იურიდიულმა კომიტეტმა ეკლესიის საპარლამენტო მდივანზე ინიციატივას მხარი არ დაუჭირა

იურიდიულ საკითხთა კომიტეტზე „საპარლამენტო მდივნის შესახებ“ საკანონმდებლო წინადადება განიხილეს, რომლის თანახმადაც, მართლმადიდებელ ეკლესიას საპარლამენტო მდივანი უნდა ჰყავდეს. საკანონმდებლო წინადადების ინიციატორი და ავტორია “სამართლიანობის აღდგენის კავშირი ხმა ერისა: უფალია ჩვენი სიმართლე”.

როგორც კომიტეტის თავმჯდომარემ ეკა ბესელიამ განაცხადა, აღნიშნული საკანონმდებლო წინადადების ინიცირება პარლამენტში საპატრიარქოსთან შეთანხმების გარეშე მოხდა.

საპარლამენტო უმრავლესობის წევრმა ზაქარია ქუცნაშვილმა კომიტეტის სხდომაზე განმარტა, რატომ არ უნდა იყოს აღნიშნული ინიციატივა მიღებული.

„კონსტიტუციაში არის ამ ინიციტივაზე პასუხი. კონსტიტუციური შეთანხმება ამბობს, რომ სახელმწიფოსთან და ნებისმიერ ორგანოებთან ურთიერთობაში საქართველოს სამოციქულო ეკლესიას წარმოადგენს საქართველოს კათოლიკოს პატრიარქი, ქორეპისკოპოსი ან მათ მიერ უფლებამოსილი პირი წმინდა სინოდიდან. ამიტომაც, „საპარლამენტო მდივნის შესახებ“ სპეციალურ კანონში ცვლილებების შეტანა კოლიზიაში მოვა კონსტიტუციურ შეთანხმებასთან. აქედან გამომდინარე მიზანშეუწონლად მიმაჩნია საკანონმდებლო წინადადების ამ ფორმით განხილვა-დამტკიცება. ჩვენ იმიტომ გავმიჯნეთ სახელმწიფო და ეკლესია, რომ მათ მოისურვეს, ეს სამი პირი ყოფილიყო უფლებამოსილი კონსტიტუციური შეთანხმებიდან, რადგან მოგეხსენებათ ორთოდოქსიზმი თავისთავად მოიცავს კანონიკური წესების მკაცრ სისტემას და ამ პირობეში უნდა იცოდე ვინ რაზეა პასუხისმგებელი. ასე, რომ მეოთხე თანამდებობის პირის გაჩენა საერო დაწესებულებებსა და ეკლესიას შორის ვფიქრობ, კონსტიტუიური შეთანხმების განაწესს ეწინააღმდეგება“, – განაცხადა ზაქარია ქუცნაშვილმა.

იურიდიულ საკითხთა კომიტეტზე აღნიშნულ საკანონმდებლო წინადადებას კენჭი უყარეს, თუმცა დეპუტატებმა მას მხარი არ დაუჭირეს.

მსგავსი სიახლეები
კომენტარები
იტვირთება...