სოფო ხორგუანი: აშკარაა, რომ დეპუტატებში კომპეტენციისა და პასუხისმგებლობის ნაკლებობაა (ინტერვიუ)

პოლიტიკოსი და უფლებადამცველი სოფო ხორგუანი მიიჩნევს, რომ პრეზიდენტ სალომე ზურაბიშვილის განმარტება დამაჯერებელი იყო ირაკლი ოქრუაშვილისა და გიგი უგულავას შეწყალებასთან დაკავშირებით.

პოლიტიკოსი „აიპრესთან“ ინტერვიუში ამბობს, რომ არაფერია სკანდალური იმაში, რომ მან გადაწყვეტილება ხელისუფლებას არ შეუთანხმა და არც იმაში, რომ ამ გადაწყვეტილების შესახებ აცნობა ბიძინა ივანიშვილს, გიორგი გახარიასა და არჩილ თალაკვაძეს. მისთვის უცნობია, რატომ არ აცნობა აღნიშნული გადაწყვეტილება თალაკვაძემ სხვა დეპუტატებს. ხორგუანს კითხვები აქვს ირაკლი კობახიძესა და სხვა დეპუტატებთან. მისი თქმით, ამ თემის გამო იზრდება პრორუსული ნარატივი და ამას ხელს ოპოზიციაც უწყობს.

პრეზიდენტის შეწყალების, „ოცნებისა“ და ოპოზიციის მოლაპარაკების, დასავლეთის კრიტიკისა, მისი ყოფილი თანაგუნდელის ირაკლი ოქრუაშვილის პოლიტიკური საქმიანობის შესახებ და სხვა აქტუალური საკითხებზე ჩვენთან ინტერვიუში სოფო ხორგუანი საუბრობს:

_ „რუსთავი 2“-ისთვის მიცემულ ინტერვიუში პრეზიდენტმა კიდევ ერთხელ თქვა, რომ პატიმრების შეწყალების გადაწყვეტილება თავად მიიღო, თუმცა მან ასევე გვითხრა, რომ ინფორმირებულები იყვნენ ივანიშვილი, გახარია და თალაკვაძე. რა გითხრათ პირადად თქვენ ამ განცხადებამ? გვესმოდა პარლამენტარების მხრიდან, რომ მათ არ იცოდნენ თუ აპირებდა პრეზიდენტი შეწყალებას. გაბათილდა მათი ეს მოსაზრებები?

_ მე ასე გავიგე, რომ პრეზიდენტის გადაწყვეტილება მოულოდნელი იყო კობახიძისთვის და უმრავლესობის სხვა დეპუტატებისთვის. რატომ არ მიაწოდა თალაკვაძემ დეპუტატებს ინფორმაცია, ეს მე არ ვიცი. გამოდის, რომ არჩილ თალაკვაძე ინფორმირებული იყო. პრეზიდენტმა გვითხრა, რომ თალაკვაძე, გახარია და ივანიშვილი ინფორმირებულები იყვნენო. ანუ, მან კი არ შეუთანხმა, არამედ შეატყობინა საკუთარი გადაწყვეტილების შესახებ. თქვა ის, რა მოცემულობაც არის. პრეზიდენტმა გადაწყვეტილება მიიღო. ის, რომ მან შეატყობინა საკუთარი გადაწყვეტილება მმართველი პარტიის თავმჯდომარეს, პრემიერსა და პარლამენტის თავმჯდომარეს, ეს ჩვეულებრივი ამბავია. ამაში სკანდალური არაფერია, რომ არავის არ შეუთანხმა გადაწყვეტილება და მხოლოდ შეატყობინა.

მან გვითხრა ფაქტი, რომ თავად მიიღო გადაწყვეტილება და დაასახელა ფაქტი, რატომაც მიიღო ეს გადაწყვეტილება. მე მას ვიცნობ და ბევრი ჩემზე კარგადაც იცნობს და მას აქვს თავისი ხისტი ხასიათი და მას შეუძლია საკუთარი პოზიციები გამოხატოს ისე, როგორც ეს მას მიაჩნია მიზანშეწონილად. ამაში პრობლემას ვერ ვხედავ, რომ მან მიიღო გადაწყვეტილება. მე ამაზე ვიტყვი, რომ მშვენიერია, როდესაც პრეზიდენტი ახერხებს დამოუკიდებელი გადაწყვეტილების მიღებას. შეიძლება ეთანხმებოდეს ან არ ეთანხმებოდე პრეზიდენტის გადაწყვეტილებას, იმის მიუხედავად მმართველი გუნდის წევრი, ხარ ოპოზიციის, თუ სადაც არ უნდა იყო, მაგრამ ეს მისი უფლებაა. პრეზიდენტს სულ რამდენიმე დისკრეცია დარჩა და ერთ-ერთი არის შეწყალება.

