A1 ბანერი

23 სექტემბერს თელავში ანსამბლი “იალონი” კონცერტს გამართავს

NULL

23 სექტემბერს 16:00 საათზე თელავის სამუსიკო სკოლაში ანსამბლი ,,იალონი” კონცერტს გამართავს. კონცერტში ასევე მონაწილეობენ თელავის სალოტბარო სკოლის მოსწავლეები.

​ანსამბლი ,,იალონი” 2009 წლიდან აქტიურად ეწევა ქართული ტრადიციული საეკლესიო გალობისა და ხალხური, ქალაქური მუსიკის შესწავლა-პოპულარიზაციას. მოპოვებული აქვს სხვადასხვა სახის ჯილდოები როგორც საქართველოში, ასევე მის ფარგლებს გარეთ. გამოცემული აქვს სამი კომპაქტ და ერთი DVD დისკი.

​,,საქართველოს ფოლკლორის 2015-2016 წლების ეროვნულ ფესტივალზე” ,,იალონს“ მიენიჭა პირველი ადგილი, ნომინაციაში – ქალთა საუკეთესო ფოლკლორული ანსამბლი.

​2017 წელს, თბილისის საგუნდო მუსიკის კონკურსზე გუნდს მიენიჭა გრანპრი ქართულ ტრადიციული გალობაში, ხოლო პირველი ადგილი და ოქროს მედალი – ქართულ ხალხურ სიმღერაში.

​გუნდის ბოლო პროექტი იყო ,,ტრადიციული მუსიკის შემოქმედებით-საგანმანათლებლო ტურები საქართველოს რეგიონებში”, რომელიც საქართველოს განათლების, მეცნიერების, კულტურისა და სპორტის სამინისტროს მხარდაჭერით განხორციელდა. პროექტის ფარგლებში გუნდმა იმოგზაურა საქართველოს სხვადასხვა რეგიონში, სოლოკონცერტებითა და მასტერკლასებით ადგილობრივ გუნდებთან. აღნიშნულ პროექტთან დაკავშირებით მომზადდა მოკლემეტრაჟიანი დოკუმენტური ფილმი ,,ფოლკლორული ჩანახატები“.

​აღსანიშნავია ,,იალონის“ კონცერტებისა და მასტერკლასების ციკლი ჰოლანდიის ოთხ ქალაქში, გუნდ ,,ოქტოიხის“ მიერ ორგანიზებული ფესტივალის ფარგლებში.

​2018 წლიდან ,,იალონი“ თანამშრომლობს ლონდონის Rose Bruford-ის დრამისა და თეატრის კოლეჯთან, ქართული პოლიფონიის შემსწავლელ ანსამბლ ,,მასპინძელთან“ და კემბრიჯის გუნდ ,,ჩელასთან“ – სხვადასხვა ქვეყნის სტუდენტებისა და ქართული მუსიკის მოყვარულებისათვის გამოცდილების გაზიარების, მასტერკლასებისა და ერთობლივი კონცერტების ჩატარების სახით.

​ანსამბლი ,,იალონი“, ფოლკლორის სახელმწიფო ცენტრის მხარდაჭერით, მუშაობს რიგით მეოთხე კომპაქტდისკის ჩაწერაზე. , 15 აპრილიდან 30 სექტემბრამდე საქართველოს ფოლკლორის სახელმწიფო ცენტრის ორგანიზებით, საქართველოს ტურიზმის ეროვნული ადმინისტრაციისა და საქართველოს განათლების, მეცნიერების, კულტურისა და სპორტის სამინისტროს მხარდაჭერით, Check-in Georgia-ს ფარგლებში, ტარდება ფესტივალი ,,ბაღია ჩვენი ქვეყანა”. ექვსი თბილისური ანსამბლი – „ადილეი“, „ანჩისხატი“, „დიდგორი“, „იალონი“, „ნანინა“, „შავნაბადა“ – საქართველოს 30 მუნიციპალიტეტში ხუთ-ხუთ კონცერტს გამართავს.

​ფესტივალზე თბილისურ ანსამბლებთან ერთად კონცერტებში მონაწილეობენ საქართველოს ფოლკლორის სახელმწიფო ცენტრის ადგილობრივი სალოტბარო სკოლის მოსწავლეები. კონცერტებზე დასწრება თავისუფალია.

მსგავსი სიახლეები
კომენტარები
იტვირთება...