გიორგი ახვლედიანი: როცა გეი პრაიდებს მართავენ, ვთქვა რომ ტერიტორიული მთლიანობა უფრო მნიშვნელოვანია?! (ინტერვიუ)

„ერთიანი საქართველო – დემოკრატიული მოძრაობის“ წარმომადგენელი გიორგი ახვლედიანი აცხადებს, რომ ის არ დაუშვებს საქართველოში ლგბტქ პრაიდის ჩატარებას და ამბობს, რომ აუცილებელია ქვეყანამ მიიღოს გარყვნილების წინააღმდეგ კანონმდებლობა. ლგბტქ თემის წარმომადგენლების გამოხატვის თავისუფლებას ახვლედიანი სწორედ ამ კონტექსტში განიხილავს.

გიორგი ახვლედიანი ამბობს, რომ ლევან ვასაძე სანამ კომბლების რევოლუციას დააანონსებდა ამაზე პოლიტიკოსი 3 წლის განმავლობაში საუბრობდა. ამის შესახებ მან „აიპრესთან“ ინტერვიუში 19 ივნისს ისაუბრა, თუმცა ინტერვიუ განვითარებული მოვლენებიდან გამომდინარე საიტზე ვეღარ განვათავსეთ, ვინაიდან საქართველოში რუსი დეპუტატის სერგეი გავრილოვის ვიზიტით, პარლამენტში მისვლით სპიკერის სავარძელში ჩაჯდომის გამო აქციები დაიწყო. შემდეგ კი პოლიციის მიერ ჯერ აქციის დაშლით, ხოლო შემდეგ მომიტინგეთა დარბევით დასრულდა. ამ მძიმე პროცესების გამო ლგბტქ პრაიდი ჩაიშალა, დაიშალნენ ლევან ვასაძე და მისი მხარდამჭერებიც. რუსთაველზე კი პუტინის პოლიტიკის საწინააღმდეგო აქციები ყოველ საღამოს მიმდინარეობდა.

გუშინ ლგბტქ პრაიდის გამართვა კიდევ ერთხელ გახდა აქტუალური, გააქტიურდა ვასაძის ლეგიონიც, რომელიც ახლაც რუსთაველზეა შეკრებილი. ამიტომ მკითხველს ვთავაზობთ 19 ივნისს გიორგი ახვლედიანთა ჩაწერილ ინტერვიუს.

გიორგი ახვლედიანი: სექსუალური უმცირესობის წარმომადგენლებს ძალიან დიდი სურვილი აქვთ იმის, როგორმე დაფიქსირდეს მათთან მიმართებით ძალადობა, ისეთი, რომელიც შემოივლის მთელი მსოფლიოს ლგბტ ორგანიზაციებს და უზარმაზარი ფინანსური რესურსი წამოვა ამ დაჩაგრული თემის დასახმარებლად. მაგრამ, რეალურად ვხედავთ, რომ არავითარ ძალადობას ადგილი არ აქვს. არ არის განსაზღვრული, რაც კანონმდებლობით უნდა იყოს განსაზღვრული.

_ რას გულიხმობთ?

_ საქართველოსნაირ ტრადიციულ ქვეყანაში, სადაც აბსოლუტური უმრავლესობა აცხადებს, რომ ყველაზე მნიშვნელოვანი ღირებულებები, ეს არის ტრადიციული ოჯახის ფასეულობები. ასეთ ქვეყანაში არ არის გარყვნილების პროპაგანდის ამკრძალავი კანონმდებლობა. არსებობს რაღაც დონეზე ასეთი კანონმდებლობა, მაგალითად ვერცერთი ტელეკომპანია ვერ გაუშვებს პორნოფილმს ეთერში. ამაზე მკაცრი რეაგირება ექნება მარეგულირებელ კომისიას და საერთოდ აუკრძალავს ეთერში გასვლას. ამ შემთხვევაში ასეთი კანონმდებლობა არ არის. უმცირესობათა წარმომადგენლები გვეუბნებიან, რომ უპირველეს ყოვლისა ეს არის გამოხატვის თავისუფლება.

_ ანუ, ამბობთ, რომ გამოხატვის თავისუფლება ჩარჩოებში უნდა მოექცეს?

_ რა თქმა უნდა. ამას ამბობს ადამიანის თავისუფლებათა დაცვის ევროპული კონვენცია, სადაც წერია, რომ თუ ეს ეწინააღმდეგება მორალს, მაშინ ეს არათუ შეიძლება შეიზღუდოს, არამედ სანქციებიც კი დაედოს გამოხატვის ამ უფლებას.

_ ამ ნაწილში ხვდება ეს, ასე გაიგეთ?

_ ნახეთ როგორი ვითარებაა. მეათე მუხლის მეორე პუნქტში ბევრი შემთხვევაა, რომელიც შეიძლება შეიზღუდოს. იქ ტერიტორიულ მთლიანობას ეხება, ადამიანის პირად ინფორმაციას, ადამიანების პირად შეურაცხყოფას და ა. შ. თუ ჩემი გამოხატვის თავისუფლება საზოგადოებაში იწვევს არეულობას და დესტაბილიზაციას, ეწინააღმდეგება მორალს, მე უნდა შემიზღუდონ ეს გამოხატვის თავისუფლება. გამოხატვის თავისუფლება არ არის უზენაესი და ყველაზე მთავარი უფლება.

_ ადამიანის უფლებათა ევროპული კონვენცია მოიყვანეთ არგუმენტად, როგორ გგონიათ არ იციან ამის შესახებ ამ ორგანიზაციებმა, რომლებმაც განცხადებები გაავრცელეს? Amnasty international-მა გაავრცელა განცხადება, ამერიკის სახელმწიფო დეპარტამენტმა და კიდევ არაერთმა ორგანიზაციამ. მათ არ იციან ეს?

_ ადამიანის უფლებათა და თავისუფლებათა კონვენცია ეს არის საერთაშორისო სამართლებრივი ფუნდამენტური დოკუმენტი, რომელსაც ჩვენ მიერთებული ვართ. რაც შეეხება სხვადასხვა ორგანიზაციებს, დეპარტამენტი, დიპლომატიური კორპუსის წარმომადგენლების დამოკიდებულება, ეს არის მათი პოლიტიკა, როგორ ჩაერიონ ჩვენს საქმეებში და გვაიძულონ გაუკუღმართებული ურთიერთობები ვაღიაროთ. მე სამართლებრივ დოკუმენტზე ვსაუბრობ.

_ დიპკორპუსთან და საერთაშორისო ორგანიზაციებთან მიმართებით ხმამაღალ განცხადებებს აკეთებთ. ოპონენტები ალბათ გეტყვიან, რომ სწორედ ეს არის რუსული ნარატივი.

_ მაგიტომაც დავაკონკრეტე. ეს ევროპული კონვენცია რუსეთის დუმაში კი არ დაუწერია ვინმეს, ან საბჭოთა კავშირში კი არ მიუღიათ. 1950 წელს რომში ევროპელი სამართალდამცველები, ადამიანის უფლებების დამცველების და კიდევ ბევრი რამის დამცველების ერთობლივი ნაშრომია. დრემდე მოდის, როგორც ადამიანის უფლებათა დაცვის ერთ-ერთი ყველაზე მაღალი სამართლებრივი ბაზა. ყველა სხვა რაც ჩამომითვალეთ, იმათი პოლიტიკაა.

ახლა გვეუბნებიან უმრავლესობაა დესტაბილიზაციის მიზეზი და თუ უნდა შეიზღუდოს, მათი გამოხატვის უფლება უნდა შეიზღუდოსო. აქ ისინი თავის თავს ეწინააღმდეგებიან. უმრავლესობა ხომ არ არის ამ პროტესტის პირველწყარო?! უმცირესობა ითხოვს მიიღეთ გაუკუღმართებული ცხოვრება, როგორც ნორმა.

_ ლგბტქ თემი ჩაგვრისა და დისკრიმინაციის წინააღმდეგ გამოდის.

_ ეს ადამიანები აღიარებულები არიან ყველა დონეზე. არსებობენ და არავინ ეწინააღმდეგება იმას, რომ ისინი ასეთები არიან. ყველას გააზრებული აქვთ ეს. ეს ყველაფერი იყო, არის და იქნება. არავინ ეწინააღმდეგება ამას.

_ რაში დაინახეთ ის, რომ ეროვნულობას ებრძვიან. უხეში ფორმით რომ ვთქვათ, ქართველობას გართმევენ?

_ არა. ძალიან გთხოვ ნუ აჰყვები აბსოლუტურ დემაგოგიამდე დასულ ფრაზებს. ძალიან გთხოვთ ნუ დამისვამთ ასე კითხვებს.

ყველამ თავის უკანალს მიხედოს. აქ საუბარია იმაზე, რომ გარყვნილების პროპაგანდა არ უნდა იყოს დაშვებული ქვეყანაში, სადაც უპირველეს ფასეულობად ითვლება ოჯახური ტრადიციული ფასეულობა, ეს არის ჩვენი ქართული ცხოვრების წესი. აბსოლუტური უმრავლესობა თანხმდება ამაზე, რომ ჩვენი მორალური ფასეულობა არის ტრადიციული ოჯახების ფასეულობები და არ ვცნობთ კაცისა და კაცის, ან ქალისა და ქალის ურთიერთობებს.

_ კითხვაზე პასუხი ვერ გავიგე, რაში გამოიხატა თავს მოხვევა?

_ გეუბნებიან, რომ საზოგადოებაში ჩამოყალიბებული მორალი უნდა დავარღვიოთ.

_ რაში გამოიხატა ეს?

_ უნდა შეიცვალოს მსოფლმხედველობა და აღიაროთ, რომ კაცისა და კაცის სექსუალური ურთიერთობა ნორმალური ურთიერთობაა და ესეც სიყვარულია. ასეთი ადამიანები არსებობენ რაც უნდათ ის აკეთონ თავის სოციუმში.

_ რას სთავაზობთ, შინაპატიმრობა მიუსაჯონ საკუთარ თავს და ქუჩაში არ გამოვიდნენ?

_ რატომ ვთავაზობთ შინა პატიმრობას? პორნოგრაფიულ ფილმებს რატომ არ უშვებენ ტელევიზიები მაშინ? ახლა რომ გამოვიდნენ ტელევიზიების წარმომადგენლები და ეს გააპროტესტონ, სწორი იქნება? როგორც არ უნდა ჩაუღრმავდეთ და როგორც არ უნდა წარმოაჩინოთ, რომ არ აქვთ საშუალება ტყავის ტრუსებით გამოვარდნენ ქუჩაში, კაცებმა ქალების ფორმაში და ქალებმა კაცების ფორმაში… მაპატიეთ ამ სიტყვისთვის და კაცებს ზასაობის უფლებას რომ ვართმევთ… რაც ჩამოვთვალე არ გინახავს, ან არ გაგიგია? ეს არის ზუსტად პრაიდი. ეს არის სექსუალური უმცირესობების გამოხატვის მთავარი საშუალება, არ გაგიგიათ?! შეგიძლია ჩაწერო გუგლში და ნახავ, რას ვეწინააღმდეგები. ყველაზე საშიში ის ადამიანები არიან, ვინც ლატენტური ლიბერალები არიან.

_ თქვენთვის მისაღებია ის განცხადებები, რაც გვესმოდა ვასაძისა და მისი მხარდამჭერების მხრიდან, კომბლების რევოლუციის დააანონსება და ა. შ. მისაღებია?

_ სანამ ვასაძე მაგას იტყოდა დაახლოებით 3 წელია მაგას ვიძახდი, რომ სხვადასხვა საკითხებთან მიმართებაში ხელისუფლება მოსახლეობას იქამდე მიგვიყვანს, რომ ავიღებთ კომბლებს და კომბლების რევოლუციას მოვაწყობთ. ახლაც ხელისუფლებასთან მიმართებაში იყო ნათქვამი. რევოლუციას გეი პრაიდებს და ასეთ ორგანიზაციებს ვერ მოვუწყობთ.

დავესწარი ამ შეხვედრას. სანამ საქართველოში არ იქნება მიღებული, რომ გარყვნილების პროპაგანდა აკრძალულია, იქამდე თითოეული ქართველი მიიჩნევს, რომ არ დაუშვას საქართველოში გარყვნილების პროპაგანდა. როგორც კი ქვეყანას ეყოლება ისეთი ხელისუფლება, რომელიც მიიღებს გარყვნილების პროპაგანდის ამკრძალავ კანონმდებლობას, დამთავრდება ამაზე ისტერიკა.

აქ საუბარი არ არის იმაზე, რომ ამის გამო ადამიანი ციხეში უნდა ჩასვა, აქ საუბარია ადმინისტრაციულ რეგულაციებზე და პოლიციას ჰქონდეს საშუალება, რომ არ დაუშვას გარყვნილება.

_ დემოკრატიული იქნება ეს?

_ რა თქმა უნდა. დემოკრატიული არ არის ადამიანის უფლებათა ევროპული კონვენცია, სადაც წერია, რომ შეიძლება შეიზღუდოს გამოხატვის თავისუფლება. არასამთავრობო ორგანიზაციები წარმოაჩენენ, თითქოს მარტო რუსეთში ებრძვიან გარყვნილებას, ამით ხდება წარმოჩენა თითქოს გათახსირება არის ევროპა და ევროპა რყვნის, ხოლო რუსეთი ამას ეწინააღმდეგება. ამის პროპაგანდას თქვენ ჟურნალისტებიც უწყობთ ხელს. როგორ შეიძლება ამის პროპაგანდირება, ევროპა არ არის „მამათმავლების“ და  გარყვნილების არეალი. პარიზში მილიონი ადამიანი გამოვიდა ტრადიციული ოჯახის და ღირებულებების დაცვის მოთხოვნით და რომში 2 მილიონი. ის არის ჩემთვის ევროპა და არა ევროპულ ქალაქებში ჩატარებული ლგბტ პრაიდები. ნუ გავაუფასურებთ ევროპულ ფასეულობებს ისე, რომ თურმე ევროპა არის „მამათმავლობა“ და რუსეთი არის ამის წინააღმდეგ.

_ როდესაც ეროვნულ ფასეულობებზე ვსაუბრობთ, ჩემთვის გაცილებით მნიშვნელოვანია ტერიტორიული მთლიანობის საკითხები, ვიდრე ის, რაზეც თქვენ საუბრობთ.

_ ვინ გითხრათ ეს ასე არ არის. გეი პრაიდზე რომ გამოვარდებიან მე უნდა ვთქვა, რომ ჩემთვის ეს მნიშვნელოვანია, მაგრამ ტერიტორიული მთლიანობა უფრო მნიშვნელოვანია და შემიძლია ამაზე ვილაპარაკო?! რა ლოგიკაა ეს.

_ ვინც აპროტესტებენ ამას, არ მინახავს ეს ადამიანები ოკუპაციის აქციებზე.

_ მათთვის უმნიშვნელოვანესია ტერიტორიული მთლიანობის საკითხი. მე ვარ ერთ-ერთი მათგანი, საზოგადოდ ვარ ერთ-ერთი პირი, კრებითად ეს ადამიანები ვარ, იმიტომ რომ თანამოაზრეები ვართ. ვინც იქ დგანან, მათთან არ მიდიან ჟურნალისტები და არ ეკითხებიან არც ტერიტორიულ მთლიანობაზე და არც სხვა რამეზე.

_ აქცია როცა იმართება რატომ არ უერთდებიან?

_ ამ შემთხვევაში პირველ ადგილზე ყოველთვის არის სოციალური აქციები. გულსატკენია, მაგრამ ლოგიკა არის. ტერიტორიული მთლიანობა ადამიანებისთვის არც თუ ადვილად მოსაგვარებელი თემაა. ამიტომ ვერ მოსთხოვ ხელისუფლებას, რატომ ვერ მოაგვარებ. გარყვნილების პროპაგანდა რომ არ გვინდა და ამას ვამბობთ, ეს არ ნიშნავს, რომ ტერიტორიული მთლიანობა მეასე ხარისხოვანია.

P.S. „აიპრესი“ ინტერვიუში გამოთქმულ ჰომოფობიურ გამონათქვამებს ემიჯნება, თუმცა მიგვაჩნია, რომ ინტერვიუ საზოგადოებამ უნდა ნახოს, ვინაიდან გიორგი ახვლედიანი ერთ-ერთი იმ პოლიტიკური პარტიის წარმომადგენელია, რომელიც ქართულ პოლიტიკაში თავის სიტყვას ამბობს.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...