_ თქვენ თუ ეთანხმებოდით პრეზიდენტს, რომ მას უნდა შეეწყალებინა ეს კონკრეტული პატიმრები?

_ ეს დამოკიდებულია იმაზე, როგორი კუთხით შევაფასებთ. მე შეიძლება არ ვფლობ ინფორმაციის დიდ ნაწილს. პრეზიდენტმა დაასაბუთა და ახსნა, რატომაც მიიღო ეს გადაწყვეტილება. დაძაბულობის მოხსნის მცდელობა ჰქონდა, მაგრამ როგორც ვხედავთ ამით არ დასრულებულა ეს პროცესი და ოპოზიცია რურუას გათავისუფლებასაც ითხოვს.

_ თუმცა, ფაქტია, რომ თავისი კომპეტენციის ფარგლებში გადადგა ნაბიჯები…

_ კი, გეთანხმებით. მან ახსნა თავის მხრიდან, რომ ამ პირებს არ თვლის პოლიტპატიმრებად. იმიტომ, რომ ეს დაძაბულობა არის და იმიტომ, რომ დასავლეთიდან ისმის კრიტიკა და ა. შ. თქვენ ნახეთ ალბათ, რომ პრორუსული ორიენტაციის ადამიანებმა დაიწყეს ამის გამოყენება, თითქოს ჩვენ ამერიკის კოლონია ვართ და შიდა საქმეებში ერევა დასავლეთი, პრაქტიკულად საბჭოეთს და მოსკოვს ადარებენ ვაშინგტონს, ეს რეალურად ძალიან ცუდი რამეა.

_ თქვენ ჩარევის რაიმე ნიშანი დაინახეთ?

_ არა, მე ასე არ ვფიქრობ და მიმაჩნია, რომ ეს არის უპასუხისმგებლო პოლიტიკოსების პოზიცია. გასაგებია, რომ ღიად პრორუსულები ამას გამოიყენებენ სათავისოდ, რომ ნახეთ ვაშინგტონი მოქალაქეების აზრს არ ითვალისწინებს და ა. შ. ოპოზიციის ნაწილში კი, რომლებიც ამბობენ, რომ თითქოს პროდასავლურები არიან, რეალურად კარგად გამოჩნდა, რომ მათაც არ უნდათ დასავლეთი და მათი მთავარი მიზანი არის ვაი პოლიტიკური მიზნის მიღწევა.

_ ვის გულისხმობთ?

_ იმ ძალებს, რომლებიც საკუთარ თავს პროდასავლურ ძალებს უწოდებენ.

_ ნაციონალური მოძრაობა და ევროპული საქართველო გყავთ მხედველობაში?

_ რა თქმა უნდა. თუ გრძნობენ ამას, რომ პრორუსული ძალები გამოიყენებს ამას და ჩვენ ხომ ვიცით, რომ რუსეთი ყოველთვის ეცდება გამოიყენოს ეს და არა მხოლოდ ასეთი, ყალბ ნიუსებს იგონებს და ა. შ.

ოპოზიციის მოქმედებას რაც შეეხება, ჩემთვის ისინი ახალი სახეები არ არიან და არც ახალია მათი მოქმედება. მეტი პასუხისმგებლობით რომ მოქცეულიყვნენ, გამიკვირდებოდა. ისინი ასე იქცევიან, ოღონდ თავისთვის სასარგებლო რაღაც მიიღონ და ყველაფერზე მიდიან. პრორუსულ განწყობებს აღვივებენ და პროდასავლურ გზას ეჭვქვეშ აყენებენ. ძალიან ლოგიკური იყო სალომე ზურაბიშვილის გადაწყვეტილებაც, მაგრამ აი ეს, როდესაც პარლამენტის წევრი ხარ და იძლევი დაპირებას, რომ პოლიტიკური მართლმსაჯულება არ იქნება და თან ამაში იმას გულისხმობ, რომ მართლმსაჯულებაში ერევი, ეს ყველაზე უხერხულია, რასაც ახლა ვუყურებ. მინდა მოვისმინო ირაკლი კობახიძისგან მეტი განმარტებები და მეტი ინფორმაცია მივიღო იმ მოლაპარაკებების შესახებ, რეალურად რა პირობა დადეს.

