სერგი კაპანაძე: ჩვენი ამოცანაა, მომავალ კოალიციაში წამყვანი ჩვენი დღის წესრიგი იყოს (ინტერვიუ)

პარლამენტის ვიცე-სპიკერი, „ევროპული საქართველოს“ ერთ-ერთი ლიდერი სერგი კაპანაძე აცხადებს, რომ ნინო ბურჯანაძის საგარეო პოლიტიკური კურსის მიუღებლობა ყველაზე მეტად მის პარტიაში აქვთ, თუმცა საარჩევნო რეფორმის საკითხი ის საკითხია, რაზეც ყველა პარტია საუბრობს. რაც შეეხება იმას, იქნება თუ არა შესაძლო კოალიციაში ბურჯანაძე, ამაზე დეპუტატი ამბობს, რომ უნდათ პროდასავლური პარტიებისგან შედგეს კოალიცია, თუმცა თუ პოტენციური თვალსაზრისით განვიხილავთ, მაშინ ეს საკითხი პოლიტიკური სპექტრის გადასაწყვეტია, ხოლო თუ ბურჯანაძე იმ კოალიციაში იქნება, მას არ ექნება გავლენა საგარეო პოლიტიკაზე.

სერგი კაპანაძე მიხეილ სააკაშვილის განცხადებებსაც აფასებს და ამბობს, რომ ხშირად ეს ოპოზიციის საქმეს აზარალებს, თუმცა ამბობს, რომ ეს თავად სააკაშვილის გადასაწყვეტია. მისი თქმით, სხვა ძალები სააკაშვილს ვერც შეცვლიან და არც აპირებენ ამას.

ე. წ. შავი სიების შესახებ კი ამბობს, რომ ეს არ ნიშნავს შურისძიებას და ამბობს, რომ ოპონენტებზე შურისძიებას არ აპირებენ და ამაზე დისკუსია კიდევ ექნებათ.  კაპანაძე აქვე განმარტავს, რომ არ უნდა დამკვიდრდეს განცდა, რომ უკანონო დავალებების შესრულება „მოსულა“.

რა გეგმები აქვს ოპოზიციას, რას ფიქრობს NDI-ის კვლევებზე, რატომ გადაწყვიტეს მოლაპარაკებებზე ბურჯანაძესთან ერთი მაგიდის გარშემო მსჯელობა, რას ფიქრობს ანაკლიის პროექტზე და მამუკა ხაზარაძესთან თანამშრომლობის პერსპექტივაზე? – ამ და სხვა საინტერესო საკითხებზე „აიპრესთან“ ვრცელ ინტერვიუში სერგი კაპანაძე საუბრობს, რომელიც ჩაწერილია გასულ პარასკევს, შესაბამისად ბოლო დღეების მნიშვნელოვან თემებზე კითხვები დასმული არ არის.

_ საუბარი ოპოზიციის გეგმებით დავიწყოთ. რა გეგმები გაქვთ? ვიცით, რომ თებერვალში გეგმავთ მასშტაბურ აქციას, მაგრამ გაგვიმხილეთ იგივე ფორმებით აპირებთ აქტიურობას თუ გექნებათ გარკვეული სიურპრიზები ხელისუფლებისთვის?

_ ვაპირებთ, რომ გვქონდეს მასშტაბური აქცია თბილისში, ასევე რეგიონებშიც. დიდი ალბათობით გვექნება სხვადასხვა მწვავე აქციები თემატურად. გვექნება პიკეტირებებიც. სირცხვილის კორიდორებიც და სხვა ტიპის ღონისძიებებიც. ანუ, ერთი და ორი ღონისძიება არ იქნება. იქნება მსვლელობები და ა. შ. საკმაოდ დიდი რეპერტუარი გვაქვს მოფიქრებული ამ წუთში.

_ თებერვლიდან იწყებთ?

_ არა, იანვრის მეორე ნახევრიდან ვიწყებთ რეგიონებში. თებერვლიდან უკვე თბილისში და გავაგრძელებთ მანამ, სანამ მიზანი არ იქნება მიღწეული.

_ ფორმები იგივე რჩება თუ რაღაც სიახლეებსაც უნდა ველოდოთ?

_ სხვადასხვაგვარი ფორმა იქნება. მათ შორის ისეთი აქციებიც, რაც აქამდე არ გავიკეთებია.

_ რა არის ასეთი?

_ მაგას ნელ-ნელა გეტყვით. ამ ეტაპისთვის ვერ გაგიმხელთ.

_ NDI-ს კვლევებზე როგორია თქვენი შეფასება? გასაგებია, რომ ხელისუფლება დაღმავალ მდგომარეობაშია, მაგრამ ოპოზიციას რამდენად თვითკმაყოფილების განცდა გაქვთ, მაშინ როცა პირველ ადგილზე მყოფ ოპოზიციურ პარტიას მხოლოდ 13% აქვს.

_ რა თქმა უნდა თვითკმაყოფილების განცდა არ გვაქვს და არც უნდა გვქონდეს. ეს კვლევები ასე არ უნდა იყოს განხილული, რომ კმაყოფილების მომგვრელია თუ არა. მგონია, რომ კვლევების პლუსი არის ხოლმე მათი დინამიკაში განხილვის შესაძლებლობა. წინა კვლევებთან შედარება და აქედან გამომდინარე დასკვნების გამოტანა. ამ კონტექსტში უფრო ვაანალიზებ ხოლმე მე პირადად, ვიდრე ერთი კონკრეტული რიცხვისა და მონაცემის განხილვის კონტექსტში.

ამ მხრივ ჩანს რამდენიმე ტენდენცია. პირველი ჩანს ის, რომ მოსახლეობის საკმაოდ დიდი რაოდენა ამბობს, რომ არასწორად მიდის საქმეები, ხელისუფლების რეიტინგი დრამატულად არის შემცირებული და ოპოზიცია ჯამურად ასწრებს ხელისუფლებას. ეს არის მოცემულობა, რომელიც ჩანს. ეს გვაძლევს კარგ საფუძველს, რომ წელს გადამწყვეტი დარტყმა მივაყენოთ ხელისუფლებას და დავამარცხოთ.

_ თუმცა 40% არის იმ ადამიანთა რაოდენობა, რომლებსაც ან ჯერ არ აქვს გადაწყვეტილი ვის მისცემს ხმას, ან არცერთ პარტიას მისცემს ხმას, ან საერთოდ არ წავა არჩევნებზე.

_ ვისაც არ აქვს გადაწყვეტილი კვლევების შედეგად, ვიცით ხოლმე როგორც ნაწილდება ხოლმე. უფრო ოპოზიციის მხარეს ნაწილდება ხოლმე. ეს იძლევა საფუძველს, რომ ხელისუფლება დამარცხდება არჩევნებში.

_თუ ოპოზიციის მხარეს ნაწილდება, რატომ არ ამბობენ ამას?

_ დიდი ნაწილი არ ამბობს, იმიტომ რომ ეშინიათ. განსაკუთრებით, რეგიონებში.

_ მათ შორის კვლევების დროსაც ეშინიათ?

_ განსაკუთრებით კვლევების დროს ეშინიათ. იმიტომ, რომ მათ არ იციან, ვინ არის ის, ვინც ამ კვლევებს ატარებენ და ერიდებიან ხოლმე პასუხის დაფიქსირებას. მათ შორის დიდი ნაწილი არის ხოლმე საჯარო მოხელეები, რომლებიც ერიდებიან პოზიციის გამოხატვას. იმიტომ, რომ თუ ოპოზიციურად არის განწყობილი, არ უნდა, რომ დაკარგოს სამსახური.

_ კვლევის დროს ეშინიათ და საარჩევნო ყუთებთან მისულებს აღარ ეშინიათ?

_ უდავოდ. საარჩევნო ყუთი მაინც არის გარკვეული ანონიმურობის განცდის დამტოვებელი. იქ, როდესაც შედიხარ და ხაზავ არავინ არ გიყურებს. თუმცა, ვიცით, რომ ხელისუფლება კამპანიის დროს ამაზე აკეთებს ხოლმე აქცენტს, რომ ადამიანებს ეუბნებიან, ჩვენ ვიცით ვისაც ხაზავთო. ამის შედეგია ხოლმე ის, როდესაც იქ ვნახულობთ ოთხკუთხედად და სამკუთხედად შემოხაზულ ბიულეტენებს. ამით ცდილობენ ფსიქოლოგიური ზეწოლის მოხდენას, რომ აი ჩვენ მაინც გავიგებთ, შემოხაზეთ თუ არაო.

ჩამოყალიბდა ასე, რომ კვლევების დროს ოპოზიციურად განწყობილი ადამიანები არ ამბობენ, ვის უჭერენ მხარს. ნებისმიერ შემთხვევაში თანაბარიც რომ იყოს, რაც ლოგიკური შეიძლება იყოს უარეს შემთხვევაში ოპოზიციისთვის, მაგ შემთხვევაშიც აშკარად ჩანს, რომ ხელისუფლების რეიტინგი იმაზე დაბალია, რაც ოპოზიციური პარტიების ერთობლიობაში.

_ ამას არც არავინ უარყოფს. მე ვცდილობ სხვა მიმართულებით გავშალოთ თემა. ხომ არ გგონიათ, რომ საზოგადოებაში არის ნიჰილიზმი პოლიტიკური კლასის მიმართ და როგორ აპირებთ ამ ნიჰილიზმის დამარცხებას?

_ მუშაობით. ნიჰილიზმი არის ხოლმე და ნიჰილიზმის ერთ-ერთი მთავარი მიზეზი არის ხოლმე სიღარიბე, დაპირებების შეუსრულებლობა და კავშირის გაწყვეტა ხელისუფლებასა და ოპოზიციას შორის. იმ პირობებში, როცა ოპოზიცია არ მონაწილეობს მართვაში, ეს ნიჰილიზმი ასევე ვრცელდება ხოლმე ოპოზიციაზეც. ოღონდ, ამისდა მიუხედავად ჩვენ ვნახეთ, რომ ეს არჩევნები მაინც არ ხასიათდება ხოლმე დაბალი აქტივობით. ასე იყო 2012-შიც და 2016-შიც. ნიჰილიზმი არის საზოგადოებაში, მაგრამ არჩევნებზე მოსვლაში ეს საკმაოდ მაღალ მოსვლაში ითარგმნება ხოლმე. აქედან გამომდინარე არ მგონია, რომ ეს შეიძლება იყოს ყველაზე დიდი გადაულახავი გამოწვევა, თუმცა რასაც ვხედავ ხოლმე არის ის, რომ ხელისუფლება განგებ ცდილობს, დათესოს ეს ნიჰილიზმი. ხშირად ამაში ეხმარება მათ ზოგიერთი სხვა პოლიტიკური ძალა, როდესაც ამბობენ, რომ არჩევნებს აზრი არ აქვს და მაინც გაყალბდება და ა. შ. მაგრამ, მე მაინც მგონია, რომ ეს ნიჰილიზმი დაძლეული იქნება ამ წელს.

_ გაგვიმხილეთ საიდუმლო, როგორ ხდება ის, რომ დავით ბაქრაძე ინარჩუნებს ბოლო რამდენიმე კვლევაში ლიდერობას?

_ არ ვიცი, ეს დათოს უნდა ჰკითხოთ, მაგრამ მე ის ახსნა მაქვს, რომ დათო არის გაწონასწორებული ლიდერი, რომელიც ყოველთვის პრინციპულ პოზიციაზე დგას ხოლმე და ეს წლების განმავლობაში გრძელდება. დათო პოლიტიკურ სივრცეშიც დიდი ხანია არის და ეს ერთობლიობა განაპირობებს მის პოპულარობას. ასევე ხელს უწყობს ამას ის თემები, რომლითაც ის აქტიურობს ხოლმე. იქნება ეს სოციალური თემები თუ სხვა.

_ მათ შორის ერთ-ერთი მიზეზი ისიც არის, რომ საზოგადოებაში აგრესიას არ იწვევს?

_ კი. მისი გაწონასწორებულობა არის ერთ-ერთი ფაქტორი. ამიტომ არ მიკვირს ხოლმე, როდესაც მაღალი რეიტინგი აქვს, მაგრამ ცოტა გასაკვირია, როდესაც ამდენი ხანი ინარჩუნებს. შეიძლება იყოს რამდენჯერმე, მაგრამ როდესაც ამდენი ხანია, ცოტა გასაკვირია.

_ მათ შორის მაშინაც ჰქონდა საკმაოდ მაღალი რეიტინგი კვლევებში, როდესაც „ოცნება“ იყო პიკში.

_ დიახ, სწორედ ამ თვისებების გამო.

_ ე. წ. შავ სიებზეც უნდა გკითხოთ, რომელსაც შემდეგ შეუცვალეთ სახელი.

_ ჩვენ არც არასდროს დაგვირქმევია „შავი სიები“. მედიამ „მონათლა“ ასე, რაც გასაგებიც არის, ასეთი შთაბეჭდილება დატოვა. მაგრამ, დაასრულეთ კითხვა და მერე გიპასუხებთ.

_ პრინციპზე მაინტერესებს თქვენი მოსაზრება. რამდენად ეთანხმებით თქვენ იმას, როცა სიები უნდა გაკეთდეს პარტიების მხრიდან, მაშინ როდესაც ეს სამართალდამცავი ორგანოების საქმეა, რომელმაც უნდა გადაწყვიტოს ის, ვინ არის დამნაშავე და ვინ მართალი…

_ როცა სამართალდამცველები ამას არ აკეთებენ?

_ ამბობთ, რომ ხელისუფლება უნდა შეცვალოთ. როცა შეცვლით ხელისუფლებას, მაშინაც ვერ გააკეთებენ სამართალდამცავი ორგანოები? თქვენ როგორ უყურებთ ამ საკითხს, ხომ არ არის ეს ოპონენტებისა თუ სამართალდამცველების წინააღმდეგ არაპოლიტიკური ფორმებით ბრძოლა და ანგარიშსწორება?

_ არა. ზუსტად, რომ პოლიტიკური მეთოდებია. მოდით, ჯერ არსს ავხსნი, რა სიაა. საუბარია ადამიანებზე, რომელთა უკანონო ქმედებები ეჭვს არ იწვევს, რომელიც ასახულია კამერებზე. არსებობს საკმარისი სამხილები დასკვნის გასაკეთებლად, რომ მათ უკანონო ქმედებები ჩაიდინეს. ადამიანები, რომლებიც ჩვენი ღრმა რწმენით რეჟიმს ემსახურებიან. რა თქმა უნდა მთავარი დამნაშავე უკანონო დავალებების მიმცემები არიან, მაგრამ არ უნდა დამკვიდრდეს განცდა, რომ ნებისმიერი უკანონო დავალებების შესრულება „მოსულა“ და შენ ამის გამო არანაირ ფასს არ გადაიხდი. ჩვენ „შავ სიას“ იმიტომ არ ვუწოდებთ, რომელში შესული ადამიანებიც ან უნდა დაისაჯონ, ან ის, რომ წინასწარ ვადეკლარირებთ, რომ ესენი არიან დამნაშავეები. არა, ეს არის იმ ადამიანებისგან შემდგარი სია, რომელზეც შევეცდებით, რომ ჩვენ პარტნიორებთან მივაღწიოთ იმას, რომ მათ შეექმნათ დისკომფორტი თავიანთი უკანონო საქმიანობის გამო. მაგალითად, ვერ წავიდნენ უცხოეთში სამოგზაუროდ და ა. შ.

_ ეს მიღწევადი გგონიათ?

_ კი. მაგალითად ის ადამიანები, რომლებიც სოციალურ ქსელებში ავრცელებენ ანტიდასავლურ და ანტისახელმწიფოებრივ საქმიანობას, მარტო იმ მიზნით, რომ სახელისუფლებო მესიჯ-ბოქსი დააკმაყოფილონ და ხელისუფლებას დაეხმარონ, ამ ადამიანებს ჩემი აზრით რაღაცა ფასი უნდა გადავახდევინოთ. ამ შემთხვევაში „პანდას“ ვგულისხმობ. ეს არის აღმოჩენილი იგივე Facebook-ის მიერ. თუ რომელიმე პარტნიორი იტყვის, რომ არ შეუშვებენ მათ ქვეყანაში, ჩემი აზრით ეს იქნება საკმაოდ მისაღები ფასი, რომ ხვალ სხვამ მსგავსი რამე არ გაიმეოროს.

_ ეს პირიქით ხომ არ გაზარალებთ? იმიტომ, რომ საზოგადოებაში გაჩნდა განცდა, რომ ესენი მოდიან შურისძიებისა და პოლიტიკური ანგარიშსწორებისთვის.

_ არა, ეგ იყო ხელისუფლების კონტრპროპაგანდა.

_ თუნდაც ხელისუფლების კონტრპროპაგანდა და ბუნებრივია გამოიყენებს.

_ იყენებს მიზანმიმართულად და მისი სამთავრობო არხები, სააგენტოები და ა. შ. ავრცელებენ ამას. იმიტომ, რომ ხელისუფლებამ ამით სცადა ჩვენთვის შემოებრუნებინა და ჩვენთვის მოეწებებინა იარლიყი, რომ ესენი მოდიან შურისძიების მიზნით. ირონიული ამბავია ის, რომ ამ ხელისუფლებამ დააპატიმრა ოპონენტები და ჯერ კიდევ დევნის პოლიტიკურად „ეფექტიანობით. იგივე „ლელოს“ საქმე რომ ნახოთ, ორ დღეში ერთხელ პროცესები აქვთ. გიგა ბოკერიას საქმე 6 წლის შემდეგ გააღვიძეს. გიგი უგულავას საქმეები დააჩქარეს. ანუ პოლიტიკური შურისძიებით დაკავებულები თვითონ არიან, ოღონდ ცდილობენ ჩვენ შემოგვიბრუნონ.

ამ მიმართულებით არაფერს არ ვაპირებთ. ამაზე ფართე დისკუსიაც გვქონდა შარშან. ევროპული საქართველოს მიერ იყო დაწყებული, სადაც ვთქვით, რომ ჩვენი ამოცანა არ არის პოლიტიკური შურისძიება და პოლიტიკურ ამინისტიაზეც კი შეიძლება იყოს საუბარი, იმიტომ რომ ქვეყანა უნდა წავიდეს წინ. ის პროკურორი, რომელიც პოლიტიკურად მოტივირებული საქმეების წამოწევით არის ცნობილი, როგორც ჩანს უნდა დააბრუნონ უკან მეორე ვადით. მხედველობაში მყავს ირაკლი შოთაძე. ასეთი ტიპის ხელწერა აქვს ივანიშვილს.

_ თუმცა აქვს ხოლმე ასეთი ტიპის პროპაგანდას შედეგი. ყოველ შემთხვევაში წინა არჩევნების შემთხვევაში ჰქონდა.

_ კი, იმუშავა. უბრალოდ, მგონია, რომ რაც უფრო შორს მივდივართ, უფრო ნაკლები ეფექტიანობა აქვს მათ პროპაგანდას და უფრო მეტი ადამიანი მიდის „ოცნების“ წინააღმდეგ.

_ საზოგადოებასთან არ აპირებთ მუშაობას იმ თვალსაზრისით, რომ არ აპირებთ პოლიტიკურ შურისძიებას და აუხსნათ ეს ხალხს?

_ კი. დავიწყეთ კიდეც, რაც ზემოთაც ვახსენე. წინასაარჩევნოდ ამას კიდევ დავუბრუნდებით. სხვა რამეა აქ პრობლემა. რაც უფრო რადიკალიზაციას ახდენს ხელისუფლება პროცესების და რაც უფრო თვითონ ეწევა ოპონენტების დევნას, მით უფრო არადამაჯერებელია ოპოზიციის მხრიდან საუბარი იმაზე, რომ შურისძიება არ იქნება. ანუ, როცა აქეთ გიტევენ და გაპატიმრებენ. გიგი უგულავას თავს დაესხნენ და მას აქეთ წაუყენეს ბრალი. ამას ხომ ხედავს ყველა, რომ შავზე თეთრს ამტკიცებენ. როცა ამის მერე მაგალითად უგულავა ამბობს, რომ შურისძიება არ იქნება, დამაჯერებლობა აკლდება მის ამ გამოსვლას. თუმცა ამაზე დისკუსია ნებისმიერ შემთხვევაში გვექნება.

_ შოთაძის თემა ახსენეთ. რა შთაბეჭდილება გრჩებათ, რატომ აბრუნებენ? არა მარტო შოთაძეს, მანამ ვნახეთ განათლების მინისტრი.

