კახა კუკავა: კოალიციას არც “ნაცებს” შევუქმნით, არც “ქოცებს”, პარტნიორობა გვექნება (ინტერვიუ)

„თავისუფალი საქართველოს“ ლიდერი კახა კუკავა „აიპრესთან“ ინტერვიუში აცხადებს, რომ კოალიციას არც „ქართულ ოცნებას“ შეუქმნიან და არც „ნაციონალურ მოძრაობას“ და აზუსტებს, რომ „ნაციონალურ მოძრაობაში“ ყველა იმ პარტიას გულისხმობს, რომლებიც 2012 წლამდე მასთან ერთად იყვნენ. ამასთან კუკავა გარკვეულ საკითხებზე პარტნიორობას არ გამორიცხავს სხვა პარტიებთან, მათ შორის არც „ოცნებასა“ და „ნაცმოძრაობასთან“.

კახა კუკავამ ისიც აღნიშნა, რომ პრემიერ-მინისტრობის ყველაზე კარგი შანსი ჰიპოთეტურად გიორგი გახარიას აქვს, ხოლო თუ ჯამურად მოიგებს ოპოზიცია, მაშინ პრემიერად დასახელებული უნდა იყოს კომპრომისული ვარიანტი და არა რომელიმე კონკრეტული პარტიის ლიდერი.

„თავისუფალი საქართველოს“ საარჩევნო პრიორიტეტებისა და გეგმის შესახებ „აიპრესთან“ ინტერვიუში კახა კუკავა საუბრობს:

_ რატომ უნდა დაგიჭირონ ამომრჩევლებმა მხარი? რას პირდებით სხვა პარტიებისგან განსხვავებულს?

_ მე მგონი „თავისუფალი საქართველო“ ყოველთვის განსხვავებულს პირდება. იმიტომ, რომ პრინციპში ყველა სხვა პარტია მსგავსია. რომ გადახედოთ „ოცნების“, „ნაცმოძრაობის“, „ევროპელების“, „ლელოს“ პროგრამებს, მათ შორის აბსოლუტური სხვაობა არ არის. ეს არის კლასიკური ლიბერალური და ეკონომიკური ხედვები.

„თავისუფალი საქართველოს“ პროგრამული ნაწილი განსხვავებულია. მაგალითად, საარჩევნო პროგრამაში ჩვენი ერთ-ერთი საკვანძო საკითხი არის იაფი მედიკამენტები. ჩვენ დავიწყეთ თურქეთიდან იაფი მედიკამენტების იმპორტი და ბევრმა მოქალაქემ მიიღო კიდეც. ჩვენ მხარს ვუჭერთ იმას, რომ სააფთიაქო მონოპოლიები გაუქმდეს.

ახლა ვნახოთ, რა პოზიცია აქვთ ამ საკითხზე ჩვენს ოპონენტებს. მთავარი სააფთიაქო მონოპოლიები, რომლებიც არის – „ფარმადეპო“ და „ჯიპისი“ ივანიშვილის ოჯახის საკუთრებაა, ხოლო მეორე მონოპოლისტი „პე-ეს-პე“, „ნაციონალური მოძრაობის“ მთავარი სპონსორია.

_ ახსენეთ იმპორტი და თქვენი ხედვით მედიკამენტების იმპორტი თურქეთიდან უნდა განხორციელდეს?

_ დღეს ეს არის აკრძალული და ნებადართული უნდა იყოს. მხოლოდ თურქეთიდან კი არა, არამედ ნებისმიერი ქვეყნიდან. ვინაიდან დღეს აკრძალულია ეს, შესაბამისად მონოპოლიებია. აქცენტი თურქეთზე კი არ გვაქვს, არამედ იმაზე, რომ შეზღუდვა უნდა მოიხსნას. თუ ეს მოხდება, ყველა აფთიაქი მას რეალურად ფასად გაყიდის. დღეს რომ შევხედოთ, არაბრენდული აფთიაქები, რაც ნაკლებადაა, მაგრამ მაინც არის, ისინი წამლებს ყიდულობენ „პე-ეს-პე“-სა და „ავერსისგან“. ჩვენ ვითხოვთ, რომ იმპორტის საშუალება იყოს. ინფორმირებული ხართ თქვენ, რომ ჩვენ ამ პროგრამას ერთი წელია ვახორციელებთ და რამდენიმე ათასმა ადამიანმა იაფი და ხარისხიანი მედიკამენტები მიიღო. აქ არ არის საუბარი 2 და 3 ლარით იაფზე, არამედ 70-80%-ით გაიაფებულ მედიკამენტებზე.

რაც არ უნდა ილაპარაკონ ზოგადი ფრაზებით, რომ დავამარცხებთ სიღარიბეს და ავაყვავებთ ქვეყანას, ეს საკმარისი არ არის. კონკრეტიკამდე უნდა მივიდეთ. ერთადერთი პარტია, რომელსაც დღეს აქვს კონკრეტული შეთავაზება საზოგადოებისთვის, ეს ჩვენი პარტიაა. ჩვენგან ეს არა მარტო მოგისმენიათ, არამედ უკვე ვაკეთებთ ამას. თუ შევალთ პარლამენტში და გვექნება მეტი ბერკეტი, ამას დიდი სავაჭრო ქსელების საშუალებით განვახორციელებთ. რატომ არ გააკეთებენ ამას „ოცნება“ და „ნაცმოძრაობა“ გასაგებია, თვითონ არიან ამ სააფთიაქო ქსელების მფლობელები.

_ ბოლო პერიოდში ერთ-ერთ ყბადაღებულ თემად იქცა საბანკო სესხები. ამ მიმართულებითაც ხომ არ გაქვთ გეგმა?

_ კი ბატონო. როდესაც ადამიანების სახლებიდან გამოსახლება ხდებოდა, იქ „თავისუფალი საქართველოს“ გარდა ვინმე გინახავთ, რომ მისულიყო?! გინდა არჩევნებამდე, გინდა არჩევნების პერიოდში. ჩვენ 200 გამოსახლება გვაქვს ჩაშლილი. ფიზიკურად მივდიოდით და ვეჯაჯგურებოდით აღმასრულებლებს. სხვას არავის გაუწევია დახმარება. რატომ? – აქაც იგივეა, რაც მონოპოლიებზე ვთქვი. ჩვენი ძირითადი ოპონენტი ბანკირების მიერ დაფუძნებული პარტიაა.

თუ მიაქცევთ ყურადღებას, ჟვანიას გარდაცვალების შემდეგ, 2005 წლიდან თითქმის ყველა პრემიერი ბანკირი იყო. დღესაც ხედავთ, რომ ივანიშვილი ბანკირია, ხაზარაძე ბანკირია, „ნაციონალური მოძრაობა“ ბანკირების პარტიაა, ვაშაძეს ბანკირი აფინანსებს…

_ რა იცით, რომ ვაშაძეს ბანკირი აფინანსებს?

_ დაიწერა ამაზე და თუ თქვენ გჯერათ, რომ ვაშაძე და ჩარკვიანი თავისი ჯიბიდან აფინანსებენ 20 მილიონიან საარჩევნო კამპანიას, გჯეროდეთ, მაგრამ მე ამის არ მჯერა.

_ მე ზოგადად ბევრი რამის არ მჯერა, მაგრამ კითხვას ვსვამ.

_ ბევრი იწერება ამის შესახებ და არის ინფორმაციები. შესაძლოა ბევრი რამე იურიდიულად დადასტურებული არ იყოს, მაგრამ ეს ვერც იქნება დადასტურებული, სანამ ძიება არ ჩატარდება. მოქალაქეებს აქვთ უფლება, რომ პარტიას თანხა შესწირონ და ეს არის ლიმიტირებული, 60 000 ლარამდე. ათასობით ადამიანს შეაქვს ამა თუ იმ პარტიის ანგარიშზე ათასობით ლარი. იურიდიულ პირს კი 120 000 ლარამდე შეუძლიათ, მაგრამ რომ გადახედოთ შემომწირველებს, ძირითადად ფიზიკური პირები არიან.

შენ, რომელიც ამდენი წელია მედიაში ხარ და პოლიტიკასთან ახლოს ხარ, გჯერა, რომ მოიძებნება საქართველოში მოიძებნება ადამიანი, რომელიც საკუთარი ჯიბიდან ამოიღებს ფულს და პარტიას შესწირავს? გვესმის, რომ ამ პარტიების უკან რეალურად სპონსორები დგანან, ვინაიდან კანონი კრძალავს ამას, სპონსორი იმალება და ფორმდება ვითომ მოქალაქეებმა შესწირეს.

_ კითხვა დამისვით და გიპასუხებთ – რასაც პოლიტიკოსები ლაპარაკობთ, 80%-ის არ მჯერა.

_ სხვათა შორის ეგ ეგრეა, მაგრამ რადგანაც მე მომმართე, გაგცემ მაგაზე პასუხს. ჩვენ ვისაუბრეთ ორ თემაზე – მედიკამენტებისა და საბანკო გამოსახლებების შესახებ. მეც შემოვალ პოლემიკაში, შეუძლებელია ჩემი სიტყვების არ გჯეროდეს, იმიტომ, რომ მე ამას კი არ ვპირდები ხალხს, რომ არჩევნების შემდეგ გავაკეთებ, არამედ მე ეს დაწყებული მაქვს. თუ არ გჯერა, რასაც ვამბობ, სიას მოგცემ რამდენიმე ათასი ადამიანის, ვინც მიიღო იაფი მედიკამენტი. როგორც ჟურნალისტს შეგიძლიათ წახვიდეთ და გადაამოწმოთ. მერე იმ ადამიანების სიას მოგცემ, რომლებიც გამოსახლებას გადავარჩინეთ. წადი და გადაამოწმე ეს ინფორმაციები და გაიგებ სიმართლეს ვამბობ თუ არა.

„თავისუფალი საქართველო“ სრულიად განსხვავებული პარტიაა, რომელიც არ არის ანგაჟირებული და არ იღწვის იმისათვის, რომ ვინმეს თავი რამით დაამახსოვროს, მაგრამ რეალურად ამ ქვეყანაში თუ ვინმე რამეს აკეთებს, ეს არის „თავისუფალი საქართველო“. ის დაპირება, რომ 2000 ლარს პენსიას დაგინიშნავ და 5000 ხელფასს, მაგას არც დიდი ინტელექტი სჭირდება და არც პოლიტიკური გამოცდილება.

_ მართლმსაჯულების სისტემა არის ერთ-ერთი მთავარი გამოწვევა და როგორ ხედავთ ამ მიმართულებით პრობლემის მოგვარების გზას?

_ ამ მიმართულებითაც „თავისუფალ საქართველოს“ აქვს სრულიად უნიკალური პოზიცია. ჩვენ ვამბობთ, რომ სასამართლო და პროკურატურის სისტემიდან მთავარი მურუსიძე-შოთაძის კლანის გაშვებაა, რომელიც მმართველი რეჟიმის ხელში ინსტრუმენტია.

_ გაუშვეს ეს კლანი, მოვიდა ნებისმიერი სხვა გვარის კლანი. ამით რა იცვლება შინაარსობრივად?

_ გვარებს და სახელებს პირობითად ვამბობ, თორემ აქ საუბარია კლანის გაშვებაზე. მთლიანად უნდა შეიცვალოს იუსტიციის საბჭოს ფორმირების წესი და კლანის გაშვება იმიტომ არის მნიშვნელოვანი, რომ სისტემის გადატვირთვა მოხდეს და ახალი მოსამართლეების დაკომპლექტება ნოლიდან დაიწყოს. არა ამ იუსტიციის საბჭომ, მურუსიძემ კი არ უნდა დააკომპლექტოს ახალი მოსამართლეები, არამედ, როდესაც ჩვენ გადატვირთვაზე ვსაუბრობთ, ეს ნიშნავს იმას, რომ იუსტიციის საბჭო უნდა გასუფთავდეს.

„თავისუფალი საქართველო“ ამ პოზიციაზე იყო 2012 წლამდეც და მას შემდეგაც. მურუსიძეები და შოთაძეები დანიშნეს „ნაცებმა“, „გირჩებმა“ და „აღმაშენებლებმა“, როდესაც ხელისუფლებაში იყვნენ და ტაშს უკრავდნენ მურუსიძეს და შოთაძეს. მაშინ „ოცნება“ წინააღმდეგი იყო. როდესაც ხელისუფლება შეიცვალა, ახლა „ოცნება“ უჭერს მხარს მურუსიძეს და შოთაძეს და ზემოთ ჩამოთვლილები ეწინააღმდეგებიან. ერთადერთი ვინც ამას ეწინააღმდეგებოდა, ჩვენი პარტია იყო. ძალიან გამოცდილი ჟურნალისტი ხართ და სულ რომ გადაქექოთ ქართული პოლიტიკური სივრცე, სხვა პარტიას ვერ აღმოაჩენთ. სხვა პარტიებისთვის სასამართლოს თემა უბრალოდ პიარია.

_ მაგალითად „რესპუბლიკელებს“ რა პოზიცია ჰქონდათ?

_ „რესპუბლიკელები“ დღეს არიან „ნაციონალური მოძრაობის“ შემადგენლობაში, ისინი არ არიან ცალკე სუბიექტები. ჩვენ ხომ საარჩევნო სუბიექტებზე ვსაუბრობთ?! ვინაიდან, „რესპუბლიკური პარტია“ შეუერთდა „ნაცმოძრაობას“, ეს ნიშნავს, რომ ისინი იზიარებენ იმ ხედვას, რაც აქვს ენმ-ს.

_ „ლეიბორისტული პარტია“?

_ ვხედავთ, რომ „ლეიბორისტული პარტია“ დღეს არის „ნაციონალურ მოძრაობასთან“ მაჟორიტარული ალიანსში. ისინი იზიარებენ არა მარტო „ნაცმოძრაობის“ პოზიციებს, არამედ კახა ოქრიაშვილის პოზიციებსა. როდესაც მკითხეთ მედიკამენტებზე და გითხარით ჩემი გაკეთებული საქმე, ამ დროს ისინი მხარს უჭერენ კახა ოქრიაშვილს დმანისის მაჟორიტარული ოლქში.

_ როგორ უჭერენ, არ ადევნებთ მათ განცხადებებს თვალ-ყურს?

_ განცხადებებს კი აკეთებენ, მაგრამ „ნაციონალურ მოძრაობასთან“ მაჟორიტარული შეთანხმება ხომ აქვთ?! გასაგებია, რომ ამბობენ ამომრჩევლის დასანახად, რომ კახა ოქრიაშვილი ცუდი ბიჭია, მაგრამ მაშინ დაუყენონ მას კონკურენტი. ჩვენ დავუყენეთ.

_ აქედან გამომდინარე, რაც ისაუბრეთ ვის განიხილავთ პარტნიორად ქართულ პოლიტიკაში? თუ საერთოდ ასე დამოუკიდებლად ბრძოლას აპირებთ?

_ არა. ჩვენ პარტნიორობას ვგეგმავთ სხვადასხვა პოლიტიკურ ძალებთან, ოღონდ მე არ მაქვს ამ საკითხთან მიმართებით ამოჩემებული არც პოზიტიური და არც ნეგატიური მიდგომები. დაველოდები არჩევნების შედეგებს და მას მივიღებ, როგორც ფაქტს.

_ მათ შორის „ნაციონალურ მოძრაობასთანაც“ განიხილავთ?

_ გარკვეული პარტნიორობა და დიალოგი გვექნება ყველა ძალასთან. მათ შორის „ქართულ ოცნებასთან“ და „ნაციონალურ მოძრაობასთანაც“.

_ კოალიციას არ შეუქმნით ივანიშვილს?

_ კოალიციას რა თქმა უნდა არ განვიხილავთ არც „ქოცებთან“ და არც „ნაცებთან“. რა თქმა უნდა, არც „ევრონაცებთან“ და როცა „ნაცებს“ ვამბობთ, მათ ყველა დანარჩენ კომპონენტებს ვგულისხმობთ. ყველა დანარჩენ პარტიასთან ჩვენ ვფიქრობთ, რომ უკვე შემდეგ არჩევნებისთვის, უკვე 2021-თვის ვიფიქროთ უფრო მჭიდრო თანამშრომლობაზე. დღეს რომ გითხრათ ვინ მირჩევნია და ვინ არა, ყოველგვარ აზრს იქნება მოკლებული. მე შეიძლება პეტრე მერჩივნოს, მაგრამ ვერ მოხვდეს პარლამენტში და მოხვდეს პავლე.

_ დასახელებულია პრემიერობის კანდიდატები, რომელს დაუჭერთ მხარს?

_ არცერთს.

პრემიერ-მინისტრი უნდა იყოს ის, ვისაც შანსი აქვს, რომ რეალურად გახდეს პრემიერი. ასეთი ერთადერთი კანდიდატია დასახელებული და ეს არის გახარია. იმიტომ, რომ როდესაც პარტია ასახელებს კანდიდატს, მას შანსი რომ პრემიერი გახდეს იმ შემთხვევაში აქვს, თუ ეს პარტია აიღებს 51%-ს. ისიც არ ვიცით, უდევს თუ არა „ოცნებას“ ჯიბეში 51%, მას დიდი სირთულეების გადალახვა მოუწევს, მაგრამ ჰიპოთეტურად მაინც არის შანსი, რომ „ოცნებამ“ 51% აიღოს. არცერთ სხვა პარტიას ამის შანსი არ აქვს და თავადაც აღიარებენ. შესაბამისად, თუ „ოცნებამ“ ვერ მოაგროვა 51% და დღის წესრიგში დადგა ოპოზიციის მხრიდან შეთანხმებული კანდიდატის არჩევა, მაშინ პრემიერი გახდება არა რომელიმე პარტიის ლიდერი, არამედ კომპრომისული ფიგურა. საქართველოშიც ყოფილა ასეთი პრაქტიკა. თუ გახსოვთ, როდესაც ჟვანია გადადგა პარლამენტის თავმჯდომარის თანამდებობიდან, ბურჯანაძე მაშინ აირჩიეს, როგორც კომპრომისული ფიგურა, რომელიც არ წარმოადგენდა არცერთ პოლიტიკურ ძალას.

ახლაც თუ მოხდა დავუშვათ ასე, რომ „ოცნებამ“ აიღო 40% და 60% გადანაწილდა ოპოზიციურ პარტიებზე, ძალიან მაინტერესებს რატომ დაუჭერენ მხარს ან ნათელაშვილს, ან სააკაშვილს?! ვინც ხმამაღლა იყვირებს იმას მისცემენ ხმას? – რა თქმა უნდა არა. თუ პრემიერის საკითხი დადგა დღის წესრიგში, იქ ასევე დადგება კომპრომისების საკითხი, რომ პრემიერი უნდა იყოს ისეთი ადამიანი, რომელიც მისაღები იქნება ოპოზიციური სპექტრისთვის. სააკაშვილთან დაკავშირებით ყველა პარტია გამოვიდა და თქვა, რომ ხმას არ დავუჭერთო, ასე, რომ სააკაშვილი ერთ-ერთი ყველაზე ნაკლები შანსის მქონეა ამ პოსტზე.

_ ინტერვიუს ბოლოს მითხარით, რა მოლოდინები გაქვთ? რამდენ პროცენტს ელოდებით არჩევნებზე?

_ სოციოლოგიური გამოკითხვების მიხედვით გვაქვს 3%-ზე ცოტა უფრო მეტი.

_ რომელი გამოკითხვებით გაქვთ 3%-ზე მეტი?

_ ობიექტური, რომელსაც ჩვენ თვითონ ვუკვეთავთ და სხვადასხვა სოციოლოგიური კომპანიებიც აქვეყნებენ, ზოგი სოციალურ ქსელში და ზოგი ტელევიზიით. 3%-ზე ცოტა მეტი გვაქვს, მაგრამ ტრადიციულად ჩვენი პარტია უფრო მეტს იღებს, ვიდრე სოციოლოგიურ გამოკითხვებში. მაგალითად, 2018 წლის საპრეზიდენტო არჩევნებზე ჩვენ 1.5% ავიღეთ, ხოლო 3% თბილისში. მაშინ არცერთ კვლევაში ჩვენ მითითებული არ ვიყავით – არც „ედისონ რისერჩში“, არც „ენ-დი-აი“-ში, ან „აი-არ-აი“-ში. ახლა როდესაც მითითებული ვართ, გვაქვს მოლოდინი, რომ ამ მითითებულ პროცენტზე ცოტა მეტს ავიღებთ.

_ ანუ, 5%-მდე ელოდებით?

_ 5% კარგი შედეგი იქნება. 3-დან 5%-მდე ველოდებით.

სტატიის ავტორი იაგო ნაცვლიშვილი
მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად