კახა კალაძე: ავჭალაში, სადგურის მიმდებარედ, საუბნო პარკი მოეწყობა

თბილისის მუნიციპალიტეტის მერიისა და აზიის განვითარების ბანკის მჭიდრო თანამშრომლობით, ავჭალის ტერიტორიაზე საუბნო პარკის მოწყობა იგეგმება, – ამის შესახებ დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა.

 

„ავჭალაში, სადგურის მიმდებარედ, დაახლოებით, ორი ჰექტარი ფართობის ტერიტორია იქნა მოძიებული. აზიის განვითარების ბანკთან მჭიდრო თანამშრომლობით, ამ პარკის დაპროექტება და შემდეგ მისი მოწყობა მოხდება. მინდა, აზიის განვითარების ბანკს თანამშრომლობისთვის მადლობა გადავუხადო. ძალიან მიხარია, რომ ავჭალაში საუბნო პარკი გაშენდება. ჩვენ ამ ტენდეციას შევინარჩუნებთ, თბილისში რაც შეიძლება მეტი მწვანე სივრცე უნდა შევქმნათ. გზაგამყოფ კუნძულებსაც კი არ ვტოვებთ ქალაქში. ვცდილობთ, ყველაფერი მაქსიმალურად გავალამაზოთ. წლების განმავლობაში სერიოზული პრობლემა იყო, რომ სკვერების, პარკების, საფეხბურთო მოედნების ხარჯზე საცხოვრებელ კორპუსებს აშენებდნენ. მთავარია, რომ საზოგადოების მხრიდან არის მხარდაჭერა. ერთიანი ძალისხმევით, ყველაფერი უნდა გავაკეთოთ იმისთვის, რომ ქალაქში რაც შეიძლება ბევრი მწვანე სივრცე შევქმნათ. ეს ჩვენი შვილებისთვის აუცილებელია. მით უფრო, იმ პირობებში, როდესაც კერძო ავტომობილების რაოდენობა იზრდება და გამონაბოლქვის პრობლემა ჩვენს ჯანმრთელობაზე აისახება“, – აღნიშნა კახა კალაძემ.

პროექტის განხორციელების შედეგად, პარკის ტერიტორიაზე მოეწყობა თანაბრად ხელმისაწვდომი და კომფორტული სივრცეები მოსახლეობის ყველა ჯგუფისთვის. საუბნო პარკის მოწყობის პროექტირების პროცესში, გაზიარებული იქნება საუკეთესო სართაშორისო გამოცდილება და ადგილობრივი მცხოვრებლების საჭიროებები.

თანამონაწილეობითი პრინციპების გათვალისწინებით, დაგეგმარების პროცესი მოსახლეობის გამოკითხვას და მათთან კონსულტაციების გამართვას ითვალისწინებს, რათა ადგილობრივი მცხოვრებლების, როგორც პარკის მთავარი მომხმარებლების ინტერესები და საჭიროებები გამოვლინდეს.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად