ერგნეთის მოსახლეობას სარწყავი წყლის პრობლემა ივნისის ბოლოს მოუგვარდება

სოფელ ერგნეთში მცხოვრები კონფლიქტით დაზარალებული ოჯახების სასოფლო-სამეურნეო სავარგულების წყალუზრუნველსაყოფად, სოფლის მეურნეობის სამინისტრო, შპს „საქართველოს მელიორაცია“ და შვეიცარიის განვითარებისა და თანამშრომლობის სააგენტო სატუმბი სადგურის რეაბილიტაციას ერთობლივად ახორციელებენ. 

რეაბილიტაციის ფარგლებში, შეიცვალა ტუმბო აგრეგატი, დაემატა სადაწნეო მილსადენის ერთი ხაზი, დამონტაჟდა მძლავრი ტრანსფორმატორი. შედეგად, სოფ. ერგნეთის 150 ჰექტარი სასოფლო-სამეურნეო მიწის ფართობი გასარწყავდება. აღნიშნული ფართობით 200 კომლი, დაახლოებით 600-700 მოსახლე ისარგებლებს.
სატუმბი სადგურის სარეაბილიტაციო სამუშოები, რომლის ღირებულებაა 260 ათასი ლარი, ივნისის ბოლოს დასრულდება.

სარეაბილიტაციო ღონისძებების მიმდინარეობა მოინახულეს დღეს „საქართველოს მელიორაციის“ გენერალურმა დირექტორმა, ლევან დვალმა, დანიის ლტოლვილთა საბჭოს წარმომადგენელმა, გაი ჰუვიმ და შვეიცარიის განვითარებისა და თანამშრომლობის სააგენტოს წარმომადგენლებმა. 

აღნიშნული ობიექტის რეაბილიტაცია შპს „საქართველოს მელიორაციასა“ და ლტოლვილთა დანიის საბჭოს შორის გაფორმებული მემორანდუმის საფუძველზე ხორციელდება. შვეიცარიის განვითარებისა და თანამშრომლობის სააგენტოს (SDC) ფინანსური მხარდაჭერით ლტოლვილთა დანიის საბჭო ახორციელებს პროექტს „ერგნეთში დაბრუნებულთა საცხოვრებლებისა და შემოსავლის წყაროების აღდგენა“, რომელიც მიზნაც ისახავს სოფელ ერგნეთში კონფლიქტით დაზარალებული ოჯახების საცხოვრებელი და სოციალური-ეკონომიკური მდგომარეობის გაუმჯობესებას. 

პროექტის ფარგლებში, კონფლიქტით დაზარალებული მოსახლეობისათვის აღდგება საცხოვრებელი სახლები და საარსებო წყაროდ საჭირო ინფრასტრუქტურა. მოსახლეობის მიერ შერჩეული იქნა სათემო ინფრასტრუქტურა-სოფლის საირიგაციო სისტემა.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად