ირაკლი ღარიბაშვილი: „საქართველოს არასოდეს ჰქონია ასეთი მაღალი დონის პოლიტიკური და პრაქტიკული მხარდაჭერა ნატოსგან“

საქართველოს თავდაცვის მინისტრობის კანდიდატმა გაერთიანებული კომიტეტების სხდომაზე სიტყვით გამოსვლისას განსაკუთრებული ყურადღება დაუთმო ნატოსთან და მის წევრ ქვეყნებთან ურთიერთობის საკითხებს.

„ნატოსთან ჩვენს ურთიერთობას საუკეთესოდ წარმოაჩენს პრინციპი – მეტი ნატო საქართველოში და მეტი საქართველო ნატოში. საქართველოს არასოდეს ჰქონია ასეთი მაღალი დონის პოლიტიკური და პრაქტიკული მხარდაჭერა ნატოსგან. საქართველო სხვა მიმართულებებთან ერთად, მაქსიმალურად ცდილობს დააკმაყოფილოს ნატოს წევრი ქვეყნებისათვის დაწესებული ფინანსური მოთხოვნები და მომავალშიც შეინარჩუნებს სამხედრო დანახარჯებს მშპ-ის 2%-ის ფარგლებში“, – აღნიშნა ირაკლი ღარიბაშვილმა.

ირაკლი ღარიბაშვილის განცხადებით, საქართველო წარმატებით ახორციელებს ნატო-საქართველოს არსებით პაკეტს, რომელიც დეკემბრის თვის ნატოს მინისტერიალზე მიღებული ერთობლივი გადაწყვეტილებით განახლდა. აღნიშნული პაკეტის ფარგლებში მან ყურადღება გაამახვილა წვრთნისა და შეფასების ერთობლივ ცენტრზე (JTEC), რომელმაც გააფორმა თანამშრომლობის ხელშეკრულება ნატოს გაერთიანებული ძალების სასწავლო ცენტრთან და ჩამოყალიბდა ნატოსთან აფილირებულ ცენტრად. ირაკლი ღარიბაშვილმა ნატოსა და ნატოს წევრ ქვეყნებთან თანამშრომლობის ასპექტით ისაუბრა საერთაშორისო წვრთნების შესახებ, რაც, მისივე განმარტებით, ხელს უწყობს ურთიერთთავსებადობის ამაღლებას ნატოსთან.

თავდაცვის მინისტრობის კანდიდატის თქმით, საქართველო გააგრძელებს მონაწილეობას ნატოსა და ევროკავშირის საერთაშორისო მისიებში მსოფლიო მშვიდობისა და უსაფრთხოების უზრუნველსაყოფად.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად