გიორგი ვაშაძე: ოპოზიციის პრემიერობის კანდიდატობას ვაპირებ მე, მხარდაჭერა ენმ-საც მოუწევს (ინტერვიუ)

„სტრატეგია აღმაშენებლის“ ლიდერი და პრემიერობის კანდიდატი გიორგი ვაშაძე აცხადებს, რომ კოალიცია „ძალა ერთობაშია“ ვიწრო კლანი იყო. მობეზრდა მუდმივად ფეხის დადება და ჭიდაობა და ამიტომ დატოვა კოალიცია. ვაშაძე იმასაც ამბობს, რომ „სტრატეგია აღმაშენებლის“ პრეზენტაციებზეც წინააღმდეგობა შეხვდა გუნდში. ასახელებს კონკრეტულ გვარსაც, ვინც მას წინააღმდეგობას უწევდა. ამბობს, რომ ის გია ბარამიძეა.

აღნიშნული განცხადება გიორგი ვაშაძემ „აიპრესისთვის“ მიცემულ ვრცელ ინტერვიუში გააკეთა. პოლიტიკოსი აბსურდს და ტალახის სროლას უწოდებს ბრალდებებს იმაზე, რომ ის ვანო ჩხარტიშვილისგან ფინანსდება და ამბობს, რომ ეს კითხვა არავის გასჩენია, როცა მათ გუნდში იყო და გარკვეულ უბნებზე საპრეზიდენტო კამპანიასაც აფინანსებდა 2018 წელს.

ინტერვიუში არც დაპირებებზე ხმაურიან განცხადებებს ერიდება და ამბობს, რომ ეროვნული ბანკი საბანკო სექტორთან კარტერულ გარიგებებსა და კორუფციულ სქემებშია შესული და ეს მოხდა მას შემდეგ, რაც ეროვნული ბანკიდან გიორგი ქადაგიძე წავიდა. ამ ნაწილში პოლიტიკოსი ხელისუფლების ხელს ხედავს.

რა დაპირებები აქვს, რა მექანიზმებით განახორციელებს ამ დაპირებებსა და რა შეფასებებს აკეთებს მიმდინარე პოლიტიკურ თემებზე? – ამ საკითხების შესახებ „აიპრესთან“ ინტერვიუში გიორგი ვაშაძე საუბრობს, რომელთან ინტერვიუც ორშაბათს 21 სექტემბერს ჩავწერეთ:

_ თქვენც და სხვა პოლიტიკოსებიც მუდმივად აცხადებდით, რომ კოალიციური მთავრობა უნდა იყოს და ამისთვის გქონდათ მზაობა. ამ ფონზე, როგორ გაიგეთ სააკაშვილის გაკეთებული განცხადება „ტვ პირველის“ ეთერში, როდესაც ის ამბობს, რომ ან „ნაციონალური მოძრაობა“ მოდის უმრავლესობით, ან ქვეყანა დაიღუპება?

_ ძალიან ცუდად. მე ეს გავიგე, როგორც ვიწრო პარტიული ინტერესებისთვის გაკეთებული განცხადება და ალბათ გახსოვთ ჩემი ძალიან მკაფიო მოსაზრებები ამ საკითხთან დაკავშირებით და ვწუხვარ, რომ „ნაციონალურმა მოძრაობამ“ თავის სამიზნედ ოპოზიცია აირჩია და არა ივანიშვილი. მით უმეტეს აქ დარჩენილ ე. წ. ლიდერებს მიზანი აქვთ, რომ როგორმე პარლამენტში მოხვდნენ და რეალურად გამარჯვებისთვის არ იბრძვიან. ეს არ არის გამარჯვებისთვის გადადგმული ნაბიჯები. ვფიქრობ, რომ ამას საზოგადოებამ პასუხი უნდა გასცეს.

_ როდესაც სააკაშვილი და ივანიშვილი პოლარიზაციის თემით ერთმანეთს ასე ავსებენ, გარიგების ნიშნებიც ხომ არ დაინახეთ მათ შორის?

_ ჩვენ რომ ამას შევხედოთ ამ კუთხით, ეს ნამეტანი იქნება, თუმცა ბუნებრივ მოკავშირეებად იქცნენ.

_ დღემდე ბევრი პასუხგაუცემელი კითხვაა, რატომ დატოვეთ კოალიცია „ძალა ერთობაშია“? მაგალითად, გია ბარამიძე დღესაც აცხადებს, რომ ვაშაძემ სამჯერ უღალატა პარტნიორებსო. პირველ პერიოდად იხსენებს, როდესაც „ნაციონალური მოძრაობა“ დატოვეთ, თუ სწორად მახსოვს 2015 წელს მოხდა ეს. შემდეგ, 2016 წელს პაატა ბურჭულაძის კოალიციაში იყავით და ასევე დატოვეთ და ახლა ისევ დატოვეთ კოალიცია, ამჯერად „ძალა ერთობაშია“. ბევრჯერ იმეორებს ამას. რა პასუხი გაქვთ?

_ ენას ძვალი არ აქვს და ყველას შეუძლია ბევრი რამე თქვას. რატომ დავტოვე და ის, რაც ხდებოდა „ნაციონალურ მოძრაობაში“ უბრალოდ მომბეზრდა. მომბეზრდა რაც იყო მაშინაც და რაც არის ახლაც – დინების საწინააღმდეგოდ სვლა. ხალხის ნების საწინააღმდეგოდ მოძრაობა და ა. შ.

რაც შეეხება გაერთიანებული ოპოზიციის დატოვებას, მე იქ ვიყავი ცალკე პოლიტიკური სუბიექტი პარტია „ახალი საქართველოს“ სახით და როგორც ჩვენ მივიღებდით გადაწყვეტილებას, ისე იქნებოდა. აქაც მომბეზრდა კულუარებში ბრძოლა, საქმის კეთების ნაცვლად მუდმივად ჭიდაობა, ფეხის დადება და ა. შ.

_ ერთპარტიული მმართველობისკენ სვლა იყო კოალიციაში?

_ ერთპარტიული კი არ იყო, არამედ ეს იყო ვიწრო კლანი, რომელსაც ძველი დიდებიდან შერჩენილი აქვს რაღაც მხარდაჭერა და იბრძვის საპარლამენტო მანდატებისთვის. ასეთია ბარამიძეც და აბსოლუტურად ყველა. რომელს რა გაუკეთებია უახლეს საქართველოს პოლიტიკაში ცალკე აღებულს?! რამე ინიციატივით გამოსულან როდესმე? რამე პროექტი შეუთავაზებია ამ ადამიანებიდან ბევრ მათგანს ქართული საზოგადოებისთვის?! ბარამიძე თავიდანვე მახსოვს, როგორ ეწინააღმდეგებოდა პროექტ „სტრატეგია აღმაშენებელს“ და თურმე მე პრეზენტაციები არ უნდა გამეკეთებინა და ხალხთან არ უნდა მესაუბრა აღმშენებლობის პროექტებზე, რომელსაც ერთად ვაპირებდით.

_ წინააღმდეგობა შეგხვდათ ამაზე?

_ რა თქმა უნდა. არ გახსოვთ, 1 ოქტომბრიდან მოყოლებული არცერთ შეხვედრაზე რომ არ დადიოდნენ დემონსტრაციულად?! რა თქმა უნდა ეწინააღმდეგებოდნენ. ნებისმიერ სიახლეს ეწინააღმდეგებიან და ამოვიდა ყელში. მე ნამდვილად არ მაქვს მათთან ჭიდაობის და კინკლაობის დრო. მე მოვიარე დღეს ქუთაისი, წყალტუბო, ხონი, სამტრედია, ვანი. გუშინ კიდევ თერჯოლა, ბაღდათი, ზესტაფონი. დავდივართ უბან-უბან, ხალხს ვხვდებით და ველაპარაკებით. მაგათ მეტი საქმე კი არ აქვთ. ოთახში დასხდებიან და ერთმანეთის ჭიდაობაში სიამოვნებას იღებენ. ეს არის ზუსტად, რომ აბსოლუტურად გამოცლილი აქვს შინაარსი იმ ადამიანებს, ვინც დარჩნენ „ნაციონალურ მოძრაობაში“. კიდევ ერთხელ ვამბობ, ერთი პრეზენტაცია მაინც გაუკეთებია ბარამიძეს?! ან ერთი შეთავაზება მაინც გაუკეთებია ხალხისთვის, მარტო ლანძღვა-გინებით რომ გამოირჩევა?! ამოვიდა ყელში. 2 თვეა მაგათ სისულელეებს, რასაც ჩემზე ლაპარაკობენ. ხომ არ შეიძლება ასე ბოლოსდაბოლოს?!

_ სალომე სამადაშვილმა თქვენზე ეპითეტი თქვა, რომ მიშას ჩინურ ვერსიას „აწვებაო“. ამაზე გაქვთ პასუხი?

_ ეს როდის თქვა.

_ ეს თქვა მაშინ, როდესაც ახალი წამოსული იყავით გაერთიანებიდან.

_ ერთსახოვანია ეს ხალხი, მანდატებისთვის მებრძოლი არაფრისმაქნისები. ასე დავარქმევდი ამათ სუყველას. მითხარით, ამ ხალხის ერთი ინციატივა გახსოვთ?! რამე გაუკეთებიათ?!

_ წარსულში თქვენც გაქვთ აღიარებული და ფაქტია, რომ სააკაშვილს ბევრი რამე აქვს გაკეთებული…

_ ზუსტად მაგას ვამბობ, რომ სააკაშვილს გაკეთებული აქვს და შერჩა ეს უმაქნისები სუყველა. ჯერ კიდევ იმ დონეზეა, რომ ახალ თაობის პოლიტიკოს მელიასა და წარსულს ვანო მერაბიშვილს შორის თურმე არჩევანი უნდა გააკეთოს „ნაცმოძრაობამ“, კარგად ყოფილა მაგათი საქმე. დამთავრდა ყველაფერი, ეს არის ხელის შეშლა და გამარჯვების წინაღობა. ეს არის მიზანს აცდენილი დამოკიდებულება, აბსულუტურად აცდენილია მიზანს. მიზანი უნდა იყოს ივანიშვილის დამსხვრეული ოლიგარქიული მმართველობის დამარცხება, რომელმაც მოატყუა ხალხი და არა ის, რომ შენი ქმედებებით ხელი შეუწყო მისი რეიტინგის ზრდას და ოპოზიციის დასუსტებას. საიდან აქვთ ილუზიები, რომ რამე შეუძლიათ ხალხისთვის გააკეთონ რამე? არ არის მიშა საქართველოში, თორემ სხვათა შორის ის პოლიტიკოსია, რომელიც გრძნობს ხალხის განწყობებს. მასთან კავშირი აქვთ მანდატებზე მებრძოლ, უმაქნისი ადამიანების ამ ვიწრო წრეს. მართლა 8 წელია, არაფრის კეთებით გამოიჩინეს თავი.

_ მიუხედავად იმისა, რომ თქვენ ხართ პრემიერობის კანდიდატი, არსებობს რაიმე შესაძლებლობა და საერთოდ თუ განიხილავთ იდეის დონეზე, რომ სააკაშვილის პრემიერობას დაუჭიროთ მხარი თუ დაინახავთ ამის საჭიროებას?

_ ჩემი აზრით სააკაშვილმა დიდი შეცდომა დაუშვა, როდესაც თავისი თავი დაასახელა პრემიერ-მინისტრობის კანდიდატად. ამას ვამბობ პირდაპირ. მან ამით ფაქტობრივად ნიველირება მოახდინა იმ ფუნქციის, რაც მას შეეძლო ჰქონოდა, ეს იყო ოპოზიციის გამაერთიანებლის ფუნქცია. აქედან გამომდინარე, მე ვფიქრობ, რომ ჩვენ – „სტრატეგია აღმაშენებლის“ გუნდი ვართ მომავლის გუნდი.

_ ანუ არ დაუჭერთ მხარს?

_ მე მექნება მეტი მხარდაჭერა საზოგადოების მხრიდან, სხვა ოპოზიციური პარტიებთან ერთად გაცილებით მეტი მხარდაჭერა გვექნება და მოუწევთ „ნაციონალურ მოძრაობასაც“ მხარდაჭერა, რომ მხარი დაუჭირონ ჩემ კანდიდატურას. მორჩა და გათავდა. სააკაშვილის პრემიერობა არარეალური რომ არის თვითონაც იცის და ყველამ იციან „ნაცმოძრაობაში“. არც ამის თქმა მინდოდა, მაგრამ სამწუხაროდ იმ დონემდე მიიყვანეს საქმე, რომ ერთმანეთზე ლაპარაკი გვიწევს. იმის მაგივრად რომ გამოსულიყო და ელაპარაკა, რა არის გასაკეთებელი ქვეყანაში და ელაპარაკა ივანიშვილის დამსხვრეული „ოცნებების“ მმართველობაზე.

_ ოპოზიციური კოალიციის შემთხვევაში თქვენ უფრო მისაღები იქნებით პრემიერად, ვიდრე სააკაშვილი და რა უპირატესობა გექნებათ? რა გამოგარჩევთ?

