დავით ბერძენიშვილი: “ოცნების” მთავარი ოპონენტი იქნება კოალიცია გრიგოლ ვაშაძის ლიდერობით (ინტერვიუ)

შუალედური არჩევნების მოახლოებასთან ერთად ოპოზიციურ პარტიებს შორის თანამშრომლობასთან დაკავშირებით კონსულტაციები აქტიურ ფაზაში შედის, რაც შესაძლოა 2020 წლის საპარლამენტო არჩევნებთან დაკავშირებითაც გაგრძელდეს. ოპოზიციის ძირითად სპექტრს უკვე მიღწეულია აქვს შეთანხმება და ერთობლივად დაიწყეს ხელმოწერების შეგროვება. მათი გეგმის მიხედვით 1 მილიონი ხელმოწერის შეგროვებას აპირებენ, რათა „ქართული ოცნება“ დათმობაზე წაიყვანოს და 2020 წელს არჩევნები პროპორციული სისტემით ჩატარდეს.

რა ტიპის თანამშრომლობა შესაძლოა შედგეს პარტიებს შორის, განიხილება თუ არა ბლოკების ან კოალიციის თემა, ვინ წარმოუდგენიათ მესამე ძალად და რამდენად შესაძლებელია განსხვავებულ პლატფორმაზე მდგომ ოპოზიციურ ძალებთან თანამშრომლობა? ამ და სხვა საკითხებზე „აიპრესთან“ ინტერვიუში „რესპუბლიკური პარტიის“ ერთ-ერთი ლიდერი დავით ბერძენიშვილი საუბრობს:

_ საუბარი ოპოზიციის თანამშრომლობაზე დავიწყოთ. საუბარია სხვადასხვა ტიპის თანამშრომლობაზე უკვე შუალედური არჩევნებისთვის. პირადად თქვენ როგორ წარმოგიდგენიათ ეს? რა სახის თანამშრომლობაზეა საუბარი, მილიონი ხელმოწერის გარდა, რაზეც თანამშრომლობთ პარტიები?

_ ის პარტიები, ვინც ერთმანეთთან ვთანამშრომლობთ, შეთანხმებულები ვართ იმაზე, რომ ერთმანეთის საწინააღმდეგო კანდიდატებს არ დავასახელებთ არც მთაწმინდაზე, არც ზუგდიდში არც სხვაგან.

_ რომელი პარტიებია ისეთი, რომელიც ამ იდეის გარშემო შეთანხმდით?

_ ყოველ შემთხვევაში მე მხოლოდ რესპუბლიკელების სახელით შემიძლია ვილაპარაკო. „რესპუბლიკელები“ საკუთარი კანდიდატურის დასახელებას არ ვაპირებთ. ამასთანავე იმაშიც დარწმუნებული ვარ, რომ კანდიდატურა რომ დაგვეყენებინა მხარდაჭერაც იქნებოდა პარტნიორი პარტიებისგან. მაგრამ ამჯერად ჩვენ თავი შევიკავეთ და ჩვენ მხარს დავუჭერთ იმ კანდიდატებს, ვისზეც შეთანხმება იქნება. მაღალი ალბათობით მთაწმინდაზეც დავუჭერთ მხარს შეთანხმებულ კანდიდატს. მე ახლა კონკრეტულად არ დავასახელებ. თავად კანდიდატმა ან მისმა პარტიამ უნდა გააჟღეროს, რომ ნამდვილად აპირებს. ასე იქნება, სხვა ადგილებშიც.

_ მთაწმინდის მაჟორიტარულ ოლქს რაც შეეხება ეს შალვა შავგულიძე იქნება, უკვე გააჟღერა გუშინ შალვა შავგულიძემ და ალბათ მას გულისხმობთ.

_ კი. თუ დაიწყება საარჩევნო კამპანია და მისი გადაწყვეტილება საბოლოოა და ალბათ ასეა, ჩვენ მას მხარს დავუჭერთ.

_ რაც შეეხება შემდგომ თანამშრომლობას, მე მქონდა საუბარი გია ბარამიძესთან, რომელმაც მითხრა, რომ შეთანხმება მიღწეულია. თუ „ოცნება“ დათმობაზე არ წამოვა და მაჟორიტარულ სისტემას დატოვებს, მაშინ იგივე სახის თანამშრომლობა გაგრძელდება 2020 წლის არჩევნებზეც და ოპოზიცია ერთმანეთს არ დაუყენებთ კონკურენტებს. მიდასტურებთ ამ ინფორმაციას?

_ თანამშრომლობა ვის და ვის შორის?

_ ყველა იმ პარტიას შორის, ვინც ახლა მოლაპარაკების მაგიდასთან ზიხართ.

_ „რესპუბლიკური პარტია“ პირველი არამიშისტური პარტია იყო, რომელმაც მეორე ტურის გამოცხადების შემდეგ მხარი დავუჭირეთ გრიგოლ ვაშაძეს. ერთგვარი ყინულმჭრელი აღმოვჩნდით ჩვენ. ჩვენი პოტენციური ამომრჩეველი საფიქრალში ჩავარდა. მერე მოგვყვნენ სხვა პარტიებიც. ახლა ხელმოწერების ფორმატშიც თანამშრომლობენ და როგორც ვატყობ უფრო მჭიდრო თანამშრომლობის ფორმებზეც ფიქრობენ. ამიტომ, ჩვენთვის მკაფიოა, რომ შესაძლებლობა საკმაოა ინტენსიური სათანამშრომლო ფორმატისა. რა ხასიათის იქნება ეს და რა ბლოკი იქნება და როგორ, ამაზე საუბარი ჯერ ნაადრევია.

_ ანუ, შესაძლოა ბლოკიც ვიხილოთ? ამაზეც არის მსჯელობა?

_ ჯერ ძალიან ადრეა ამაზე საუბარი. ყოველ შემთხვევაში გრიგოლ ვაშაძესთან „რესპუბლიკელებს“ პრობლემები არ გვაქვს თანამშრომლობასთან დაკავშირებით. ბუნებრივია ბევრ საკითხში ჩვენ განვსხვავდებით ერთმანეთისგან, მაგრამ სათანამშრომლო ფორმატის გამოცდილებაც გაქვს პოზიტიური და პერსპექტივაც.

_ გრიგოლ ვაშაძესთან თანამშრომლობის პრობლემები არ გაქვთ და სააკაშვილთან გაქვთ? ამიტომ ხომ არ გადგა გვერდზე, როცა თავმჯდომარის პოსტი დატოვა?

_ არავითარი პრობლემა არ გვაქვს. მე ვლაპარაკობ იმაზე, ვისთანაც კონკრეტულად გვილაპარაკია. ვაშაძე იყო საპრეზიდენტო კანდიდატი და ვისაც ჩვენ მხარი დავუჭირეთ. ბოლო ხანებში „რესპუბლიკურ პარტიას“ კი ჩამოუყალიბდა სათანამშრომლო გამოცდილება.

_ რაც შეეხება ბურჯანაძეს, რომელიც აბსოლუტურად სხვა პლატფორმაზე დგას. მასთან როგორ წარმოგიდგენიათ თანამშრომლობა?

_ არაფერი. ხანდახან ეთერში ერთმანეთს შევხვდებით, გადავკოცნით. პიროვნული კორექტული ურთიერთობები გვაქვს, მაგრამ პოლიტიკურად „რესპუბლიკელების“ და ბურჯანაძის პარტია დიამეტრიულად სხვადასხვა პოზიციაზე ვართ.

_ თუ კანდიდატების თემა იქნება, ითანამშრომლებთ?

_ არ გვინდა ამდენი მარჩიელობა. შემიძლია გითხრათ, რომ ყოველ შემთხვევაში ის არ არის პირველი რიგის პარტნიორი და არც მტრად განვიხილავთ არავის.

მე ვფიქრობ, რომ თუ იქნება ლიდერი ოპოზიციური გაერთიანება, ეს გაერთიანება მაღალი ალბათობით ხელისუფლების მთავარი კონკურენტი იქნება.

_ თუ იქნება რაღაც გაერთიანება, მასში პროდასავლურ პარტიებს განიხილავთ და არა სხვა პლატფორმაზე მდგომ პარტიებს?

_ როგორც მინიმუმ პროდასავლური პარტიების თანამშრომლობის სიმჭიდროვის ხარისხი მოსალოდნელია უფრო მაღალი იყოს. სხვის ნაცვლად მე ვერ ვილაპარაკებ.

_ დავით უსუფაშვილთან და მის პოლიტიკურ ძალასთან თუ გაქვთ კონსულტაციები?

_ არ მინდა სათითაოდ ჩამოვყვე. პროპორციულ სისტემასთან დაკავშირებით იდეას ძალიან ბევრი პარტია შემოუერთდა. მათ შორის არარეგისტრირებული პოლიტიკური ჯგუფებიც. ასე, რომ იმ ფორმატში ძალიან ბევრია. დანარჩენი რა და როგორ იქნება, ამაზე საუბარი ჯერ ძალიან ადრეა. ოფიციალურად საარჩევნო კამპანიის სტარტამდე წელიწადნახევარია.

_ არის ერთი პოლიტიკური ცენტრი „ქართული ოცნება“, მეორე „ნაციონალური მოძრაობა“ და მუდმივად საუბარია მესამე ძალის ფორმირებაზე. თქვენ ვინ წარმოგიდგენიათ ასეთად?

_ მესამე ძალაზე პრეტენზია ოთხმა კაცმა უკვე განაცხადა. ალბათ მეხუთე, მეექვსეც გამოჩნდება. მე ვფიქრობ, რომ იქნება არა ასე, არამედ ოდნავ განსხვავებულად. არის ხელისუფლება – პარტია „ქართული ოცნება“. მისი მთავარი ოპონენტი იქნება კოალიცია გრიგოლ ვაშაძის ლიდერობით. ამას გარდა კიდევ იქნება ბარიერის გადალახვის შემძლე 4-5 პოლიტიკური სუბიექტი, რომლებსაც შეეძლებათ სხვადასხვა ხარისხის და ინტენსივობის თანამშრომლობა ლიდერ ოპოზიციურ გაერთიანებასთან.

იქნება ორი დიდი ძალა. ხელისუფლება და კოალიცია გრიგოლ ვაშაძის პირველი ნომრობით და ლიდერობით. ამას გარდა რამდენიმე პოლიტიკური ჯგუფი იქნება. ამ ჯგუფებში ზოგი პრორუსულია, ზოგი პროდასავლურია, 4-5 ჯგუფი იკვეთება ასეთი. 3%-იანი ბარიერის პირობებში 4-6 კონკურენტუნარიანი სუბიექტი იკვეთება. ამას აჩვენებს არჩევნების შედეგები. თუმცა, პარლამენტში ლიდერ ოპოზიციასთან თანამშრომლობას შეძლებს ყველა „პატრიოტთა ალიანსის“ გარდა. ეს პარტია „ქართული ოცნების“ ფილიალია.

_  „რესპუბლიკელებს“ გრიგოლ ვაშაძის ლიდერობის მქონე კოალიციაში განიხილავთ?

_ ჯერ არ ვიცი. მე ვთქვი ვარიანტი. „რესპუბლიკელები“, ისევე როგორც 1-2 სუბიექტი შესაძლოა აღმოჩნდეს კოალიციაში, შეიძლება აღმოჩნდეს ცალკე მებრძოლად 3%-იანი ბარიერის გადასალახავად. ამაზე საუბარი ჯერ ნაადრევია. თუმცა, გრიგოლ ვაშაძესთან თანამშრომლობის გამოცდილება გვიდასტურებს, რომ შესაძლებელი იქნება მჭიდრო სათანამშრომლო ფორმატი უკვე პარლამენტში. მანამდე რა ფორმით მივალთ არჩევნებამდე ამაზე საუბარი ჯერ ნაადრევია.

_ „ქართული ოცნებიდან“ ახლა წამოსულ დეპუტატებთან თანამშრომლობას განიხილავთ?

_ თუ ისინი მოხვდებიან პარლამენტში და არიან ოპოზიციონერები ვითანამშრომლებთ. პარლამენტი თავისთავად ისეთი სტრუქტურაა, რომ სათანამშრომლო შესაძლებლობები იქ მოსალოდნელია. ყოველ შემთხვევაში გამორიცხული არ არის.

_ არჩევნებამდე არ გეგმავთ?

_ არ ვიცი. ჩვენ არ ვფიქრობთ ამ მიმართულებით, მაგრამ არჩევნები ძალიან შორს არის.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...