_ ორი მიზეზი აქვს ამას. პირველი მიზეზია ის, რომ რეალური ერთგული ადამიანები დარჩათ მხოლოდ თითზე ჩამოსათვლელი და არავინ მათ მიღმა. ამ რაღაც წრეში ტრიალებენ. ანუ, ბევრი კანდიდატურა და ალტერნატივა არც აქვთ. ზუსტად იგივეა შოთაძეზეც და ამ შემთხვევაში ჩხენკელზეც. ჩხენკელი უბრალოდ გამორჩეულად ამაზრზენია, რომელიც გამოხატავს მისი პირფერობის აღმატებულ ხარისხს. მეორე არგუმენტია ის, რომ ალბათ შოთაძე სჭირდებათ წინასაარჩევნოდ ამ პოლიტიკური საქმეების ბოლომდე მისაყვანად. შოთაძე მაგით არის გამორჩეული, რომ ნებისმიერ დავალებას ოპონენტების წინააღმდეგ ასრულებდა თვალის დახამხამების გარეშე. როგორც ჩანს აპირებს ივანიშვილი, რომ ეს წინასაარჩევნო პერიოდი გადააგოროს და ამ დროს შოთაძეზე კარგ კადრს ვერ იპოვის.

_ ამით აიხსენება ხელისუფლების წარმომადგენლების განცხადებები და შოთაძის ქება-დიდება?

_ ეს ხომ ასე ხდება ხოლმე, რომ წინასწარ იღებენ გადაწყვეტილებას და მერე პარლამენტში აფორმებენ. ასე იყო მოსამართლეებთან დაკავშირებითაც. ეუთო/ოდირის დასკვნის მთავარი არსი ეგ იყო, რომ წინასწარ შეარჩიეს მოსამართლეები, პოლიტიკური გადაწყვეტილება მიიღეს და მერე დანარჩენი ფარსი იყო. დანარჩენი ფარსი იქნება გენერალური პროკურორის არჩევის საკითხიც.

_ რა პოლიტიკისაც ვხედავთ. ვახსენეთ ჩინოვნიკების დაბრუნებები, დაპირება პროპორციულზე გადასვლასთან დაკავშირებით, რომელზეც ასევე „გადაგვაგდეს“. ამ ფონზე, ქუცნაშვილის დაბრუნებაც ხომ არ არის მოსალოდნელი?

_ არც ქუცნაშვილის დაბრუნებას არ გამოვრიცხავ. უბრალოდ, ქუცნაშვილი ამ კლოუნების იერარქიაში მაღალ დონეზე არ არის და მნიშვნელოვანი არ არის, მაგრამ კი, ყველაფერი შესაძლებელია. ივანიშვილი აკეთებს იმას, როგორც საჭიროდ თვლის. ძალის პროექცირებას თუ გამოსხივების ჩვენებას, იმის მიხედვით იქცევა. შოთაძის დაბრუნებაც და გახარიას დაწინაურებაც მისი მხრიდან ძალის ჩვენებაა, რომ მე რაც მინდა იმას ვაკეთებო, ქუცნაშვილიც რომ დააბრუნოს, საერთოდ არ გამიკვირდება.

_ „ოცნების“ ლიდერებიდან თუ არის ვინმე ისეთი, ვისზეც მიიჩნევთ, რომ კარგად მუშაობს და მასთან ითანამშრომლებდით?

_ მას შემდეგ რაც „ოცნებამ“ ეს წითელი ხაზი გადალახა, განსაკუთრებით მაშინ, როდესაც საქმე ეხებოდა პარლამენტში განვითარებულ პროცესებს, ასეთი ადამიანი აღარ დარჩა მათ გვერდით.  დარჩნენ მხოლოდ ისეთი ადამიანები, რომლებიც ყველა დავალებას ასრულებენ უსიტყვოდ. არ ფიქრობენ ქვეყნის მომავალზე, ფიქრობენ მარტო საკუთარ მომავალზე და ბიძინას მომავალზე და რომლისთვისაც საქმის კეთებაზე უფრო მნიშვნელოვანი არის ან ფულის კეთება, ან საკუთარი ტყავის გადარჩენა.

ამიტომ, ამ ადამიანების გამოხშირვა, რომელი უფრო ეფექტიანია რაღაც კონკრეტულ საქმეებთან დაკავშირებით, ეს მე არასწორი მგონია. ასეთი ადამიანები პრაქტიკულად აღარ ჰყავს გვერდზე ბიძინა ივანიშვილს.

_ ბაქრაძის მსგავსად კახა კალაძესაც მაღალი რეიტინგი აქვს. როგორია ამის თქვენეული ახსნა?

_ მარტივი ასახსნელია. კალაძე ბიუჯეტიდან ბევრ ფულს ხარჯავს ისეთ რაღაცებზე, რაც ჩანს. მიუხედავად იმისა, რომ ხშირად არაეფექტურია, ხშირად ფული იფლანგება და უხარისხოდ სრულდება სამუშაოები, მაგრამ ჯამში რა რესურსსაც ხარჯავს და შემდეგ ამას თვითონ მიიწერს, იმიტომ, რომ ის არის ქალაქის მერი, ეს რეიტინგი ახსნადია ამით. გასაგებია, რომ ქუჩის რეაბილიტაციას რომ აკეთებს და ერთი წელი ვერ ასრულებს, ეს ნეგატივია, მაგრამ როდესაც სრულდება, გარკვეულ პოზიტივს იწერს.

_ ანუ დედაქალაქის მერს პოპულარობის მეტი შესაძლებლობა აქვს?

_ უფრო მეტი რესურსი აქვს და იმის შესაძლებლობა, რომ კონკრეტული საქმე თვითონ მიიწეროს. გასაკვირი ის არის, რომ ამის მიუხედავად მისი რეიტინგი მაღალი მაინც არ არის. სხვებზე მაღალი არის, მაგრამ მაღალი მაინც არ არის.

_ კალაძესთან მიმართებით პროცესების როგორი განვითარების მოლოდინი გაქვთ? წავა ივანიშვილი მის დაჭერაზე?

_ აზრზე არ ვარ და არ მგონია მაგ თემაზე სპეკულირება სწორად. ვნახავთ ყველაფერს. ივანიშვილის თავში რა გადატრიალდება და თავის რომელ თანაგუნდელს დაიჭერს თუ დააწინაურებს, იცის მხოლოდ ივანიშვილმა.

_ თქვენთვის თუ არის ცნობილი ის განცხადება, რაც ელისაშვილმა გააკეთა, რომ ოპოზიციას შემოუთვალა, რომ ჩაერთვება ივანიშვილის წინააღმდეგ ბრძოლაში?

_ კი, ცნობილია. უბრალოდ დეტალები არ ვიცი. მედიიდან მაქვს ეს ინფორმაცია.

_ მედიიდან იცით? პოლიტიკოსებისგან არ მიგიღიათ ინფორმაცია?

_ არა.

_ კრიტიკული დასკვნები ხშირად არის საერთაშორისო თანამეგობრობის მხრიდან, მაგრამ ვხედავთ, რომ ხელისუფლება რეალურად არაფერს არ ითვალისწინებს. ამ ფონზე რაში ხედავთ გამოსავალს, როგორ შეიძლება საზოგადოებამ დაათმობინოს ხელისუფლებას?

_ მარტო არჩევნებით. ეს ხელისუფლება გაცდა უკვე იმ წერტილს, როდესაც შეგონებით, თხოვნით, ზეწოლით ან გავლენით რაიმეს შეცვლის. მორჩა ეგ ამბავი. დარჩა რამდენიმე თვე არჩევნებამდე, არჩევნებით უნდა შევცვალოთ და მერე შევცვალოთ სხვა რაღაცები. სხვა გამოსავალი აქ აღარ არის. კრიტიკა, რომელიც მოდის ხელისუფლების მისამართით და თუ გვინდა, რომ ეს არ ისმოდეს, ამისთვის საჭიროა რომ გამოვცვალოთ ხელისუფლება.

_ როდესაც ოპოზიციაზე ვსაუბრობთ, კითხვებს აჩენს ნინო ბურჯანაძესთან თანამშრომლობა, რაზეც მუდმივად წითელი ხაზი გქონდათ „ევროპულ საქართველოს“ გავლებული მისი პრორუსული პოლიტიკის გამო, მაგრამ გარკვეული თანამშრომლობა შედგა. რით აიხსნება ეს? ეს იყო უკიდურესი აუცილებლობა  შექმნილი რეალობიდან გამომდინარე თუ მის ელექტორატზეც დაიწყეთ მუშაობა?

_ წითელი ხაზი მასთან ისევ გვაქვს. მაგრამ თქვენი კითხვაში თავიდან ბოლომდე არასწორი დეფინიციაა. ჩვენ არ გვაქვს თანამშრომლობა ბურჯანაძესთან, ჩვენ გვაქვს თანამშრომლობა ყველა პარტიასთან მხოლოდ საარჩევნო სისტემის რეფორმირების ირგვლივ. სხვა არაფერზე არ არის თანამშრომლობა, არცერთ შინაარსობრივ და თემატურ საკითხზე. აქედან გამომდინარე თქვენი კითხვის მეორე ნაწილი – დავიწყეთ თუ არა მის ელექტორატზე მუშაობა აზრს კარგავს.

ის პოლიტიკური ძალები, რომლებიც ვიკრიბებით „ლეიბორისტების“ ოფისში, გაერთიანებული ვართ ერთადერთი მოსაზრების გამო, რომ გვქონდეს სამართლიანი პროპორციული არჩევნები. იმის იქით ჩვენს შორის თანამშრომლობა არ არის – შინაარსობრივ საკითხებზე, იდეოლოგიურ საკითხებზე, ეკონომიკურ საკითხებზე საუბარი არ ყოფილა, განსაკუთრებით კი საგარეო პოლიტიკურ საკითხებზე თანამშრომლობა არც ყოფილა და არც გვექნება.

_ ერთ-ერთმა პარტიამ დატოვა თქვენი მოლაპარაკებები, რომლისთვისაც მიუღებელი იყო ბურჯანაძესთან ერთად ჯდომა?

_ ვინ?

_ თაკო ჩარკვიანმა.

_ არა, ისევ მონაწილეობს თაკო ჩარკვიანი ამ მოლაპარაკებებში.

_ საჯაროდ ასე ამბობს. მის მიღმა რა ხდება, არ ვიცი.

_ ფაქტია, რომ მონაწილეობს.

_ დადის იმ შეხვედრებზე?

_ კი, მე როცა ვიყავი… იქ არის ხოლმე ის ან მისი პარტიის წარმომადგენელი.

ბურჯანაძის საგარეო პოლიტიკურ თემებზე მიუღებლობა ალბათ ყველაზე მეტად ჩვენ გვაქვს. ვიმეორებ, ეს იმას არ ნიშნავს, რომ ჩვენ ერთად არ ვიქნებით პროპორციული არჩევნების მოთხოვნის საქმეში. პროპორციული არჩევნების არსი და პეწი სწორედ ეგ არის, რომ მერე მოსახლეობამ უნდა გადაწყვიტოს, მერე ვინ შევა და რა რაოდენობით პარლამენტში. ვიცით, რომ არის საქართველოში პრორუსულად განწყობილი მოსახლეობაც და მას თუ უნდა, რომ ბურჯანაძე აირჩიოს, ამის უფლება მათ უნდა ჰქონდეთ. პრორუსულობა დანაშაული კი არ არის საქართველოში, უბრალოდ ჩვენთვის არის კატეგორიულად მიუღებელი. ვინც იტყვის, რომ დანაშაულია, ის ჩვეულებრივ ფაშისტურ აზრს ავითარებს. ამიტომ, შეუძლია იყოს პარლამენტში. უბრალოდ ჩვენთან ვერ ითანამშრომლებს და ჩვენ არ შევალთ მასთან თანამშრომლობაში.

_ სხვა საკითხებზე თანამშრომლობას გამორიცხავთ?

_ რა თქმა უნდა. შინაარსობრივ საკითხებზე მასთან თანამშრომლობა არ გვექნება.

_ თუ დადგა რეალობა, რომ ბურჯანაძე გჭირდებათ კოალიციის შესაქმნელად, ამ შემთხვევაში რას იზამთ?

_ ჩემ აზრს გეუბნებით, საგარეო პოლიტიკურ თემაზე ბურჯანაძეს გავლენა არ ექნება, კიდეც რომ შევქმნათ კოალიცია. ოღონდ მე გამოვრიცხავ, რომ ეგეთი ვარიანტი დადგეს. იმიტომ რომ ბურჯანაძეს ძალიან მცირე მხარდაჭერა აქვს. დიდი ალბათობით მომავალ კოალიციურ ერთობაში მისი ადგილი არ იქნება, იქიდან გამომდინარე, რომ ჩვენი ამოცანაა, რომ პროდასავლურ ძალებს შორის შეიკრას კოალიცია.

_ პოტენციურ შესაძლებლობებზე გეკითხებით.

_ პოტენციურად ბურჯანაძე პარლამენტში ალბათ მოხვდება ერთი ან ორი ადამიანით, მაგრამ თუ ის გადაწყვეტს, რომ კოალიციას შემოერთდეს, ამის შესაძლებლობა ალბათ ექნება, რადგან ამას ერთი ან ორი პარტია ვერ გადაწყვეტს. მაგრამ, მას არანაირი გავლენა არ ექნება საგარეო პოლიტიკაზე. ეს არის ცალსახა წითელი ხაზი ჩვენთვის და ამ წითელ ხაზს არ გადავუხვევთ. რაც არ უნდა პროპაგანდა მძვინვარებდეს ხელისუფლების მხრიდან, რომ ნახეთ „ევროპული საქართველო“ პრორუსულ ძალებთან გაერთიანდა. ეს არის უბრალოდ ტყუილი, მაგრამ ვიცით, რომ ეს ხელისუფლებისთვის ჩვეულებრივი ხელწერაა. სოციალურ ქსელებში მთელი მაგათი საქმიანობა ტროლებისა და ბოტების მეშვეობით მაგაზეა ორიენტირებული.

_ კიდევ ჰყავთ ტროლები და ბოტები?

_ რა თქმა უნდა. ტროლების თავიდან შექმნა საერთოდ არ არის რთული და როგორც ჩანს, ისევ განაახლეს. ყოველდღიურად ხდება მათი ახლიდან აღმოჩენა.

_ ოპოზიციას არ ჰყავს ტროლები და ბოტები?

_ ევროპულ საქართველოს ნამდვილად არ ჰყავს. სხვა ოპოზიციურ ძალებს თუ ჰყავთ, არ ვიცი. მაგრამ, კიდეც რომ ჰყავდეთ, მასშტაბი იქნება დაახლოებით ისეთი, როგორც ფინანსურ კონტრიბუციებშია ხოლმე, როდესაც 99% ქართულ ოცნებას აქვს და 1% ყველა ოპოზიციურ პარტიას.

_ სააკაშვილის განცხადებებზეც უნდა გკითხოთ. პირადად თქვენთვის რამდენად მისაღებია ეს და რამდენად თანხვედრაშია თქვენთან? ხომ არ ფიქრობთ, რომ მისი რიგი პოლიტიკური გამონათქვამები აზარალებს ოპოზიციას?

_ დიახ, ხშირად არ არის ჩვენთან თანხვედრაში სააკაშვილის განცხადებები. სააკაშვილი არის პოლიტიკური ლიდერი, რომელიც არ არის საქართველოში, თავისი პოლიტიკური ძალა ჰყავს. მისი პოლიტიკური განცხადებები თუ ვინმეს აზარალებს, პირველ რიგში მის პოლიტიკურ ძალას აზარალებს. მე ხშირად არ მომწონს ხოლმე.

_ ანუ თქვენთან ხშირად თანხვედრაში არ არის?

_ ძალიან ხშირად. ოპოზიციურ სპექტრში ვთანამშრომლობთ იმ იდეის ირგვლივ, რასაც ჰქვია პროპორციულ არჩევნებზე ხელისუფლებაზე მიწოლა და ამაზე მიღწევა. ამ საკითხში ერთნაირი პოზიციები გვაქვს.  სხვა საკითხებზე ბევრ რამეზე გვაქვს ფუნდამენტური განსხვავება სააკაშვილთანაც და მის პარტიასთანაც, ასევე იმ პოლიტიკურ ძალებთან, რომლებიც იმ ერთობაში არიან.

_ თვითონ ვერ ხვდება სააკაშვილი რომ პროცესს აზიანებს?

_ მაგ კითხვაზე მე არ მაქვს პასუხი. რას ხვდება და რას ვერა, მე რა ვიცი. ეგ უნდა ჰკითხოთ მას.

_ ოპოზიციის წარმომადგენლებს არ გქონიათ მასთან ამაზე საუბარი და რომ ბიძინა ივანიშვილის წისქვილზე ასხამს წყალს?

_ ბევრი მისი შეფასება გამოიყენება ხოლმე ხელისუფლების მიერ, ხშირად არალეგიტიმურად, მაგრამ იმისთვის, რომ დააზარალოს ოპოზიციის მოსაზრებები. ხელისუფლება ამას ხშირად აკეთებს ხოლმე. ბოლო განცხადება რაც ვნახეთ, რომ სააკაშვილის განცხადება 20 ივნისთან დაკავშირებით გამოძიების ქვეშ უნდა მოექცეს და ა. შ. ეს არის აბსურდი და საზოგადოებისთვის თვალებში ნაცრის შეყრა. ის განცხადება, რაც მაშინ სააკაშვილმა გააკეთა, რომ ახლოს იყო ივანიშვილის რეჟიმი დასამხობად, ამის გამოყენება იმ თვალსაზრისით, რომ სახელმწიფო გადატრიალება იგეგმებოდა, აბსურდია.

_ ეს მეორე საკითხია, რას უპირისპირებს ხელისუფლება, მაგრამ ფაქტი ხომ არის, რომ პოლიტიკურად გაუმართლებელია ზოგჯერ?

_ ზოგჯერ კი არა, ხშირად. მაგას ჩვენ ვამბობთ ხოლმე. უბრალოდ, ეგ არის მისი გადასაწყვეტი. ჩვენ სააკაშვილს ვერც შევცვლით და არც ვაპირებთ სააკაშვილის შეცვლას. ჩვენი ამოცანაა, რომ ჩვენი დღის წესრიგი გავიტანოთ და კოალიციურ მმართველობაში ჩვენი დღის წესრიგი იყოს წამყვანი.

_ მაგრამ როგორ, მაშინ როცა სააკაშვილის პარტია არის ლიდერი ოპოზიციურ პარტიებს შორის?

_ პირველი ამოცანაა, რომ ივანიშვილის რეჟიმი დავამარცხოთ და გვაქვს იმედი, რომ იმ კოალიციაში ჩვენი ხედვა იქნება უფრო წონიანი და ჩვენი ხედვა უფრო განხორციელდება.

_ ანაკლიასთან დაკავშირებით გავიდა გარკვეული დრო და გარკვეული ანალიზი შესაძლებელია. როგორ ფიქრობთ, ეს იყო კონსორციუმის მიერ დაშვებული შეცდომების შედეგი, ანუ ვალდებულებები არ შეასრულა, უბრალოდ ოპონენტი ჩამოიშორა ხელისუფლებამ ხაზარაძის სახით თუ რუსეთის დავალება შეასრულა?

_ ეს იყო რუსეთის ინტერესების წინააღმდეგ არწასვლა ივანიშვილის მხრიდან. ეს იყო პირველი და მთავარი მიზეზი. ამის თანმდევი იყო პოტენციური პოლიტიკური ოპონენტების მოშორება, ანუ ხაზარაძის და ჯაფარიძის. რაც შეეხება კონსორციუმის ვალდებულებების შესრულება-არშეასრულებას, არანაირი კავშირი მაგას არ აქვს ანაკლიის პორტის გაჩერებასთან.

_ სამომავლოდ ითანამშრომლებთ ხაზარაძის გუნდთან?

_ მე პირადად მგონია, რომ ხაზარაძის გუნდთან თანამშრომლობა შესაძლებელია ივანიშვილის დამარცხების შემდეგ.

_ ბოლოს უახლეს ამბავზეც მითხარით თქვენი აზრი. ამერიკის ახალმა ელჩმა დადო ფიცი და როგორ აფასებთ ამ ამბავს?

_ ჩემი აზრით კარგია, რომ აშშ-მა ელჩის გამოგზავნა დააჩქარა საქართველოში. ალბათ უფრო ბოლო მოვლენების გამო. ის უნდა ჩამოსულიყო აპრილისთვის და ჩამოვა რამდენიმე თვით ადრე. ეს გასაგებიც არის. იმიტომ, რომ საქართველოში მიმდინარე მოვლენები ამერიკისთვის არ დარჩენილა ყურადღების მიღმა. ზოგადად ამერიკის ყოფნა და ჩვენთან დემოკრატიის პრობლემებზე მეტი ყურადღება ჯამში შეიძლება იყოს მნიშვნელოვანი ჩვენი მიზნების მიღწევის კონტექსტში. ანუ პროპორციული არჩევნების და ზოგადად არჩევნების დემოკრატიულად და სამართლიანად ჩატარების კონტექსტში. ამიტომ მე ამას მხოლოდ მივესალმები და იმედი მაქვს, რომ მალე ჩამოვა და შეუდგება საქმიანობას.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად