გედევან ფოფხაძე: თუ ხაზარაძეს კიდევ დასჯიან, ეს ნიშნავს, რომ რეჟიმი რადიკალურ წესებს ამყარებს (ინტერვიუ)

პოლიტიკური პარტია „სამართლიანობისთვის“ ერთ-ერთი ლიდერი გედევან ფოფხაძე აცხადებს, რომ პოლიტიკაში ჩართული ბიზნესმენის მამუკა ხაზარაძის ქმედება დანაშაულის დაფარვის კვალიფიკაციაში ექცევა, რადგან მან ბიზნესზე ზეწოლის კონტექსტში განცხადება თავის დროზე არ გააკეთა და ამაზე მხოლოდ და მხოლოდ ახლა ისაუბრა. თუმცა დეპუტატი ამბობს, რომ თუ ამის გამო ხაზარაძის წინააღმდეგ რაღაც სამართლებრივ დავას დაიწყებენ და კიდევ მას დასჯიან, ეს ნიშნავს, რომ პოლიტიკური რეჟიმი ახალ რადიკალურ წესებს ამყარებს.

ამის შესახებ გედევან ფოფხაძემ „აიპრესთან“ ინტერვიუში ისაუბრა. დეპუტატი აქვე აღნიშნავს, რომ ხაზარაძე როგორც პოლიტიკოსი მისთვის მისაღები არ არის. ამბობს, რომ თუ ის პოლიტიკაში შემოვა, როგორც ახალი ივანიშვილი ეს წრეზე ტრიალი იქნება და ამ ქვეყანას ეს კი არ სჭირდება, არამედ ის, რომ სახალხო ხელისუფლება ეყოლება, რომელიც სისტემურ ცვლილებებს განახორციელებს.

_ გუშინ ისაუბრა მამუკა ხაზარაძემ იმაზე, როგორ მოხდა ბიძინა ივანიშვილის სახლში გენპროკურორისა და ბიზნესმენების მონაწილეობით, როგორ გამოატანინეს ვანო ჩხარტიშვილის წინააღმდეგ საკონსტიტუციო სასამართლოდან სარჩელი და. ა. შ. ბევრი ისეთი დეტალი თქვა მან გადაცემა „რეაქციისთვის“ მიცემულ ინტერვიუში, რაც პრინციპში აქამდე ცნობილი არ იყო. არის თუ არა ეს საფუძველი გამოძიების დასაწყებად და ფიგურანტი პირების დასაკითხად?

_ რა თქმა უნდა. რასაც მეკითხებით ბანალურად რომ შევხედოთ მაშინაც ცხადია, რომ გამოძიება უნდა დაიწყოს და ამას არ უნდა იურისტი. რასაც მამუკა ხაზარაძე მოყვა იმაზე, რაც მოხდა ბიძინა ივანიშვილის სახლში, ამაზე უკვე სისხლის სამართლის საქმე უნდა აღიძრას. ან ირაკლი შოთაძეს რა უნდოდა იმ შეხვედრაზე, ან ფიფიას რა უნდოდა?! ამას ვერ ვხვდები.

ისეთ რაღაცას მოყვა ხაზარაძე, რა თქმა უნდა, ეს შეიცავს სისხლის სამართლის ნიშნებს და ყველა უნდა დაიკითხოს. ფიფიას ყოფნა შეხვედრაზე ან უნდა დადასტურდეს, ან უარყოფილი უნდა იყოს. ყოველ შემთხვევაში მოწმის სტატუსით ყველა უნდა დაიკითხოს. თავისთავად დანაშაული ცალსახაა, სამსახურებრივი უფლებამოსილების გადამეტებაც არის როდესაც საუბარია იმაზე, რომ შოთაძე იმყოფებოდა იქ.

ზუსტ კვალიფიკაციაზე საუბარი გამიჭირდება, იმიტომ რომ არ ვიცი დეტალები, მაგრამ ჩემი აზრით უნდა დაიკითხოს ყველა დასახელებული პირი და მერე ჩამოყალიბდნენ კვალიფიკაციასთან დაკავშირებით. ყველა შემთხვევაში რაც იქ ხდებოდა აბსურდია და არანაირ სამართლებრივ ჭრილში არ ზის.

_ მთლად ბიზნესის ჭრილშიც არ ზის. იმიტომ, რომ როგორც გაირკვა იმ შეხვედრაზე იმყოფებოდა მაშინდელი მთავარი პროკურორი.

_ რა თქმა უნდა, ეს თავისთავად აბსურდია. როგორ შეიძლება საქმის ასეთ გარჩევაზე, როდესაც ვიღაცა ვიღაცას ფულს სთხოვს და იმ შეხვედრაზე ზის მთავარი პროკურორი და გაუგებარია რა სტატუსით ზის.

_ პოლიტიკური შეფასება როგორია თქვენი მხრიდან?

_ ამ შემთხვევაში მე მამუკა ხაზარაძეს, როგორც ბიზნესმენს თანავუგრძნობ და ეს არის ჩემთვის იმის მაჩვენებელი, რომ ხელისუფლება ბიზნესს ატერორებს. მაგრამ, მამუკა ხაზარაძე, როგორც პოლიტიკოსი ჩემთვის მისაღები არ არის.

_ ფაქტზე გთხოვთ პოლიტიკურ შეფასებას, მამუკა ხაზარაძის მიღება-მიუღებლობაზე არ გეკითხებით ამ შემთხვევაში.

_ ფაქტთან დაკავშირებით ცალსახად ვაცხადებ, რომ ხელისუფლების მხრიდან ადგილი აქვს აბსოლუტურად არასწორი პოლიტიკური და სამართლებრივი სტანდარტის შექმნას. მე სხვა ბიზნესმენებისგანაც მსმენია, რომ ასეთი ურთიერთობები ჰქონდათ თავის დროზე. მე მითქვამს ეს საჯარო გამოსვლებში. მაგალითად ბატონი ჯანყარაშვილი ახდენდა ზეწოლად გარკვეულ ბიზნესმენებზე. ამის ფაქტები არ მაქვს, მაგრამ მამუკა ხაზარაძემაც რამდენიმე წლის თავზე აღიარა ეს ყველაფერი.

ხელისუფლება, რომელიც ბიზნესს ელაპარაკება ამ ტონით. „ნაეზდი“ უწოდა თავად ხაზარაძემ ურთიერთობის ამ ფორმას. ეს არის ისეთი ურთიერთობის ფორმა ბიზნესთან, რომელიც სამართლებრივ ჩარჩოებში ვერ ექცევა. ეს არ არის სამართლებრივი სახელმწიფოსათვის დამახასიათებელი. ეს დამახასიათებელია პოლიტიკური რეჟიმისთვის, სადაც წესებს ადგენს არა კანონი და სახელმწიფო სისტემა, არამედ გარკვეული ჯგუფი თავისი ინტერესებიდან გამომდინარე.

_ კიდევ ერთი ძალიან მნიშვნელოვანი დეტალი თქვა მან, რომ სანამ მას შეეხებოდა ეს პრობლემა, ჩხარტიშვილი სხვა ბიზნესმენებს ართმევდა ფულს. ამაზე რას იტყვით?

_ კი ბატონო, ესეც მიუთითებს იმაზე, რომ ხაზარაძე სისტემურ პრობლემაზე მიუთითებს, რომელიც ქვეყანაში არსებობს და არა კერძო პრობლემაზე მასთან მიმართებაში. ისე  გასათვალისწინებელია, რომ თუ სამართლებრივ კვალიფიკაციაზე ვსაუბრობთ, ამ შემთხვევაში ხაზარაძე დანაშაულის დაფარვის კვალიფიკაციაში ექცევა.

_ რადგანაც თავის დროზე არ თქვა ამის შესახებ?

_ რა თქმა უნდა. როდესაც შენ ასეთი ინფორმაცია გაქვს და დანაშაულს ფარავ… ვისთვის უნდა ეთქვა, მთავარი პროკურორი იქ იჯდა, მაგრამ ფორმალურად მას ჰქონდა სამართლებრივი, პოლიტიკური და მორალური ვალდებულება ეს ეთქვა ამის თაობაზე.

_ თან საუბრობს, რომ ჩხარტიშვილის დავებს სხვა ბიზნესმენებთან ერთი მოსამართლე განიხილავდა.

_ მას ჰქონდა ფაქტობრივი ინფორმაცია იმისათვის, რომ საკითხი მას სხვანაირ პოლიტიკურ დონეზე აეყვანა, მაგრამ მან მიიღო თამაშის წესები და ახლა აღარ მიიღო. სჯობს გვიან, ვიდრე არასდროს, მაგრამ ჩემთვის არსებითი ის არის თუ რა აინტერესებს ხაზარაძეს – თავისი პირადი მდგომარეობა ამ პოლიტიკურ მოცემულობაში თუ ის, რომ ქვეყანაა ამ დღეში. მაინტერესებს მისი მოტივაცია. ჩემთვის, როგორც პოლიტიკოსისთვის ეს მნიშვნელოვანია.

პირველ ნაწილში მამუკა ხაზარაძეს ყველანაირად სოლიდარობას ვუცხადებ და მიმაჩნია, რომ ის არ უნდა დაისაჯოს, მაგრამ თუ ის პოლიტიკაში შემოვიდა და მეორე ივანიშვილი გახდება, მე ეს მიმაჩნია ერთ წრეზე ტრიალი. ამ წრეზე მე მგონი საქართველო არ უნდა წავიდეს. მსხვილი ფინანსური დაჯგუფება არ უნდა გახდეს ქვეყნის მეპატრონე. ჩვენ ან ვთანხმდებით იმაზე, რომ უნდა მივიღოთ სახალხო მთავრობა, ან ამ ნიუანსებში შესვლაზე – ოღონდ ბიძინა ივანიშვილი წავიდეს და ყველას შევეკვრები, ჩემთვის მისაღები ფორმა არ არის.

_ ისაუბრეთ, რომ დანაშაული დაფარა, რადგან თავის დროზე არ თქვა. ხომ არ ელოდებით, რომ ეს საქმეც შესაძლოა ხაზარაძის წინააღმდეგ შემოტრიალდეს?

_ იცით რა არის? მე ამ შემთხვევაში მგონია, რომ ეს არ არის საქმე ხაზარაძის წინააღმდეგ. ჩვენ – ამ შემთხვევაში ჩემ თავს და თქვენ გგულისხმობთ, ვინც ამ პროცესის მაყურებლები ვართ… მამუკა ხაზარაძემ ეს საჯაროდ გააჟღერა. ხომ ხვდებით, რომ ქვეყანაში პრობლემაა?! გვინდა თუ არა, ეს არის საქმე ქართული სახელმწიფოს წინააღმდეგ, რომელიც დღეს არის შეუმდგარი და ხელისუფლება იქცევა, როგორც პოლიტიკური რეჟიმი. თუ ამის გამო ხაზარაძეს ვიღაცა კიდევ დასჯის, ეს იქნება იმის მაჩვენებელი, რომ ქვეყანაში პოლიტიკური რეჟიმი ამყარებს ახალ წესებს და ეს წესები უფრო გამომწვევი და უფრო რადიკალური ხდება, ვიდრე აქამდე დასჭირდათ.

ვხედავთ, რომ არჩევნებზე ადამიანები იღუპებიან, სამეგრელოში მოხდა ია კერზაიას შემთხვევა, ამ საქმის შეწყვეტის უფლება მათ არ ჰქონდათ და უნდა მოეთხოვათ პასუხი ვიღაცისთვის. ვხედავთ, რომ ბიზნესს ატერორებენ. მე მომწონს თუ არა ეს ბიზნესმენები, ამას მნიშვნელობა არ აქვს.

თუ სახელმწიფო გაილაშქრებს მამუკა ხაზარაძის წინააღმდეგ, ეს იქნება მინიშნება, რომ არჩევნებზე ხელისუფლება გადადის აგრესიულ ქმედებებზე. ფაქტია, რომ რეჟიმი უკვე არსებობს. ეს უკვე აღარ არის მამუკა ხაზარაძის წინააღმდეგ გადადგმული ნაბიჯი. ეს უკვე ეხება ნებისმიერ ჩვენთაგანს. მე მომწონს თუ არა ვიღაცა ვისაც უსამართლოდ ჩაგრავენ ამას არ აქვს მნიშვნელობა, უსამართლოდ ჩაგვრა აჩენს უსამართლო სისტემის დაკანონებას ქვეყანაში, რომლის თანამონაწილეც მე არ უნდა გავხდე. იმიტომ, რომ შემდეგ მეც დავიჩაგრები, თქვენც და სხვებიც. კარგი ადამიანებიც დაიჩაგრებიან. ამ დროს აღარ აქვს მნიშვნელობა ჩვენ ვინ მოგვწონს და ვინ არა. ამ შემთხვევაში ხაზარაძის მიმართ თუ სისტემა რადიკალური და ცუდი ფორმებით ამოქმედდება, ჩვენ ეს სისტემა უნდა მოვთოკოთ და ეს უნდა გავაკეთოთ ერთობლივი ძალებით.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად