ჯანი ბუკიკიო: საარჩევნო სისტემის შესაცვლელად შვიდი წელი ძალიან ბევრია

ვენეციის კომისიის პრეზიდენტმა ჯანი ბუკიკიომ "საზოგადოებრივ მაუწყებელთან" ექსკლუზიურ ინტერვიუში საქართველოს საარჩევნო სისტემის სავარაუდო ცვლილებაზე ისაუბრა და აღნიშნა, რომ საარჩევნო სისტემის შესაცვლელად შვიდი წელი ძალიან ბევრია. მისი განმარტებით, ვენეციის კომისიას ზეწოლის განსახორციელებლად არანაირი მექანიზმი არ აქვს. 

"როდესაც დავიწყეთ საკონსტიტუციო ცვლილებებზე მსჯელობა, მიზნად დავისახეთ, რომ საქართველო ახალ საარჩევნო სისტემაზე მომავალი არჩევნებიდან გადასულიყო. როგორც ვიცი, პარლამენტის მაჟორიტარმა წევრებმა ამ სისტემას მხარი არ დაუჭირეს და უმრავლესობამ პარტიაში მიაღწია კომპრომისულ ვარიანტს. ამ შეთანხმების თანახმად, ახალ სისტემაზე გადასვლა 2024 წლიდან დაიგეგმა. ჩვენ გამოვხატეთ ჩვენი მოსაზრება და ამ მოსაზრებაზე ვიმსჯელეთ დღესაც.

საარჩევნო სისტემის შესაცვლელად 7 წელი ძალიან  ბევრია. ვენეციის კომისიას ზეწოლის განსახორციელებლად არ აქვს არანაირი მექანიზმი. თქვენთან ინტერვიუში ვამბობ და ეს ჩაიწერება საბოლოო დასკვნაშიც, რომ გადადება არ არის კარგი. თუ გადაიდება 2024 წლამდე ახალ სისტემაზე გადასვლა, მაშინ ჩვენ არაფერი შეგვიძლია გავაკეთოთ.

კარგია, რომ 2024 წლიდან ახალ სისტემაზე გადახვალთ. საქართველოს ახალი საარჩევნო სისტემა ექნება, რაც ხელს შეუწყობს ქვეყნის პარლამენტში მეტ პლურალიზმს. კიდევ ერთხელ ვამბობ, რომ7 წელი ძალიან ბევრია, განსაკუთრებით საქართველოსთვის, როცა ამ წლების განმავლობაში შეიძლება ძალიან ბევრი რამ მოხდეს. სამწუხაროა, მაგრამ უნდა მივიღოთ ის, რაც საქართველოს ხელისუფლებამ გადაწყვიტა",-აცხადებს ბუკიკიო.  

მსგავსი სიახლეები
კომენტარები
იტვირთება...