_ მე ვარდ ადამიანი, რომელიც ყოველთვის საქმეზე ვარ ორიენტირებული, ვითვალისწინებ სხვების მოსაზრებებს. არცერთი შეთანხმება რაც ცხოვრებაში დამიდია, არ დამირღვევია. მორჩა და დამთავრდა. თანაც ახალი თაობის პოლიტიკოსები ვართ ჩვენ. ხალხს უნდა სიახლე და მას არ უნდა წარსული. ცუდსა და უარესს შორის ბრძოლა არ უნდა იყოს. „ოცნების“ სტრატეგიაა, რომ ვინ უფრო ცუდია ამის მტკიცება და არა ის, თავად რა გააკეთა. თქვენ არ მოგბეზრდათ ეს? ახალი თაობის პოლიტიკოსებია საჭირო. მოდი, გულწრფელად ვთქვათ, რომ ერთადერთი პარტია ვართ „სტრატეგია აღმაშენებელი“, რომლის რეიტინგიც იზრდება. ამას ხალხი ხედავს, რომ ჩვენ საქმეზე ვლაპარაკობთ, ისინი კი კინკლაობაზე.

_ „ევროპულ საქართველოსთან“ რა დამოკიდებულება გაქვთ დღეს?

_ ნორმალური. მაჟორიტარულ ოლქებში შეთანხმება მათ ნამდვილად არ გაუტეხიათ „ნაცმოძრაობისგან“ განსხვავებით. ნორმალური ურთიერთობა მაქვს, როგორიც უნდა იყოს სხვა ოპოზიციურ პარტიასთან, რომელთანაც გარკვეულ საკითხებზე თანამშრომლობ.

_ „სამართლიანი არჩევნების“ კვლევით, ყველაზე მეტი თანხა Facebook-ში განთავსებულ რეკლამაში თქვენ დახარჯეთ. ამან გააჩინა გარკვეული კითხვები და პირდაპირ გკითხავთ, ვინ გაფინანსებთ? მოდით, ბოლო მოუღოთ ყბადაღებულ თემას და გვითხარით გაქვთ თუ არა რაიმე კავშირი ვანო ჩხარტიშვილთან და მისი გავლით შესაბამისად ივანიშვილთანაც?

_ დავიწყებ იმით, რომ ეს არის აბსურდი და ტყუილი. ეს არის მოგონილი იმ ადამიანების მიერ, რომლებსაც არაფერი გაუკეთებიათ ცხოვრებაში და უნდათ, რომ თავი დაიმკვიდრონ ტალახის სროლით. ბევრი მათგანი პოლიტიკურ კინტოდ ჩამოყალიბდა და ამიტომაც მიდის უკან მათი რეიტინგი.

რაც შეეხება კონკრეტულად ფინანსებს, მე ფულს ვხარჯავ იქ, სადაც ფული აღირიცხება გამჭვირვალედ. დიახ, რეკლამაში ვხარჯავ ფულს და არა კოორდინატორებში, რაშიც ფულს ხარჯავენ პარტიების უმრავლესობა. დიახ, ბანერებიც გვაქვს, Facebook-რეკლამაც გვაქვს და სატელევიზიო რეკლამაც. ოღონდ ეს არის ყველა ის დანახარჯი, სადაც ვერ დამალავ დანახარჯს. შესაბამისად, ყველა ჩვენი შემოწირულობა აღირიცხება აუდიტის სამსახურში. შედით აუდიტის სამსახურის ვებ-გვერდზე და ნახეთ ვინ არიან ჩემი შემომწირველები. შესაბამისად, რადგანაც ეს დანახარჯები გამჭვირვალეა, ვერანაირი კითხვა ვერ იქნება ამ დანახარჯებთან.

ვინც კოორდინატორებს იყვანს უბნებზე ათობით, თხუთმეტობით თუ ხუთობით და შავ ფულს ხარჯავს, იმათ ფულის წარმომავლობა ნამდვილად გასარკვევია. მაგას მოვითხოვ დიდი ხანია, რომ აიკრძალოს შავი ფულით კოორდინატორების დაფინანსება, რადგანაც ასობით, ათასობით თუ მილიონობით შავი ფული არ შემოდიოდეს არჩევნებში. პრეტენზია იმ ადამიანებს აქვთ, ვინც ძველი სისტემებით მუშაობენ, რეკლამას არ აკეთებენ იმიტომ რომ შავი ფული აქვთ და კოორდინატორებს შავ ფულს უხდიან ქეშად.

რაც შეეხება ვანო ჩხარტიშვილს, იმიტომ ვაპირებ სამართლებრივი სახელმწიფოს აწყობას და სასამართლო სისტემაში უცხოელი მოსამართლეების მოწვევას, რომ ვანო ჩხარტიშვილი კი არა, ჩემი ძმა ან ჩემი შვილი რომ იყოს, კანონის წინაშე მათაც პასუხი უნდა აგონ და ყველა მოქალაქე თანასწორი უნდა იყოს. ვერავინ ვერ აიღებს ინდულგენციას.

_ საინტერესოა, ჩხარტიშვილი თქვენს შემომწირველებს შორის არ არის?

_ რა თქმა უნდა, არა. დიდი ხანია ჩხარტიშვილს არჩეული აქვს თავისი პოლიტიკური გემოვნება. ამაზე განხილვა ბევრგან მქონია. ბევრმა კარგად იცის, რომ რაც მე ცოლი მოვიყვანე, 2010 წლიდან მოყოლებული, ის აბსოლუტურად სხვა ხედვებზეა. ამ ადამიანებს კი, ვინც ბრალდებებს მიყენებს, 2018 წელს შტაბის უფროსი რომ ვიყავი და საუკეთესო შედეგი დაიდო, ან 2011-12 წლებში როდესაც იუსტიციის მინისტრის მოადგილე ვიყავი თუ სხვა პოზიციებზე, მაშინ ეს კითხვები არ გასჩენიათ. როდესაც ფინანსურად ვეხმარებოდი ზუგდიდსა და ზესტაფონში არჩევნებს, როდესაც ფინანსურად ვეხმარებოდი ჩემს მეგობრებთან ერთად საპრეზიდენტო არჩევნების დროს კამპანიას, ეს კითხვა არავის არ გასჩენიათ. იცით რატომ? ძალიან კარგად იციან, რომ არავითარი კავშირი არ მაქვს ჩხარტიშვილის ბიზნესებთან.

_ სხვათა შორის ეს კითხვა მაქვს დასმული „ნაციონალური მოძრაობის“ წარმომადგენლებთან და მათი პასუხი იყო, რომ შტაბის უფროსობის დროს ვაშაძე ნომინალური ფიგურა იყო და მეტი არავითარი ფუნქცია არ ჰქონდაო…

_ ამას ამბობენ ის ადამიანები, რომელთაც ცხოვრებაში არაფერი არ გაუკეთებიათ. მითხრან ერთი პროექტი მაინც, რომელიც 2012 წლის შემდეგ განახორციელეს და მერე შეხედეთ ჩემ არაერთ ინიციატივას, რომელიც 2012 წლის მერე მაქვს გაკეთებული. დღეში ერთი საათით კომენტარებს რომ გააკეთებენ ჟურნალისტებთან, ეს ჰგონიათ პოლიტიკოსობა. ამიტომაც აქვთ პლინტუსთან ახლოს პერსონალური რეიტინგები, არავინ პატივს რომ არ სცემს. ასეთი უქნარა პოლიტიკოსები უნდა დამთავრდეს ქვეყანაში. ნახეთ ჩემი წარსული და ნახეთ მათი წარსული. მე რას ვაკეთებდი 8 წლის მანძილზე, ოპოზიციაში ყოფნის დროს და ისინი სად იყვნენ.

_ ამ განცხადებების ფონზე „ნაციონალურ მოძრაობასთან“ ერთად კოალიციურ მთავრობას ისევ ფიქრობთ?

_ სხვა გზა არ ექნებათ. რა თქმა უნდა ვფიქრობ და რა თქმა უნდა ამას თავადაც დათანხმდებიან.

_ „ქართულ ოცნებასთან“ კოალიციას გამორიცხავთ?

_ რა თქმა უნდა. რანაირად უნდა გავაკეთო ძალასთან კოალიცია, რომელიც მატყუარების და კორუმპირებულების ერთობლიობაა.

_ ვთქვათ ვერ ქმნიან უმრავლესობას და თქვენ გინდათ პრემიერობა. ამ დროს ვთქვათ შემოგთავაზეს პრემიერობა და დაგპირდნენ თავისუფლებასაც, ოღონდ შექმენი ჩვენთან ერთად კოალიციაო. ასეთ დროს რას იზამთ?

_ ასე ვენდობი ივანიშვილს?

_ არ ვიცი. არ ვარ პოლიტიკოსი და არ ვიცი როგორ დებთ ხოლმე შეთანხმებებს.

_ კიდევ ერთხელ ვამბობ, აბსურდულ სცენარებზე ნუ ვისაუბრებთ ახლა. ერთადერთი რეალური სცენარია ის, რომ ოპოზიციამ საერთო ჯამში უნდა გაიმარჯვოს და ამ ოპოზიციის პრემიერობის კანდიდატობას ვაპირებ მე. ანუ საქართველოს პრემიერ-მინისტრობას და არა რომელიმე პარტიის. ამით დამთავრდება ერთპიროვნულობის მმართველობა საქართველოში და ეს იქნება ის აღმშენებლობა, რომელიც ასე სჭირდება საქართველო. დღე და ღამე ვიმუშავებ, რომ ქვეყანა კრიზისიდან გამოვიყვანო.

_ გადავიდეთ პროგრამულ ნაწილზე, 4 წელში აპირებთ 300 000-მდე სამუშაო ადგილის შექმნას. როგორ და რა გეგმით აპირებთ?

_ 1 ოქტომბრიდან მოყოლებული სწორედ ამ პროექტებზე ვაკეთებდით პრეზენტაციებს. მაგალითად ვაპირებთ წარმოების განვითარების სრულიად ახალი მიდგომით. აქ მთავარია, რომ სახელმწიფო შესაბამის ტერიტორიებს გამოყოფს. მაგალითად ეს არის მიკროჩიპების ინდუსტრიული პარკი. ბევრმა არც იცის, რომ საქართველოში მიკროჩიპები და მიკროსქემები იწარმოებოდა. ასეთი წარმოებები მთელ მსოფლიოში მზარდია ეკონომიკური განვითარებისათვის.

რა არის ინდუსტრიული პარკი? – ეს არის ერთმანეთთან დაკავშირებული ერთი სახის მცირე და საშუალო ბიზნესი, რომელიც გაერთიანებულია ერთ დიდ ტერიტორიაზე და ხდება წარმოება. ეს მაგალითები პირადად მაქვს შესწავლილი სლოვაკეთში, უნგრეთში, სამხრეთ კორეაში… ამ კომპანიების ჩამოყვანას ვაპირებ, რომლებმაც ქართულ ბიზნესთან ერთად უნდა განავითარონ ეს ინდუსტრიული პარკები. თუ წარმოება არ განვითარდება, ქვეყანა არ განვითარდება.

მეორე მიმართულებად გვაქვს აგრო სფეროების განვითარება გვაქვს მიზნად. პირდაპირი მოლაპარაკებები გვაქვს ჰოლანდიის და ისრაელის სოფლის მეურნეობის ინოვაციურ ცენტრებთან. იცით, რომ ჰოლანდია აგრო ექსპორტით მეორე ადგილზეა და ჩვენზე მცირე მიწა აქვთ. ისინი აწარმოებენ ეკოლოგიურად სუფთა პროდუქტს. მათთან ერთად მინდა ჩამოვაყალიბოთ ინოვაციური მარკეტინგის ცენტრი საქართველოში, რომელიც კონკურენტულ პროდუქტებს დაადგენს. ფასის დადგენის ამერიკული მოდელი გვინდა გავაკეთოთ.

შემდეგი სფერო ეს არის აიტი ქალაქები. აქ მე ბევრი კომპანიისთვის მაქვს გაკეთებული კონსალტინგი და მაქვს კონტაქტები და შემიძლია სწრაფად შემოვიყვანო აიტი გიგანტები საქართველოში, რომლებიც შექმნიან მაღალანაზღაურებად სამუშაო ადგილებს. ამას გარდა მომავლის სპეციალობებზე დავიწყებთ გადამზადების პროგრამას.

რა თქმა უნდა გეგმაში გვაქვს ტურიზმის განვითარებაც, რომ თითოეულ რეგიონში შევიდეს, არა ისე როგორც ახლაა, როდესაც რაიონის ცენტრები საღამოს საათებში ჩამკვდარია და არაფერი არ ხდება, არამედ თავისი მიზიდულობის ცენტრები უნდა იყოს ყველგან. ყველა სოფელშია უნიკალური ბუნება და უნიკალური ისტორიული ძეგლები, რომელიც საინტერესოა აგროტურიზმთან ერთად უცხოელებისთვის და ამ მიმართულებით ვაპირებთ მუშაობას. ყველა თაობის ადამიანისთვის გვაქვს ამბიციური პროექტები.

_ 2021 წლიდან აპირებთ სესხების განახევრებას და პენსიონერებს, რომლებსაც სესხები 36-40%-ად აქვთ ჩამოწერას გეგმავთ. საბანკო საქმეებში ჩარევას გეგმავთ?

