგბტ სამკლავურით გამოვიდა, მაგრამ ისეთი რეაქცია, რაც საქართველოში ამფაქტს მოჰყვა, არსად არ მოჰყოლია…

ჰოლანდიაში არ მალავენ დანარჩენი კაპიტნები, რომ ისინი მხარს უჭერენ ლგბტ პირებზე მაგალითად ბავშვების გაშვილებას. არა მარტო ჰოლანდიაში, არამედ სხვა ქვეყნებშიც. თუ ვაჟკაცია, თქვას, რომ გურამ კაშია, ქართველი, მეგრელი კაცი მხარს უჭერს იმას, რომ ქართველი ბავშვები ჰომოსექსუალ ოჯახებში გააშვილონ. ამას უჭერს მხარს და არაძალადობის წინააღმდეგ ბრძოლას. ეს არის ლიბერალური ფარისევლობა!

თქვენთვის „ქართული მარში“ ეს არის ეროვნული მოძრაობა თუ აგრესიული ადამიანების თავყრილობა?

იქ არა მარტო აგრესიული, არამედ გარკვეული პირები ღიად იყვნენ დაკავშირებული სპეცსამსახურებთან.

იყვნენ, აღარ არიან?

როგორც ვიცი სადღობელაშვილმა დატოვა „ქართული მარში“. ზოგიერთ ადამიანს ვიცნობ და პატივს ვცემ. მაგალითად, კოკა მორგოშიას, გიორგი გიგაურს. მათ პატივს ვცემ პიროვნულად, მაგრამ როგორც ჩანს ისინი იქ კლიმატს ვერ ქმნიან. ჩვენ „მარშთან“ არანაირი თანამშრომლობა არც გვქონია და არც ვაპირებთ. მაგალითად, ბაკურ სვანიძე რომ არის იქ, ის ჩემთვის კატეგორიულად მიუღებელია. ეროვნულ მოძრაობაზე რაც თქვეს, რომ „მარში“ არის ზვიადის და მერაბის საქმის გამგრძელებლები ვართო, ეს კომედია იყო.

ვანო მერაბიშვილსა და ბაჩო ახალაიას ზოგიერთი პარტია პოლიტპატიმრად მოიხსენიებს. თუ პრეზიდენტი გახდებით, შეიწყალებთ მათ?

დავუმატებ კიდევ. მე რას დავუმატებ, მაგრამ სამართლიანი მართლმსაჯულების პირობებში მათ კიდევ უნდა დაემატოთ სასჯელი. რა უნდა შევიწყალო, ტერორისტები არიან.

სააკაშვილი მარგველაშვილს ადანაშაულებს რომ ჩამოართვა მოქალაქეობა. რას ფიქრობთ ამ საკითხზე და ხომ არ აღუდგენთ მას საქართველოს მოქალაქეობას?

არა. სააკაშვილს საქართველოში დაბრუნებაში ხელს შევუწყობ, ოღონდ ხელბორკილებით. ამასთანავე შევქმნი სპეციალურ დანაყოფს ძალოვან სტრუქტურებში, რომელსაც დაევალება სააკაშვილის დაკავება.

პრეზიდენტს არ აქვს ამის უფლებამოსილება და რანაირად გააკეთებთ ამას?

უშიშროების საბჭოს მოვიწვევ, დავუძახებ შს მინისტრს და თავდაცვის მინისტრს და მოვახერხებ. ნუ დაიწყებ იურიდიულ დეტალებში შესვლას. სულ პატარა თანამდებობა მქონდა და 1 საათში ინგლისური რეკლამები ჩამოვხსენი.

ერთია ინგლისურენოვანი რეკლამების ჩამოხსნა და მეორეა ექსპრეზიდენტის დაკავება…

მე და გახარია მოვილაპარაკებთ, ბოლოს და ბოლოს ერთი სოფლიდან ვართ.

ხელისუფლებაში როგორც ჩანს ყველა მიუღებელი არ არის თქვენთვის. გახარია არ იქნება მიუღებელი… დამისახელეთ ერთი მინისტრი, რომელიც მოგწონთ და 1 რომელიც ყველაზე მეტად არ მოგწონთ.

მისაღები დავით სერგეენკო. ადრე კახიშვილსაც ვამბობდი, მაგრამ ახლა მინისტრი აღარ არის. მიუღებელი კი თეა წულუკიანია. სერგეენკომ რაღაცა მაინც გააკეთა. ამ მთავრობის პირობებში, როცა სხვებს ნულოვანი შედეგი აქვთ, სერგეენკოს ცოტა გაკეთებული საქმეც აშკარად გამოყოფის ღირსია.

ინტერვიუს ბოლოს ერთი წინადადებით უთხარით თქვენს პოტენციურ ამომრჩეველს, რატომ უნდა დაგიჭირონ მხარი?

იმიტომ რომ სხვა არცერთი კანდიდატი, არაფერს არ შეცვლის. ყველა სხვა კანდიდატი არსებული სისტემის ნაწილია. სალომე ზურაბიშვილი, გრიგოლ ვაშაძე და დავით ბაქრაძე, ეს ნიშნავს რომ გვარები და სახელები შეიცვლება. ერთადერთი არასისტემური ოპოზიცია მე ვარ, მე არა მხოლოდ ამ ხელისუფლების ოპოზიცია, არამედ არასისტემური ოპოზიცია ვარ.

მსგავსი სიახლეები
კომენტარები
იტვირთება...