_ თქვენ არ გქონიათ კითხვები ამ კონკრეტული პოლიტიკოსების დაჭერასთან დაკავშირებით? შერჩევითი სამართლის ნიშნები ვერ დაინახეთ?

_ ვიცოდი, რომ ამ კითხვას დამისვამდით. მე ეს საქმეები არ შემისწავლია და კონკრეტულ სისხლის სამართლის საქმეებზე მე ვერ ვილაპარაკებ. მე ვერ ვილაპარაკებ, სწორად წარიმართა ეს სისხლის სამართლის საქმეები თუ არა.

მე გეტყვით, ჩემთვის რა არის ძალიან უხერხული და მინდა მოვისმინო უფრო მეტი კონკრეტიკა ირაკლი კობახიძისგან, რომელიც დადიოდა მოლაპარაკებებზე რეალურად. თუ მან ან ვინმემ გასცა ასეთი პირობა, რომ გაათავისუფლებდნენ… მე მახსოვს გახარიას განცხადება, რომ შეუძლებელია ჩემი გუნდიდან ეს პირობა ვინმეს გაეცაო…

ჩემთვის ყველაზე უხერხული აქ არის ის, რომ თუ ვინმემ დააყენა პირობა, რომ პოლიტპატიმრები გყავს და შენ ამ პირობაზე წახვედი, ამაზე პასუხისმგებელი ვინ არის, მე ეგ მაინტერესებს. რატომ ვერ შეძლო და ვერ დაასაბუთა ირაკლი კობახიძემ და დანარჩენებმა, ვინც ამ მოლაპარაკების მაგიდასთან ისხდნენ, რომ დაესაბუთებინათ, რომ ეს ადამიანები არ არიან პოლიტიკური პატიმრები? რატომ ვერ შეძლეს საკუთარი პოზიციის დადასტურება და თუ ასეთი პირობა დადეს, ასეთი პირობის დადება როგორ გაბედეს? სასამრთლოზე ზეგავლენის მოხდენის პირობის დადება წარმოუდგენელია, როდესაც ერთმანეთისგან დამოუკიდებელი სახელისუფლებო შტოებია სასამართლო და პარლამენტი.

თან ამბობ, რომ არ არიან პოლიტპატიმრები და თან მსგავს პირობაზე წახვედი? როდესაც ამბობ, რომ პოლიტიკური ნიშნით მართლმსაჯულება არ იქნება, ეს გასაგებია. ამით პირდაპირ იღებ ვალდებულებას, რომ პოლიტიკური პროცესი არ ჩაერევა სასამართლო პროცესში. ყველაზე უხერხული არის ეს, დანარჩენს ყველაფერს აქვს ლოგიკური ახსნა.

_ ირაკლი კობახიძე ოქრუაშვილსა და უგულავას პოლიტკრიმინალებს უწოდებს, ეს რამდენად გამართლებულად მიგაჩნიათ?

_ ზოგადად გამოხატვის თავისუფლება ძალიან ფართო ცნებაა. პოლიტიკოსების გამოხატვის თავისუფლება კიდევ უფრო ფართოა იმ თვალსაზრისით, რომ მათ შეუძლიათ ერთმანეთის მიმართ გაცილებით მძაფრი შეფასება გამოიყენონ. როდესაც კრიმინალს უწოდებ ადამიანს და ის არ არის გასამართლებული ეს არის უდანაშაულობის პრეზუმფციის დარღვევა, მაგრამ ეს ადამიანები სისხლის სამართლის საქმეზე არიან გასამართლებულები, ამიტომ აქ არც უდანაშაულობის პრეზუმფცია ირღვევა და არც გამოხატვის თავისუფლება.

მაგრამ, როდესაც ზიხარ მოლაპარაკების მაგიდასთან და ეს არის პოლიტიკური მოლაპარაკება და შენ ამბობ, რომ პოლიტიკური მართლმსაჯულება არ იქნება, იქ არ უნდა დარჩეს კითხვები. როდესაც ასეთი ტიპის შეთანხმება ფორმდება, იქ ორაზროვანი განმარტებების შესაძლებლობა არ უნდა დატოვო.

_ ანუ, კონკრეტული განმარტებები უნდა ყოფილიყო დოკუმენტში?

_ რა თქმა უნდა. პასუხისმგებლობის მქონე პოლიტიკოსი სანამ რაღაცას ხელს მოაწერს, აუცილებლად უნდა გათვალოს ყველა შესაძლო შედეგი. როდესაც ხელშეკრულებას ხელს აწერ, ხომ კითხულობ? და თუ კითხვა გაქვს, ხომ სვამ ამ კითხვას? ასეთ შემთხვევაშიც თუ ხარ პრაგმატული, გამოცდილი და პასუხისმგებლიანი პოლიტიკოსი, აუცილებლად უნდა გაითვალისწინო ყველა შედეგი. როდესაც ხელს აწერ, რომ პოლიტიკური მართლმსაჯულება არ იქნება და არ ამბობ, ამაში რას გულისხმობ… როგორ შეიძლება ამაში გულისხმობდე სასამართლოს საქმეებში ჩარევას?! არ ვიცი რატომ დაემართათ ეს ირაკლი კობახიძესა და სხვებს, ვინც იმ შეხვედრაზე იყვნენ. პოლიტიკური გამოცდილება არ ეყოთ, ცოდნა თუ რა, ეს მე არ ვიცი. ეს არის უხერხული და არა ის, რომ პრეზიდენტი იღებს შეწყალების გადაწყვეტილებას.

_ ჩვენ გვახსოვს, როდესაც პრეზიდენტი მარგველაშვილი იღებდა გადაწყვეტილებას და როგორი მწვავე იყო მთელი მმართველი გუნდი, ეს არ გვინახავს ამ შემთხვევაში და ეს აჩენს გარკვეულ კითხვებს…

_ ხომ ვნახეთ ირაკლი კობახიძის განცხადება და ის როგორი მძაფრი იყო ის.

_ მე მთლიანად გუნდზე ვამბობ და არა მხოლოდ ირაკლი კობახიძეზე, ან რომელიმე ცალკეულ წევრზე.

_ მე ასე დეტალურად ვერ მივადევნე თვალი, არ ვიცი რეალურად ვინ და რა თქვა. მე მოვუსმინე კობახიძეს, რომელმაც აღშფოთებულმა გამოხატა თავისი პოზიცია.

_ „ქართული ოცნება“ გველაპარაკება, რომ ევროპარლამენტსა და კონგრესში 20-მდე დეპუტატია, რომლებიც მუდმივად აკრიტიკებს „ოცნებას“ და ისინი არიან კონკრეტული პოლიტიკური ძალების მხარდამჭერები. ეს რომ ასეც იყოს, მაშინ თავად მმართველმა პარტიამ რატომ ვერ მოახერხა ამ 8 წელში, რომ თავადაც მოეხერხებინა ეს მხარდაჭერა, რომ მათი მხარდამჭერი განცხადებებიც გაკეთდეს, თუნდაც ის ითქვას, რომ საქართველოს არ ჰყავს პოლიტპატიმრები და ამით მოხდეს ვითარების დაბალანსება?

_ მოდით ობიექტურად შევხედოთ. სიმართლე მიყვარს მე და ასე ვილაპარაკოთ. ობიექტურად თუ შევაფასებთ, დღეს საქართველოს და დასავლეთის ქვეყნების თანამშრომლობა, მეგობრობა თუ დახმარება არის ძალიან მაღალ დონეზე. ოფიციალურ დოკუმენტებში დღეს ჩვენ გვაქვს ძალიან მაღალ დონეზე მხარდაჭერა და გვაქვს ძალიან მაღალ დონეზე პარტნიორული ურთიერთობა. ამას კითხვის ნიშნის ქვეშ ვერ დავაყენებ. ეს არის ფაქტები – რა ფინანსურ დახმარებას ვიღებთ, ჩვენი მხარდამჭერი განცხადებები მიიღება აშშ-ში თუ ევროკავშირში და. ა. შ.

_ მემგონი ამას არც არავინ უარყოფს.

_ თქვენ ამბობთ, რომ მხარდამჭერიო. ის, რა კრიტიკაც ისმის, ეს არის ცალკეული დეპუტატების პოზიცია, რომელსაც ისინი გამოხატავენ. ისინი არიან ჩვენი მეგობრები, რომლებიც გვეუბნებიან, რომ შენ რამე ხომ არ გეშლება და თუ გეშლება, გამოასწორე. ეს არის მეგობრის პოზიცია.

მე გეთანხმებით იმაში, რომ სათანადოდ არ მუშაობს „ქართული ოცნება“. სათანადოდ არ აწვდიან ინფორმაციას. ზოგადად არის კომპეტენციის პრობლემა და რასაც ვუყურებ, ეს არის ძალიან სამწუხარო. ყველას რატომღაც ჰგონია, რომ პოლიტიკა არის იოლი და ბინძური საქმე, ყველას ყველაფრის უფლება აქვს – ის თუ დეპუტატია მეც ვიქნები, ის თუ დეპუტატია მეც ვიქნები და ა. შ. მაგრამ, ძალიან ხშირად არის პასუხისმგებლობის პრობლემა. ძალიან ხშირად არ აქვთ გააზრებული, რა თანამდებობაზე არიან.

ჩვენ ვართ საპარლამენტო რესპუბლიკა და რეალურად ქვეყნის პოლიტიკას პარლამენტი უნდა განსაზღვრავდეს და პარლამენტი უნდა აკონტროლებდეს მთავრობას. ჩამოიარეთ და ჰკითხეთ, რამდენს აქვს გააზრებული საკუთარი პასუხისმგებლობა. მოცემულობაა ასეთი, რომ კომპეტენციის და პასუხისმგებლობის ნაკლებობაა და ეს აშკარაა. თუნდაც იმ მოლაპარაკებაში, როდესაც რაღაცაზე შეთანხმდნენ და ერთმა სხვანაირად გაიგო მეორემ სხვანაირად, ესეც ამაზე მიუთითებს. ასეთი რაღაცა არ უნდა დაემართოთ იმ ადამიანებს, რომლებიც რეალურად უნდა განსაზღვრავდნენ ქვეყნის პოლიტიკას კონსტიტუციის ახალი რედაქციის თანახმად.

_ ვსაუბრობთ კონსტიტუციაზე და პარლამენტის როლზე. სწორედ ახლა მიმდინარეობს პარლამენტში მუშაობა კანონპროექტზე, რომელიც მთავრობას აძლევს შესაძლებლობას საგანგებო მდგომარეობის გამოცხადებისა და პარლამენტის გარეშე დააწესოს გარკვეული შეზღუდვები. როგორ უყურებთ ამ საკითხს? რამდენად სწორია საპარლამენტო მმართველობის დროს? თუ იქნება ცვლილებები, მაქსიმალური კონკრეტიკა ხომ არაა საჭირო?

_ ნამდვილად გეთანხმებით იმაში, რომ ძალიან დეტალურად უნდა იყოს გაწერილი. ყოველთვის როდესაც არის საუბარი ძალის გამოყენებაზე, შეზღუდვაზე ან ზოგადად ამ მიმართულებაზე რაღაცა გადაწყვეტილების მიღება ხდება, აუცილებელია, რომ რაც შეიძლება მეტი დეტალი იყოს და რაც შეიძლება მეტი კონკრეტიკა იყოს. რეალურად გამოსავალი ეს არის.

კონსტიტუციურად მთავრობას ამის მოთხოვნის უფლება აქვს და თუ პარლამენტი ამას დაეთანხმება, მაშინ უნდა მოხდეს ეს. მე ეს კანონპროექტი არ წამიკითხავს, მაგრამ როდესაც იქნება განხილვა, იქნება განმარტება და მას დეტალურად ახსნის მთავრობის საპარლამენტო მდივანი რატომ და რისთვის სჭირდებათ.

შეზღუდვების წინააღმდეგ წასვლა არასწორია, პოლიციას უნდა მისცე მეტი შესაძლებლობა, მაგრამ გააკონტროლე – დეტალები გაუკონტროლე. სწორედ ამ მიმართულებით უნდა იმუშავონ დეპუტატებმა და რაც შეიძლება მეტი კითხვა დასვან იმისათვის, რომ რაც შეიძლება მეტი კონკრეტიკა და რაც შეიძლება მეტი თავისუფლება იყოს. საერთოდ კანონმა არ უნდა დატოვოს ინტერპრეტაციის მრავალი შესაძლებლობა.

_ თქვენ იყავით ერთ დროს ირაკლი ოქრუაშვილის თანაგუნდელი. როგორ უყურებთ მის პოლიტიკურ საქმიანობას დღეს?

_ დიახ, თქვენ თქვით, რომ თანაგუნდელები იყავითო. დიახ, მე ორი წელი ვიყავი „რესპუბლიკურ პარტიაში“ და 1 წელი ვიყავი „ქართულ პარტიაში“. სწორედ იმიტომ, რომ თანაგუნდელები ვიყავით, მე ვერაფერს ვიტყვი ჩემს ყოფილ თანაგუნდელებზე. ვცდილობ ხოლმე, რომ მაინცდამაინც არ შევეხო იმას, ვისთანაც ერთ პარტიაში ვიყავი. ამიტომ მე ვერაფერს გეტყვით. არ ვიცი, რა გეგმები აქვს მას. როგორ ხედავს საკუთარ თავს პოლიტიკაში, ან რა ფორმით აპირებს მოქმედებას.

_ ის გამოირჩევა ხოლმე ხისტი გამონათქვამებით. თქვენ მოგწონთ მისი ეს განცხადებები?

_ განცხადებების სიხისტე არ არის პრობლემა. მე არ მომწონს ის, როდესაც მდაბიო ხასიათის თუ სექსისტური განცხადებები კეთდება. მაგალითად ვიღაცამ სალომე ზურაბიშვილზე დაწერა კუზიანი დედაბერიო. ასეთი სახის განცხადებები ბილწსიტყვაობის შემცველი მზაფრავს, თორემ პოლიტიკოსს როდესაც აქვს ხისტი განცხადებები, ეს მისი ნებაა. ვიღაცას მოსწონს და ვიღაცას არა. ეს გემოვნების ამბავია.

_ როდესაც ოქრუაშვილი იყო ციხეში მას მხარს უჭერდა მთელი ოპოზიცია და მის გათავისუფლებას ითხოვდნენ. გამოდის ციხიდან და ამბობს, რომ ყველამ უნდა გადავდოთ პირადი საკითხები და ქვეყნისთვის ვიმუშავოთო და ამ დროს ასევე ციხიდან ახლად გამოსულ ვანო მერაბიშვილზე ამბობს, რომ მის ადგილს პოლიტიკაში ვერ ხედავს. მთელი ამ კონტექსტის გათვალისწინებით, რამდენად გამართლებული გგონიათ ეს პოლიტიკურად?

_ არ ვიცი. მე ხომ არ ვიცი, რა არის ირაკლი ოქრუაშვილის პოლიტიკური გეგმები. მე არ ვიცი თავის თავს როგორ ხედავს და რა გეგმები აქვს. გააჩნია, რა მიზანი აქვს მას. როდესაც ის და მერაბიშვილი ერთ გუნდში იყვნენ და სააკაშვილის მთავრობაში ორივე მინისტრი იყო, მაშინაც კი არ ჰქონდათ კარგი ურთიერთობა. რამე პოლიტიკური გათვლა ჰქონდა თუ არა ამ განცხადებაში, ეს მე არ ვიცი. ეს მას თავად ჰკითხეთ.

_ გასაგებია, მაინც თავს იკავებთ შეფასებისგან…

_ არა, უბრალოდ არ ვიცი. არ ვიცი რატომ გააკეთა ეს – იმიტომ, რომ პიროვნულად არ უყვარს და როგორც ადრე იყო მისთვის მერაბიშვილი მიუღებელია ასევეა ახლაც თუ რაღაცა სხვა გათვლა აქვს. მე ხომ არ ვიცი ეს. რაც შეეხება იმას, რომ ვიღაც მის გათავისუფლებას ითხოვდა, ამის გამო ვალდებულებები აიღო?! რისთვის ითხოვ ვიღაცის გათავისუფლებას – გჯერა, რომ ის გასათავისუფლებელია, თუ იმიტომ, რომ მერე რაღაცა მოსთხოვო? თუ გარიგება იყო, ეს მე არ ვიცი.

_ გარიგებაზე არ ვსაუბრობ. უბრალოდ, როდესაც აკეთებს განცხადებას, რომ ოპოზიციურ კონსოლიდაციაში თავისი წვლილის შეტანა უნდა და მერე ასეთ განცხადებას აკეთებს, ეს კითხვებს ბადებს.

_ ეს კითხვა დაუსვით ირაკლი ოქრუაშვილს. მე და თქვენ ხომ ვარაუდებზე ვსაუბრობთ?! შესაძლოა ის ფიქრობს, რომ ვანო მერაბიშვილი, როგორც ფაქტორი ოპოზიციისთვის სასარგებლო არ იქნება. არ ვიცი, მე არ ვფლობ არანაირ ინფორმაციას ამასთან დაკავშირებით.

ავტორი: იაგო ნაცვლიშვილი

მსგავსი სიახლეები
კომენტარები
იტვირთება...

ეს ვებ – გვერდი იყენებს cookie– ს თქვენი გამოცდილების გასაუმჯობესებლად. ვეთანხმები დეტალურად