_ არა, არსად ჩარევას არ ვაპირებთ. მეტი კონკურენცია იქნება. სახელმწიფო რომ ჩაერია „ქართული ოცნების“ სახით და მონოპოლია მისცა „ლიბერთი ბანკს“ პენსიონერებთან მიმართებით, იმიტომ არის სესხები ასეთი მაღალი პროცენტით. პენსიონერი თავისი პენსიით სესხს ვერ აირებს ვერსად სხვაგან, გარდა „ლიბერთი ბანკისა“. შესაბამისად, ისინი სესხს აძლევენ 36%-ად. ახლა შემხვდა ადამიანი, რომელმაც მითხრა, რომ თავისი ძროხა დააგირავოს, უკვე 22-23%-ად აძლევენ სესხს. ანუ, პირდაპირ ძარცვავენ პენსიონერებს და შშმ პირებს, რომლებიც იღებენ პენსიას. ექსკლუზივის და მონოპოლიის მიცემის გამო ართმევენ ამხელა პროცენტს. შესაბამისად, აუდიტების მეშვეობით ამ ყველაფრის დავუთვლით, რაზეც დღეს მონოპოლია აქვთ და ჩამოეწერებათ ადამიანებს პროცენტები.

_ ეს ბიზნესში ჩარევა არ არის?

_ არა, ეს არის ის ფუნქცია, რაც სახელმწიფომ უნდა შეასრულოს ანტიმონოპოლიური ფუნქციის თვალსაზრისით. ეს არის ეროვნული ბანკის ფუნქცია. ვიმეორებ, ჩარევა იყო მაშინ, როდესაც მონოპოლია შეუქმნეს „ლიბერთის“. აბა პენსიონერს შეეძლოს სხვა ბანკში გადატანა პენსიის, მყისიერად გასაშუალდებოდა ეს პროცენტი. იმხელა თაღლითობის სქემებია შექმნილი. ჯერ ოვერდრაფტი აქვთ შეტენილი პენსიონერებისთვის და ამაზე აქვთ გაცემული სესხი. გეკითხებით, რისთვის გვჭირდება ეროვნული ბანკი და სახელმწიფო თუ მან საკუთარი მოქალაქეების ინტერესები არ დაიცვა. ამ გარიგებით მილიონებს შოულობენ ყველაზე ღარიბი ადამიანების ხარჯზე.

მე ვაპირებ, რომ ანტიმონოპოლიური კანონი შევიტანოთ პარლამენტში, მივიღოთ ეს კანონი და ჩამოვწეროთ ეს სესხები. მორჩა და დამთავრდა.

_ თუ თაღლითურ სქემებთან გვაქვს საქმე სამართლებრივ ჭრილშიც ხომ არ აპირებთ საქმის განხილვას და საქმის გამოძიებას?

_ ასობით პენსიონერის ქეისი გვაქვს შესწავლილი. პენსიონერი ეუბნება, რომ 200 ლარი მჭირდება წამლისთვის და ამ დროს „ლიბერთი ბანკი“ ეუბნება, რომ არა, 800 უნდა მოგცე. რეალურად პენსიას ეს ადამიანები 220 ლარს კი არ იღებენ, ყველაზე კარგ შემთხვევაში 120-130 ლარს იღებენ. იმიტომ, რომ წამლის ფასი ძვირია, რომელიც არ ფინანსდება, შესაბამისად პენსიონერ სესხის აღება ამ მიზნით უწევთ. უფრო მეტსაც გეტყვით, ლარიზაციამდე ადამიანს შეეძლო განვადებით შეეძლო უთოს ან მაცივრის გამოტანა, როგორც კი აკრძალეს ეს, პენსიონერს მოუწია ისევ „ლიბერთი ბანკში“ წასვლა. ანუ პენსიონერს მაცივრის შეძენა 36%-ით გაუძვირდა. მე ვფიქრობ, რომ აქ ჩვენ ძალიან დიდი გამოძიება უნდა ჩავატაროთ. არ მგონია, რომ ეს შემთხვევით მოხდა. ლარიზაციის პროგრამის შემდეგ ბანკების მოგება გაოთხმაგდა და გახუთმაგდა, ხოლო ყველა დანარჩენი გავღარიბდით.

ზოგადად საბანკო სექტორს რაც შეეხება, დავითვალეთ და აღმოჩნდა, რომ ევროპაში საშუალოდ კაპიტალთან მიმართებაში ბანკების მოგება არის 5-დან 7%-მდე. საქართველოში კი 26%. არ არსებობს არცერთი ქვეყანა პოსტსაბჭოთა სივრცეში, სადაც ამხელა მოგება აქვთ ბანკებს. ეს ხდება იმიტომ, რომ არის კარტერული გარიგება, რომელსაც ხელს უწყობს და ხელს აფარებს ეროვნული ბანკი. შეთანხმებული პროცენტებით მუშაობენ და ამან გამოიწვია ასეთი გაძვირება.

ლარიზაციის პროგრამით აიძულეს ადამიანები, რომ ლარში აიღონ სესხები. თუ ლარში გაქვთ ხელფასი სესხს არ მოგცემენ დოლარში, რომელშიც არის 5-6%, ლარში კი 15%. როდესაც ვამბობ, რომ გავანახევრებ ძალიან მარტივია, ვაუქმებ ლარიზაციას, ყოველგვარ შეზღუდვებს ვაუქმებ და განახევრდება სესხი.

_ ასე მარტივად უყურებთ პროცესს?

_ კი, ძალიან მარტივად ვუყურებ. ხომ იცით, რომ მე არ მიყვარს საქმისადმი ზედაპირული მიდგომა? ჩავუღრმავდი ამ რიცხვებს და დეტალურად გავიარე.

_ პოლიტიკოსებისგან ასეთი დაპირებები ხშირად მოგვისმენია. მათ შორის 2012 წელს, „ქართული ოცნებაც“ ოცნების კოშკებს გვპირდებოდა და ვხედავთ რა დღეშიც არის ქვეყანა. თქვენ რატომ უნდა დაგიჯეროთ?

_ ჩემსა და ქართულ ოცნებას შორის, რომელსაც მე დამსხვრეული ოცნებების პარტიას ვუწოდებ, ძალიან დიდი განსხვავებაა. დიდი განსხვავებაა პირველ რიგში პროფესიონალიზმში და განსხვავებაა იმაში, რომ რასაც ვამბობ, ყოველთვის სიღრმისეულად ვუდგები. ამიტომ არის, რომ გახარიას ეშინია დებატებში გამოსვლის. იმიტომ, რომ დებატებში აბსოლუტურად ყველაფერს დავუმტკიცებ. ამ ადამიანებს 8 წლის მანძილზე არაფერი გაუკეთებიათ და საქართველოში ჯერ კიდევ არის იუსტიციის სახლები, რომელიც ნომერ პირველი რეფორმაა თავისი არსით მსოფლიოში, რომელიც ჩემი და ჩემი გუნდის მიერ არის გაკეთებული. ამიტომ, ეს არის ჩემსა და მათ შორის განსხვავებაა. არაფერი პოპულიზმი აქ არ არის. მეც ასე მეგონა და არ მეჯერა, რომ ამხელა თაღლითობებთან გვქონდა საქმე ბანკებთან მიმართებით, მაგრამ ჩავიხედე საქმეში და დავინახე ეს.

_ ერთ-ერთ ინტერვიუში თქვით, რომ სამომავლოდ ეროვნული ბანკის გაუქმებაც უნდა მოხდეს. მაშინ რა ინსტიტუცია უნდა იყოს, რომელიც იქნება მაკონტროლებელი მექანიზმი?

_ არაფერი. ზუსტადაც რომ ეროვნული ბანკი გვყავს მაკონტროლებელ მექანიზმად, ბანკები დალაგებულები არიან მასთან, დაკეტილი აქვთ საბანკო სექტორში და ახალი ბანკი ფაქტობრივად ვერ შემოდის.

_ კორუფციული სქემის ნაწილია ეროვნული ბანკი?

_ რა თქმა უნდა. დღეს ეროვნული ბანკი პირდაპირ კორუფციულ გარიგებებში შევიდა ბანკებთან. ამიტომ, არაფერში არ გვჭირდება. კითხვა მაქვს, რას აკეთებს? ბარიერებს ქმნის, რომ ახალი მძლავრი ბანკი არ შემოვიდეს და კონკურენციაში არ შევიდეს არსებულ ბანკებთან, რითაც დაიწევა სესხის პროცენტი ქვეყანაში.

_ გვახსოვს „ოცნებას“ თავდასხმა ჰქონდა გამოცხადებული მაშინდელი ეროვნული ბანკის პრეზიდენტის ქადაგიძის წინააღმდეგ და მისი გზით ხომ არ მიდიხართ თქვენც?

_ მე არ მახსოვს, „ოცნებას“ ეთქვას, რომ ეროვნული ბანკის გაუქმებას ვაპირებთო. სხვათა შორის, სანამ ქადაგიძე იყო ეროვნული ბანკის პრეზიდენტი, ასეთი სისულელეები როგორიც ლარიზაცია და ა. შ. არის არ ხდებოდა ქვეყანაში. როგორც ჩანს, ეროვნული ბანკის ხელში ჩაგდება უნდოდათ იმისთვის, რომ აი ეს დიდი, მაფიოზური ოლიგარქიული სქემა გაეშვათ ლარიზაციის სახით, რითაც ყველა გაგვაღარიბეს. ქადაგიძის დროს ბანკების წლიური მოგება 150-200 მილიონი ლარი იყო, ხოლო ლარიზაციის შემდეგ ეს რიცხვი მილიარდ ლარამდე ავიდა. ეს არის პრობლემა.

აქვე ვიტყვი იმას, რომ ეს მხარს ვუჭერ მულტი საგადასახადო სისტემას, რომ საგადასახადო სისტემაში შემოვიდეს ევრო და შეიძლება დოლარიც. ხომ ვაპირებთ ევროკავშირის წევრობას? მაინც მოგვიწევს ევროზე გადასვლა და სჯობა ახლავე გადავიდეთ.

_ მათ შორის ხელფასებიც ევროში გაიცეს?

_ რატომაც არა. ბიზნესმა გადაწყვიტოს როგორც თავად უნდა. ეს გაცილებით გაამარტივებს ბაზარს. მეტ ინვესტიცია მივიღებთ და მარტივი იქნება. ლარის რყევის გამო, რასაც დებენ ნებისმიერი პროდუქტის ფასში, ესეც შემცირდება. წარმოიდგინეთ, რომ ყიდულობთ შაქარს, რომელიც შეძენილია დოლარში ან ევროში. მისი შემომტანი და ადგილობრივი დისტრიბუტორი ფასს ადგენს ლარში, მაგრამ ის ასევე რისკში ითვალისწინებს კურსის ცვალებადობას, შესაბამისად მას უფრო იაფად შევიძენდით, თუ კურსის ცვალებადობა არ გვექნებოდა გასათვალისწინებელი. გარდა ამისა 400 მილიონი დავხარჯეთ ლარის კურსის შენარჩუნებისთვის და ვხედავთ ლარი რა დღეშიც არის, ამიტომ მარტივია ეს. მე მაგალითად, ჩემი შვილებისთვის ლარში მაქვს გახსნილი დეპოზიტი. ახლა ვითვლიდი, რომ რაც შევიტანე ლარი, როცა ჩემი უფროსი ვაჟი დაიბადა, ახლა რა პროცენტიც დაერიცხა, წაგებაში ვარ კურსის ცვალებადობის გამო.

_ მინიმუმ 30%-ით აპირებთ წამლების ფასების შემცირებას. როგორ?

_ ესეც მარტივი საკითხია. ჯერ უნდა დაინერგოს ფასწარმოქმნის გამჭვირვალობის ევროპული სტანდარტი. ეს ნიშნავს, რომ წარმოებიდან აფთიაქამდე, რა დაემატა წამლის ფასს, ეს ყველაფერი გამჭვირვალეა. შესაბამისად, არის ზღვრული მოგებები. რაღაცაზე მეტის მოგებას ვერ დაადებ წამალს. ეს ევროპაში გააკეთეს იმიტომ, რომ ფარმაცევტული ბიზნესი მიდრეკილია მონოპოლიებისკენ და შესაბამისად მნიშვნელოვანი იყო მოეფიქრებინათ მექანიზმი, როგორ არ უნდა ყოფილიყო მონოპოლია. ჩვენთან წამალზე საშუალო მოგება 102%-ია. ამის დათვლაც ბოლოს 5 წლის წინ მოხდა, იმის მერე აღარ ითვლიან, ფულს იხდიან კომპანიები, რომ აღარ მოხდეს საშუალო მოგების მარჟის დათვლა. თუ შევადარებთ, რომ 73%-ით არის გაზრდილი ბოლო 8 წლის მანძილზე, აქედან გამომდინარე სავარაუდოდ კიდევ უფრო მეტია საშუალო მოგება. ევროპაში კი საშუალო მოგება 12%-ია. ამას გარდა ჩვენთან წამლის წარმომავლობაც კი გაურკვეველია ზოგჯერ და ხშირად არის პრობლემა წამლის ხარისხთან დაკავშირებით.

_ მილიონზე ნაკლები ბრუნვის ბიზნესი გათავისუფლდება დღგ-გან. ეს გაქვთ პროგრამაში ჩადებული. ეს საკმარისია მცირე და საშუალო ბიზნესის ხელშესაწყობად თუ სხვა გადასახადების კორექტირებასაც უნდა ველოდოთ?

_ ეს აუცილებელია მცირე რა საშუალო ბიზნესის ამოსაქოქად. იმიტომ, რომ ჩვენ უნდა გვქონდეს საგადასახადო სისტემა, რომლითაც მსხვილი ბიზნესიც და მცირე და საშუალო ბიზნესიც ერთ პირობებში იქნება. გვჭირდება განვითარებული მცირე და საშუალო ბიზნესი. დღგ-გან გათავისუფლება ნიშნავს, რომ საოჯახო ტიპის სასტუმროები და მცირე საწარმოები, რომლის ბრუნვაც მილიონ ლარამდეა აღარ დაიბეგრება დამატებითი ღირებულების გადასახადისგან.

_ მონოპოლიებზე როდესაც საუბრობდით და კონკურენტულ გარემოზე, ამ მიმართულებით გადადგმული თქვენეული ნაბიჯებია?

_ რა თქმა უნდა. კონკურენცია შეუქმნის პატარა, მცირე საწარმოები დიდ მონოპოლიებს. მაგალითად ევროპაში მიღებულია, რომ ფარმაცევტის სერტიფიკატი ვისაც აქვს, პატარა აფთიაქი სახლშიც კი ჰქონდეს და არა არის აუცილებელი, რომ დიდი აფთიაქი გაარემონტოს. მაგალითად, ვენა რომ ავიღოთ 1კვ/კმ-ზე აფთიაქების რაოდენობა ოთხჯერ უფრო ნაკლებია, ვიდრე საქართველოში. იქ რა წამალს არ ყიდულობენ? საქართველოში ბევრი აფთიაქი იმიტომ არის, რომ ქუჩაში მოსიარულე ადამიანები მიიზიდონ და ძვირადღირებული წამალი შეაჩეჩონ. ეს არის მათი სტრატეგია.

_ რა გეგმა გაქვთ განათლების სისტემაში?

_ სასკოლო განათლებაში კონკრეტული ინიციატივა გვაქვს, რაც გულისხმობს განათლების სისტემაში ცენტრალიზებული ფუნქციების გაუქმებას. ყოველკვირეულად ვახდენთ დისკუსიას განათლების სპეციალისტებთან, მასწავლებლებთან და დირექტორებთან. ეს არის ავტორიზაციის ზედამხედველობის და ა. შ. ფუნქციები თავმოყრილია განათლების სამინისტროში. ეს ფუნქცია მთლიანად უნდა გადავიდეს სკოლაში და მან უნდა გადაწყვიტოს სახელმძღვანელოებიც და ისიც სწავლების რა მოდელს ირჩევს. ზედმეტი ჩარევებისგან გათავისუფლდნენ, ხოლო კერძო სკოლები საერთოდ გათავისუფლდება სახელმწიფო რეგულაციებისგან. სკოლის დირექტორის არჩევა უნდა მოხდეს მშობლებისა და მასწავლებლებისგან ფარული კენჭისყრით, ამით ხელი შეეწყობა სკოლის პოლიტიზირების შემცირებასაც. სკოლის დირექტორის ხელფასი 3000 ლარი უნდა იყოს, რათა კარგი კვალიფიკაციის ადამიანებს სკოლის დირექტორობის სურვილი ჰქონდეთ. ვაუჩერს რაც შეეხება, დავთვალეთ და რეალური ვაუჩერი არის 2000 ლარი და არა 400 ლარი. სახელმწიფო აფინანსებს სხვადასხვა სკოლებს შერჩევით, ლოიალობის პრინციპიდან გამომდინარე. ამ 2000 ლარით მოსწავლეს და მშობელს შეეძლება რომ კერძო სკოლაში წაიღოს, ან დარჩეს საჯარო სკოლაში. ამით გაიზრდება კონკურენცია სასკოლო განათლებაში. იგივე პრინციპი იქნება ბაღებში. იქაც ვაუჩერულ სისტემას შემოვიღებთ, რომ ხელი შეეწყოს ბაღების ქსელების განვითარებას.

უმაღლეს სასწავლებლებს რაც შეეხება, გვინდა, რომ რექტორები იყვნენ არჩეულები პროფესორ-მასწავლებლების მიერ და არა ისე, როგორც ახლაა, როდესაც ვერც კი ვიგებთ როგორ ირჩევენ რექტორს თსუ-სა თუ ტექნიკურ უნივერსიტეტში.

მეცნიერებაზე გვაქვს დიდი სტრატეგიები, რომ გადავიყვანოთ სახელმწიფო დაფინასებაზე და მეცნიერება იყოს პრაქტიკულ რეფორმებზე და ეკონომიკურ ინიციატივებზე პირდაპირ კავშირში.

_ ჯანდაცვაში რა გეგმები გაქვთ?

_ ჯანდაცვაში ჩვენ გვყავს ჯანდაცვის საუკეთესო სპეციალისტი სერგო ჩიხლაძე, რომელიც ჯანდაცვის ძალიან მაგარი მინისტრი იქნებოდა. იმედი მაქვს, რომ ასეც იქნება. ჩვენ ვაპირებთ პირველად ჯანდაცვაზე და საზოგადოებრივ ჯანდაცვაზე ყურადღების გამახვილებას. ანუ, ეს ნიშნავს პრევენციას, რომ ნაკლებად ავადდებოდეს ადამიანი. პირველადი ჯანდაცვის ქსელი გაუმართავია და ადამიანებს პირდაპირ საავადმყოფოებისთვის მიმართვა უწევთ, როცა უკვე ავად არიან. მაგალითად, საქართველოში ონკოლოგიური დაავადებების გამოვლენა ხდება მესამე და მეოთხე სტადიაში, როცა ევროპაში ეს ხდება პირველ ან მეორე სტადიაში. იგივე C ჰეპატიტის პროგრამა, რის სამკურნალოდაც ამერიკამ მოგვცა ძვირადღირებული წამლები, იმიტომ ვერ ვუმკურნალეთ პაციენტებს პირველ ეტაპზე, რომ ამ ჩერჩეტებს პროცედურები ჰქონდათ შემოღებული მკურნალობის დაწყებამდე და ადამიანებს ამის ფული არ ჰქონდათ.

ოჯახის ექიმების ქსელი და პირველადი ჯანდაცვის ობიექტები უნდა განვავითაროთ მთელი ქვეყნის მასშტაბით. იცით, რომ საშინელი მდგომარეობა გვაქვს ჩვენ ჯანდაცვაში მონოპოლიების თვალსაზრისით. იქნება ეს აფთიაქი, საავადმყოფო თუ პოლიკლინიკა.

_ დაზღვევის სისტემის განვითარებასაც ხომ არ აპირებთ?

_ პირველადი ჯანდაცვა ეს ერთი მიმართულებაა, ხოლო მეორე რა თქმა უნდა დაზღვევის სისტემის განვითარებაა. თუ ადამიანს უნდა კერძო სადაზღვევოში წასვლა და კმაყოფილია ამ მომსახურებით, მას შეუძლია საერთო ბიუჯეტიდან თავისი პაკეტი წაიღოს.

_ სასამართლო რეფორმის მიმართულებით რა გეგმა გაქვთ?

_ ოპოზიციურმა პარტიებმა მოვაწერეთ ხელი სასამართლო და პოლიციის რეფორმის განხორციელებას. სასამართლო რეფორმა შედგება რამდენიმე კომპონენტისგან. პირველ ინსტანციაში უნდა იყოს არჩეული მოსამართლეები და ნაფიც მსაჯულთა ინსტიტუტი. ადამიანს ექნება არჩევანი – არჩეული მოსამართლე  ნაფიცი მსაჯულები, დანიშნული მოსამართლე – ნაფიცი მსაჯულები, დანიშნული მოსამართლე – ნაფიცების გარეშე, არჩეული ნაფიცების გარეშე. დიდ არჩევანს ვაძლევთ, რომ დიდი კონკურენცია შევქმნათ პირველ ინსტანციაში. შემდგომ ინსტანციებში გვინდა, რომ უცხოელი მოსამართლეები მოვიწვიოთ, განსაკუთრებით კი პოლიტიკურ და კორუფციულ საქმეებზე, რადგანაც დიდი მნიშვნელობა აქვს ნდობას სასამართლოს მიმართ. დღეს ნულოვანია ნდობა. მე ამის გამოცდილება მაქვს სხვადასხვა ქვეყნებში. მაგალითად უკრაინაში მოსამართლეების შერჩევაში ამერიკელი და ბრიტანელი ექსპერტები მონაწილეობდნენ.

ასევე უნდა მოხდეს იუსტიციის საბჭოს რეორგანიზება და იქ მინდა, რომ უცხოელების პანელი მოვიწვიოთ, რომელიც შეარჩევს მათ, რათა პოლიტიკური კომპონენტი მთლიანად ჩაიხსნას. უნდა მოხდეს უზენაესი სასამართლოს და საკონსტიტუციო სასამართლოს გაერთიანება, უნდა შემოვიღოთ ამერიკული მოდელი და რაღა თქმა უნდა ამ რეორგანიზაციის შედეგად კლანი უნდა გავუშვათ. არ უნდა დარჩეს მურუსიძეების და ჩინჩალაძეების კლანი.

_ მესმის, რომ როდესაც ხელისუფლებაში მათ შორის თქვენც იყავით, თქვენი პოზიცია სხვა იყო, მაგრამ რატომ არ შეგაწუხათ მაშინ მურუსიძეების და ჩინჩალაძეების კლანმა?

_ ვინ თქვა, რომ არ შემაწუხა? მაგრამ ჩემი პოზიცია არ იყო ისეთი, რომ მე რომ გამოვმხტარიყავი და რამე მეთქვა, ამით რამე შეიცვლებოდა. თუმცა, გეტყვით, რომ ჩემმა ჭიდაობამ გამოიწვია პრობაციონერების დაახლოებით 10 000-ით შემცირება. ვამბობდი, რომ აზრი აღარ ჰქონდა აღარც იუსტიციის სახლის რეფორმას და აღარც არაფერს, თუ ამას არ გავაკეთებდით. უბრალოდ ბევრი მეუბნებოდა, რომ ეს შენი მიმართულება არ არისო. არასდროს არ მიყვარს საქმის შუა გზაში მიტოვება და იუსტიციის სახლების რეფორმის ბოლომდე მიყვანა მინდოდა. ახლა იუსტიციის სახლი ნახევრად გაკეთებული რომ იყოს, ყველა იტყოდა ცხოვრებაში არც არაფერი გაგიკეთებიაო.

გულწრფელად გეტყვით, მჯეროდა, რომ სისტემის რეფორმირება შესაძლებელი იყო და ამიტომაც გადავდგი ნაბიჯი, როდესაც 2012 წელს პოლიტიკაში წავედი. როდესაც შეთავაზება მივიღე დავთანხმდი, რადგან ვფიქრობდი, რომ გაცილებით ძლიერი იქნებოდა ჩემი პოზიცია და შევძლებდი იმ რეფორმირებას, სადაც რეფორმის აუცილებლობას ვხედავდი. ჯერ კიდევ მაშინ იცოდა ყველამ, რომ დამოუკიდებელი ვიყავი და ჩემზე ზემოქმედებას ვერავინ ვერ მოახდენდა.

რაც შეეხება შსს-ს რეფორმას, ეს არის ამერიკული მოდელი, სადაც შს მინისტრი პოლიციელი ან გენერალი არ არის, მაგრამ არის ფიგურა, რომელსაც გავლენა არ აქვს პოლიციის პირდაპირ მუშაობაზე. ფედერალური ბიურო ჩამოყალიბდება, მოხდება საპატრულო პოლიციის უფროსების არჩევა რაიონულ დონეზე და მოხდება სახელფასო უზრუნველყოფა. მათ მომავალ წელს 500 ლარით თუ არ გავუზარდეთ ხელფასი, წარმოუდგენელია, რადგან ეს ხალხი ჩვენი ქვეყნის სადარაჯოზე უნდა იდგას. რაც მთავარია ამით უნდა გავათავისუფლოთ პოლიტიკური წნეხისგან, რათა მათ არასოდეს არ მიიღონ პოლიტიკური დავალებები.

_ ჩვენი ინტერვიუ ცოტა პოზიტიური და სახალისო თემით დავასრულოთ. გარითმული საარჩევნო კლიპები გაქვთ, ამის ავტორიც თქვენ ხართ თუ ვინმე გიწერთ ტექსტებს?

_ „აღმშენებლობა გვჭირდება მალე, რომ უკეთესად ვიცხოვროთ ხვალე“. ამ ლექსის ავტორი კოტე ყუბანეიშვილია, რომელიც მოვიდა, გვეხმარება და ყველანაირად მხარს გვიჭერს. ხანდახან მნიშვნელოვანია მსგავსი არასტანდარტული მიდგომები, რათა ადამიანების ყურადღება მივიქციოთ. დღეიდან ახალი კლიპებია, ადევნეთ თვალი და კიდევ ბევრი სიახლე გვექნება. ბევრი ადამიანი თვითონ გვწერს ხოლმე და არა მარტო ყუბანეიშვილი. მაგალითად, მოგვწერეს: „თუ ცხოვრება გინდა მშვიდი, შემოხაზე 27“.

_ ეს მოპარულია, 2016 წელს ალასანიას პარტიას ჰქონდა.

_ ეს არ მახსოვდა, ცუდად უმუშავიათ. არ ვიცოდი ეს ნამდვილად.

_  ოფიციალურად არ გამოუყენებიათ კლიპებში, თუმცა პრეზენტაციაზე რამდენჯერმე გაჟღერდა და თუ სწორად მახსოვს თამარ ამაშუკელს ეკუთვნის ეს ფრაზა.

_ გასაგებია.

სტატიის ავტორი იაგო ნაცვლიშვილი
მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად