ბრიუს გელინი: პანდემიის შეკავების მთავარი პრინციპი მასობრივი ვაქცინაციაა

როგორ მუშაობს ინფორმაციული რნმ-ის ვაქცინა, რომელსაც ვაქცინოლოგიის ახალ ეპოქას უწოდებენ, როგორ უნდა უზრუნველყოს სახელმწიფომ მასობრივი იმუნიზაცია, რამდენად მნიშვნელოვანია უნივერსალური ვაქცინის შექმნა პანდემიების შესაჩერებლად და რას მოიაზრებს ფრაზა „ვირუსთან თანაცხოვრება“, – ამ ძირითად საკითხებზე საუბრობს ამერიკული ინსტიტუტის, Sabin Vaccine Institute-ის გლობალური იმუნიზაციის პრეზიდენტი ბრიუს გელინი, რომელთანაც ექსკლუზიური ინტერვიუ პირველი არხის ანალიტიკურმა საკვირაო გადაცემა „ახალმა კვირამ“ ჩაწერა.

პროფესიით ეპიდემიოლოგი ბრიუს გელინი მუშაობდა ჯანდაცვის მსოფლიო ორგანიზაციაში, აშშ-ის სახელმწიფო ვაქცინების პროგრამის ოფისში, აშშ-ის დაავადებათა კონტროლისა და პრევენციის ცენტრში. 2017 წლიდან ბრიუს გელინი მსოფლიოს ერთ-ერთ წამყვან ინსტიტუტს, Sabin Vaccine Institute-ს ხელმძღვანელობს. ეს ინსტიტუტი ვაშინგტონში 1993 წელს ჰელოისა საბინმა დააარსა. ჰელოისა საბინი ალბერტ საბინის მეუღლეა, – მეცნიერის, რომელმაც თავის დროზე პოლიომიელიტის ვაქცინა შექმნა.

ვიცით, რომ ჯოგური იმუნიტეტი პანდემიის დასრულების ერთგვარი გასაღებია. რამდენად სწრაფად მოახერხებს მსოფლიო მოსახლეობა ჯოგური იმუნიტეტის გამომუშავებას კორონავირუსის წინააღმდეგ? რეალურად, რამდენად ახლოსაა პანდემიის დასასრული?  

ჯოგური იმუნიტეტის გამომუშავება დამოკიდებულია იმუნიზებული მოქალაქეების რაოდენობაზე, რადგან თუ საზოგადოებაში არსებობს აუცრელი ადამიანების ერთგვარი კუნძული, ვირუსი მათ მიაგნებს და დაიწყება გავრცელება. კლასიკურ მაგალითად მოვიყვან ინფექციურ ვირუსულ დაავადება წითელას. ვიცით, რომ მსოფლიოს არაერთ ქვეყანაში წითელას ეპიდაფეთქებას მრავალი წელია, ადგილი აღარ ჰქონია, ამიტომაც არის ასეთი მნიშვნელოვანი ჯოგური იმუნიტეტის მისაღწევად იმუნიზაციის ფართოდ დანერგვა. ჩვენ გვაქვს წითელას მართლაც შესანიშნავი მაგალითი, როცა ვირუსი არსებობს, არსად გამქრალა, მაგრამ პანდემიას ვეღარ იწვევს. სწორედ ეს გახლავთ ერთგვარი თანაცხოვრება ვირუსთან. ერთი სიტყვით, რაც უფრო მეტი ადამიანია აცრილი კონკრეტულ ქალაქში, ქვეყანაში თუ მთელ მსოფლიოში, ვირუსი მით უფრო ცოტა ადამიანს აინფიცირებს. სწორედ ამას ეფუძნება პანდემიის შეკავების მთავარი პრინციპი.

დღეს „კოვიდ-19“-ის წინააღმდეგ დაწყებული ვაქცინაციის პროგრამის მთავარი მიზანია იმუნიტეტის გამომუშავება იმ ადამიანებში, ვისაც ვირუსი ჯერ არ გადაუტანია. სამწუხაროდ, ვხედავთ, რომ მათ ნაწილს, ვინც ეს ვირუსი უკვე გადაიტანა, დარჩა გართულებები, ვაქცინაცია კი იმუნიტეტს თანმდევი გართულებების გარეშე გამოგვიმუშავებს. ის, რისი თქმაც რთულია, გახლავთ დრო, კერძოდ მსოფლიო მოსახლეობის იმუნიზაციის დასრულების კონკრეტული თარიღი. ეს ფაქტორი კონკრეტულ ქვეყნებზეცაა დამოკიდებული, თუ რამდენად ორგანიზებულად მოახერხებს სახელმწიფო საკუთარი მოსახლეობის მასობრივ იმუნიზაციას. თუ სხვადასხვა ქვეყნის მონაცემებს გადავხედავთ, სადაც კორონავირუსის წინააღმდეგ ვაქცინაცია უკვე დაიწყო, ამ ეტაპზე ყველაზე წარმატებული მაგალითი ისრაელია, სადაც მოსახლეობის 15 პროცენტი უკვე აიცრა.

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად